1-2. Was fer propleeme tuun fiile Yeehoowa sayn Tsayer mit mache?

TE APHOSTEL Phaul hot Timoteus uf kemuut sayn pestes in te preetich aarwayt mache. (2 Tim. 4:5) Un meyer, als kriste, wole tiise aanreet aach aan nëme. Awer manich mool is tas net laycht. Fiile priiter un xwestere prayche koraaj hon wën se preetiche. (2 Tim. 4:2) Tsum payxpiil, tenk aan unser priiter woo in lënter leepe woo een teel orer unser kans aarwayt ferpoot is. Tii khene soo kaar in kexpërt wëre wën se preetiche keen!

² Yeehoowa sayn tiiner tuun fiile propleeme mit mache woo khente sayn muut xteele. Tsum payxpiil: fiile priiter prayche haufe xtune xafe fer sayn familye fersoriche. Tii teete kërn mee in te preetich aarwayt mache, awer am ën fon te woch sin se aarich miit. Anere khene ploos een pisye in te preetich aarwayt xafe wayl se krank orer alt sin; etliche khene soo kaar net aus sayn haus keen. Un noch anere mëne tas se khee weyert foer Yeehoowa hon orer tas se unutslich sin. Mary, * een xwester woo im Mitel Oryent leept, saat: “Ich prayche mich soo fiil aan xtrenge fer keeche mayn nekatiiwe xpiirunge khëmpfe, tas am ën sin ich kaput miit. Too, xpiire ich mich xultich wayl tas xteelt ti kraft un ti tsayt woo ich in te preetich aarwayt penutse teet.”

3. Was tuun mer in tiise artikel lërne?

³ Ekaal unser xwiirichkheete, Yeehoowa khan uns ti kraft woo mer prayche kepe fer unser pestes in tëm sayn aarwayt mache. Toch, wii macht Eyer tas? Tas is was mer in tiise artikel lërne tuun. Awer eyerst, wole mer siin wii Yeehoowa Phaul un Timoteus ferxtërkt hot fer sayn aarwayt fërtich pringe, opwool ti propleeme woo se mit kemacht hon.

4. Was fer propleeme hot Phaul kehat?

⁴ Phaul hot fiile propleeme kehat. Hauptseechlich wën eyer ferxlaa, in kexpërt un neekst um keprung waar, praucht eyer Yeehoowa sayn hilef hon. (2 Kor. 11:23-25) Als mool, praucht eyer aach keeche ti unmuutichkheet khëmpfe. Un tee hot sich net kexeemt too triwer fertseele. (Rom. 7:18, 19, 24) Phaul hat aach een propleem mit te kesuntheet, woo wii een “taarn ins flayx” waar. Un tee wolt wërklich hon tas Yeehoowa es wech hoole teet. (2 Kor. 12:7, 8)

5. Was khont Phaul mache opwool ti xwiirichkheete woo eyer phake praucht?

⁵ Phaul hot wërklich fiile xwiirichkheete kephakt. Awer Yeehoowa hot tëm ti kraft kep fer sayn aarwayt wayter mache. Kuk mool ales was Phaul hin kriit hot. Tsum payxpiil: torich een tsayt waar eyer in een haus in Roma inkexpërt. Tat, hot eyer fer fiile layt kepreeticht — too tepay yiitixe fiirer un fiilaycht rechiirente. (Aph. 28:17; Fili. 4:21, 22) Tee hot aach fer ti Pretoryaner soltaate un ti mënxe woo tëm pesuucht hon kepreeticht. (Aph. 28:30, 31; Fili. 1:13) Torich tiise selwich tsayt, hot Kot Phaul penutst fer priife xraype, woo pis hayt ti woere kriste helfe. Phaul sayn payxpiil hot aach ti kemaynt in Roma ferxtërkt. Tes weeche, hon ti priiter “noch mee koraaj [ketsaycht] fer tas wort fon Kot oone pang se xpreche”. (Fili. 1:14) Kewis wolt Phaul noch mee mache. Awer tee hot tas pestes in sayn situatsyoon kemacht, un weeche tas sin “ti kuute notisye ferprayt” kep. (Fili. 1:12)

6. Tëm noo 2^te Korinter 12:9, 10, was hot Phaul keholef sayn tiinst aarwayt kuut mache?

⁶ Phaul hot kemërkt tas ales was eyer in Yeehoowa sayn aarwayt mache khont, waar weeche Kot sayn kraft, net weeche tëm sayns. Tee wust aach tas “[Kot sayn] macht is in te xwacheet kans ketsaycht”. (Lees 2^te Korinter 12:9, 10.) * Torich sayn hayliche kayst, hot Yeehoowa Phaul ti kraft kep fer sayn preetich aarwayt kuut mache soo kaar foer ti propleeme, wii ti yachtung un inxpërtnung.

7. Was fer propleeme praycht Timoteus iwerkhome fer sayn aarwayt kuut mache?

 ⁷ Timoteus — Phaul sayn yunge froynt — praycht aach Yeehoowa sayn kraft kriin fer sayn aarwayt mache. Tee is mit Phaul in sayn lang misyoneere reese kang. Un Phaul hot Timoteus aach in anere reese kexikt fer ti kemaynte pesuuche un uf muute. (1 Kor. 4:17) Im xtant, hot Timoteus ketenkt tas eyer net kuut kenuuch waar fer ti aarwayt mache. Un khan sin tas, weeche tas, hot Phaul tëm kesaat: “Los nii tas yemant tich niter xtelt wayls tuu yung pist.” (1 Tim. 4:12) Un torich tiise tsayt, hat Timoteus sayn aychne taarn ins flayx — tee waar “ofts mool krank” kewees. (1 Tim. 5:23) Awer tee wust tas Yeehoowa sayn xtarke hayliche kayst khont tëm ti kraft kepe fer wayter preetiche un sayn priiter tiine. (2 Tim. 1:7)

8. Wii tuut Yeehoowa sayn folek hayt tsu taach ferxtërke?

⁸ Hayt, Yeehoowa kept “iwermeesich kraft” fer sayn folek. Soo, kriin se tëm wayter troy tiine. (2 Kor. 4:7) Fer uns ferxtërke un uns helfe troy tsu tëm plaype, xenkt uns Yeehoowa 4 hilfe. Was sin se? Tas kepeet, ti Piipel, unser priiter un xwestere, un ti preetich aarwayt. Wole mer yeete eene fon tiise hilfe noo kuke.

9. Wii khan tas kepeet uns helfe?

⁹ Yeehoowa ferxtërkt uns torich tas kepeet. In Ëfeser 6:18, saat uns Phaul tas mer sole “yeete xtun” tsu Kot peete; tan, tuut Eyer uns ferxtërke. Jonnie, woo in Poliiwya leept, hot kemërkt wii Yeehoowa tëm keholef hot wii eyer fiile xwiirichkheete mit kemacht hot. Sayn fraa un sayn eltere sin in te selwich tsayt aarich krank kewoer. Tas waar aarich xweyer fer Jonnie kewees ti tray uf phase. Es is traurich, awer sayn mama is kextorep, un es hot lang ketauert pis tas sayn fraa un sayn papa noch mool kuut traan kep sin. Jonnie saat iwer tiise xweyere tsayte: “Wën ti soriche mich iwerlaat hon, hot es mich imer keholef tsu Yeehoowa peete un tëm aus leye wii ich mich kexpiirt hon.” Yeehoowa hot Jonnie ti kraft kep fer aus se hale. Ronald, een elteste in Poliiwya, hot tsu wise kriit tas sayn mama kreeps hat. Een moonat xpeeter, is se kextorep. Was hot tëm torich tiise xweyere tsayte keholef? Tee fertseelt: “Imer wën ich tsu Yeehoowa peete, saan ich tëm ales was ich xpiire. Ich wees tas Eyer khan mich peser wii ti anere ferxteen; un in woerheet, peser wii mich selepst.” Manich mool, fine mer uns soo iwerlaat, tas mer kriin net mit wërter saan was mer am xpiire sin. Awer Yeehoowa laat uns in tsu tëm peete soo kaar wën mer kriin net unser xpiirunge richtich aus leye. (Rom. 8:26, 27)

10. Tëm noo Hepreeyer 4:12, warom is es wichtich tas mer ti Piipel leese un too triwer noo tenke?

¹⁰ Yeehoowa ferxtërkt uns torich ti Piipel. Phaul hot ti Piipel kelees fer kraft un troost kriin. Meyer prayche tas selwich mache. (Rom. 15:4) Wën mer ti Piipel leese un too triwer noo tenke, khan Yeehoowa sayn hayliche kayst penutse fer uns lënke. Tan, kriin mer se siin wii ti Piipel in unser situatsyoon uns helfe khan. (Lees Hepreeyer 4:12.) * Ronald, iwer weem mer kraat fertseelt hon, saat: “Mayn kewoonheet is yeete nacht een xtik fon te Piipel leese; un tas lost mich aarich froo. Ich tenke aan Yeehoowa sayn kwaliteete traan un wii liiplich eyer mit sayn tiiner kewees waar. Tas tuut mich wërklich ferxtërke.”

11. Wii hot ti Piipel een xwester woo traurich waar ferxtërkt?

 ¹¹ Wën mer aan te Piipel triwer noo tenke, kriin mer unser propleeme in te richtich aat siin. Kuk mool wii ti Piipel een xwester keholef hot, woo sayn man im toot ferloer hat. Een elteste hot se kesaat tas wën se tas puuch fon Yoop leese teet, teet se nutsliche lisyoone fine. Am aanfang, hot se Yoop kritikiirt weeche tëm sayn ferkheerte mënunge. In sayn khop, hot se tëm kesaat: ‘Oo Yoop, los mool noo soo nekatiiw sin!’ Awer tan, hot se was kemërkt: tii hot sich kraat soo wii Yoop aan kextelt. Tas hot tëne keholef sayn aanxtelung ënere. Un tas hot tëne aach kraft kep fer mit tëm toot fon sayn man peser um keen.

12. Wii penutst Yeehoowa ti priiter un xwestere fer uns ferxtërke?

¹² Yeehoowa ferxtërkt uns torich unser priiter un xwestere. Phaul hot kexrip tas eyer wolt wërklich mit te priiter un xwestere sin fer sich naner uf muute. (Rom. 1:11, 12) Mary, iwer weem mer foner traan kexproch hon, liipt mit sayn priiter un xwestere sin. Tii fertseelt: “Fer mich ferxtërke, hot Yeehoowa priiter un xwestere penutst woo wuste net iwer mayn propleeme. Tii hon mich was ufmuutich kesaat orer een tseetelche kexikt; tas waar kraat was ich praucht hon! Etwas woo mich aach helfe tuut, is mit xwestere fertseele woo ti selwich propleem hate. Ich lërne wërklich fiil mit was se kemacht hon. Un ti elteste lose mich imer sicher tas ti kemaynt mich liipt.”

13. Wii khene mer uns eene ti anere in te fersamlunge ferxtërke?

¹³ Eene fon te peste xtune fer uns naner uf muute is in te fersamlunge. Awer wii khene mer unser priiter in te fersamlunge uf muute? Een aat is tëne saan tas mer tëne liipe un tas mer petanklich weeche sayn aarwayt sin. Tsum payxpiil, kuk mool was een elteste woo Peter heest, foer een fersamlung kemacht hot. Es waar een xwester in te kemaynt woo ferhayrat waar mit eene man woo net Yeehoowa sayn Tsayer is. Peter hot tëne kesaat: “Tich too hiir mit tayn 6 khiner siin muut mich wërklich uf! Tii sin imer soo xeen aan ketsoo un imer fërtich fer antworte in te fersamlung kepe.” Ti xwester sayn aue sin terek fol treene kep; un sayn hërts waar soo petanklich, tas se kesaat hot: “Pruuter, tuu khanst tich net foer xtele wii fiil praycht ich tas hayt heere.”

14. Wii tuut ti preetich aarwayt uns helfe?

¹⁴ Yeehoowa ferxtërkt uns torich ti preetich aarwayt. Wën mer preetiche, fine mer uns kuut un uf kemuut, ekaal op ti layt uns heere orer net. (Xpr. 11:25) Een xwester woo Stacy heest, hot kemërkt wii fiil ti preetich aarwayt uns ferxtërke khan. Wën yemant fon sayn familye tesasosiirt waar, is se aarich traurich kep. Tii hot sich selepst kefroot: ‘Khent ich was kemacht hon fer tëm helfe?’ Noo lose too triwer tenke waar net laycht kewees. Was hot se keholef sich peser fine? Ti preetich aarwayt! Wën se kepreeticht hot, hot se sich aan te layt fom teritooryum traan kehal, wayl tii praychte ti woerheet lërne. Stacy fertseelt: “Torich tiise tsayt, Yeehoowa hot mich een Piipel xtutënt kep woo xnel foran kang is. Tas hot mich fiil uf kemuut. Mayn kreeste hilef is ti preetich aarwayt.”

15. Was lërnst tuu fon Mary sayn wërter?

¹⁵ Weeche sayn situatsyoon, fiile priiter tenke tas se khene net fiil in Yeehoowa sayn aarwayt mache. Finst tuu tich als mool soo? Wën yaa, ferkes net: Yeehoowa kefalt sich wën mer unser pestes tëm kepe. Kuk mool was mit Mary pasiirt is, iwer weem mer kraat kexproch hon. Tii hot sich pis een aner plats kewanert un tat hon ti layt een aner xprooch fertseelt. Weeche tas, hot se sich unutslich kexpiirt. Tii  leet aus: “Fer een tsayt, in te preetich aarwayt, khont ich ploos phaar wërter saan, een Piipel tekst leese orer een pleetche kepe.” Wën se sich ferklaycht hot mit te anere layt woo khonte ti xprooch kenau xpreche, hot se sich net kuut kenuuch kefun. Awer Mary hot sayn aanxtelung keënert. Tii hot kemërkt tas Yeehoowa khont tëne penutse, opwool se net soo kwap in te xprooch waar. Tii saat: “Opwool ti piiplixe inlërnunge keweenlich sin, khene se ti layt sayn leepe ënere un rete.”

16. Was khan helfe tii woo wole preetiche awer khene net aus sayn haus keen?

¹⁶ Yeehoowa wees tas etliche woo preetiche wole, khene net aus sayn haus keen. Is tas tayn situatsyoon? Tan, Yeehoowa khan tich helfe fer ti toktere un fer ti layt woo tich uf phase preetiche. Ferklaych net was tuu friier kemacht host mit was tuu hayt mache tuust. Tas tuut tich ploos oone muut lose. Xtats tas, xtreng tich aan fer se mërke wii Yeehoowa tich hayt am helfe is. Tas tuut tich ti kraft kepe fer kwalkee propleem mit frooheet aus hale.

17. Tëm noo Eklesyastes 11:6, warom sole mer wayter preetiche soo kaar wën mer khene net ti resultaate klaych siin?

¹⁷ Wën mer preetiche, tuun mer soome fon te woerheet seeye. Awer mer wise net was fer soome tuun wortsle tsiie un aan fange se wakse. (Lees Eklesyastes 11:6.) * Tsum payxpiil, kuk mool Barbara sayn speryens. Tii hot xon mee wii 80 yoore un tuut eftas torich telefoon un priife preetiche. In eene fon sayn priife, hot se A Sentinela 1^te Mërts fon 2014 mit kexikt. Tas theema waar “O que Deus tem feito por você?” Tii wust net, awer tii hot te priif fer een pheyerche kexikt woo waar net mee Yeehoowa sayn Tsayer kewees. Tii hon tas piichelche noo un noo kelees. Fer te man, waar es wii wën Yeehoowa mit tëm am xpreche weyer. Tan, hot tas pheyerche aan kefang in te fersamlunge keen un — noo mee wii 27 yoore — sin se noch mool Yeehoowa sayn Tsayer kep. Wii Barbara tas tsu wise kriit hot, hot tas tëne aarich uf kemuut un ferxtërkt — tas waar te resultaat fon ploos eene fon sayn priife!

18. Was mise mer mache fer nutse fon Kot sayn kraft kriin?

¹⁸ Yeehoowa xenkt uns fiile hilfe fer uns ferxtërke: tas kepeet, ti Piipel, unser priiter un xwestere, un ti preetich aarwayt. Wën mer tiise hilfe kuut penutse, tsayche mer tas mer klaape tas Yeehoowa wil un khan uns helfe. Wole mer wayter aan unser Fater im himel traue, woo frayt sich wën eyer khan “mit sayn kraft ti mënxe helfe woo tëm mit kans hërts liipe”. (2 Kro. 16:9)