1. Was hot tich fiilaycht ferwunert wiis tuu tas eyerste mool iwer ti woerheet mit te anere fertseelt host?

WII host tuu tich kexpiirt wiis tuu ti woerheet kefun host? Ti piiplixe inlërnunge khente net taytlicher sin! Tsiimlich sicher host tuu ketenkt: ‘Ah, ale kaar tuun tas kërn hon! Tas tuut tëne sayn leepe ferpesere un een wunerlich hofnung kepe!’ (Psal. 119:105) Tan host tuu mit ale tayn froynte un parente too triwer fertseelt. Un was is pasiirt? Tas hot tich fiilaycht ferwunert, awer ti meyerste hon tas klaych ap kextos.

2-3. Was hon ti meyerste layt in Yeesus sayn taache iwer tëm un sayn pexeet ketenkt?

² Meyer sole uns net ferwunere wën ti anere ti pexeet woo mer preetiche ap xtose. Tenk mool: in Yeesus sayn taache, hot eyer wunere kemacht un tas hot taytlich ketsaycht tas Yeehoowa tëm pay kextan hot; awer noch soo, wolte ti meyerste layt niks fon tëm wise. Tsum payxpiil, Yeesus hot Lasaro uf keruuft, un sayn faynte khonte net saan tas tiise wuner net pasiirt is. Soo wii soo, hon ti yiitixe relichyeese fiirer Yeesus net wii Mesias aan kenom. Tii wolte soo kaar Yeesus un Lasaro um pringe. (Yoo. 11:47, 48, 53; 12:9-11)

³ Awer Yeesus wust xon tas ti meyerste layt net klaape teete tas eyer te Mesias waar. (Yoo. 5:39-44) Un tee hot fer een krup fon Yoohan te Taafer sayn tisipele kesaat: “Froo is tee woo net weeche mich xtolpere tuut.” * (Mat. 11:2, 3, 6) Awer warom hon soo fiil layt Yeesus ap kextos?

4. Was tuun mer in tiise artikel noo kuke?

⁴ In tiise artikel un in tëm neekste, tuun mer tiise frooche noo kuke: Warom hon soo fiil layt aan Yeesus sayn taache uf tëm net keklaapt? Warom tuun soo fiil layt hayt tsu taach unser pexeet ap xtose? Un tas haupste: was khene mer mache fer net xtolpere?

5. Warom hon welche fiilaycht ketenkt tas Yeesus khent net te Mesias sin?

⁵ Fiile sin kextolpert weeche woo un wii Yeesus kroos kewakst is. Tii hon erkhënt tas eyer eene kuute leerer waar un tas eyer wunere kemacht hot. Awer fer tëne, waar eyer ploos te soon fon een aarm tsimerman. Un tee is aach fon Nasarë khom, een xtat woo net wichtich foer ti layt waar. Soo kaar Natanaël, woo is xpeeter een tisipel kewoer, hot am aanfang kesaat: “Khan was kuutes fon Nasarë khome?” (Yoo. 1:46) Fiilaycht hat eyer net kërn ti xtat woo Yeesus kroos kewakst is. Orer es khan sin tas eyer am tenke waar in te profetsii fon Mikeyas 5:2, woo xon foer raus kesaat hot tas te Mesias teet uf te welt khome in Petleheem, net in Nasarë.

6. Was khent ti layt keholef hon se erkhëne tas Yeesus te Mesias waar?

⁶ Was saat ti Piipel? Te profeet Isaiias hot foer raus kesaat tas te Mesias sayn faynte teete sich net ketanke mache ‘mit te kleenichkheete fon sayn leepe’. (Isa. 53:8) Fiile fon tiise kleenichkheete waare xon foer heyer kesaat. Tiise layt miste tsayt kehool hon fer ti informatsyoone noo kuke. Too, teete se raus kriin tas Yeesus in Petleheem uf te welt khom is un tas eyer nookhomer fon tëm kheenich Tawi waar. (Luk. 2:4-7) Tas plats woo Yeesus uf te welt khom is, xtimt aach mit te profetsii fon Mikeyas 5:2. Tan, was fer waar te propleem? Ti layt hon tsu xnel kericht, foer ti informatsyoone noo kuke; un tes weeche, sin se kextolpert.

7. Warom tuun fiile hayt tsu taach Yeehoowa sayn folek ap xtose?

⁷ Pasiirt tas noch hayt? Yawool. In Yeehoowa sayn folek, sin ti meyerste net raych orer important foer ti welt; tes weeche, mëne ti layt tas mer “keweenlich un oone xuul sin”. (Aph. 4:13) Wayl mer net wichtiche relichyeese xuule mache, mëne welche layt tas mer sole net iwer ti Piipel in lërne. Anere saan tas Yeehoowa sayn Tsayer sin een “amerikanix relichyoon”; awer in woerheet, ti meyerste Yeehoowa sayn Tsayer leepe net in te Fereenichte Xtaate fon Amërika. Noch anere hon keheert tas mer net aan Yeesus klaape. Torich ti yoore, hon ti layt uns fiile naame keruuft: “komunister”, “amerikanixe xpyoone”, “ekstremister”... Fiile layt wise net ti woerheet iwer Yeehoowa sayn folek un wën se tiise kexichte heere, xtolpere se.

8. Tëm noo Aphostele sayn Kexicht 17:11, was sole ti layt mache fer se wise weer Yeehoowa sayn folek hayt tsu taach is?

⁸ Was khene ti layt mache fer net xtolpere? Tii mise ti woerheet iwer tiise sache noo kuke. Tas is was Lukas, eene Piipel xrayper, sich aan kextrengt hot fer se mache. Tee hot “ale tinge fom aanfang aan kenau uner suucht”. Tee wolt hon tas ale kaar woo sayn puuch leese teete, “sich kans sicher weyere fon te tinge” woo se iwer Yeesus keheert hate. (Luk. 1:1-4) Ti yuuter in Perëya waare soo wii Lukas kewees. Wën se tas eyerste mool ti kuute notisye iwer Yeesus keheert hon, hon se ti Hepreeyxe Xrifte uner suucht fer se siin ep tas xtime teet. (Lees Aphostele sayn Kexicht 17:11.) * In te selwich aat, mise ti layt hayt was se lërne noo kuke. Tii sole ferklayche was Yeehoowa sayn Tsayer saan mit was ti Piipel saat. Tii prayche aach tas kexicht fom Yeehoowa sayn folek fon unser taache xtutiire. Wën se een “kenau unersuuchung” mache, xtolpere se  net weeche was ti anere saan orer was se friier kemënt hon.

9. Was is pasiirt wii Yeesus een tsayche fom himel net kemacht hot?

⁹ Was Yeesus in kelërnt hot waar fer welche layt net kenuuch kewees. Tii wolte mee hon. Fer se pewayse tas eyer te Mesias waar, hon ti layt tëm kexikt ‘een tsayche fom himel mache’. (Mat. 16:1) Fiilaycht hon se tas tëm ferlangt weeche was se keleest hate in Tanyël 7:13, 14. Awer, es waar noch net ti tsayt fer Yeehoowa tiise profetsii erfiile. Was Yeesus kelërnt hot waar xon kenuuch kewees fer se pewayse tas eyer te Mesias waar. Awer, wayl tee hot net ti wunere woo se wolte kemacht, sin se kextolpert. (Mat. 16:4)

10. Wii hot Yeesus erfiilt was Isaiias iwer te Mesias kexrip hat?

¹⁰ Was saat ti Piipel? Te profeet Isaiias hot iwer te Mesias kexrip: “Tee tuut net xraaye orer hart xpreche; uf te xtroos, lost eyer net sayn xtim keheert wëre.” (Isa. 42:1, 2) In te preetich aarwayt, hot Yeesus net acht iwer sich selepst keruuft. Tee hot net kroose thempele kepaut un hot aach net xtolse un fayne relichyeese tsaych aan ketsoo. Un tee wolt net hon tas ti layt tëm mit ekstra thitele nëne teete. Torich sayn kericht, hot eyer net wunere kemacht ploos fer te kheenich Herotes kefale, opwool Yeesus sayn leepe ins kefoer waar. (Luk. 23:8-11) Es is wërklich woer tas Yeesus etliche wunere kemacht hot. Awer fer tëm, tas haupste waar ti preetich aarwayt kewees. Tee hot soo kaar fer sayn tisipele kesaat: “Weeche tas sin ich khom.” (Mar. 1:38)

11. Was fer ferkheerte mënunge hon welche hayt tsu taach?

¹¹ Pasiirt tas noch hayt? Yawool. Fiile layt ferwunere sich mit te kroose khëriche un sayn tayer tekoratsyoone, mit te relichyeese fiirer sayn thitele, woo wichtich aus siin, un mit te relichyeese fersamlunge, opwool ti meyerste wise net was se petayte un fon woo se heyer khom sin. Toch, ti layt woo aan tiise  khëriche keen, tuun net fiil iwer Kot un sayn tsiil lërne. Uf te aner sayt, ti mënxe woo aan unser fersamlunge khome, lërne was wil Yeehoowa fon uns hon. Unser Raych Saale sin sauwer un keweenlich, oone tayer tekoratsyoone. Tii woo ti kemaynt fiire, penutse net fayne tsaych orer ekstra thitele. Was mer in lërne un klaape khomt fon te Piipel. Soo wii soo, xtolpere fiile layt wayl se mëne tas unser aat fer se aan peete tsu keweenlich is un tas was mer in lërne, xtimt net mit was se heere wole.

12. Tëm noo Hepreeyer 11:1, 6, uf was sole mer unser klaape paue?

¹² Was khene mer mache fer net xtolpere? Te aphostel Phaul hot fer ti kriste woo in Roma keleept hon, kesaat: “Te klaape keet noo was ma heert. Un was ma heert khomt torich tas wort iwer Kristus.” (Rom. 10:17) Tan, fer unser klaape ferxtërke mise mer ti Piipel xtutiire — net in relichyeese fersamlunge keen woo net mit te Piipel xtime, opwool se kroos un xeen sin. Meyer sole een xtark klaape paue woo sich aan te kenau khëntnis xtaypt, wayl “oone klaape is es unmeechlich Kot kefale”. (Lees Hepreeyer 11:1, * 6. *) Tes weeche, prayche mer net een wunerlich tsayche fom himel siin fer uns sicher sin tas mer ti woerheet kefun hon. Fer uns, is es kenuuch ti piiplixe inlërnunge mit acht xtutiire. Tas pringt xon unser tswayfele tsum ën.

13. Weeche was hon fiile Yeesus kritikiirt?

¹³ Yoohan te Taafer sayn tisipele hon sich ferxrok wën se tsu wise kriit hon tas Yeesus sayn tisipele net kefast hon. Yeesus hot aus keleet tas tii praychte tas net mache soo lang wii eyer noch am leepe waar. (Mat. 9:14-17) Noch soo, hon ti fariseer un anere keechner Yeesus kritikiirt wayl tee is net ti tratitsyoone noo kang. Tii sin pees kep wayl tee ti kranke  layt im Samstaach keheelt hot. (Mar. 3:1-6; Yoo. 9:16) Tii hon sich keproost tas tii sin tas kesets fom Samstaach kans kenau noo kang. Awer in te selwich tsayt, hon se khee propleem kesiin aan kexefte im thempel mache. Un wën Yeesus tëne weeche tas kexënt hot, sin se wuutich kep. (Mat. 21:12, 13, 15) Een aner mool hot Yeesus in een sinakook in Nasarë kepreeticht. Ti layt sin pees kep wii eyer payxpiile fon Israël sayn kexicht penutst hot fer se tsayche tas se ekoiistix un oone klaape waare. (Luk. 4:16, 25-30) Fiile sin kextolpert wayl Yeesus net kemacht hot was se kewaart hon. (Mat. 11:16-19)

14. Warom hot Yeesus ti mënxliche tratitsyoone konteniirt woo net mit te Piipel kextimt hon?

¹⁴ Was saat ti Piipel? Yeehoowa hot torich te profeet Isaiias kesaat: “Tiise folek khomt ploos mit wërter tichter pay mich, un eert mich ploos mit lipe. Awer sayn hërts is kans wayt fon mich; un ti aanpeetung woo se mich kepe, xtaypt sich uf te kepoote fon te mënxe, woo waare tëne in kelërnt.” (Isa. 29:13) Yeesus waar richtich kewees wii eyer ti mënxliche tratitsyoone konteniirt hot, woo net mit te Piipel kextimt hon. Ti layt woo kemënt hon tas ti mënxliche reekle un tratitsyoone wichticher wii ti Piipel kewees waare, hon Yeehoowa un te Mesias woo Eyer kexikt hot, ap kextos.

15. Warom hon fiile layt hayt tsu taach Yeehoowa sayn Tsayer net kërn?

¹⁵ Pasiirt tas noch hayt? Yawool. Wii Yeehoowa sayn Tsayer, fayre mer net ti mënxliche tratitsyoone mit te layt, wii ti keportstaache un Waynachte. Mer hon aach khee teel aan te natsyonaalixe feste un keen mer net noo ti tratitsyoone fer ti toote pekraape, woo xtime net mit te Piipel. Tas ales lost ti layt manich mool pees mit uns. Toch, fiile woo weeche tiise uersache xtolpere, tuun fon sayn kans hërts klaape tas Kot tëne sayn aanpeetung aan nëmt. Awer tii khene net Kot kefale wën se raus suuche ti mënxliche tratitsyoone noo keen, xtats ti taytliche inlërnunge fon te Piipel. (Mar. 7:7-9)

16. Was mise mer mache? (Psalm 119:97, 113, 163-165)

¹⁶ Was khene mer mache fer net xtolpere? Meyer prayche een xtark liip tsu Kot sayn kesetse un oryentiirunge ëntwikele. (Lees Psalm 119:97, * 113, * 163-165. *) Wën mer Yeehoowa liipe, xtose mer kwalkee tratitsyoon ap woo tëm net kefalt. Tan, niks tuut unser liip tsu Yeehoowa xteere.

17. Was fer hofnung hate fiile in Yeesus sayn taache iwer te Mesias?

¹⁷ Welche in Yeesus sayn taache wolte een politix ënerung siin. Tëne sayn hofnung waar tas te Mesias teet tëne fon te Romaanix Raych pefraye. Awer, wii se fersuucht hon Yeesus wii kheenich in xtele, hot eyer tas ap kextos. (Yoo. 6:14, 15) Toch anere — too tepay ti priister — hate pang tas Yeesus teet tiise ënerunge mache. Weeche was? Wayl tan, weyere ti romaaner pees un teete se ti macht un autoriteet tsurik hoole, woo se fer ti relichyeese fiirer kep hate. Fiile yuuter hon sich ketanke mit te politik kemacht un tes weeche hon se Yeesus ap kextos.

18. Fer was fer piiplixe profetsiie iwer te Mesias hon ti yuuter khee acht kep?

¹⁸ Was saat ti Piipel? Es is wërklich woer tas fiile profetsiie hon kesaat tas te Mesias teet  een Kriicher wëre un sayn faynte ap kewine. Awer anere profetsiie hon ketsaycht tas, eyerst, mist eyer weeche unser sinte xtërpe. (Isa. 53:9, 12) Tan, warom hate ti yuuter ferkheerte aanunge iwer te Mesias? Ti yuuter wolte wërklich hon tas sayn propleeme fiks resolwiirt weyere. Tan, wën een profetsii tëne net ketiint hot, hon se tëne khee acht kep. (Yoo. 6:26, 27)

19. Weeche was fer ferkheerte mënunge tuun fiil hayt xtolpere?

¹⁹ Pasiirt tas noch hayt? Yawool. Fiile tuun hayt xtolpere wayl mer uns net in te politik rin mexe. Tii mëne tas mer sole een kantitaat in te waal raus suuche. Awer, wën mer een mënx raus suuche teete fer iwer uns rechiire, teete mer in woerheet Yeehoowa ap xtose. (1 Sam. 8:4-7) Ti layt tenke aach tas mer selte xuule un krankehayser paue un anere nutsliche tinge fer ti layt mache. Tii xtolpere wayl mer uns traan hale aan te kuute notisye preetiche, net aan te propleeme fon te welt resolwiire.

20. Tëm noo Yeesus sayn wërter in Matheus 7:21-23, aan was sole mer uns traan hale?

²⁰ Was khene mer mache fer net xtolpere? Ti welt is fol sotsyaalix un politix propleeme. Awer mer sole uns traan hale aan te aarwayt woo Yeesus uns kexikt hot, net aan te propleeme fon te welt resolwiire. (Mat. 28:19, 20) Meyer liipe ti layt un mer khimere uns mit tëne sayn xwiirichkheete. Awer meyer wise tas ti pest aat fer tëne helfe, is tëne in lërne iwer Kot sayn Raych un wii khene se een froyntxaft mit Yeehoowa paue. (Lees Matheus 7:21-23.) *

21. Was sole mer pextimt sin se mache?

²¹ In tiise artikel hon mer iwer 4 xtolpere xteen kexproch. Weeche tëne, hon ti layt Yeesus im eyerste yoer hunert ap kextos. Un weeche ti selwiche uersache wole fiile layt niks mit Yeehoowa sayn folek hayt tsu taach se tuun hon. Awer sin tiise ti eensiche uersache fer se xtolpere? Nee. Im neekste artikel tuun mer iwer noch 4 xtolpere xteen xpreche. Tan, wole mer pextimt sin unser klaape xtark hale un nii mools xtolpere!