AM MITWOCH, 18^te yanuer fon 2023, een ekstra pekhantmachung is im jw.org foer khom. Es hot kesaat tas 2 priiter waare wii mitkliiter fon te Rechiirente Khërperxaft fon Yeehoowa sayn Tsayer in kesetst: Gage Fleegle un Jeffrey Winder. Tiise 2 priiter tuun Yeehoowa xon een lang tsayt troy tiine.

Te pruuter Fleegle waar in Oëst Pennsylvania (FXA) kroos ketsoo. Sayn eltere hon tëm ti woerheet in kelërnt. Wii eyer yung waar, hot sayn familye sich kewanert tsu een kleen xtat woo hilef praycht. Klaych tëm noo, am 20^te nofemper fon 1988, hot eyer sich taafe kelos.

Te pruuter Fleegle sayn eltere hon tëm imer uf kemuut in te fol tsayt tiinst aan fange. Ofts, hon se sirkuyt superintentente un peteliter tsu sayn haus in kelaat. Te pruuter Fleegle khont siin wii froo se waare. Net fiil tsayt noo sayn taaf, am 1^te septemper fon 1989, hot eyer aan kefang wii rekulaar pyoneer tiine. Tswaay yoore xpeeter, hot eyer een tsiil ketrof woo eyer kextelt hat wii eyer 12 yoore alt waar: in Petël tiine. Tee hot aan kefang im Petël fon Brooklyn tiine in oktooper fon 1991.

In Petël, hot te pruuter Fleegle 8 yoore in te puuch pineray kexaft; nochter is eyer tsu te Tiinst Apteelung in kesetst kep. Torich tiise yoore, hot eyer in een kemaynt ketiint in te rusix xprooch. In 2006, hot eyer sich mit Nadia kehayrat, woo hot aach aan kefang in Petël tiine. Tii hon mitsamer ketiint in een portukeesix kemaynt un mee wii 10 yoore in een xpaanix kemaynt. Noo fiile yoore in te Tiinst Apteelung, waar te pruuter Fleegle in kesetst kep fer se xafe im Inlërnung Komisyoon Skritooryum un noo heyer im Tiinst Komisyoon Skritooryum. In mërts fon 2022, waar eyer in kesetst wii een helfer fer ti Tiinst Komisyoon fon te Rechiirente Khërperxaft.

Te pruuter Winder is in Murrieta, California (FXA) kroos ketsoo kep. Sayn eltere hon tëm ti  woerheet in kelërnt un tee hot sich taafe kelos am 29^te mërts fon 1986. Te moonat truf hot eyer wii hilef pyoneer ketiint. Tee hat tas soo kërn tas eyer wolt wayter too temit xafe. Tee hot phaar moonate wii hilef pyoneer ketiint un tan, am 1^te oktooper fon 1986, hot eyer aan kefang wii rekulaar pyoneer tiine.

Wii te pruuter Winder yung waar, hot eyer sayn 2 elter priiter in Petël pesuucht. Tas hot tëm te wunx kep fer een petitsyoon tsu Petël aus file wën eyer elter weyer. Un in maay fon 1990, waar eyer in kelaat fer in Petël fon Wallkill tiine.

Te pruuter Winder hot in fiile apteelunge fon Petël kexaft — too tepay in te aarwayt woo se tuun hat mit sauwermachung, mit friichte un kemiise un xpeeter im skritooryum. In 1997, hot eyer sich mit Angela kehayrat un tii hot aach aan kefang in Petël tiine. In 2014, waare se tsu Warwick kexikt. Tat hot te pruuter Winder in te paueray fon te haupst sets kexaft. In 2016, sin se tsu te Watchtower Inlërnung Tsentrum in Patterson kexikt kep. Tat hot te pruuter Winder in te Autyo un Wiiteo Apteelung kexaft. Fier yoore xpeeter, sin se tsurik tsu Warwick kexikt kep un te pruuter Winder waar in kesetst kep fer se xafe in te Personaal Komisyoon Skritooryum. In mërts fon 2022, waar eyer in kesetst wii een helfer fer ti Personaal Komisyoon fon te Rechiirente Khërperxaft.

Meyer peete tas Yeehoowa seechent tiise priiter — ‘mëner woo wii kexenke kep waare’ — soo lang wii se xweyer xafe fer tas Raych pay xteen. (Ëfe. 4:8)