1-2. Was khan uns helfe se ferxteen wii Yeehoowa sich xpiirt weeche al ti liie keeche sayn naame?

 XTEL tich mool foer tas yemant woos tuu liipst was xrekliches iwer tich saat. Tuu weest tas es net woer is, awer etliche klaape too traan. Un noch xlimer: tii fange aan tiise lii aus prayte un fiil anere klaape too traan. Wii teest tuu tich xpiire? Wëns tuu tich ketanke machst mit was ti anere tenke un tayn kuute naame, sicher wërst tuu traurich. (Xpr. 22:1)

² Tiise situatsyoon khan uns helfe ferxteen wii Yeehoowa sich kexpiirt hot wii etliche liie keeche sayn naame kexproch waare. Eene fon sayn engele hot iwer tëm keloo fer ti eyerst fraa, Ewa, un tii hot too traan keklaapt. Weeche tiise lii, hon Aatam un Ewa sich keeche Kot repeliirt. Tes weeche, tuun al ti mënxe sinte un tsum xlus xtërpe. (Xee. 3:1-6; Rom. 5:12) Al ti propleeme uf te welt — te toot, ti kriiche, ti xwiirichkheete — pasiire weeche ti liie woo Satanaas im Eetem kaate aan kefang hot se fertseele. Sicher, xpiirt Yeehoowa phayn weeche al tiise liie un ti propleeme woo too teweeche khome. Awer Yeehoowa is net piterlich; kraat anerste: tee is te “frooe Kot”. (1 Tim. 1:11)

3. Was fer priwilëj hon mer?

³ Meyer khene helfe se pewayse tas was Satanaas keeche Yeehoowa kesaat hot, een lii is — tas is een kroos priwilëj.  Fer tas hin kriin, mise mer tiise kepoot aan heere: “Loopt Yeehoowa sayn naame.” (Psal. 113:1) Wii khene mer tas mache? Meyer mise fer ti anere fertseele iwer ti kuute tinge woo Yeehoowa macht. Wole mer 3 kuute uersache noo kuke woo uns uf muute Kot sayn naame mit unser kanse hërts loope.

MEYER LOSE YEEHOOWA FROO WËN MER SAYN NAAME LOOPE

4. Warom wërt Yeehoowa froo wën mer tëm loope? Mach een ferklaychung. (Kuk aach tas pilt.)

⁴ Meyer lose unser himlixe Fater froo wën mer sayn naame loope. (Psal. 119:108) Awer wil tas saan tas te Ale Mechtiche Kot is soo wii ti imperfekte mënxe woo mise loop kriin weeche sayn emotsyonaal neetichkheete? Nee. Kuk mool een ferklaychung. Iwerlee tich tas een meetche krayft sayn papa um un saat: “Tuu pist te peste papa uf te welt!” Te fater lacht un is froo. Warom? Is wayl eyer een emotsyonaal neetichkheet hot un mus fon sayn tochter keloopt wëre? Nee. Es is wayl eyer sayn meetche liipt. Tee is froo tas se tëm liip un petanklichkheet tsaycht. Tee wees tas sayn meetche een frooer persoon wërt weeche tiise kwaliteete. Kraat soo, is unser himlixe Fater Yeehoowa froo wën mer tëm loope.

5. Wën mer Yeehoowa loope, was tuun mer pewayse?

⁵ Satanaas hot aach een lii keeche yeete eene fon uns kesaat. Wën mer unser himlixe Fater loope, helfe mer pewayse tas es net woer is. Satanaas saat tas khee mënx tuut Kot sayn naame troy xitse. Tee saat tas nimant troy tsu Kot playpt unich proope. Tee saat tas meyer al teete noo lose Kot tiine, wën mer rechne teete tas es peser fer uns weyer. (Yoop 1:9-11; 2:4) Awer Yoop is troy tsu Kot keplip un hot pewayst tas Satanaas een liichner is. Un tuu? Tuust tuu aach troy plaype? Yeete eene fon uns khan raus suuche Kot sayn naame xitse un tëm froo lose torich unser troy tiinst. (Xpr. 27:11) Es is wërklich een eer tas mache.

6. Wii khene mer te kheenich Tawi un ti lewiiter noo mache? (Neemias 9:5)

⁶ Tii woo Yeehoowa liipe, wole Sayn naame mit kans hërts loope. Te kheenich Tawi hot kexrip: “Loop Yeehoowa, oo mayn seel; ales was ich sin sol sayn haylich naame loope.” (Psal. 103:1) Tawi wust tas wën mer Yeehoowa sayn naame loope, loope mer Yeehoowa selepst. Wën mer Kot sayn naame heere, tenke mer aan te sort persoon woo tee is — aan al sayn xeene kwaliteete un wunerliche aktsyoone. Tawi wolt Yeehoowa sayn naame wii haylich siin un tëm loope. Tee wolt tas  mache mit ‘ales was eyer waar’ — es wil saan, mit sayn kanse hërts. Ti lewiiter hon aach te eyerste xrit kep fer Yeehoowa loope. Tii hon mit teemuut erkhënt tas sayn wërter khente nii kenuuch wëre fer Yeehoowa sayn naame te loop kepe woo eyer fertiint. (Lees Neemias 9:5.) a Sicher, tiise teemuutich un hërtslich loop hot Yeehoowa kefrayt.

7. Wii khene mer Yeehoowa loope in unser preetich aarwayt un taach tsu taach?

⁷ Fer Yeehoowa hayt loope, mise mer iwer tëm xpreche mit liip un petanklichkheet. Wën mer in te preetich aarwayt sin, unser haupste opjetiiw is ti layt helfe tichter pay Yeehoowa khome. Meyer wole se helfe unser liipe Fater siin soo wii meyer tëm siin. (Tya. 4:8) Es frayt uns fer ti layt tsayche wii ti Piipel Yeehoowa pexraypt un tëm sayn liip, kerechtichkheet, kluucheet, kraft un anere xeene kwaliteete tsayche. Meyer loope aach Yeehoowa un lose tëm froo wën mer uns aan xtrenge fer tëm noo mache. (Ëfe. 5:1) Soo, khene anere mërke tas mer anerste sin wii ti layt fon tiise xlechte welt. Un tii khene sich frooe warom tas soo is. (Mat. 5:14-16) Wën mer mit tëne um keen, khene mer se aus leye warom mer uns soo aan xtele. Tas khan eerliche layt uf muute tichter pay Kot khome. Wën mer Yeehoowa soo loope, lose mer Sayn hërts froo. (1 Tim. 2:3, 4)

MEYER LOSE YEESUS FROO WËN MER YEEHOOWA SAYN NAAME LOOPE

8. Warom is Yeesus tas peste payxpiil fon yemant woo Yeehoowa sayn naame keloopt hot?

⁸ Nimant im himel orer uf te eyert khënt Yeehoowa peser wii Yeesus. (Mat. 11:27) Yeesus liipt sayn Fater un tee is tas peste payxpiil fon yemant woo Yeehoowa sayn naame keloopt hot. (Yoo. 14:31) In een kepeet fer sayn Fater woo eyer kemacht hot foer sayn toot, hot eyer sayn preetich aarwayt soo pexrip: “Ich hon tëne tayn naame pekhant kemacht.” (Yoo. 17:26) Wii hot Yeesus tas kemacht?

9. Was fer kexicht hot Yeesus fertseelt fer uns helfe Yeehoowa peser khëne lërne?

⁹ Yeesus hot net ploos fer ti layt kesaat tas Kot sayn naame Yeehoowa is. Ti yuute woo Yeesus in kelërnt hot, hon Kot sayn naame xon kekhënt. Awer Yeesus “hot Tee pekhant kemacht”. (Yoo. 1:17, 18) Tsum payxpiil: ti Hepreeyxe Xrifte tsayche tas Yeehoowa parmhërtslich un mitlaytich is. (Eeks. 34:5-7) Yeesus hot tiise woerheet taytlicher kelos wii eyer tas kexicht fom ferloerne soon un sayn fater fertseelt hot. Wii te soon “noch wayt wech waar”, hot te fater tëm kesiin, tsu tëm kexprung, um kekrif un hërtslich fertsayt. Tas helft uns taytlich siin wii Yeehoowa parmhërtslich un mitlaytich is. (Luk. 15:11-32) Yeesus hot ti anere keholef se ferxteen was fer sort persoon Yeehoowa wërklich is.

10. (a) Wii wise mer tas Yeesus Yeehoowa sayn naame penutst hot un wolt hon tas ti anere tas selwiche mache teete? (Markus 5:19) (Kuk aach tas pilt.) (b) Was wil Yeesus hon tas mer hayt mache?

¹⁰ Wolt Yeesus aach hon tas ti anere Kot sayn naame penutse teete? Sicher. Etliche relichyeese fiirer hon fiilaycht ketenkt tas Kot sayn naame tsu haylich waar fer aus xpreche. Awer Yeesus hot nii noo kelos Yeehoowa sayn naame loope weeche soo sorte tratitsyoone woo sich net aan te Piipel kextaypt hon. Tenk aan te tsayt woo Yeesus in te rechyoon fon te keraseener waar un een man keheelt hot woo een temoon in sich hat. Ti layt hon pang kriit un hon aan kehal tas Yeesus faart keengt.  Tes weeche is eyer net tat keplip. (Mar. 5:16, 17) Noch soo, wolt Yeesus hon tas ti layt fon te rechyoon iwer Yeehoowa sayn naame wise teete. Soo hot eyer fer te man woo keheelt waar, kesaat tas eyer solt fer ti layt fertseele iwer was Yeehoowa kemacht hat, net iwer was Yeesus kemacht hat. (Lees Markus 5:19. b) c Tee wil tas selwiche hayt hon — tas mer Yeehoowa sayn naame uf te kans welt pekhant mache. (Mat. 24:14; 28:19, 20) Wën mer unser teel mache, kefale mer unser kheenich Yeesus.

11. (a) Iwer was hot Yeesus sayn nookeener in kelërnt se peete? (b) Tëm noo Esekyël 36:23, warom is tas wichtich?

¹¹ Yeesus wust tas Yeehoowa sayn tsiil is Sayn naame ferhayliche un sauwer fon te kans liieray mache. Tes weeche, hot Yeesus sayn nookeener in kelërnt soo se peete: “Unser Fater im himel, tayn naame sol kehaylicht wëre.” (Mat. 6:9) Tas is tas wichtichste sache im Uniwërsum un Yeesus wust tas. (Lees Esekyël 36:23.) d Nimant hot Yeehoowa sayn naame mee ferhaylicht wii Yeesus. Awer wën tee in kexpërt waar, was fer waar ti akusatsyoon keeche tëm? Tas eyer khee respekt tsu Yeehoowa sayn naame ketsaycht hat! Yeesus hot sicher ketenkt tas tas weyer ti xlimst sint. Tee is aarich unruych kep tas eyer akusiirt un xultich aus kexproch weyer weeche tiise kriim. Tsiimlich sicher, waar tas ti haupst uersach warom Yeesus “soo ëngstlich keplip” is in te xtune foer sayn inxpërtnung. (Luk. 22:41-44)

12. Wii hot Yeesus Yeehoowa sayn naame in te pest aat ferhaylicht?

¹² Fer Yeehoowa sayn naame ferhayliche, hot Yeesus aus kehal wii eyer kekweelt, kexënt un falx akusiirt waar. Tee wust tas eyer sayn Fater imer aan keheert hat — tee hat khee uersach fer sich xeeme. (Hep. 12:2) Tee wust aach tas Satanaas tëm am atakiire waar in  tiise xlim tsayt. (Luk. 22:2-4; 23:33, 34) Satanaas wolt hon tas Yeesus untroy weyer; awer es hot net funtsyoniirt. Yeesus hot pewayst tas Satanaas een liichner is un tas Yeehoowa troye tiiner hot woo sich leaal hale unich ti xlimste proope.

13. Wii khanst tuu tayn Kheenich Yeesus kefale?

¹³ Wilst tuu tayn Kheenich Yeesus kefale? Soo, tuu wayter Yeehoowa sayn naame loope un helf ti anere se wise was fer sort persoon Tee wërklich is. Wëns tuu tas machst, keest tuu Yeesus sayn xrite noo. (1 Phe. 2:21) Soo wii Yeesus, tuust tuu Yeehoowa froo lose un pewayse tas Sayn faynt, Satanaas, een liichner is!

MEYER HELFE LEEPE RETE WËN MER YEEHOOWA SAYN NAAME LOOPE

14-15. Was fer wunerliche tinge khene pasiire wën mer ti layt iwer Yeehoowa in lërne?

¹⁴ Wën mer Yeehoowa sayn naame loope, helfe mer leepe rete. Wii soo? Satanaas hot “te ferxtant fon te unklaapiche plint kemacht”. (2 Kor. 4:4) Tes weeche, klaape se aan etliche liie soo wii tii too: es kept khee Kot; Kot is wayt wech un khimert sich net mit te mënxe; Kot is krop un ferkweelt ti xlechte layt fer imer. Was is te opjetiiw fon soo sorte liie? Satanaas wil Yeehoowa sayn kuute naame trekich lose, soo tas ti layt sich net uf kemuut xpiire fer tichter pay Tëm khome. Awer wën mer preetiche, hale mer Satanaas um sayn tsiil trefe. Meyer tsayche fer ti layt ti woerheet iwer unser Fater. Un meyer loope Kot sayn hayliche naame. Was is te resultaat?

¹⁵ Ti woerheete fon Kot sayn Wort hon fiil kraft. Wën mer ti layt in lërne iwer Yeehoowa un wii tee wërklich is, pasiirt was wunerliches. Ti layt wëre net mee plint weeche Satanaas sayn liie un tii fange aan Yeehoowa sayn xeene kwaliteete siin. Tii ferwunere sich mit Kot sayn iwermeesich kraft. (Isa. 40:26) Tii lërne uf tëm traue weeche sayn perfekt kerechtichkheet. (Teut. 32:4) Kot sayn tiif kluucheet pringt licht tsu sayn leepe. (Isa. 55:9; Rom. 11:33) Un tii kriin troost wën se lërne tas Yeehoowa liip is. (1 Yo. 4:8) Wii se tichter pay Yeehoowa khome, sayn hofnung fer eewiche leepe kriin wii Kot sayn khiner  wërt kreeser. Es is een kroos eer fer uns ti layt helfe tichter tsu sayn Fater khome. Wën mer tas mache, siit Yeehoowa uns wii sayne mitaarwayter. (1 Kor. 3:5, 9)

16. Wii wëre etliche petrof wën se Kot sayn naame lërne? Kep payxpiile.

¹⁶ Am aanfang, khene mer ti layt aynfach in lërne tas Kot sayn naame Yeehoowa is. Tas khan tas leepe fon een eerlich persoon ënere. Tsum payxpiil: een yung fraa woo Aaliyah e heest, waar kroos ketsoo in een relichyoon woo net aan te Piipel keklaapt hot. Awer tii waar net froo mit sayn relichyoon un tii hot sich net ticht pay Kot kexpiirt. Tas hot sich keënert wii se aan kefang hot ti Piipel mit Yeehoowa sayn Tsayer xtutiire. Tii hot aan kefang Kot wii sayn Fraaynt siin. Un tii wust net tas Kot sayn naame fon fiile iwersetsunge raus kehool waar un tas se te naame ersetst hon mit thitele, soo wii Hër. Yeehoowa sayn naame lërne, hot sayn leepe keënert. Tii hot kesaat: “Mayn peste Fraaynt hot een naame!” Was fer waar te resultaat? “Yets hon ich fiil friit in mayn hërts — saat se. — Tas is een kroos eer fer mich.” Eene man woo Steve heest, waar een musikanter woo wii yuute kroos ketsoo waar. Tee wolt net teel fon een relichyoon sin weeche ti falxheet woo eyer kesiin hat. Awer noo tas sayn mama kextorep is, hot eyer es aan kenom een Piipel xtuutyum kuke, woo fon een Yeehoowa sayn Tsayer kefiirt waar. Es hot tëm tiif aan kekrif Yeehoowa sayn naame lërne. “Ich hat nii Kot sayn naame kelërnt — saat eyer. — Fer tas eyerste mool, hon ich ferxtan tas Kot reaal is. Ich hon tëm wii een persoon kesiin. Ich wust tas ich een Fraaynt kefun hon.”

17. Warom wilst tuu wayter Yeehoowa sayn naame loope? (Kuk aach tas pilt.)

¹⁷ In tayn preetich un inlërnung aarwayt, tuust tuu Yeehoowa sayn hayliche naame fer ti layt in lërne? Helfst tuu tëne siin wii Kot wërklich is? Wëns tuu tas machst, loopst tuu Kot sayn naame. Un meyer muute tich uf tas wayter mache. Soo, tuust tuu leepe rete. Tuu tuust unser Kheenich Yeesus noo mache. Un tas wichtichste: tuu kefalst unser liipliche Fater Yeehoowa. Meyer hofe tas tuu Yeehoowa ‘sayn naame fer imer loope tuust’! (Psal. 145:2)