1. Was fer een payxpiil hot Yeesus fer sayn nookeener kelos un was hon se kemacht? (Kuk tas pilt am aanfang fom piichelche.)

WII Yeesus uf te eyert waar, hot eyer net noo kelos se preetiche. Tee hat hofnung tas ti layt tëm heere teete. Un tee wolt hon tas sayn tisipele ti selwich xpiirung iwer ti preetich aarwayt hëte. (Yoo. 4:35, 36) Wii ti tisipele mit Yeesus waare, hon se mit muut kepreeticht. (Luk. 10:1, 5-11, 17) Awer noo heyer, wii Yeesus in kexpërt un um keprung waar, wolte se fer een tsayt net mee preetiche. (Yoo. 16:32) Noo tas Yeesus fom toot uf kextii is, hot eyer sayn tisipele uf kemuut sich aan te preetich aarwayt traan hale. Un, tii hon tëm aan keheert. Noo tas eyer tsurik tsum himel kang is, hon se soo flaysich kepreeticht, tas sayn faynte kesaat hon: “Kukt mool! Teyer hot Yeruusalem fol mit ayre inlërnunge kemacht.” (Aph. 5:28)

2. Was tsaycht tas Yeehoowa ti preetich aarwayt seechent?

² Yeesus hot ti preetich aarwayt im eyerste yoer hunert kefiirt un Yeehoowa hot ti aarwayt keseechent. Fiile layt hon ti woerheet aan kenom. Tsum payxpiil: im Phingste taach fom yoerkang 33 N. K., hon sich unkefeer 3.000 mënxe taafe kelos. (Aph. 2:41) Un te numer fon tisipele hot net noo kelos se wakse. (Aph. 6:7) Awer Yeesus hot foer raus kesaat tas in te letste taache fiil mee layt teete ti woerheet aan nëme. (Yoo. 14:12; Aph. 1:8)

3-4. Warom khan ti preetich aarwayt in welche pletse xweyer sin un was tuun mer in tiise artikel lërne?

³ Mer al wole een positiiw aanxtelung iwer ti preetich aarwayt hon. In phaar lënter is tas net xweyer. Warom? Wayl soo fiile layt wole ti Piipel xtutiire, tas se prayche sayn mool in te ray waarte. Awer in anere pletse uf te welt, mëne ti puplikatoore  tas ti preetich aarwayt net soo laycht is. Ti layt sin weenich tehëm; un wën se tehëm sin, wole se in te meyerst tsayt niks iwer ti Piipel wise.

⁴ Un woos tuu woonst, is ti preetich aarwayt als mool xweyer? Tan, tiise artikel tuut tich helfe. Mer tuun lërne was etliche puplikatoore kemacht hon fer mit mee layt fertseele. Mer tuun aach siin warom sole mer unser frooheet in te preetich aarwayt hale, soo kaar wën ti layt wole net unser pexeet heere.

5. Was fer propleeme tuun fiile Yeehoowa sayn Tsayer mit mache?

⁵ Fiile Yeehoowa sayn Tsayer hon kemërkt tas es imer xlimer wërt ti layt tehëm trefe. Tsum payxpiil: hayt woone fiile mënxe in pletse woo sin fon toore un fon wachter kexitst. Tan Yeehoowa sayn Tsayer khene net rin keen, heechstens wën se een inlaatung fon een pewooner hon. Xon in anere pletse khene Yeehoowa sayn Tsayer haus tsu haus preetiche, awer fine se weeniche layt tehëm. Anere puplikatoore prayche in te kolonii preetiche un in pletse woo wayt fon ales sin. Tan prayche se manich mool een lang tsayt faare fer ploos een haus fine un im xtant is ti persoon kaar net tehëm! Wëns tuu was eenliches mit machst, kep net uf! Es is meechlich tas iwerkhome un mit mee layt in tayn teritooryum fertseele. Wii soo?

6. Was is eenlich tswixich preetiche un fixe?

⁶ Yeesus hot ti preetich aarwayt mit te aarwayt fon een fixer ferklaycht. (Mar. 1:17) Welche fixer tuun haufe taache xafe un fiilaycht niks fange. Awer tii tuun net uf kepe. Xtats tas, ënere se ti xtun, tas plats woo se fixe keen un ti aat wii se fixe. Mer khene eenliche ënerunge in unser preetich aarwayt mache. Wole mer etliche aanunge too triwer kuke.

7. Was khan pasiire wën mer in unerxiitliche tsayte preetiche?

⁷ Fersuuch ti layt fine in unerxiitliche tsayte. Mer tuun mit mee layt fertseele wën mer preetiche wën se tsiimlich sicher tehëm sin. Tsum xlus, een xtun, khome se al hëm! Fiile priiter un xwestere tuun noo mitaach orer foer nacht preetiche, wayl in tii xtune fine se mee layt tehëm. Ti pewooner sin aach eftas in ruu un fërtich fer se fertseele. Kuk mool was een elteste, woo David heest, macht un sii was tuu finst: “Mer mache soo: eyerst xafe mer eene orer tswaay xtune im teritooryum. Tan, keen ich mit mayn mithelfer tsurik, fer ti hayser woo nimant tehëm waar.” Tee saat noch: “Es ferwunert mich wii fiil layt fine mer in te hayser wën mer tëne noch mool pesuuche keen.” *

8. Wii khene mer Eklesyastes 11:6 in unser preetich aarwayt aan wëne?

⁸ Te haupste tekst fon tiise artikel tuut uns aan muute net uf kepe. (Lees Eklesyastes 11:6.) * David, iwer weem mer kraat fertseelt hon, hot net uf kep. Tsum payxpiil: tee is in een haus fiil mools tsurik kang un tsum xlus hot eyer te pewooner ketrof. Te man wolt iwer ti Piipel fertseele un tee hot aach kesaat: “Ich woone xon 8 yoore too, awer tas is tas eyerste mool woo een Yeehoowa sayn Tsayer aan mayn teer klopt.” David saat: “Wëns tuu noo un noo een haus pesuuchst un tuust tsum xlus ti persoon tehëm trefe, tuut se tsiimlich sicher unser pexeet heere.”

9. Was hon welche puplikatoore kemacht fer ti layt trefe woo net tehëm sin?

 ⁹ Fersuuch ti layt fine in unerxiitliche pletse. Es is xweyer mit welche layt in sayn haus fertseele. Tan, hon etliche puplikatoore ti pletse woo se preetiche keënert. Tsum payxpiil: fiile layt woone in apartamente un tes weeche, hon ti puplikatoore kemërkt tas uf te xtroos orer mit te puplikatsyoone khareche tsaye kepe, pringt kuute resultaate. Oone tas, weyers unmeechlich mit tëne xpreche. Fiile puplikatoore hon aach kemërkt tas ti layt fine es peser se fertseele un puplikatsyoone aan nëme in te prasas, feere orer kexëfte pletse. Floiran, een sirkuyt superintentent in Poliiwya, saat: “Mer keen tsu ti feere un tsu ti kexëfte pletse tswixich 1:00 pis 3:00 uer noo mitaach. In tiise xtune hon ti kexëfte layt weenich se tuun. Mer tuun eftas kuute kexpreeche hon un soo kaar Piipel xtuutye aan fange.”

10. Was khene mer noch mache fer mit te layt fertseele?

¹⁰ Fersuuch unerxiitliche aate penutse fer ti layt trefe. Iwerlee tich tas tuu fersuucht host mit yemant noo un noo fertseele, awer tuu host es net hin kriit. Tuu host in unerxiitliche xtune aan sayn teer keklopt, awer es waar nimant tehëm. Kepts een aner aat fer mit tiise persoon xpreche? Katarína saat: “Ich tuun priife xraype fer tii woo ich noch nii tehëm ketrof hon. Uf tëne xraype ich kraat was ich saan teet, wii wën ich khent mit te persoon xpreche.” Was lërne mer mit tiise speryens? Mer mise fersuuche een aat fine fer mit al ti layt fon unser teritooryum xpreche.

11. Warom wole welche layt niks fon unser pexeet wise?

¹¹ Weeche unerxiitliche uersache wole etliche layt niks fon unser pexeet wise. Etliche tenke tas se net iwer Kot orer fon te Piipel lërne prayche. Anere klaape net aan Kot weeche ti eelent woo se in te welt siin. Welche xtose ti Piipel ap weeche ti relichyeese fiirer sayn aanxtelung — tii saan tas se ti Piipel aan heere, awer mache fiil ferkheerte tinge. Noch anere mache sich ketanke mit sayn aarwayt, sayn familye, sayn propleeme un siin net wii khan ti Piipel tëne helfe. Tan, wii khene mer unser frooheet hale wën mer fer layt preetiche woo mërke net wii nutslich unser pexeet is?

12. Wii khene ti wërter fon Filiper 2:4 uns in te preetich aarwayt helfe?

¹² Tsaych tas tuu tich mit te anere khimerst. Fiile woo am aanfang niks fon unser pexeet wise wolte, hon sayn aanxtelung keënert wën se kemërkt hon tas mer uns wërklich mit tëne kekhimert hon. (Lees Filiper 2:4.) * David, iwer weem mer foner traan kexproch hon, saat: “Wën yemant saat tas eyer khee interës aan unser pexeet hot, tuun mer unser Piipel un puplikatsyoone tsurik in te thax. Tan saan mer: ‘Ich wil wërklich wise: warom xpiirst tuu tich soo?’” Wën mer uns wërklich mit te layt khimere, mërke se tas. Fiilaycht ferkese se was mer kesaat hon, awer tii tuun tsiimlich sicher traan tenke wii mer tëne pehantelt hon. Soo kaar wën te pewooner lost uns net iwer ti kuute oter xpreche, khene mer noch tsayche tas mer uns mit tëm khimere torich unser ferheltnis un froyntlich kesicht.

13. Was khene mer mache tas unser norichte mee interesant fer ti layt wërt?

¹³ Wii khene mer noch tsayche tas mer uns mit te layt khimere? Mer khene ënere was mer saan teete, tëm noo was ti persoon praucht un interesiirt. Tsum payxpiil: Siin mer etwas woo tsaycht tas te pewooner een khint hot? Tan, fiilaycht wole ti eltere ti Piipel sayn aanreet wise iwer wii khene se sayn khiner kroos tsiie un een froo familye hon. Orer fiilaycht mërke mer tas ti teer fol xlose is; tan im xtant, khene mer fertseele iwer ti kriminaliteet un iwer wii kefeerlich unser tsayte sin. Too, khene mer xpreche iwer wii Kot sayn Raych tas ales wech nëme tuut. Tas wërt wool te pewooner wërklich fraye! Een tuun ti situatsyoon, wën mer mit een persoon xpreche woo unser pexeet heere wil, sole mer tëne tsayche wii  ti Piipel sayn aanreet khan nutslich fer tii selepst sin. Katarína, iwer weem mer kraat kexproch hon, saat: “Ich tenke imer traan aan wii fiil ti Piipel mich xon keholef hot.” Tes weeche tuut Katarína mit sicherheet xpreche un ti layt khene tas mërke.

14. Tëm noo Xpriiche 27:17, wii khene ti priiter woo mitsamer xafe sich naner helfe?

¹⁴ Los tas ti anere tich helfe. Phaul hot Timoteus in kelërnt wii preetiche un in lërne. Un, Phaul hot Timoteus uf kemuut ti selwich hilef fer ti anere priiter un xwestere kepe. (1 Kor. 4:17) Soo wii Timoteus, khene mer fiil lërne mit te priiter un xwestere woo speryens hon. (Lees Xpriiche 27:17.) * Kuk mool tas payxpiil fon een pruuter woo Shawn heest. Tee hot een tsayt wii pyoneer in te kolonii kexaft. Tat, ti meyerste layt waare xon tsufriite mit sayn aychne relichyoon. Wii hot eyer sayn frooheet kehal? Tee saat: “Wëns meechlich waar, hon ich mit een aner pruuter kexaft. Wii mer pis tas neekste haus am faare waare, hon mer uns naner keholef peser in lërne. Tsum payxpiil, hon mer fertseelt iwer was te pewooner kesaat hot un wii mer keantwort hon. Tan, hon mer kesiin was khente mer anerste mache wën ti selwich situatsyoon noch mool foer khemt.”

15. Warom is tas kepeet seer wichtich in unser preetich aarwayt?

¹⁵ Peet tsu Yeehoowa fer hilef kriin. Ferlang Yeehoowa sayn hilef imer wëns tuu preetiche keest. Meyer prayche tëm sayn hayliche kayst fer uns helfe in ales was mer mache. (Psal. 127:1; Luk. 11:13) Wëns tuu Yeehoowa sayn hilef im kepeet ferlangst, say spetsiifix. Tsum payxpiil, ferlang tëm tas eyer tich tsu yemant lënkt woo wil iwer tëm lërne un fërtich is fer unser pexeet heere. Tan xtreng tich aan tëm noo tayn kepeet un preetich fer ale kaar woos tuu trefst.

16. Warom is tas perseenlich xtuutyum seer wichtich fer unser preetich aarwayt?

¹⁶ Hool tsayt fer tayn perseenlich xtuutyum mache. Ti Piipel saat: ‘Peways fer tich selepst was Kot sayn kuut, xeen un perfekte wile is.’ (Rom. 12:2) Woo peser khëne mer Kot, woo kreeser wërt unser sicherheet wën mer fer ti anere preetiche. Katarína, iwer weem mer foner traan fertseelt hon, saat: “Een khorts tsayt tsurik hon ich kemërkt tas ich praucht mayn klaape ferxtërke in welche piiplixe inlërnunge. Tan hon ich mit ketult xtutiirt un fer mich selepst pewayst tas es een Kriatoer kept, tas ti Piipel Kot sayn Wort is un tas Eyer een Orkanisatsyoon hayt too hiir uf te eyert hot.” Katarína saat tas sayn perseenlich xtuutyum hot tëne sayn klaape ferxtërkt un tëne sayn frooheet in te preetich aarwayt ferkreest.

17. Warom is Yeesus in te preetich aarwayt wayter froo keplip?

¹⁷ Yeesus hot net noo kelos se preetiche un is wayter froo keplip, soo kaar wën ti layt wolte net sayn pexeet heere. Warom? Tee wust tas ti mënxe praychte ti woerheet lërne un tee wolt soo fiil layt wiis meechlich waar helfe. Tee wust aach tas welche, woo sayn pexeet am aanfang ap kextos hon, sich xpeeter ënere khente. Tsum payxpiil: kuk mool was mit sayn aychne familye pasiirt is. Wii Yeesus 3 un halpe yoore kepreeticht hot, sayn priiter sin net sayn tisipele kep. (Yoo. 7:5) Awer, noo tas eyer fom toot uf keruuft kep is, sin se kriste kewoer. (Aph. 1:14)

18. Warom tuun mer wayter preetiche?

¹⁸ Wën mer preetiche, wise mer net was  fer layt tuun Yeehoowa sayn tiiner wëre. Un etliche tuun mee tsayt wii ti anere nëme fer ti woerheet lërne. Soo kaar ti layt woo uns net heere wole, khene unser kuut aanxtelung un frooheet mërke. Un mit te tsayt fiilaycht fange se aan “Kot loope”. (1 Phe. 2:12)

19. Tëm noo 1^te Korinter 3:6, 7, was sole mer net ferkese?

¹⁹ Opwool mer planse un kiise, sole mer net ferkese: Kot macht es wakse. (Lees 1^te Korinter 3:6, 7.) * Eene pruuter, woo in Etyoopya tiint, saat: “Ich hon fer mee wii 20 yoore too hiir woo ich woone aleen kepreeticht. Awer, yets kepts 14 puplikatoore un 13 fon tëne sin xon ketaaft — too tepay mayn fraa un mayn tray khiner. Un unkefeer 32 layt tuun in yeete fersamlung khome.” Te pruuter is froo tas eyer net noo kelos hot se preetiche; tas eyer ketultich kewaart hot tas Yeehoowa eerliche layt tsu tëm sayn Orkanisatsyoon pringe teet. (Yoo. 6:44)

20. Mit was khene mer ti preetich aarwayt ferklayche?

²⁰ Fer Yeehoowa hon ti layt al fiil weyert. Tes weeche wil eyer layt fon ale natsyoone in tëm sayn Orkanisatsyoon samele, eep tas ën khomt. Un tee kept uns ti wunerlich eer fer mit Yeesus in tiise aarwayt xafe. (Axeu 2:7) Unser preetich khan ferklaycht wëre mit te aarwayt fer welche layt rete woo in een xif sin woo uner keet. Meyer sin wii ti krup layt woo khome tat ti mënxe rete. Opwool net al in te krup tuun yemant perseenlich rete, ti aarwayt woo yeete eene macht is aarich wichtich. Tas selwich kilt aach fer unser preetich aarwayt. Meyer wise net wii fiil layt wëre noch fon Satanaas sayn welt keret, awer Yeehoowa khan kwalkee eene fon uns penutse fer tëne helfe. Andreas, woo in Poliiwya leept, saat: “Ich wees tas wën yemant ti woerheet lërnt un sich taafe lost, is ti aarwayt fon fiile priiter too hiner traan.” Tan, wole mer tiise positiiw aanxtelung iwer ti preetich aarwayt hale. Soo tuut Yeehoowa uns seechne un kriin mer fiil frooheet in tiise aarwayt.