1-2. Was hot een xrayper kesaat un was tuun mer in tiise artikel noo kuke?

“ICH klaape aan Yeesus” — saan milyoone layt hayt se taach. Awer tuun se wërklich aan nëme was tee in kelërnt hot? Nee! (2 Tim. 4:3, 4) Een xrayper hot een mool kesaat: “Wën eene man tswixich uns hayt weyer, woo teet ti selwiche tinge saan woo Yeesus kesaat hat (...), teete mer tëm ap xtose, wii mer mit Yeesus kemacht hon tswaay tausent yoore tsurik? (...) Ti antwort is: Yaa, mer teete!”

² Wii Yeesus uf te eyert waar, hon fiile layt tëm sayn inlërnunge kehoricht un tëm kesiin wunere mache, awer tii wolte net aan tëm klaape. Weeche was? Im letste artikel hon mer 4 uersache noo kekukt warom ti layt kextolpert sin weeche tas was Yeesus kesaat un kemacht hot. Yets tuun mer iwer 4 anere uersache xpreche. Mer tuun aach siin warom tuun ti layt hayt se taach Yeesus sayn nookeener ap xtose un was khene mer mache fer net xtolpere.

3. Welche layt sin kextolpert weeche etwas woo Yeesus kemacht hot. Wii soo?

³ Wii Yeesus uf te eyert waar, hot eyer tsayt mit ale sorte layt fertrip. Tsum payxpiil, eyer hot eftas mit layt kes woo raych waare un fiil macht hate. Awer tee hot noch mee tsayt aus kep mit te aarme un mit te layt woo xlecht pehantelt waare. Tee hot aach mitlayt ketsaycht fer ti layt woo waare wii “sinticher” kenënt. Welche hoochnaasiche mënxe sin kextolpert weeche was Yeesus kemacht hot. Tii hon tëm sayn tisipele kefroot: “Warom est un trinkt teyer mit layt woo xtaye ferlange un woo sinte mache?” Tan, hot Yeesus keantwort: “Tii woo kesunt sin prayche kheen tokter, awer ti kranke, yaa. Ich sin net khom fer ti kerechter ruufe, awer ti sinticher, tas se sich peroye.” (Luk. 5:29-32)

4. Tëm noo ti profetsii fon Isaiias, was khente ti yuuter iwer te Mesias xon kewaart hon?

 ⁴ Was saat ti Piipel? Een lang tsayt eep te Mesias uf te eyert khom is, hot te profeet Isaiias xon kesaat tas ti welt tëm net aan nëme teet. Ti profetsii hot kesaat: “Ti mënxe hon tëm ferxënt un uf sayt kelos (...) Es waar wii wën sayn kesicht fon uns ferxtekelt weyer. Tee waar niter kextelt un mer hon kemënt tas eyer niks tauche teet.” (Isa. 53:3) Ti profetsii hot kesaat tas “ti mënxe” teete te Mesias uf sayt lose. Tan, ti yuuter in Yeesus sayn taache khente xon kewaart hon tas eyer ap kextos weyer.

5. Was tenke fiile layt hayt iwer Yeesus sayn nookeener?

⁵ Pasiirt tas noch hayt? Yawool. Fiile relichyeese fiirer mache ti teer fon sayn khërich prayt uf fer ti layt woo important, raych un xlau foer ti welt sin. Ti relichyeese fiirer wëre mechtich froo wën se khome. Ti layt khene teel fon te khërich sin, opwool se tinge mache woo Kot hast. Tiise selwiche relichyeese fiirer tuun Yeehoowa sayn flaysich un moraalix rayn tiiner niter xtele, ploos wayl se net kroos foer ti welt sin. Awer wii Phaul kesaat hot, Yeehoowa hot raus kesuucht tii “woo niter kextelt sin.” (1 Kor. 1:26-29) Fer Yeehoowa hon al sayn troye tiiner fiil weyert.

6. Was hot Yeesus in Matheus 11:25, 26 kesaat un wii khene mer tëm noo mache?

⁶ Was khene mer mache fer net xtolpere? (Lees Matheus 11:25, 26.) * Los net ti mënunge woo ti welt iwer Yeehoowa sayn tiiner hot, tich influentsiire. Erkhën: Yeehoowa penutst ploos teemuutiche layt fer sayn wile mache. (Psal. 138:6) Tenk aach traan: foer ti welt sin Yeehoowa sayn tiiner net xlau orer kluuch, awer Yeehoowa macht fiile un kroose tinge torich tëne.

7. Warom hot Yeesus ti fariseer konteniirt un wii hon se sich aan kextelt?

⁷ Ti relichyeese fiirer fon Yeesus sayn taache hon net ti layt keholef Kot richtich aan peete. Tes weeche hot Yeesus tii mit koraaj konteniirt. Tsum payxpiil: Yeesus hot ketsaycht tas ti fariseer wolte ploos haylich foer ti anere aus siin. Tii hon sich mee ketanke kemacht mit wii sayn hënt richtich wexe, wii mit sayn eltere uf phase. (Mat. 15:1-11) Wii Yeesus tas kesaat hot, hon sayn tisipele sich fiilaycht ferxrok. Tii hon tëm kefroot: “Tuu weest tas ti fariseer kextolpert sin mit was tuu kesaat host, kël?” Tee hot tëne keantwort: “Yeete plans woo mayn himlixe Fater net keplantst hot, wërt aus keroopt. Lost tëne. Tii sin plinte fiirer. Un wën eene plinte man een aner plinte man fiirt, fale ti tswaay in een loch.” (Mat. 15:12-14) Ti fariseer sin pees kep mit te tinge woo Yeesus kesaat hot. Awer Yeesus hot net noo kelos ti woerheet xpreche.

8. Wii hot Yeesus ketsaycht tas Kot net al ti relichyeese inlërnunge aan nëmt?

⁸ Yeesus hot aach ketsaycht tas welche relichyeese inlërnunge falx waare. Tee hot net kesaat tas Kot nëmt ale sorte relichyeese inlërnunge aan. Xtats tas, hot eyer aus keleet tas ti meyerste layt teete im prayt weech tsu te fernichtung keen un tas ploos weeniche layt, teete im xmaal weech tsum leepe keen. (Mat. 7:13, 14) Tee hot aach taytlich kelos tas etliche teete saan tas se Kot tiine, awer in woerheet mache se tas net. Tee hot sayn tisipele aan kesaat: “Phast uf mit te falxe profeete, woo tsu aych wii xeef ferklayt khome, awer inwënich sin se wii  peese wolefe. Weeche tëne sayn friichte tuut teyer se khëne.” (Mat. 7:15-20)

9. Was sin welche fon ti falxe relichyeese inlërnunge woo Yeesus foer keprung hot?

⁹ Was saat ti Piipel? Een piiplix profetsii hot foer raus kesaat tas te Mesias teet een xtark wunx hon fer Kot sayn haus xitse. (Psal. 69:9; Yoo. 2:14-17) Weeche tiise sort xpiirunge, hot Yeesus ti falxe tinge foer keprung woo ti relichyeese fiirer in kelërnt un kemacht hon. Tsum payxpiil, ti fariseer hon keklaapt tas ti seel unxtërplich is — es wil saan, tas ti persoon tuut wayter leepe noo sayn toot. Awer Yeesus hot in kelërnt tas ti toote sin am xloofe — es wil saan, tas se net mee eksistiire tuun. (Yoo. 11:11) Ti satuseer hon net keklaapt tas ti toote uf xtaye khente. Awer Yeesus hot sayn froynt Lasaro fom toot uf keruuft. (Yoo. 11:43, 44; Aph. 23:8) Ti fariseer hon in kelërnt tas Kot, orer een aner sort macht, ëntxlist was mit een pasiirt un was een mache tuut. Awer Yeesus hot ketsaycht tas ti mënxe raus suuche khene ep se Kot tiine tuun orer net. (Mat. 11:28)

10. Warom tuun fiile xtolpere weeche tas was mer in lërne?

¹⁰ Pasiirt tas noch hayt? Yawool. Mer penutse ti Piipel fer se pewayse tas welche relichyeese inlërnunge ferkheert sin. Tes weeche fiile layt wole niks fon uns wise. Tsum payxpiil, fiile relichyeese fiirer saan tas Kot ti xlechte layt in een fayer hel xtrooft. Mit tiise inlërnung, fersuuche se ti layt kontroliire. Awer meyer — woo Yeehoowa, te Kot fon liip, aan peete — helfe ti layt ferxteen tas tiise inlërnung falx is. Ti relichyeese fiirer tuun aach in lërne tas ti seel unxtërplich is. Tenk mool noo: wën tiise inlërnung woer weyer, weyers net neetich ti layt fom toot uf ruufe. Tes weeche tsayche mer in te Piipel tas tiise inlërnung falx is. Fiile relichyoone lërne tas Kot, orer een aner sort macht, xon ëntxlist hot was een mache tuut. Awer, mer tsayche fer ti layt tas ti mënxe een fray wile hon un tas se khene raus suuche Kot tiine orer net. Wii xtele sich ti relichyeese fiirer aan wën mer foer ti anere tsayche tas se falxe leerer sin? In te meyerst tsayt wëre se wuutich mit uns!

11. Tem noo Yeesus sayn wërter in Yoohan 8:45-47, was wil Kot hon tas mer mache?

 ¹¹ Was khene mer mache fer net xtolpere? Wën mer ti woerheet liipe, mise mer aan heere un klaape aan was Kot saat. (Lees Yoohan 8:45-47.) * Mer sin net soo wii Satanaas, woo ti woerheet ap kextos hot. Un mer teete nii mools was mache woo net mit unser klaape xtimt. (Yoo. 8:44) Yeehoowa hot kesaat tas sayn folek mus ‘hase was xlecht is’ un ‘sich hale aan was kuut is’, soo wii Yeesus kemacht hot. (Rom. 12:9; Hep. 1:9)

12. Warom sin fiile yuuter kextolpert weeche ti aat wii Yeesus kextorep is?

¹² Weeche was noch hon etliche yuuter Yeesus ap kextos? Phaul kept uns ti antwort: “Meyer preetiche tas Kristus uf een phoste um keprung kep is. Fer ti yuuter is tas een uersach fer se xtolpere.” (1 Kor. 1:23) Warom waar tas fer tii een xtolpere xteen kewees? Wayl weeche ti aat wii Yeesus kextorep is, aan een kweel phoste, hots aus kesiin tas eyer een xpitspuup un een sintiche mënx waar — net te Mesias. (Teut. 21:22, 23)

13. Was hon ti yuuter woo kextolpert sin net kemërkt?

¹³ Ti yuuter woo kextolpert sin hon net kemërkt tas Yeesus unxultich waar, tas ti akusatsyoone keeche tëm falx waare un tas eyer unkerecht pehantelt woer is. Tii woo Yeesus kericht hon, hon sich niks traus kemacht mit te kerechtichkheet. Tas yiitix heechste kericht hot sich xnel fersamelt un is net ti kesetse iwer wii se richte noo kang. (Luk. 22:54; Yoo. 18:24) Tii waare net kerecht wën se ti akusatsyoone un pewaysunge keeche Yeesus keheert hon. Tii hon aach “falxe tsaye keeche Yeesus kesuucht, fer tëm um pringe”. Awer, tas hot net richtich pariirt. Tes weeche hot te Hooche Priister fersuucht Yeesus tswinge xult iwer sich selepst pringe. Tas waar keeche tas kesets kewees. (Mat. 26:59; Mar. 14:55-64) Noo heyer is Yeesus fom toot uf kextii.  Tan, hon ti selwiche unkerechte richter ‘haufe silwer nikele fer ti romaanixe soltaate kep’ woo Yeesus sayn kraap uf kephast hon. Tii selte een falx kexicht aus teele fer aus leye warom tas kraap leyer kewees waar. (Mat. 28:11-15)

14. Was hot ti Piipel xon foer heyer kesaat iwer Yeesus sayn toot?

¹⁴ Was saat ti Piipel? Fiile yuuter in Yeesus sayn taache hon net kewaart tas es neetich weyer tas te Mesias xtërpe teet. Awer kuk mool was ti Piipel xon foer heyer kesaat hot: “Wayl tee hot sayn leepe pis aan toot aus kexut, un waar tswixich ti sinticher tepay ketseelt; tee hot ti sinte fon fiile ketraa un waar een mitler fer ti sinticher kewees.” (Isa. 53:12) Tan, ti yuuter hate khee uersach fer se xtolpere wën Yeesus wii een sintiche mënx um keprung kep is.

15. Weeche was fer akusatsyoone keeche Yeehoowa sayn Tsayer sin welche kextolpert?

¹⁵ Pasiirt tas noch hayt? Kewis! Yeesus waar falx akusiirt un xultich aus kexproch. Un hayt se taach tuun ti layt tas selwich keeche Yeehoowa sayn Tsayer mache. Kuk mool phaar payxpiile. In te Fereenichte Xtaate fon Amërika, tswixich ti yoore 1930 un 1950, hon mer fiile prosëse in te kerichte uf kemacht fer unser frayheet fer Kot aan peete xitse. Awer welche richter hon net ferxtekelt tas se uns net kërn hate. In Quebec, Kanata, ti Katoolix Khërich un ti rechiirung hon mitsamer kexaft fer se fersuuche unser aarwayt um hale. Fiile puplikatoore waare in kexpërt ploos wayl se mit sayn nochpere iwer Kot sayn Raych kexproch hon. In Taytxlant ti nasist rechiirung hot fiile troye yunge priiter um keprung. Un khërtslich, fiile fon unsere priiter in Ruslant sin xultich aus kexproch un in kexpërt kep wayl se iwer ti Piipel mit te anere fertseelt hon. Ti autoriteete hon tas kenënt wii een “ekstremist aktiwiteet”. Soo kaar ti Tradução do Novo Mundo da Bíblia Sagrada in rusix is ferpoot kep; un wayl se te naame Yeehoowa penutst, is se kenënt woer wii een “ekstremist informatsyoon”.

16. Tëm noo 1^te Yoohan 4:1, warom sole mer uns net hiner keen lose fon te falxe kexichte iwer Kot sayn folek?

¹⁶ Was khene mer mache fer net xtolpere? Lërn ti woerheet iwer tiise sache. In te Përich Reet, hot Yeesus fer tii woo am heere waare kesaat: ‘Ti layt tuun ale xlechte liie keeche aych saan.’ (Mat. 5:11) Satanaas is ti kweel fon tiise liie keeche tëne woo ti woerheet liipe. Weeche tëm sayn influens tuun ti faynte ti liie aus prayte. (Apo. 12:9, 10) Un wën mer een lii heere, was sole mer mache? Mer mise tii klaych ap xtose un nii mools lose tas se uns pang macht orer unser klaape ferxweecht. (Lees 1^te Yoohan 4:1.) *

17. Was fer tinge sin foer Yeesus sayn toot pasiirt woo ti layt xtolpere kemacht hon?

¹⁷ Kraat foer sayn toot, eene fon Yeesus sayn 12 aphostele hot tëm hiner kang. Een aner aphostel hot tray mool kesaat: ‘Ich khëne net Yeesus.’ In woerheet, in te nacht foer sayn toot hon al sayn aphostele tëm im xtich kelos. (Mat. 26:14-16, 47, 56, 75) Awer, Yeesus hot sich net ferxrok. Eyer hot soo kaar foer raus kesaat tas es pasiire teet. (Yoo. 6:64; 13:21, 26, 38; 16:32) Weeche tas ales was pasiirt is, sin im xtant welche kextolpert, fiilaycht soo am tenke: ‘Wën Yeesus sayn aphostele sich soo aan xtele, wil ich niks mit tëne se tuun hon!’

18. Was fer profetsiie hon sich erfiilt eep Yeesus sayn toot?

¹⁸ Was saat ti Piipel? Hunerte yoore eep Yeesus uf te eyert khom is, hot Yeehoowa  xon in te Piipel kesaat tas yemant teet te Mesias hiner keen fer 30 silwer nikele kriin. (Sak. 11:12, 13) Te hinerkeener teet eene fon te Mesias sayn tichste froynte sin. (Psal. 41:9) Te profeet Sakarias hot aach kexrip: “Xlaa te xeefer, un los te trop xeef aus naner keen.” (Sak. 13:7) Tas ales hot sich aan Yeesus erfiilt. Tan, es waar khee uersach fer se xtolpere. Fer ti woerheet saan, ti eerliche layt khonte sayn klaape ferxtërke wën se tas ales kesiin hon.

19. Was wise ti eerliche layt?

¹⁹ Pasiirt tas noch hayt? Yawool. In unsere taache, phaar pekhante Yeehoowa sayn Tsayer hon ti woerheet hiner kelos, sin aphostate kep un yets fersuuche se ti anere fon te woerheet ap lënke. Tii tuun xlechte un hinerlistiche kexichte un liie iwer Yeehoowa sayn Tsayer aus teele. Tii mache tas torich tsaytung, raatio, TV un ti internet. Awer eerliche layt xtolpere net. Tii wise xon tas ti Piipel foer raus kesaat hat tas tiise tinge pasiire teete. (Mat. 24:24; 2 Phe. 2:18-22)

20. Was khene mer mache fer net xtolpere weeche tëne woo ti woerheet hiner kelos hon? (2^te Timoteus 4:4, 5)

²⁰ Was khene mer mache fer net xtolpere? Mer prayche unser klaape xtark hale. Wii kriin mer tas hin? Mer sole ti Piipel reeklich xtutiire, imer peete un unser pestes mache in te aarwayt woo Yeehoowa uns kep hot. (Lees 2^te Timoteus 4:4, 5.) * Wën mer een xtarke klaape hon, kriin mer net pang wën mer xlechte kexichte iwer Yeehoowa sayn Tsayer heere. (Isa. 28:16) Unser liip tsu Yeehoowa, tëm sayn Wort, un ti priiter tuut uns helfe net xtolpere weeche tëne woo ti woerheet hiner kelos hon.

21. Opwool ti meyerste layt hayt niks fon unser pexeet wise wole, fon was khene mer uns sicher sin?

²¹ In Yeesus sayn taache, sin fiile kextolpert un hon tëm ap kextos. Soo wii soo, fiil anere hon aan tëm keklaapt. Too tepay waar fer weenichts een mitkliit fon te Sinëtrio un soo kaar “een kroos numer fon priister”. (Aph 6:7; Mat. 27:57-60; Mar. 15:43) Un tas is net fiil anerste hayt. Milyoone layt hon ëntxlist Yeesus noo keen. Weeche was? Wayl tii khëne un liipe ti woerheete woo in te Piipel xteen. Un Kot sayn Wort saat: “Tii woo tayn kesets liipe, hon fiil friit; niks macht se xtolpere.” (Psal. 119:165)