Wii khene mer froo sin soo lang wii mer ketultich uf Kot waarte?
TUUST tuu hërtslich waarte ti tsayt wën Yeehoowa al ti xlechtichkheet tsum ën pringt un ales nay macht? (Apo. 21:1-5) Sicher! Awer es is net imer laycht ketultich uf Yeehoowa waarte, hauptseechlich wën mer xwiirichkheete mit mache. Wën mer wayter hofe tas etwas pasiirt, awer es khomt net wën mer es waarte, khene mer uns traurich xpiire. (Xpr. 13:12)
Noch soo, wil Yeehoowa hon tas mer ketultich waarte pis eyer — in sayn pextimt tsayt — in krayft. Warom waart Yeehoowa soo was fon uns? Was khan uns helfe unser frooheet hale soo lang wii mer waarte?
WAROM WIL YEEHOOWA HON TAS MER WAARTE?
Ti Piipel saat: “Yeehoowa tuut ketultich waarte fer aych kuutheet tsayche, un tee tuut sich uf xtele fer aych parmhërtslichkheet tsayche. Wayl Yeehoowa is een Kot fon kerechtichkheet. Froo sin ale tii woo uf tëm waarte.” (Isa. 30:18) Ti wërter in Isayas kapitel 30 sin kexrip kep fer ti tikhopiche yuute. (Isa. 30:1) Awer im wersikel 18, hot Yeehoowa hofnung fer ti troye layt tswixich ti yuute kep. Ti selwiche wërter kepe hofnung fer Yeehoowa sayn troye tiiner hayt.
Soo, mise mer ketultich waarte wayl Yeehoowa tas aach am mache is. Tee hot een tsayt pextimt fer tiise welt tsum ën pringe un tee waart tiise taach un xtun khome. (Mat. 24:36) In tiise tsayt, wërts kans taytlich tas te Taywel sayn akusatsyoone keeche Yeehoowa un Sayn tiiner, falx sin. Yeehoowa tuut tan Satanaas un tii woo tëm pay xteen, wech xafe; awer tee tuut uns “parmhërtslichkheet tsayche”.
Es is woer tas Yeehoowa tuut net unser propleeme wech xafe pis tiise tsayt khomt; awer tee lost uns sicher tas mer khene froo sin soo lang wii mer waarte. Soo wii Isayas kesaat hot, khene mer froo sin soo lang wii mer hofe was kuutes pasiire. (Isa. 30:18) a Wii khene mer tiise frooheet kriin? Kuk mool 4 xrite woo uns helfe tuun.
WII KHENE MER FROO SIN SOO LANG WII MER WAARTE?
Tenk aan te kuute tinge woo in tayn leepe pasiire. Te kheenich Tawi hot fiile xlechtichkheete torich sayn leepe kesiin. (Psal. 37:35) Noch soo, hot eyer kexrip: “Playp ruych foer Yeehoowa un waart ketultich uf tëm. Tuu tich net ëriche weeche te man woos kuut keet in sayn xlechte pleen.” (Psal. 37:7) Tawi selepst hot tas aan kewënt. Tee hot sich traan kehal aan Yeehoowa sayn ferxpreche fer tëm helfe. Tee waar aach petanklich fer al ti kuute tinge woo Yeehoowa tëm kemacht hat. (Psal. 40:5) Wën mer uns aach traan hale aan te kuute tinge fon unser leepe, xtats aan te propleeme, wërts laychter fer uns uf Yeehoowa waarte.
Penuts yeete xans fer Yeehoowa loope. Te xrayper fom Psalm 71 — tsiimlich sicher Tawi — hot tsu Yeehoowa kesaat: “Ich selepst tuun imer uf tich waarte; ich tuun tich imer mee loope.” (Psal. 71:14) Wii khont eyer Yeehoowa loope? Tee khont mit anere iwer Yeehoowa fertseele un Tëm liiter singe. (Psal. 71:16, 23) Soo wii Tawi, khene mer froo sin soo lang wii mer uf Yeehoowa waarte. Meyer loope Yeehoowa wën mer preetiche, wën mer iwer tëm mit anere fertseele un wën mer unser liiter singe. Tas neekste mool woos tuu een liit singe tuust, was mënst tuu fiil acht kepe aan te ufmuutiche wërter fom liit?
Los tayn priiter un xwestere tich uf muute. Wii Tawi xwiirichkheete mit kemacht hot, hot eyer fer Yeehoowa kesaat: “Foer tii woo leaal tsu tich sin, tuun ich uf tayn naame waarte.” (Psal. 52:9) Meyer khene aach uf kemuut wëre wën mer mit unser priiter un xwestere sin, net ploos in te fersamlunge un preetich aarwayt, awer aach wën mer xpas mitsamer hon. (Rom. 1:11, 12)
Ferxtërk tayn hofnung. Psalm 62:5 saat: “Ich waarte ruych ploos uf Kot, wayl mayn hofnung fon tëm khomt.” Es is aarich wichtich een xtark hofnung hon, hauptseechlich wën tas ën fon tiise welt tauert mee fer se khome wii mer uns foer kextelt hate. Meyer mise uns sicher sin tas Yeehoowa sayn ferxpreche sich erfiile tuun, ekaal wii lang mer tas waarte mise. Meyer khene unser hofnung ferxtërke wën mer Kot sayn Wort xtutiire. Tsum payxpiil: tenk iwer ti profetsiie woo sich xon erfiilt hon, wii ti unerxiitliche xrayper eene mit te anere xtime, un iwer ti kleenichkheete woo Yeehoowa iwer sich selepst kept. (Psal. 1:2, 3) Es is aach neetich wayter “mit hayliche kayst peete” fer unser fraayntxaft mit Yeehoowa hale, soo lang wii mer waarte sayn ferxpreche fon eewiche leepe sich erfiile. (Yuu. 20, 21)
Soo wii Tawi, khene mer uns sicher sin tas Yeehoowa uf phast tii woo uf tëm waarte un Sayn leaale liip tëne tsaycht. (Psal. 33:18, 22) Tuu wayter mit ketult un frooheet uf Yeehoowa waarte! Too tefoer, tenk aan te kuute tinge woo in tayn leepe pasiire, penuts yeete xans fer Yeehoowa loope, los tayn priiter un xwestere tich uf muute un hal tayn weyertlich hofnung xtark.
a Tas hepreeyx wort woo iwersetst is “ketultich waarte” khan aach petayte “hofe tas etwas pasiire tuut”. Tas tsaycht tas es net ferkheert is te wunx hon tas Yeehoowa een ën fer unser propleeme pringt.
