TI PIIPLIXE xrayper hon als mool ti selwiche wërter noo un noo kexrip. Kuk mool 3 uersache warom se tas fiilaycht kemacht hon:

Wanee tas kexrip waar. Im friirix Israël, hate net ti meyerste layt sayn aychne kopye fom Kesets. Tii hon ti leesung fom Kesets hauptseechlich keheert wën ti natsyoon sich kesamelt hot foer te tapernakel orer foer te thempel. (Teut. 31:10-12) Tii muste fiile xtune xteen plaype un es waare fiile layt um rom. Soo, sicher es waare tinge woo sayn acht ap kelenkt hon. (Nee. 8:2, 3, 7) In tiise ewënte, ti wichtiche wërter fom tekst noo un noo saan hot es laychter kelos tas ti layt tas erinere un aan wëne teete. Etliche wërter noo un noo saan, teet se helfe sich erinere ti kleenichkheete fon Yeehoowa sayn Kesets. (Lew. 18:4-22; Teut. 5:1)

Wii es kexrip waar. In te Piipel, fine mer fiile liiter, soo wii tas puuch fon te Psalme, Salomon sayn Liit un tas Yaamer Liit. Als mool hate ti liiter wërter woo noo un noo kesung waare. Tas hot acht keprung fer tas haupste theema fom liit. Soo, khonte tii woo tas keheert hon, ti wërter ausm khop lërne. Tsum payxpiil: mërk mool ti wërter fom Psalm 115:9-11: “Oo Israël, trau uf Yeehoowa: Tee is ayre hilef un xits xilt. Oo Aron sayn haus, trau uf Yeehoowa: Tee is ayre hilef un xits xilt. Teyer woo Yeehoowa tiif respektiirt, traut uf Yeehoowa: Tee is ayre hilef un xits xilt.” Tas noo un noo singe, hot ti singer keholef tiise weyertliche woerheete in sayn ketanke un hërts hale.

Warom tas kexrip waar. Ti piiplixe xrayper hon als mool ti wichtichste wërter noo un noo kesaat. Tsum payxpiil: wii Yeehoowa ti israeliiter ferpoot hot tas pluut ese, hot eyer Mooses oryentiirt noo un noo aus leye warom tas soo waar. Kot wolt taytlich lose tas tas leepe fom flayx im pluut xteet — es wil saan, tas tas pluut tas leepe representiirt. (Lew. 17:11, 14) Xpeeter, wii ti aphostele un elteste in Yeruusalem kexrip hon iwer was ti kriste ap xtose solte fer Kot kefale, hon se noch mool ketsaycht tas es wichtich waar sich wech hale fom pluut. (Aph. 15:20, 29)

Opwool ti Piipel als mool ti selwiche wërter noo un noo saat, es petayt net tas Yeehoowa wil hon tas mer ti piiplixe wërter noo un noo saan, wii een rituaal. Tsum payxpiil, Yeesus hot kesaat: “Wëns tuu peetst, saa net imer ti selwiche tinge noo un noo.” (Mat. 6:7) Tan hot eyer iwer etliche tinge kexproch woo mer peete khene. (Mat. 6:9-13) Soo, opwool mer net ti selwiche wërter noo un noo in te kepeete saan, khene mer iwer ti selwiche sache noo un noo peete. (Mat. 7:7-11)

Soo, es kept kuute uersache fer ti Piipel noo un noo etliche wërter saan. Tas is eene fon te fiile aate woo unser Kroose Leerer uns in lërnt wii nutse fer uns selepst pringe. (Isa. 48:17, 18)