Tiise xreklich situatsyoon hot mayn leepe keënert. Fon tat aan hon ich aan kefang Kot suuche. Noo heyer xpreche ich een pisye mee iwer tiise tunkel nacht. Awer eyerst, teet ich kërn fertseele iwer was is mit mich pasiirt wii ich noch een khint waar, woo mayn hërts foer perayt hot fer Kot suuche.

Ich sin uf te welt khom im yoerkang 1937, in Guesnain, een xtat am nort fom Frankraych. Tat, hon fiile layt in te mine kexaft, too tepay mayn papa. Tee hot mich in kelërnt wii wichtich xtram xafe is. Mit tëm hon ich aach kelërnt ti unkerechtichkheet hase. Tee hot kemërkt tas fiile mineratoore waare net kerecht pehantelt. Tii hon in kefeerliche situatsyoone kexaft un mayn papa wolt tëne helfe. Tes weeche hot eyer ti sintikaate fon te mineratoore pay kextan un greves uner xtitst. Mayn papa waar aach pees mit te falxheet woo eyer tswixich te relichyeese fiirer kesiin hot. Fiile fon tëne hate xon eene kuute leepe; awer noch soo, hon se ese un kelt fer ti aarme mineratoore ferlangt. Mayn papa hot sich soo fiil keëricht mit te relichyeese fiirer sayn aanxtelung, tas  eyer mich niks iwer relichyoon in kelërnt hot. Fer ti woerheet saan, hon mer nii mools iwer Kot fertseelt.

Wii ich kroos kewakst sin, hon ich aach aan kefang ti unkerechtichkheet hase. Tsum payxpiil: ti layt hon xeep fer ti auslënter kekukt, awer fer mich waar tas net richtich kewees. Ich hon fuspal mit te auslënter sayn puupe kexpilt, un es waar iwer kuut mit tëne sin. Un noch: mayn mama waar poolix, net franseesix kewees. Tan, wolt ich wërklich hon tas ale rase in friit leepe teete un tas al kerecht pehantelt weyere.

Im yoerkang 1957, hot mich ti rechiirung im militeer tiine kexikt. Tas hot mich pis te përich in te tunkel nacht kenom, iwer was ich foner traan fertseelt hon. Noo tas ich “Oo Kot! Oo Kot!” aus kexproch hon, was hon ich ketrof? Een faynt? Nee!... een esel! Tas hot mich fiil ferlaycht. Noch soo, weeche te kriich un was tat pasiirt is, hon ich aan kefang mee iwer tas tsiil fom leepe tenke — weeche was sin mer too? Meecht Kot sich mit uns khimere? Meechte mer eene taach eewiche friit hon?

Noo heyer, wën ich mayn eltere am pesuuche waar, hon ich een Yeehoowa sayn Tsayer khëne kelërnt. Tee hot mich een Piipel kep; xpeeter, wën ich tsurik tsu Arxeelya kang sin, hon ich aan kefang se leese. Een tekst woo mich tiif petrof hot, waar Apokalipsis 21:3, 4, woo saat: “Kot sayn woonung is pay te mënxe; (...) Tee tuut yeete treene fon sayn aue ap trokne, un es kept kheen toot mee, kheen traurichkheet, kheen krayxe un kheen phayn.” Tas hot mich ferwunert. Ich hon mich kefroot: ‘Khene tiise wërter wërklich woer sin?’ In tiise tsayt, wust ich neekst kaar niks iwer Kot orer ti Piipel.

Im yoerkang 1959, waar mayn tiinst im militeer fërtich kewees. Een pisye xpeeter hon ich François khëne kelërnt, woo een Yeehoowa sayn Tsayer waar. Tee hot mich ti woerheet fon te Piipel in kelërnt. Tsum payxpiil, tee hot mich in te Piipel ketsaycht tas Kot eene naame hot: Yeehoowa. (Psal. 83:18) Tee hot mich aach in kelërnt tas Kot tuut ti unkerechtichkheet too uf te eyert tsum ën pringe; tas Eyer tuut fon te eyert een Paratiis mache un ti wërter fon Apokalipsis 21:3, 4 erfiile.

Tiise inlërnunge waare laycht fer se ferxteen un tii hon aan mayn hërts kekrif. Awer in te selwich tsayt sin ich pees mit te relichyeese fiirer kep. Un ich wolt fer ti anere tsayche tas se tinge in kelërnt hon woo net in te Piipel waare. Ich hon noch soo wii mayn papa ketenkt. Too, wolt ich was klaych keeche ti unkerechtichkheet mache!

François un mayn anere froynte woo Yeehoowa sayn Tsayer waare, hon mich keholef mayn wuut kontroliire. Tii hon mich aus keleet tas unser aarwayt wii kriste is hofnung tsu te layt kepe torich ti kuute notisye fom Raych, net tëne richte. Tas is was Yeesus kemacht hot un woo eyer uns kexikt hot se mache. (Mat. 24:14; Luk. 4:43) Ich praycht aach lërne wii froyntlich un mit kexik mit te layt fertseele, ekaal aan was se keklaapt hon. Es is kraat soo wii ti Piipel saat: “Te Hër sayn sklaaw praucht net xtrayte, awer mus froyntlich mit al sin.” (2 Tim. 2:24)

 Ich hon ti neetiche ënerunge in mayn leepe kemacht un mich taafe kelos im yoer 1959, in een sirkuyt konkrës. Tat, hon ich een xeen yung xwester khëne kelërnt, woo Angèle keheest hot. Ich hon aan kefang tëne sayn kemaynt pesuuche un im yoerkang 1960 hon mer uns kehayrat. Tii is wërklich een wunerlich fraa un een weyertlich kexenk fon Yeehoowa. (Xpr. 19:14)

Torich ti yoore, hon ich haufe lisyoone kelërnt mit kluuche priiter woo fiil speryens hon. Too is eene fon te wichtichste: fer kwalkee xweyer flicht erfiile, prayche mer teemuutich sin un Xpriiche 15:22 aan wëne, woo saat: “Mit fiile aanreeter, kriit ma kuute resultaate.”

Im yoerkang 1964, hon ich kesiin wii neetich waars tiise wërter aan wëne. In tiise yoer, hon ich aan kefang wii sirkuyt superintentent tiine. Mayn flicht waar ti kemaynte pesuuche fer ti priiter uf muute un tëne helfe sich tichter pay Yeehoowa xafe. In tiise tsayt waar ich ploos 27 yoore alt un ich hat net fiil speryens. Tes weeche, hon ich phaar feeler kemacht; awer ich hon fersuucht mit tëne lërne. Un tas haupste: ich hon weyertliche lisyoone kelërnt mit kompetente “aanreeter” woo fiil speryens hate.

Ich tenke mich noch traan was pasiirt is wii ich een nay superintentent waar. Noom pesuuch fon een kemaynt in Paris, hot een rayfe pruuter mich kefroot ep tee khont mit mich aleen fertseele. “Kewis” — hon ich kesaat.

Tee hot mich kefroot: “Louis, weem tuut te tokter helfe: tii woo krank sin orer tii woo kesunt sin?”

“Tii woo krank sin” — hon ich keantwort.

Too hot eyer kesaat: “Host recht! Awer ich hon kemërkt tas ti meyerst tsayt pist tuu mit te priiter woo xon een xtark froyntxaft mit Yeehoowa hon, wii te kemaynt superintentent. Awer too kepts fiile priiter un xwestere woo oone muut, nay orer pleet sin. Es weyer kuut tas tuu mee tsayt mit tëne aus kepe teest. Tuu khenst soo kaar pay tëne maaye keen, fiilaycht fer was ese.”

Es waar net laycht aan nëme tas ich een feeler kemacht hon. Awer ich hon tiise kuut aanreet klaych in kefiirt. Un ich sin aarich petanklich kep tas te liipe pruuter mich tas kesaat hot. Tëm sayn liip tsu Yeehoowa sayn xeef hot mich tiif petrof. Ich tanke imer Yeehoowa weeche tiise sort priiter.

Es waare 2 internatsyonaale konkrëse in Colombes, Paris kehal: een in 1969 un te aner in  1973. Ich hon ti apteelung uf kephast woo ese fer ti priiter pesoricht hot. Im konkrës fom yoer 1973, praychte mer ese fer unkefeer 60.000 layt torich 5 taache pesoriche! Ich hon mich kefroot: ‘Wii khene mer soo was hin kriin?’ Xon noch mool ti solutsyoon waar ti wërter fon Xpriiche 15:22 — mit kluuche priiter fertseele. Too hon ich ti hilef fon priiter woo fiil speryens hate ferlangt. Welche waare xlachter, pauer, kocher un anere hon mit khaafe in sayn aarwayt kexaft. Mitsamer hon mer es hin kriit ti xweyer aarwayt fërtich pringe.

Im yoerkang 1973, hon se mich un mayn fraa in kelaat fer in Petël fom Frankraych tiine keen. Mayn eyerst flicht tat waar aach seer xweyer kewees. Ich praycht puplikatsyoone fer unser priiter in Kameruun, Afrika, xike. Awer es waar net soo laycht wayl unser aarwayt waar tat ferpoot tswixich ti yoore 1970 un 1993. Xon noch mool, hon ich mich kefroot: ‘Wii khan ich soo was hin kriin?’ Te superintentent fon te filyaal im Frankraych hot tas im xtant kemërkt. Fer mich uf muute, hot eyer mich kesaat: “Unser priiter in Kameruun prayche ti kaystlich esmitel wërklich fiil kriin. Wole mer tëne fersoriche!” Un kraat tas is was mer kemacht hon.

Ich sin eftas pis te lënter neewich Kameruun kerees fer mit te elteste fon Kameruun fertseele. Tiise priiter waare koraajich un kluuch kewees. Tii hon mich keholef aate fine fer ti puplikatsyoone fer ti priiter reeklich xike. Yeehoowa hot unser aanxtrengung keseechent: um 20 yoore rom, hot es khee etitsyoon fon Te Wachthorm fer ti priiter in Kameruun kefeelt; un yeete moonat hon se te Nosso Serviço do Reino kriit.

Wii mer aan kefang hon se namoriire, hon ich klaych kemërkt tas Angèle een ticht froyntxaft mit Yeehoowa hat. Un wii mer uns kehayrat hon, khont ich tas noch taytlicher siin. Tsum payxpiil: kuk mool was pasiirt is in te nacht fon unser  hoochtsayt. Angèle hot mich ferlangt een kepeet tsu Yeehoowa mache un tëm saan tas mer wolte mitsamer unser pestes tsu tëm kepe. Yeehoowa hot tiise kepeet keantwort.

Angèle hot mich aach keholef mee aan Yeehoowa traue. Ich kepe mool een payxpiil: im yoerkang 1973, wën mer in kelaat waare tsu Petël keen, waar ich mich net sicher ep mer keengte. Ich hat mayn aarwayt wii sirkuyt superintentent iwer kërn un ich wolt tas net hiner lose. Awer Angèle hot mich erinert tas mer unser leepe tsu Yeehoowa tetikiirt hate. Tes weeche, selte mer mache ales was Tëm sayn Orkanisatsyoon ferlange teet. (Hep. 13:17) Ich hon aan kenom was se kesaat hot un tan sin mer in Petël xafe kang. Angèle is een kluuch un ferninftich fraa, woo wërklich Yeehoowa liipt. Tiise kwaliteete hon unser hayrat ferxtërkt un uns keholef kuute ëntxlise torich ti yoore mache.

Yets, sin mer elter kep. Awer Angèle is noch een wunerlich fraa woo mich uner xtitst. Tsum payxpiil: fiile xuule fon te Orkanisatsyoon sin ploos in englix kemacht. Tan, tas mer tiise xuule mache khente, hon mer xtram kexaft fer unser englix ferpesere. Too, sin mer pis een englix kemaynt kang, opwool mer xon mee wii 70 yoore hate. Weeche mayn flichte wii mitkliit fon te Filyaal Komisyoon fom Frankraych, hate ich weenich tsayt fer een xprooch xtutiire. Awer ich un Angèle hon uns naner keholef. Hayt, sin mer xon mee wii 80 yoore alt un tuun mer noch ti fersamlunge in franseesix un in englix in richte. Meyer fersuuche soo fiil wiis meechlich is in te fersamlunge un in te preetich aarwayt mit helfe. Un Yeehoowa hot unser mii fer englix lërne keseechent.

In 2017, ich un Angèle hon een wunerlich kexenk kriit: meyer waare in kelaat fer ti Xuul fer ti Mitkliiter fon Filyaal Komisyoon un sayne Fraae mache. Tii is kehal kep in te Wachthorm Inlërnung Sentrum, in Patterson, Nay York.

Yeehoowa is wërklich te Kreeste Leerer. (Isa. 30:20) Tes weeche, yeete eene fon uns — alt orer yung — kriit ti pest inlërnung woos kept. (Teut. 4:5-8) Ich hon kemërkt tas ti yunge layt woo Yeehoowa un aach ti rayfe priiter un xwestere aan heere, mache kuute ëntxlise im leepe un hale sich troy tsu Yeehoowa. Tas is kraat soo wii Xpriiche 9:9 saat: “Lërn tee woo kluuch is, un tee wërt noch kluucher. Lërn tee woo kerecht is, un tee tuut noch mee wise.”

Als mool, tenke ich noch aan te xreklich tunkel nacht ufm përich in Arxeelya, unkefeer 60 yoore tsurik. In tii nacht, wust ich net was fer een frooes leepe teet ich noch hon. Ich hon mechtich fiil mit te anere kelërnt! Yeehoowa hot mich un Angèle een wunerxeen leepe kexenkt! Meyer wole nii mools noo lose mit Yeehoowa un mit te rayfe priiter un xwestere woo tëm liipe lërne.