XTUUTYUM ARTIKEL 21
Apokalipsis — Was petayt tiise puuch fer tayn futuer?
“Amen! Khom, Hër Yeesus.” (APOKALIPSIS 22:20)
LIIT 142 Ti hofnung halt uns fest
WAS TUUN MER SIIN? *
1. Was fer wichtich ëntxlus mus yeete eene mache?
TI LAYT hayt mise een wichtich ëntxlus mache: tuun se Yeehoowa pay xteen wii te kerechte Rechiirente fom uniwërsum? Orer tuun se Sayn xlechte faynt, Satanaas te Taywel, pay xteen? Yeete persoon mus sayn sayt raus suuche. Tëm noo sayn ëntxlus, tuun se tas eewiche leepe kriin orer net. (Mat. 25:31-33, 46) Torich ti “kroos tripulatsyoon”, tuut yeete persoon een mark kriin — fer lepeentich plaype orer fer fernicht se wëre. (Apo. 7:14; 14:9-11; Ese. 9:4, 6)
2. (a) Was tuut Hepreeyer 10:35-39 uns uf muute se mache? (b) Wii khan tas puuch Apokalipsis uns helfe?
2 Lees Hepreeyer 10:35-39. * Host tuu raus kesuucht Yeehoowa sayn rechiirung pay xteen? Tan, host tuu een kuut ëntxlus kemacht. Sicher, wilst tuu aach anere helfe te richtich ëntxlus mache. Un ti informatsyoone in Apokalipsis khene tich helfe tas hin kriin. Tiise interesante puuch saat was mit Kot sayn faynte pasiire tuut un saat aach was fer seechen tuun Yeehoowa sayn troye tiiner kriin. Es weyer aarich kuut tiise wichtiche woerheete xtutiire! Es tuut unser pextimung ferxtërke fer Yeehoowa wayter aan peete. Un, mit was mer lërne, khene mer anere helfe raus suuche Yeehoowa tiine un tas wayter mache.
3. Was tuun mer in tiise artikel lërne?
3 Was tuut pasiire mit tëne woo Kot sayn rechiirung pay xteen? Un was pasiirt mit tëne woo tas roote wilte tier pay xteen, woo in Apokalipsis foer khomt? Tas is was mer in tiise artikel lërne.
WAS PASIIRT MIT KOT SAYN TROYE TIINER?
4. Was fer krup siit te aphostel Yoohan mit Yeesus im himel?
4 Te aphostel Yoohan hot 2 krupe in een wisyoon kesiin. Ti 2 tuun Yeehoowa sayn rechiirung pay xteen un kriin tas eewiche leepe. Im eyerste krup, sin 144.000 layt. (Apo. 7:4) Tii sin fon te eyert raus kesuucht kep fer teel fon een rechiirung, orer Raych, mit Yeesus im himel mache. In te wisyoon, hot Yoohan se kesiin, mit Yeesus, im himlixe Përich Syoon. (Apo. 14:1) Mitsamer, tuun se iwer ti eyert rechiire. (Apo. 5:9, 10; 14:3, 4)
5. Was tuut klaych pasiire mit te kesalpte woo noch uf te eyert sin?
5 Fon te tsayt fon te aphostele pis hayt, tausente layt sin raus kesuucht kep fer teel fon tiise 144.000 mache. (Luk. 12:32; Rom. 8:17) Awer, es is fer Yoohan kesaat kep, tas ploos een kleen numer fon tiise krup teet lepeentich too uf te eyert sin torich ti letste taache. Foer tëm aanfang fon te kroos tripulatsyoon, tuun se te letste “selo” fon Yeehoowa sayn tsuxtimung kriin. (Apo. 7:2, 3; 12:17) Tan, in een momënt torich ti kroos tripulatsyoon, wërt tiise krup tsum himel kenom. Tii tuun te rest fon te 144.000 trefe, woo xon troy tsu Kot kextorep sin. Un tat im himel, tuun se mit Yeesus in Kot sayn Raych rechiire. (Mat. 24:31; Apo. 5:9, 10)
6-7. (a) Was fer krup siit Yoohan noo te 144.000 siin un was wise mer iwer tëne? (b) Warom sole ti kesalpte un tas “kroose folek” acht kepe fer Apokalipsis 7?
6 Noo tiise himlix krup siin, siit Yoohan een “kroos folek”. Anerste wii ti 144.000, ti Piipel saat net wii fiil layt teel fon tiise krup mache. (Apo. 7:9, 10) Was wise mer iwer tëne? Een engel saat fer Yoohan: “Tas sin tii woo fon te kroos tripulatsyoon raus khom sin; un tii hon sayn lang tsaych kewext un im pluut fom Lam ways kemacht.” (Apo. 7:14) Noo te kroos tripulatsyoon iwerleepe, tuut tiise “kroos folek” too uf te eyert woone un wunerliche seechen kriin. (Psal. 37:9-11, 27-29; Xpr. 2:21, 22; Apo. 7:16, 17)
7 Ekaal ep tayn hofnung im himel orer too uf te eyert leepe is, khanst tuu tich siin too in tiise wërter woo in Apokalipsis 7 xteen? Es weyer kuut wëns tuu tas mache teest. Tas wërt een wunerlich tsayt fer ti 2 krupe fon Yeehoowa sayn tiiner sin. Xtel tich mool foer ti frooheet woo mer xpiire tuun wayl mer raus kesuucht hon Yeehoowa sayn Raych pay xteen! Awer, was noch saat uns tas puuch Apokalipsis iwer ti kroos tripulatsyoon? (Mat. 24:21)
WAS PASIIRT MIT KOT SAYN FAYNTE?
8. Wii tuut ti kroos tripulatsyoon aan fange un wii tuun ti meyerste layt sich aan xtele?
8 Im letste artikel, hon mer kelërnt tas klaych tuun ti politixe orkanisatsyoone fon tiise welt Papiloon ti Kroos atakiire, woo al ti falxe relichyoone petayt. (Apo. 17:16, 17) Tas wërt te aanfang fon te kroos tripulatsyoon sin. Wën tas pasiirt, meechte fiile layt aan fange Yeehoowa tiine? Nee. Apokalipsis 6 saat tas kraat tas keeche teel pasiire tuut. Wën ti situatsyoon xlim wërt, tuun tii woo Yeehoowa net tiine, xuts suuche in te politixe un ekonoomixe orkanisatsyoone fon tiise welt, woo mit përiche ferklaycht sin. Wayl ti layt net raus suuche Yeehoowa sayn Raych pay xteen, tuut Eyer se wii faynte siin. (Luk. 11:23; Apo. 6:15-17)
9. Torich ti kroos tripulatsyoon, wii wërts taytlich tas Yeehoowa sayn tiiner anerste sin un was tuut weeche tas pasiire?
9 Torich ti xlim tsayt fon tripulatsyoon, wërts taytlich tas Yeehoowa sayn tiiner anerste sin. Ploos tii tuun Kot wayter aan peete un ploos tii tuun “tas wilt tier” net pay xteen. (Apo. 13:14-17) Wayl se troy tsu Yeehoowa plaype, wëre Kot sayn faynte aarich pees. Tes weeche, een krup fon natsyoone tuut Yeehoowa sayn folek uf te kans eyert atakiire. Ti Piipel nënt tas wii te atak fon Kok fon Makok. (Ese. 38:14-16)
10. Tëm noo Apokalipsis 19:19-21, wii tuut Yeehoowa sich aan xtele foer te atak keeche sayn folek?
10 Wii tuut Yeehoowa sich aan xtele foer tiise xrooe atak? Tee saat uns: “Mayn kroos wuut tuut aan keen.” (Ese. 38:18, 21-23) Apokalipsis 19 saat was tan pasiirt. Yeehoowa xikt sayn Soon fer Sayn folek xitse un sayn faynte ap kewine. Yeesus un “tas militeer im himel” — too tepay ti troye engele un ti 144.000 — tuun keeche Kok fon Makok khëmpfe. (Apo. 17:14; 19:11-15) Was is te resultaat fon tiise kriich? Al ti layt un orkanisatsyoone woo sich keeche Yeehoowa xtele, wëre fernicht. (Lees Apokalipsis 19:19-21.) *
NOOM KRIICH, EEN HAYRAT
11. Was is tas haupste tings woo im puuch Apokalipsis pasiirt?
11 Fiile troye layt tuun ti fernichtung fon Kot sayn faynte iwerleepe. Xtel tich mool foer wii kroos wërt tëne sayn frayt un wii froo wërt tiise tsayt sin! Im himel, tuut es aach een kroos frooheet kepe noo tas Papiloon ti Kroos fernicht wërt. (Apo. 19:1-3) Awer, etwas tuut noch een kreeser frooheet pringe. Tas is, in woerheet, tas haupste tings woo im puuch Apokalipsis pasiirt: “ti hayrat fon tëm Lam”. (Apo. 19:6-9)
12. Tëm noo Apokalipsis 21:1, 2, wën pasiirt ti hayrat fon tëm Lam?
12 Wën pasiirt ti hayrat? Ti 144.000 al wëre xon im himel klaych foer te Armaxeton kriich; awer, tas is noch net ti tsayt fer ti hayrat fom Lam mache. (Lees Apokalipsis 21:1, 2.) * Ti hayrat fon tëm Lam pasiirt noom Armaxeton kriich, wën Kot sayn faynte al xon fernicht kep sin. (Psal. 45:3, 4, 13-17)
13. Was tuut in te hayrat fon tëm Lam pasiire?
13 Was tuut in te hayrat fon tëm Lam pasiire? Een hayrat macht een man un een fraa eenich. Kraat soo, ti hayrat fon tëm Lam tuut te Kheenich Yeesus Kristus un sayn “praut” — ti 144.000 — eenich mache. Tiise hayrat xtelt fest ti nay rechiirung woo ti eyert torich 1.000 yoore rechiirt. (Apo. 20:6)
EEN WUNERLICH XTAT UN TAYN FUTUER
Apokalipsis 21 saat tas ti Nay Yeruusalem khomt ‘fom himel runer, yaa, fon Kot heyer’. Torich ti Tausent Yoore Rechiirung, tuut tii fiile seechen fer ti foliche mënxheet pringe (Kuk ti apsetse 14-16.)
14-15. Mit was tuut Apokalipsis 21 ti 144.000 ferklayche? (Kuk tas pilt am aanfang fom piichelche.)
14 Apokalipsis 21 tuut tan ti 144.000 mit een iwer xeen xtat ferklayche: ti “Nay Yeruusalem”. (Apo. 21:2, 9) Tiise xtat hot 12 funtamente xteen; uf tëne sin “ti naame fon te 12 aphostele fom Lam” kexrip. Warom waar tas was ekstras fer Yoohan kewees? Wayl tee hot sayn aychne naame tat kesiin, uf eene fon tiise xteen kexrip. Tas waar wërklich een kroos eer! (Apo. 21:10-14; Ëfe. 2:20)
15 Es kept kheen xtat woo khan mit te Nay Yeruusalem ferklaycht wëre. Sayn haupst xtroos is fon phuer kolt. Tii hot 12 toore woo fon phërle kemacht sin. In sayn maure un funtamente, kepts weyertliche xteen. Un ti xtat is perfekt kemeest kep. (Apo. 21:15-21) Awer es feelt etwas in te xtat un Yoohan hot tas kemërkt. “Ich hon khee thempel in te xtat kesiin — saat eyer —, wayl Yeehoowa Kot, te Ale mechtiche, is sayn thempel, soo wii aach te Lam. Ti xtat praucht net ti sun un aach net te moon fer iwer tii xayne, wayl Kot sayn hërlichkheet lost se hel; un tëne sayn lamp is te Lam.” (Apo. 21:22, 23) Tii woo teel fon te Nay Yeruusalem mache, sin pay Yeehoowa. (Apo. 22:3, 4) Un noch, wën se haylich tiinst fer Yeehoowa mache, wëre se fon Yeesus kefiirt, woo xon Hooche Priister im himel is. (Hep. 7:27) Tes weeche, sin Yeehoowa un Yeesus te thempel fon te xtat.
Weer tuut nutse kriin fon te seechen woo wii een “flus” un “peem” pexrip sin? (Kuk ti apsetse 16-17.)
16. Was tuut mit te mënxheet pasiire torich ti Tausent Yoore Rechiirung?
16 In tiise xtat tenke, pringt fiil frooheet fer ti kesalpte. Awer, tii woo ti eyertlich hofnung hon, sole sich aach too traan interesiire. Torich ti Tausent Yoore Rechiirung, tuut ti Nay Yeruusalem fiil seechen tsu te eyert pringe. Yoohan siit tiise seechen wii “een flus fon waser fon leepe” am laafe. Un uf te tswaay sayte fom flus, kepts “peem fom leepe” un tii hon pleter woo penutst wëre fer ti “natsyoone heele”. (Apo. 22:1, 2) Al ti mënxe woo in tiise tsayt leepe, kriin ti xans fer nutse fon tas ales hon. Xrit noo xrit, wëre al ti mënxe woo Yeehoowa aan heere, perfekt. Nimant tuut mee krank wëre, phayn xpiire, orer weeche traurichkheet prile. (Apo. 21:3-5)
17. Tëm noo Apokalipsis 20:11-13, weer kriit nutse fon te Tausent Yoore Rechiirung?
17 Weer tuut nutse kriin fon al tiise wunerliche tinge? Tsum eyerst, tas kroose folek woo te Armaxeton iwerleept un aach ti khiner woo in te nay welt uf te welt khome khene. Awer, Apokalipsis 20 tuut aach ferxpreche tas ti toote tsurik tsum leepe keprung wëre. (Lees Apokalipsis 20:11-13.) * Ti “kerechte”, troye layt woo in te ferkangne yoore kextorep sin, un “unkerechte” layt — woo net een kuut xans hate fer iwer Yeehoowa lërne — wëre uf keruuft fer too uf te eyert leepe. (Aph. 24:15; Yoo. 5:28, 29) Wil tas saan tas, in te Tausent Yoore Rechiirung, wëre ale kaar tsum leepe uf keruuft? Nee. Tii woo fer kërn ti keleechenheet net aan kenom hon fer Yeehoowa tiine, wëre net uf keruuft. Tii hate xon sayn xans. Un tii hon ketsaycht tas se net fertiine im Paratiis leepe. (Mat. 25:46; 2 The. 1:9; Apo. 17:8; 20:15)
TI LETST PROOP
18. Was wërt ti situatsyoon uf te eyert sin am ën fon te 1.000 yoore?
18 Am ën fon te 1.000 yoore, tuun al uf te eyert xon perfekt sin. Ti sint, woo mer fon Aatam keërpt hon, tuut uns net mee petrefe — tiise ferfluuchung wërt kans wech kenom! (Rom. 5:12) Soo, tii uf te eyert tuun “tsum leepe khome” am ën fon te 1.000 yoore, wayl tii tuun perfekt wëre. (Apo. 20:5)
19. Warom is es neetich een letst proop mache?
19 Meyer wise tas Yeesus troy keplip is wii Satanaas tëm keproopt hot. Awer, tuun al ti perfekte mënxe troy tsu Kot plaype wën Satanaas tëne proopt? Yeete eene mus tiise frooch antworte wën Satanaas loos kemacht wërt, am ën fon te 1.000 yoore. (Apo. 20:7) Tii woo troy torich tiise letst proop plaype, tuun eewiche leepe un woere frayheet kriin. (Rom. 8:21) Awer tii woo sich repeliire, wëre fer imer fernicht, tepay mit tëm Taywel un sayn temoone. (Apo. 20:8-10)
20. Wii xpiirst tuu tich iwer ti wunerliche profetsiie woo in Apokalipsis xteen?
20 Meyer hon khorts kexproch iwer fiile xtike fom puuch Apokalipsis. Wii xpiirst tuu tich too triwer? Es is wunerlich uns selepst siin in tiise profetsiie, kël? Kewis, pist tuu aach uf kemuut kep fer anere in laate fer Yeehoowa in een phuer aat aan peete. (Apo. 22:17) Meyer tuun hërtslich waarte was klaych pasiire tuut un meyer saan was te aphostel Yoohan kesaat hot: “Amen! Khom, Hër Yeesus.” (Apo. 22:20)
LIIT 27 A vitória dos filhos de Deus
[Fuusnoote]
^ Tas is te letste artikel in te sekwens iwer tas puuch Apokalipsis. In tiise artikel, tuun mer siin tas Yeehoowa sayn troye tiiner tuun een froo futuer kriin; awer tii woo sich keeche Kot sayn Raych xtele, tuun een xeemlich ën hon.
^ (Hepreeyer 10:35-39) Tes weeche, tuut net im xtich lose ayre koraaj, woo raychlich peloont wërt. 36 Wayl teyer mist aus hale fer Kot sayn wile fërtich mache un siin ti erfiilung fon Sayn ferxpreche. 37 Wayl, ploos “noch een kleen pisye tsayt”, un “tee woo khome tuut, khomt, un tee tuut sich net ferxpeete”. 38 “Awer mayn kerechte tuut weeche te klaape leepe”, un “wën eyer tsurik keet, tuun ich mich net fon tëm kefale”. 39 Awer, meyer sin net fon tëne woo tsurik fer ti fernichtung keen, awer fon tëne woo klaape hon fer tas leepe rete.
^ (Apokalipsis 19:19-21) Un ich hon kesiin tas wilt tier un ti kheeniche fon te eyert mit sayn militeer fersamelt fer kriiche keeche tee woo uf tëm kaul kehokt hot un keeche sayn militeer. 20 Tas wilt tier is kefang kep, un mit iim, te falx profeet woo foer tëm ti sinaale kemacht hot, woo hiner kang hot tii woo ti mark fom wilt tier kriit hate un tii woo sayn pilt aan kepeet hon. Noch lepeentich, waare ti tswaay in te ferprëntne lakoo, woo mit xweewel prëne tuut, hin kexmis kep. 21 Awer ti anere sin um keprung kep mit een lang xwaart woo raus khom is fom maul fon tëm woo ufm kaul kehokt hot. Un ti kanse feechle hon sich fon tëne sayn flayx sat kefrest.
^ (Apokalipsis 21:1, 2) Ich hon een naye himel un een nay eyert kesiin, wayl te ferkangne himel un ti ferkangne eyert sin rom kang, un tas meer tuut xon net mee eksistiire. 2 Ich hon aach ti haylich xtat kesiin — ti Nay Yeruusalem — fom himel runer keen, yaa, fon Kot heyer. Un tii waar fërtich kewees soo wii een praut woo fer sayn man in kericht is.
^ (Apokalipsis 20:11-13) Ich hon een kroose ways troon kesiin un aach Tee woo tat truf kesetst hot. Foer tëm sin ti eyert un te himel aus keris, un is kheen plats kefun woer fer tëne. 12 Ich hon ti toote — ti kroose un ti kleene — kesiin foer tëm troon kextan un role sin uf kemacht kep. Awer een aner rol is uf kemacht kep: te rol fom leepe. Ti toote sin kericht kep tëm noo was in te role kexrip waar, tëm noo sayn aktsyoone. 13 Un tas meer hot ti toote, woo tat trin waare, raus kep. Un te toot un tas Kraap hon ti toote, woo tat trin waare, raus kep. Un tii sin kericht kep, tëm noo tëne sayn aktsyoone.
