1. Fon te friirixe tsayte aan, was fer xeen aanxtelung hon Kot sayn tiiner ketsaycht?

 KEPST tuu weyert fer tayn fraayntxaft mit Yeehoowa? Kans sicher! Un tuu pist net aleen. Fon te friirixe tsayte aan, hon fiile layt sich soo kexpiirt. (Psal. 104:33, 34) Fiile hon tinge uf kep fer Yeehoowa aan peete. Tsum payxpiil: ti nasireer im friirix Israël hon kraat tas kemacht. Weer waare se un was khene mer mit sayn payxpiil lërne?

2. (a) Weer waare ti nasireer? (Nuumere 6:1, 2) (b) Warom hon etliche raus kesuucht nasireer wëre?

² Tas wort “nasireer” khomt fon een hepreeyx wort woo petayt “tee woo raus kesuucht kep is”, “woo ekstra ketuun kep is” orer “woo tetikiirt kep is fer een ekstra aarwayt”. Tiise wort tuut kenau pexraype ti flaysiche israeliiter woo etliche tinge uf kep hon fer Yeehoowa tiine in een ekstra aat. Unich tas mosayxe Kesets, khont een man orer fraa een ekstra ferxpreche tsu Yeehoowa mache un raus suuche fer een tsayt wii nasireer leepe. a (Lees Nuumere 6:1, 2.) b Wën een israeliiter raus kesuucht hot tiise ferxpreche mache, must eyer etliche kepoote aan heere woo ti anere israeliiter praychte net. Soo, warom teet een israeliiter raus suuche een nasireer wëre? Tsiimlich sicher weeche sayn tiif liip tsu Yeehoowa un sayn petanklichkheet  weeche ti fiile seechen woo eyer kriit hat. (Teut. 6:5; 16:17)

3. Was is eenlich tswixich Kot sayn tiiner hayt un ti nasireer?

³ Wii “Kristus sayn kesets” tas mosayxe Kesets ersetst hot, khonte Yeehoowa sayn tiiner net mee nasireer wëre. (Kal. 6:2; Rom. 10:4) Awer soo wii ti nasireer, hon Kot sayn tiiner hayt een xtarke wunx fer Yeehoowa tiine mit sayn kanse hërts, seel, ferxtant un kraft. (Mar. 12:30) Wën mer unser leepe tsu Yeehoowa tetikiire, tuun mer fraywilich ferxpreche tëm tiine. Fer tiise ferxpreche erfiile, mise mer Yeehoowa sayn wile mache un etliche tinge uf kepe. Meyer khene phaar lisyoone lërne iwer wii unser ferxpreche erfiile wën mer xtutiire wii ti nasireer tas kemacht hon. c (Mat. 16:24) Wole mer etliche payxpiile noo kuke.

SAY WILICH FER TINGE UF KEPE

4. Tëm noo Nuumere 6:3, 4, was solte ti nasireer uf sayt lose?

⁴ Lees Nuumere 6:3, 4. d Ti nasireer thërfte net alkohool trinke orer etliche tinge ese, soo wii traupe un apketrokne traupe. Ti anere israeliiter khonte tiise tinge ese un trinke — es waar net ferkheert tas mache. In woerheet, ti Piipel pexraypt “te wayn woo tëm man sayn hërts frayt” wii een kexenk fon Kot. (Psal. 104:14, 15) Opwool tiise tinge khonte frooheet pringe, waare ti nasireer wilich fer tas uf sayt lose. e

5. Was hon Madián un Marcela ëntxlist uf kepe un warom hon se tas kemacht?

⁵ Soo wii ti nasireer, hon mer aach tinge uf kep fer mee fer Yeehoowa mache. Kuk mool tas payxpiil fon Madián un Marcela. f Tiise pheyerche hat een kuute leepe. Madián hot fiil kelt in sayn aarwayt fertiint un tii hon in eene xeen apartament keleept. Awer tii wolte mee in Yeehoowa sayn tiinst mache. Fer tas hin kriin, hon se ëntxlist etliche ënerunge mache. “Meyer hon aan kefang weenicher kelt aus kepe — saan se. — Meyer hon uns tsu een kleen apartament kewanert un unser khare ferkhaaft.” Fer Yeehoowa tiine, waar es net neetich tas Madián un Marcela tas mache  teete. Awer tii hon tas ëntxlist wayl se wolte Yeehoowa peser tiine. Tii hon sich tsufriite un froo kexpiirt wayl se tiise ëntxlus kemacht hon.

6. Warom tuun ti kriste hayt etliche tinge uf kepe? (Kuk aach tas pilt.)

⁶ Hayt tsu taach, wëre Yeehoowa sayn tiiner aarich froo wën se tinge uf kepe fer mee tsayt hon fer Yeehoowa tiine. (1 Kor. 9:3-6) Yeehoowa xikt uns net tinge uf kepe woo net ferkheert sin. Tsum payxpiil: etliche sin wilich sayn liipst aarwayt, sayn aychne haus orer een tier uf kepe. Fiile tuun raus suuche een tsayt letich plaype orer net khiner kriin klaych noo sayn hayrat. Anere hon ëntxlist sich wanere tsu een plats woo ti neetichkheet kreeser is, opwool se mise wayt wech fon sayn familye un fraaynte plaype. Fiile fon uns sin wilich tiise tinge uf kepe wayl mer wole unser pestes tsu Yeehoowa kepe. Say tich sicher: Yeehoowa kept weyert fer yeete kleene orer kroose tings woos tuu ëntxlist uf kepe fer tëm peser tiine. (Hep. 6:10)

SAY WILICH FER ANERSTE SIN

7. Warom khent es xweyer fer een nasireer wëre sayn ferxpreche hale? (Nuumere 6:5) (Kuk aach tas pilt.)

⁷ Lees Nuumere 6:5. g Ti nasireer hon ferxproch sayn hoer net ap xnayte. Tas hot ketsaycht tas se sich kans unich te autoriteet fon Yeehoowa kextelt hon. Wën een israeliiter fer een lang tsayt een nasireer weyer, teet sayn hoer lang wëre un ti layt khonte tas klaych mërke. Anerste sin, weyer net een kroos propleem wën ti anere tëm respektiire teete un tëm uf muute teete sayn ferxpreche hale. Es is xaat, awer es waar net imer soo. In etliche tsayte fon Israël sayn kexicht, waare ti nasireer net respektiirt un unerxtitst. In te tsayte fom profeet Amoos, hon aphostate israeliiter wayter “wayn fer ti nasireer kep”; tsiimlich sicher waare se am fersuuche tas ti nasireer sayn ferxpreche fer sich wech fom wayn hale, iwertreete teete. (Amo. 2:12) Als mool muste ti nasireer aarich koraajich sin fer sayn ferxpreche hale un anerste wii ti anere wëre.

8. Wii hot Benjamin sayn speryens tich uf kemuut?

⁸ Mit Yeehoowa sayn hilef, khene mer aach koraaj hon fer anerste wii ti anere sin, soo kaar wën mer pleet sin. Kuk mool Benjamin sayn payxpiil, een Yeehoowa sayn Tsayer in Noorweek woo 10 yoore alt is. Weeche te kriich in Ukraanya, hot sayn xuul een ewënt kehal fer se tsayche tas se ti layt fon Ukraanya pay kextan hon. Ti khiner solte een liit singe un tsaych aan tsiie mit te farpe fon  Ukraanya sayn faan. Benjamin wolt net teel mache in tiise natsyonaalix ewënt. Tes weeche, is eyer xteen keplip wayt wech fom plats woo tas pasiire teet. Awer een leerin hot tëm kesiin un hot hart kesaat: “Tuu must yets pay uns khome! Meyer sin al tich am waarte.” Mit koraaj, hot Benjamin fer ti leerin keantwort: “Ich wil khee sayt hoole un aach niks mit politik se tuun hon. In woerheet, wayl mer net tsum kriich keen, sin fiile Yeehoowa sayn Tsayer inkexpërt.” Ti leerin hot Benjamin sayn ausleyung aan kenom un hot kesaat tas eyer praycht net teel fon tiise ewënt mache. Awer sayn koleke hon aan kefang tëm frooe warom eyer net mit tëne waar. Benjamin is soo nerwees kep tas eyer neekst keprilt hot. Awer mit koraaj, hot eyer fer sayn kanse koleke aus keleet was eyer xon fer ti leerin kesaat hat. Nochter, hot Benjamin fer sayn eltere aus keleet tas eyer kexpiirt hot tas Yeehoowa tëm keholef hat sayn klaape xitse.

9. Wii khene mer Yeehoowa sayn hërts froo lose?

⁹ Wayl mer raus suuche Yeehoowa aan heere, mërke ti anere tas mer anerste sin. Es is neetich koraaj fer uns wii Yeehoowa sayn Tsayer itentifitsiire in te xuul orer in te aarwayt. Soo lang wii ti welt sayn aanxtelung imer xlimer wërt, tsiimlich sicher wërts xweyer fer uns tëm noo te piiplixe funtamente leepe un ti piiplixe woerheet mit te anere teele. (2 Tim. 1:8; 3:13) Awer ferkes tich net: meyer ‘lose Yeehoowa sayn hërts froo’ wën mer koraajich sin un anerste sin wii ti layt woo Tëm net tiine. (Xpr. 27:11; Mal. 3:18)

HAL YEEHOOWA IM EYERSTE PLATS IN TAYN LEEPE

10. Warom khent es xweyer fer een nasireer wëre tas kepoot in Nuumere 6:6, 7 aan heere?

¹⁰ Lees Nuumere 6:6, 7. h Ti nasireer solte net ticht khome pay toote khërper. Fiilaycht tenkst tuu tas es net soo xlim waar. Awer es weyer aarich xweyer fer een nasireer wën een ticht parent xtërpe teet. In te piiplixe tsayte, fer ti peërtichungs kewoonheete erfiile, waar es neetich tas ti layt sich ticht hale teete fom toote khërper. (Yoo. 19:39, 40; Aph. 9:36-40) Awer een nasireer khont net tiise kewoonheete noo keen. Soo kaar wën yemant fon sayn familye kextorep is un al fiil trauer mit kemacht hon, hon ti nasireer xtarke klaape ketsaycht un sayn ferxpreche kehal. Sicher hot  Yeehoowa tiise troye tiiner ferxtërkt fer soo sorte kefoore aus hale.

11. Was sol een krist pextimt sin se mache wën eyer mit sayn familye um keet? (Kuk aach tas pilt.)

¹¹ Wii kriste, wise mer wii ërnst unser tetikatsyoon tsu Yeehoowa is. Tas petreft unser ëntxlise un aktsyoone iwer sache woo mit unser familye se tuun hon. Meyer mache unser pestes fer unser familye fersoriche, awer meyer tuun nii ti winxe fon unser familye foer Yeehoowa sayn wile fer uns xtele. (Mat. 10:35-37; 1 Tim. 5:8) Als mool, fer Yeehoowa froo lose, mise mer ëntxlise mache woo unser parente net kefale.

12. Wii Alexandru een xweyer situatsyoon in sayn familye mit keleept hot, wii hot eyer sich aan kextelt?

¹² Kuk mool ti speryens fon Alexandru un sayn fraa Dorina. Tii hon ti Piipel torich 1 yoer xtutiirt. Too hot Dorina ëntxlist noo lose tas mache un tii wolt hon tas Alexandru aach noo lose teet. Awer mit ketult un kexik, hot eyer kesaat tas eyer wayter ti Piipel xtutiire teet. Dorina waar net froo un hot fersuucht tëm tswinge noo lose. Alexandru saat tas eyer sich aan kextrengt hot fer ti aanxtelung fon sayn fraa ferxteen, awer es waar tëm net laycht. Als mool, wën Dorina tëm kritikiirt un krope wërter kesaat hot, hot eyer kerechent tas es peser weyer noo lose se xtutiire. Awer Alexandru hot wayter Yeehoowa im eyerste plats kextelt. In te selwich tsayt, hot eyer fiil liip un respekt tsu sayn fraa ketsaycht. Weeche Alexandru sayn kuute payxpiil, hot Dorina ëntxlist ti Piipel noch mool xtutiire un mit te tsayt hot se sich taafe kelos. (Im site jw.org, kuk te wiiteo Alexandru un Dorina Văcar: “Ti liip is ketultich un kuut”, unich te sekwëns fon wiiteos Ti woerheet tuut leepe ënere.)

13. Wii khene mer liip fer Yeehoowa un unser familye tsayche?

¹³ Yeehoowa hot ti familye kepleent un tëm sayn wunx is tas mer een froo familye hon. (Ëfe. 3:14, 15) Fer wërklich froo sin, mise mer mache was Yeehoowa uns ferlangt. Say tich sicher tas Yeehoowa weyert kept fer ti kans aanxtrengung woos tuu machst fer tëm aan peete, soo lang wiis tuu tayn familye kuut uf phase tuust un tëne mit liip un respekt pehantelst. (Rom. 12:10)

WOLE MER UNS NANER UF MUUTE SOO WII TI NASIREER SIN

14. Weem sole mer hauptseechlich uf muute mit unser wërter?

¹⁴ Al woo raus suuche Yeehoowa hayt tiine, mise wilich sin fer etliche tinge uf kepe weeche sayn liip tsu tëm. Als mool is es net laycht tas mache. Wii khene mer uns naner helfe soo een sort aanxtelung tsayche? Meyer khene ti anere  uf muute torich unser wërter. (Yoop 16:5) Kepts yemant in tayn kemaynt woo sich aan xtrengt fer sayn leepe keweenlicher lose fer mee fer Yeehoowa mache? Khënst tuu yunge woo, mit koraaj, sich anerste aan xtele wii sayn koleke in te xuul, opwool tas net laycht is? Kepts Piipel xtutënte orer priiter woo sich aan xtrenge fer troy plaype opwool ti opositsyoon fon sayn familye? Say pextimt se mache ales was tuu khanst fer tëne uf muute un tëne saan tas tuu weyert kepst fer sayn koraaj un sayn aanxtrengung fer Yeehoowa tiine. (File. 4, 5, 7)

15. Wii tuun etliche helfe tii woo in te fol tsayt tiinst xafe?

¹⁵ Als mool khene mer praktix hilef kepe fer priiter woo in te fol tsayt tiinst xafe. (Xpr. 19:17; Hep. 13:16) Tas waar te wunx fon een troy elter xwester woo in Sri Lanka leept. Te loon woo se kriit hot, hot sich ferkreest un tii wolt 2 yunge xwestere helfe wayter wii pyoneerine tiine, opwool se ekonoomixe propleeme mit kemacht hon. Tes weeche, hot se ëntxlist yeete moonat tëne mit kelt helfe fer sayn telefoon rechnunge petsaale. Tiise xwester hot een xeen aanxtelung ketsaycht, kël?

16. Was khene mer mit te nasireer fon te friirixe tsayte lërne?

¹⁶ Meyer khene wërklich fiil lërne mim payxpiil woo ti nasireer uns kelos hon. Awer mit te nasireer, lërne mer aach etwas iwer unser himlixe Fater Yeehoowa. Tee wees tas mer tëm kefale wole un tas mer wilich sin etliche tinge uf kepe fer unser tetikatsyoon erfiile. Yeehoowa kept uns eer wën eyer uns ti xans kept fer raus suuche wii mer unser liip tsu tëm tsayche tuun. (Xpr. 23:15, 16; Mar. 10:28-30; 1 Yo. 4:19) Tas ferxpreche woo ti nasireer kemacht hon, tsaycht tas Yeehoowa mërkt un kept weyert fer ales was mer mache fer tëm tiine. Soo wole mer pextimt sin wayter Yeehoowa tiine un unser pestes tëm kepe.