ES IS pekhant tas ti ejipter uf tëm papirus * kexrip hon. Kreekixe un romaanixe layt hon tas selwiche kemacht. Awer ploos weeniche layt wise tas tii aach te papirus fer xif paue penutst hon.

Xon mee wii 2.500 yoore tsurik, hot te profeet Isaiias iwer ti layt woo “in te rechyoon fon te fluse fon Etyoopya” kewoont hon, kexrip: ‘Tii hon pexeet mëner iwer tas meer kexikt un tii sin in papirus xif iwer tas waser kang.’ Xpeeter, hot te profeet Yeeremias foer raus kesaat tas ti Mëto-Përsya teet Papiloon fernichte. Tii teete “ti papirus xif” fon te papilooner ferprëne, tas se net aus rayse khente. (Isa. 18:1, 2; Yee. 51:32)

Ti Piipel is fon Kot inspiriirt. (2 Tim. 3:16) Tes weeche ferwunert uns net tas ti arkeooloker xpeeter raus kefun hon tas ti layt in piiplixe tsayte wërklich xif fon papirus kemacht hon. Tsum payxpiil: tii hon pewaysunge kefun tas ti ejipter xif fon papirus kepaut hon.

Ti arkeooloker hon in te ejiptixe kreeper pilter aan te wënt kefun. Tii tsayche wii ti layt papirus samer keraft hon un aach wii se fon papirus xif kepaut hon. Ti mëner hon te papirus ap kexnit un tan hon se te papirus in leste kemacht. Nochter, hon se ti kanse leste mitsamer ferpuun. Te papirus sayn xtëm sin tray ekich; un wën ma tii samer pint, wëre se xtark un es keet khee waser torich. Tëm noo een puuch iwer tas Ejiptix Kexicht, khonte ti papirus xif mee wii 17 meter lang sin un uf yeete sayt fon tas xif, khonte se 10 orer 12 reeme hin tuun fer tas xif lënke.

Neewich te Nilo flus waars kans keweenlich tas se fiil papirus kefun hon. Un noch: es waar net soo xweyer een papirus xif paue. Soo kaar wën ti layt aan kefang hon kroose xif mit hols paue, siits aus tas fiile fixer un yachter wayter kleene xif fon papirus penutst hon.

Un fer een lang tsayt, hon ti layt tas noch kemacht. Te kreekixe xrayper Plutarko, woo in te tsayt fon te eyerste kriste keleept hot, hot kesaat tas etliche layt noch xif fon papirus penutst hon.