1. Wanee keen ti letste kesalpte tsum himel?

 YOORE tsurik, hot Kot sayn folek sich kefroot: ‘Wanee keen ti letste kesalpte kriste tsum himel?’ Friier hon mer ketenkt tas etliche kesalpte khente too uf te eyert plaype un fer een tsayt im Paratiis leepe noom Armaxeton kriich. Awer in A Sentinela 15^te Yuuli fon 2013, hon mer kelërnt tas al ti kesalpte wëre xon im himel foer te aanfang fom Armaxeton. (Mat. 24:31)

2. Was fer frooch khene etliche sich mache un was siin mer in tiise artikel?

² Awer etliche fon uns khene sich frooe: ‘Was tuut pasiire mit Yeesus sayn “anere xeef” woo Yeehoowa wayter troy tiine too uf te eyert torich ti “kroos tripulatsyoon”?’ (Yoo. 10:16; Mat. 24:21) Etliche rechne tas se sich ër un im xtich kelos xpiire tuun wën ti liipe kesalpte tsum himel kenom wëre. Wole mer 2 piiplixe payxpiile noo kuke woo mache etliche soo was tenke. Tan siin mer phaar uersache warom mer prayche uns net ketanke mache.

WAS TUUT NET MIT TE ANERE XEEF PASIIRE?

3-4. Was khene etliche sich frooe un warom?

³ Etliche khene sich ketanke mache tas ti anere xeef noo lose tuun Yeehoowa tiine wën se net mee ti kesalpte priiter fon te Rechiirente Khërperxaft hon fer tëne lenke. Tii khene sich soo xpiire weeche etliche piiplixe kexichte. Wole mer 2 payxpiile siin. Tas eyerste is fom hooche priister Yeoyata, een troy tiiner fon Yeehoowa. Tee un sayn fraa Yeosapeat hon te yunge Yeoas kexitst un tëm keholef een kuute un troye  kheenich wëre. Soo lang wii te alt Yeoyata keleept hot, hot Yeoas Yeehoowa aan kepeet un kuute tinge kemacht. Awer noo Yeoyata sayn toot, hot Yeoas klaych aan kefang tas xlechtes mache. Tee hot ti xlechte prinse keheert un noo kelos Yeehoowa tiine. (2 Kro. 24:2, 15-19)

⁴ Tas neekste payxpiil is fon te kriste im 2^te yoer hunert. Yoohan waar te letste aphostel woo kextorep is. Soo lang wii eyer keleept hot, hot eyer fiile kriste keholef troy tsu Yeehoowa plaype. (3 Yo. 4) Soo wii ti anere aphostele, hot Yoohan sich aan kextrengt fer ti kemaynt fon te aphostasii xitse. (2 The. 2:7; 1 Yo. 2:18) Awer noo Yoohan sayn toot, sin fiile in te kemaynt aphostate kep. In te yoore tëm noo, hon ti aphostate fiile falxe inlërnunge aus keteelt un ferkheerte aanxtelunge in te kemaynt erlaupt.

5. Was sole mer net rechne weeche ti 2 payxpiile woo mer xtutiirt hon?

⁵ Tuun tiise 2 payxpiile tsayche tas was eenliches mit te anere xeef pasiire tuut wën ti kesalpte tsum himel keen? Tuun ti anere xeef aan fange sich xlecht aan xtele soo wii Yeoas kemacht hot? Tuun se aphostate wëre soo wii fiile kriste im 2^te yoer hunert? Kewis net! Meyer khene ti sicherheet hon tas, wën ti kesalpte tsum himel keen, tuun ti anere xeef Yeehoowa wayter richtich aan peete un Yeehoowa tuut se wayter uf phase. Warom prayche mer khee tswayfel too triwer hon?

TI WOER AANPEETUNG WËRT NET FERSAUT

6. Iwer was fer 3 tsayte tuun mer xpreche?

⁶ Warom khene mer uns sicher sin tas ti woer aanpeetung net fersaut wërt, soo kaar torich ti xlime tsayte woo noch khome? Wayl ti Piipel leet aus tas ti tsayt woo mer hayt leepe is kans anerste wii ti tsayt fon te israeliiter un ti tsayt noo te aphostele sayn toot. Soo wole mer yets etliche kleenichkheete iwer tiise 3 tsayte kuke: (1) ti tsayt fom friirix Israël, (2) ti tsayt noo te aphostele sayn toot un (3) unser tsayt, “ti tsayt woo ales noch mool in te ray kextelt wërt”. (Aph. 3:21)

7. Warom praychte ti troye israeliiter net oone muut plaype wayl ti kheeniche un anere israeliiter tas xlechtes kemacht hon?

⁷ Ti tsayt fom friirix Israël. Een khorts tsayt foer Mooses sayn toot, hot eyer fer ti israeliiter kesaat: “Ich wees kans kenau tas, noo mayn toot, tuut teyer sicher tas xlechtes mache un tuut aych ap lenke fom weech woo ich aych kexikt hon se keen.” (Teut. 31:29) Tee hot aach kesaat tas wën se sich repeliire teete, weyere se tsu een aner lant kefang kenom. (Teut. 28:35, 36) Tiise wërter hon sich kenau erfiilt. Torich hunerte yoore, hon fiile kheeniche tas xlechtes foer Yeehoowa sayn aue kemacht un tii hon tas folek fon Yeehoowa sayn aanpeetung ap kelenkt. Tes weeche, hot Yeehoowa ti xlechte layt fon Israël kextrooft un hot net mee erlaupt tas ti israeliitixe kheeniche iwer tëne rechiire teete. (Ese. 21:25-27) Awer wii ti troye israeliiter kesiin hon wii Yeehoowa sayn wërter sich kenau erfiilt hon, hon se koraaj kriit fer tëm wayter tiine. (Isa. 55:10, 11)

8. Sol es uns ferwunere tas ti kemaynt im 2^te yoer hunert fersaut kep is? Lee tas aus.

⁸ Ti tsayt noo te aphostele sayn toot. Sol es uns ferwunere tas ti kemaynt im 2^te yoer hunert fersaut kep is? Nee. Yeesus hat foer raus kesaat tas een kroos aphostasii pasiire teet. (Mat. 7:21-23; 13:24-30, 36-43) Torich Phaul, Pheeter un Yoohan sayn wërter, khene mer siin tas Yeesus sayn profetsii xon aan kefang hat sich erfiile in tëne sayn  tsayt. (2 The. 2:3, 7; 2 Phe. 2:1; 1 Yo. 2:18) Im 2^te yoer hunert, noom toot fom letste aphostel, is ti kemaynt fersaut kep. Te falx kristyanismus hot iwer hant kenom un is een wichtich teel fon Papiloon ti Kroos kep, woo al ti falxe relichyoone petayt. Yeesus sayn profetsii hot sich erfiilt.

9. In was fer tsayt tuun mer leepe un was pasiirt torich tiise tsayt?

⁹ “Ti tsayt woo ales noch mool in te ray kextelt wërt.” Ti tsayt woo mer leepe, is anerste wii ti tsayt fon te friirixe israeliiter un ti tsayt fon te kroos aphostasii im 2^te yoer hunert. Ofts tuun mer unser tsayt nëne wii ti “letste taache” fon tiise xlechte welt. (2 Tim. 3:1) Awer ti Piipel saat tas, in te selwich tsayt, hot een wichticher un lënger tsayt aan kefang. Es khomt ploos tsum ën wën Yeesus sayn Raych al ti mënxe perfekt lost un fon te eyert een paratiis macht. Tas is kenënt wii “ti tsayt woo ales noch mool in te ray kextelt wërt”. (Aph. 3:21) Tiise tsayt hot in 1914 aan kefang. Was waar in tiise yoer in te ray kextelt? Yeesus is kheenich im himel kep. Soo, hat Yeehoowa noch mool een kheenich fer tëm representiire, een nookhomer fom troy kheenich Tawi. Awer tiise rechiirung is net tas eensiches woo Yeehoowa in te ray kextelt hot. Klaych tëm noo, hot Kot sayn troye tiiner uf te eyert keholef tëm noch mool in te richtich aat aan peete. (Isa. 2:2-4; Ese. 11:17-20) Awer wërt ti woer aanpeetung noch mool fersaut?

10. (a) Was hot ti Piipel foer raus kesaat iwer ti phuer aanpeetung in unser tsayt? (Isayas 54:17) (b) Warom tuun tiise profetsiie uns uf muute?

¹⁰ Lees Isayas 54:17. a Tenk iwer tiise profetsii: “Khee waf woo keeche tich kemacht wërt, tuut richtich pariire.” Tiise inspiriirte wërter erfiile sich hayt. Too tii wërter kile aach fer unser tsayt: “Tayn khiner al wëre fon Yeehoowa in kelërnt, un kroos wërt tëne sayn friit sin. Tuu wërst fest uf te kerechtichkheet kextelt. (…) Niks tuut tich ëngstlich lose un kaar niks tuut tich pang kepe, wayl tas tuut net ticht pay tich khome.” (Isa. 54:13, 14) Noch net mool Satanaas — “te kot fon tiise welt” — khan um hale ti aarwayt woo Kot sayn folek macht fer ti layt iwer Yeehoowa in lërne. (2 Kor. 4:4) Ti phuer aanpeetung is fest kextelt un wërt nii mool wiiter fersaut. Es playpt fer ti eewichkheet.  Khee waf woo keeche uns kemacht is, tuut richtich pariire!

WAS TUUT PASIIRE?

11. Wii khene mer uns sicher sin tas tas kroose folek net im xtich kelos wërt wën ti kesalpte tsum himel keen?

¹¹ Was tuut pasiire wën ti kesalpte tsum himel kenom wëre? Eriner tich: Yeesus is unser Xeefer un te khop fon te kristlich kemaynt. Yeesus hot taytlich kesaat: “Ayer Fiirer is ploos eene, te Kristus.” (Mat. 23:10) Yeesus, woo im himel rechiirt, tuut imer sayn woere nookeener uf phase. Yeehoowa sayn tiiner too uf te eyert prayche khee pang hon, wayl Yeesus selepst is tëne am lenke. Kewis wise mer net yeete kleenichkheet iwer wii Yeesus sayn folek in tëne tsayt lenke tuut. Soo, wole mer etliche piiplixe payxpiile noo kuke woo uns helfe khene.

12. Wii hot Yeehoowa sayn folek wayter uf kephast (a) noo Mooses sayn toot? (b) noo te ënerung in Eliias sayn insetsung? (Kuk aach tas pilt.)

¹² Eep ti israeliiter im Ferxprochne Lant rin kang sin, is Mooses kextorep. Was is mit Kot sayn folek pasiirt? Hot Yeehoowa noo kelos sayn folek helfe noom toot fon tiise troye man? Nee. Soo lang wii se troy keplip sin, hot Yeehoowa se keholef. Eep Mooses kextorep is, hot Yeehoowa tëm kexikt Yosuee in setse fer tas folek fiire. Torich xon fiile yoore, hat Mooses Yosuee keiipt. (Eeks. 33:11; Teut. 34:9) Un es waare aach fiil anere kwape mëner woo ti natsyoon kefiirt hon — xëfe fon tausent, hunert, fuftsich un soo kaar tseen. (Teut. 1:15) Kot sayn folek waar kuut uf kephast. Was eenliches is mit Eliias pasiirt. Tee hot torich fiile yoore xtram kexaft fer Kot sayn folek helfe Yeehoowa aan peete. Awer xpeeter hot Yeehoowa tëm een aner insetsung in Yutaa kep. (2 Khe. 2:1; 2 Kro. 21:12) Waare ti troye layt in te 10 xtëme fon Israël im xtich kelos? Nee. Torich xon fiile yoore, hat Eliias Eliseu keiipt. Es waare aach ti “profeete sayn soone”, woo iipung kriit hate. (2 Khe. 2:7) Soo es waare fiile troye mëner woo khonte in te aarwayt helfe fer Kot sayn folek fiire. Yeehoowa hot wayter sayn tsiil erfiilt un sayn troye tiiner uf kephast.

13. Was ferxprecht uns Yeehoowa im 2^te teel fon Hepreeyer 13:5? (Kuk aach tas pilt.)

¹³ Mit tiise payxpiile in te ketanke, was mënst tuu: Was tuut pasiire wën ti letste kesalpte tsum himel keen? Meyer prayche ti antwort net roote. In te Piipel, fine mer tiise keweenlich un ufmuutich woerheet: Yeehoowa lost nii sayn folek uf te eyert im xtich.  (Lees Hepreeyer 13:5 2^te teel.) b Soo wii Mooses un Eliias, te kleen krup kesalpte priiter woo Kot sayn folek hayt fiirt, wees wii wichtich es is ti anere iipe. Torich xon fiile yoore, tuut ti Rechiirente Khërperxaft priiter fon te anere xeef iipe fer Kot sayn folek fiire. Tii tuun, tsum payxpiil, fiile xuul orkanisiire fer ti elteste, sirkuyt superintentente, mitkliiter fon Filyaal Komisyoone, superintentente in Petël un noch anere iipe. Ti mitkliiter fon te Rechiirente Khërperxaft tuun aach perseenlich iipe phaar helfer fer in te komisyoone fon te Rechiirente Khërperxaft tiine. Xon yets, tuun tiise helfer xweyere flichte troy erfiile. Tii sin kuut foer perayt fer Yeesus sayn xeef wayter uf phase.

14. Was is te phunkt woo mer uns net ferkese sole?

¹⁴ Tas is te phunkt woo mer uns net ferkese sole: wën ti letste fon te kesalpte tsum himel keen neekst am ën fon te kroos tripulatsyoon, tuun Yeehoowa sayn tiiner too uf te eyert Tëm wayter troy aan peete. Tas tuut soo pasiire wayl Yeesus uns wayter lenke tuut. Meyer wise tas, in tëne tsayt, tuut een krup fon natsyoone — kenënt wii Kook fon Makook in te Piipel — Kot sayn folek atakiire. (Ese. 38:18-20) Awer tiise khorts atak tuut net funtsyoniire. Tas tuut net Kot sayn folek um hale Tëm aan peete. Yeehoowa tuut sicher sayn folek rete! In een wisyoon, hot te aphostel Yoohan kesiin een “kroos folek” fon Kristus sayn anere xeef. Yoohan saat tas tiise “kroos folek” fon te “kroos tripulatsyoon” raus khomt. (Apo. 7:9, 14) Tas lost uns sicher tas Kot se rete tuut.

15-16. Tëm noo Apokalipsis 17:14, was tuun ti kesalpte torich te Armaxeton kriich mache un warom is tas ufmuutich?

¹⁵ Noch soo, khene etliche sich frooe: ‘Un ti kesalpte? Was tuun se im himel mache?’ Ti Piipel tuut tas taytlich antworte. Tii saat tas ti rechiirunge fon tiise welt “tuun keeche tas Lam khëmpfe”. Sicher, tuun se te kriich ferliire — “tas Lam [tuut] tëne ap kewine”. Awer weer tuut Yeesus helfe? Ti Piipel  kept ti antwort: “Tii woo mit tëm sin, ti troye woo keruuft un raus kesuucht kep sin.” (Lees Apokalipsis 17:14.) c Weer sin se? Ti kesalpte woo uf keruuft kep sin. Yawool, noo tas ti letste kesalpte too uf te eyert tsum himel keen, neekst am ën fon te kroos tripulatsyoon, eene fon sayn eyerste insetsunge wërt khëmpfe. Tas is wërklich een wunerlich inxtelung! Etliche fon te kesalpte kriste hon kërn kekhëmpft eep se Yeehoowa sayn Tsayer kep sin. Welche hon soo kaar wii soltaate ketiint. Awer xpeeter, sin se woere kriste kep un hon kelërnt wii in friit mit te anere leepe. Tii hon noo kelos im kriich khëmpfe. (Kal. 5:22; 2 The. 3:16) Awer noo se tsum himel kenom wëre, tuun se mit Kristus un sayn hayliche engele tas letste kriich keeche Kot sayn faynte khëmpfe.

¹⁶ Tenk mool noo: too uf te eyert, sin etliche fon te kesalpte alt un xwach. Awer noo se tsum himel keen, wëre se unxtërpliche un xtarke kaystliche kriatuure. Tii wëre in kextelt fer mit sayn Kheenich un Kriicher Yeesus khëmpfe. Noom Armaxeton kriich, tuun se mit Yeesus xafe fer ti mënxheet helfe perfekt wëre. Fom himel aus, tuun se sayn liipe priiter un xwestere helfe. Sicher, wërt tiise hilef kreeser wii ti hilef woo se kepe khonte wii se imperfekte mënxe too uf te eyert waare.

17. Wii wise mer tas al Kot sayn tiiner wëre in sicherheet torich te Armaxeton kriich?

¹⁷ Pist tuu eene fon te anere xeef? Wën yaa, was must tuu mache wën te Armaxeton kriich aan fangt? Ploos uf Yeehoowa traue un sayn oryentiirunge aan heere. Was is too tepay? Ti Piipel saat: “Keet in ayre tsimere rin un macht ti teere hinich aych tsu. Ferxtekelt aych fer een tsayt pis ti wuut torich keet.” (Isa. 26:20) Al Yeehoowa sayn troye tiiner im himel un uf te eyert wëre in sicherheet in tiise tsayt. Soo wii te aphostel Phaul, sin mer uns sicher tas khee “rechiirung, niks woos hayt kept orer woo noch khomt (…), khan uns fon Kot sayn liip aus naner mache”. (Rom. 8:38, 39) Ferkes tich net: Yeehoowa liipt tich un lost tich nii im xtich!