1-2. Kep een uersach warom mer acht kepe mise fer tas puuch Apokalipsis.

 HOT yemant tich xon in kelaat fer etliche fon sayn pilter kuke? Wëns tuu ti pilter kukst, siist tuu fiile layt woos tuu net khënst. Awer tan, halst tuu xtil un kukst mit acht een pilt. Warom? Wayl tuu pist uf tiise pilt! Wiis tuu tas pilt kukst, fersuuchst tuu tich foer xtele wën un woo tas pilt ap kenom kep is. Tuu fersuuchst aach se wise weer sin ti kanse layt uf tëm pilt. Tiise pilt is etwas ekstras fer tich.

² Tas puuch fon Apokalipsis is soo wii tiise pilt. Warom? Weeche ferweenichst 2 uersache. Eyerst: tiise piiplix puuch is fer uns kexrip kep. In sayn eyerst wersikel, leese mer: “Rewelatsyoon fon Yeesus Kristus, woo Kot fer tëm kep hot, fer se tsayche fer tëm sayn sklaawe ti tinge woo hatich pasiire tuun.” (Apo. 1:1) Tan, was in tiise puuch xteet, is net fer ale kaar, is fer uns: Kot sayn tiiner. Un wayl mer Kot sayn folek sin, sole meyer uns net ferwunere tas mer een teel hon in te erfiilung fon te profetsiie woo in tiise puuch xteen. Tan wën mer tas puuch Apokalipsis leese, leese mer iwer tinge woo uns perseenlich petrefe — es wil saan, meyer “sin uf tëm pilt”.

3-4. Tëm noo tas puuch Apokalipsis, wanee teete sayn profetsiie sich erfiile un wii sol tas uns petrefe?

³ Ti tsweet uersach warom mer sole acht kepe fer ti profetsiie fon Apokalipsis hot se tuun mit te tsayt woo se sich erfiile tuun. Te aphostel Yoohan hot kesaat wanee tiise profetsiie sich erfiile teete: “Torich inspiratsyoon, waar ich in tëm taach  fom Hër”. (Apo. 1:10) Wii Yoohan tas kexrip hot — unkefeer 96 N.K. — waar “te taach fom Hër” noch wayt wech. (Mat. 25:14, 19; Luk. 19:12) Awer tëm noo te piiplixe profetsiie, hot tiise taach aan kefang in 1914 wii Yeesus kheenich im himel kep is. Ti profetsiie fon Apokalipsis woo se tuun hon mit Kot sayn folek, hon in tiise yoer aan kefang sich erfiile. Yawool, meyer sin yets im “taach fom Hër” am leepe!

⁴ Wayl mer in tiise tsayt am leepe sin, mise mer een ekstra acht kepe fer te liiplich aanreet woo in Apokalipsis 1:3 xteet: “Froo is tee woo in hart xtim leest un tii woo ti wërter fon tiise profetsii heere un foliche tuun, wayl ti pextimt tsayt is ticht.” Yawool, meyer mise ti wërter fon tiise profetsiie in ‘hart xtim leese, tëne heere un foliche’. Was fer sin etliche fon te wërter woo mer foliche mise?

5. Wii tsaycht tas puuch Apokalipsis wii wichtich es is tas unser aanpeetung Yeehoowa kefalt?

⁵ Xon in tëm eyerste kapitel fon Apokalipsis, lërne mer tas Yeesus wees ales was in te kemaynte pasiirt. (Apo. 1:12-16, 20; 2:1) Ti pexeete woo Yeesus fer ti 7 kemaynte in Kleen Asya kexikt hot, pewayse tas. In tiise pexeete, hot Yeesus spetsiifixe oryentiirunge fer ti kriste im eyerste yoer hunert kep, fer tëne helfe sich sicher sin tas sayn aanpeetung Yeehoowa kefalt hot. Un was in tiise pexeete kesaat waar, kilt fer Kot sayn tiiner hayt tsu taach. Was is ti lisyoon fer uns? Unser Fiirer, Yeesus Kristus, wees kans kenau ep mer een kuut fraayntxaft mit Yeehoowa hon. Tee fiirt un xitst uns un siit ales. Un tee wees was mer mache mise fer wayter Yeehoowa sayn tsuxtimung hon. Was fer oryentiirung woo Yeesus kep hot, mise mer hayt foliche?

6. (a) Tëm noo Yeesus sayn wërter in Apokalipsis 2:3, 4, was fer propleem hot ti kemaynt in Ëfeso kehat? (b) Was fer lisyoon lërne mer too temit?

⁶ Lees Apokalipsis 2:3, 4. * Meyer sole net ti liip woo mer tsu Yeehoowa am aanfang hate ferliire. Yeesus sayn pexeet fer ti kemaynt in Ëfeso hot ketsaycht tas ti priiter aus kehal hate un wayter Yeehoowa ketiint hon soo kaar foer xwiirichkheete. Noch soo, hon se ti liip woo se am aanfang hate ferloer. Tii miste tiise liip noch mool xtërker lose. Wën net, teet Yeehoowa tëne sayn aanpeetung net aan nëme. In te selwich aat hayt, mise mer mee mache wii ploos aus hale. Meyer mise aus hale weeche ti richtiche uersache. Yeehoowa kept acht net ploos aan was mer mache, awer aach aan warom mer tas mache. Tas is wichtich fer Yeehoowa, wayl eyer wil hon tas mer tëm aan peete weeche unser tiif liip un petanklichkheet tsu tëm. (Xpr. 16:2; Mar. 12:29, 30)

7. (a) Tëm noo Apokalipsis 3:1-3, was fer propleem hat ti kemaynt in Saartes? (b) Was mise mer mache?

⁷ Lees Apokalipsis 3:1-3. * Meyer mise wayter wachsam plaype. Ti priiter fon te kemaynt in Saartes hate een aner propleem. Opwool se Yeehoowa friier ketiint hate, hon se tas yets net mee kemacht. Tes weeche, hot Yeesus kesaat ti solte ‘uf wache’. Was is ti lisyoon fer uns? Sicher tuut Yeehoowa sich  net fon unser aarwayt ferkese. (Hep. 6:10) Soo wii soo, sole mer net tenke tas, wayl mer Yeehoowa friier ketiint hon, prayche mer net tas wayter mache. Khan sin tas hayt, khene mer net soo fiil wii friier mache. Awer meyer mise imer fiil se tuun hon “im Hër sayn aarwayt” un wachsam pis tas ën plaype. (1 Kor. 15:58; Mat. 24:13; Mar. 13:33)

8. Was fer lisyoon lërne mer mit Yeesus sayn wërter fer ti priiter in Laotisëya, woo in Apokalipsis 3:15-17 xteen?

⁸ Lees Apokalipsis 3:15-17. * Meyer mise flaysich sin un Yeehoowa mit unser kanse hërts aan peete. Yeesus sayn pexeet fer ti kemaynt in Laotisëya hot een aner propleem foer keprung. Tii waare “waarm” in sayn aanpeetung. Weeche tas, hot Yeesus tëne kesaat tas se “yamerlich” un “aarm” waare. Tii miste mit muut fer Yeehoowa xafe un tëm flaysich aan peete. (Apo. 3:19) Was is ti lisyoon fer uns? Wën mer unser muut fer Yeehoowa tiine am ferliire sin, mise mer unser petanklichkheet fer ales was Yeehoowa un sayn Orkanisatsyoon uns kepe, ferxtërke. (Apo. 3:18) Meyer sole nii net uns soo fiil aan xtrenge fer een kuut leepe yets hon, tas Yeehoowa aan peete net mee tas haupste in unser leepe is.

9. Tëm noo Yeesus sayn pexeet fer ti kriste in Përkamo un Tiatira, fon was sole mer uns wech hale?

⁹ Meyer mise uns wayt wech fon te inlërnunge fon te aphostate hale. Yeesus hot etliche in Përkamo ferxënt wayl tii waare ti kemaynt am teele. (Apo. 2:14-16) Tee hot ti priiter fon Tiatira keloopt, wayl se sich wech kehal hon fon “Satanaas sayn tiife tinge” un hot se uf kemuut sich ‘fest aan te woerheet hale’. (Apo. 2:24-26) Ti xwache kriste woo aan kefang hate tiise falxe inlërnunge noo keen, miste sich peroye. Hayt mise mer uns wech hale fon yeete inlërnung woo keeche Yeehoowa sayn ketanke keet. Es khan aus siin tas ti aphostate sich khimere tuun mit was ti Piipel saat, awer tëne sayn aktsyoone pewayse tas se falx sin. (2 Tim. 3:5) Es is laychter fer uns tiise falxe inlërnunge mërke un uns too tefun wech hale, wën mer kuute xtutënte fon te Piipel sin. (2 Tim. 3:14-17; Yuu. 3, 4)

10. Was fer aner lisyoon khene mer lërne mit Yeesus sayn wërter fer ti kemaynte in Përkamo un Tiatira?

¹⁰ Meyer sole uns wech fon ale sort imoraaliteet  hale. Ti priiter in Përkamo un Tiatira hate noch een aner propleem. Yeesus hot etliche in tiise kemaynte ferxënt wayl tii sich net fon te imoraaliteet wech kehal hon. (Apo. 2:14, 20) Was is ti lisyoon fer uns? Yeehoowa macht sayn aue net tsu fer ti imoraaliteet, ekaal wii lang mer xon tëm tiine orer ti flichte woo mer in te kemaynt hon. (1 Sam. 15:22; 1 Phe. 2:16) Yeehoowa wil hon tas mer imer mache was eyer saat richtich is, een tuun wii xlecht ti layt um uns rom sich aan xtele. (Ëfe. 6:11-13)

11. Was hon mer pis yets hin kelërnt? (Kuk te khaste “ Lisyoone fer uns hayt”.)

¹¹ Was hon mer pis yets hin kelërnt? Meyer mise uns sicher sin tas unser aanpeetung Yeehoowa kefalt. Wën mer etwas mache woo unser aanpeetung tsu Yeehoowa fersaut, mise mer klaych ënerunge mache. (Apo. 2:5, 16; 3:3, 16) Awer, Yeesus hot iwer was aneres kexproch in sayn pexeet fer ti kemaynte. Was waar tas?

12. Was khene mer lërne mit Yeesus sayn wërter fer ti kemaynte in Esmirna un Filatëlfya? (Apokalipsis 2:10)

¹² Wole mer yets siin Yeesus sayn pexeet fer ti kemaynte in Esmirna un Filatëlfya. Tee hot fer ti kriste tat kesaat tas tii solte khee pang fon te yachtung hon, wayl Yeehoowa teet se peloone wën se troy plaype teete. (Lees Apokalipsis 2:10; * 3:10) Was is ti lisyoon fer uns hayt? Meyer khene waarte tas mer keyacht wëre un mer mise wilich sin fer tas aus hale. (Mat. 24:9, 13; 2 Kor. 12:10) Warom is tas wichtich?

13-14. Wii tuun ti ewënte fon Apokalipsis 12 Kot sayn folek petrefe?

¹³ Tas puuch Apokalipsis saat tas, “im taach fom Hër” — ti tsayt woo mer yets am leepe sin — Kot sayn folek teet keyacht wëre. Apokalipsis 12 saat tas een kriich im himel aus keproch hot klaych wii Yeesus kheenich fon Kot sayn Raych kep is. Michel — woo Yeesus Kristus is, noo tas eyer tsurik tsum himel kang is — hot mit sayn engele keeche te Taywel un sayn temoone kekhëmpft. (Apo. 12:7, 8) Tes weeche, sin Kot sayn faynte ap kewun un tsu te eyert kexmis kep. Un too hiir, pringe se fiil xmërts fer ti mënxe. (Apo. 12:9, 12) Awer, wii tuut tas ales Kot sayn folek petrefe?

¹⁴ Apokalipsis tuut tan saan wii Satanaas sich aan xtelt. Tee khan net mee im himel rin keen. Tes weeche, tuut eyer Kot sayn kesalpte tiiner too uf te eyert atakiire. Tii tuun Kot sayn Raych too uf te eyert foer xteen “un hon  ti aarwayt fer tsaye iwer Yeesus kepe”. (Apo. 12:17; 2 Kor. 5:20; Ëfe. 6:19, 20) Wii erfiilt sich tiise profetsii?

15. Weer sin ti “tswaay tsayer” fon Apokalipsis 11 un was is mit tëne pasiirt?

¹⁵ Satanaas hot Kot sayn faynte uf kerechent ti kesalpte priiter, woo ti preetich aarwayt kefiirt hon, atakiire. Tiise mëner waare ti “tswaay tsayer” fon Apokalipsis woo um keprung kep sin. * (Apo. 11:3, 7-11) In 1918, waare 8 priiter woo ti Orkanisatsyoon kefiirt hon, falx akusiirt, xultich aus kexproch un tsu te katee fiile yoore kexikt. Ti meyerste hon ketenkt tas ti aarwayt fon tiise kesalpte “toot” weyer.

16. Was fer unkewaartne tings is in 1919 pasiirt, awer was hot Satanaas wayter kemacht fon tiise tsayt aan?

¹⁶ Ti profetsii in Apokalipsis 11 hot aach kesaat tas, noo een khorts tsayt, teete ti “tswaay tsayer” noch mool tsum leepe khome. Un tas hot sich in een unkewaartne aat erfiilt, weenicher wii een yoer tëm noo wii ti priiter in kexpërt kep sin. Am mërts fon 1919, sin tiise priiter fray kemacht kep un ti akusatsyoone keeche tëne sin wech kehool kep. Ti priiter hon klaych aan kefang ti preetich un inlërnung aarwayt noch mool fiire. Awer tas hot net ti atake fon Satanaas keeche Kot sayn folek um kehal. Fon tiise tsayt aan, hot Satanaas “een flus” fon yachtung keeche Kot sayn folek keprung. (Apo. 12:15) Yawool, meyer al mise “aus hale un klaape hon”. (Apo. 13:10)

17. Was fer unkewaartne hilef hon Kot sayn tiiner kriit, opwool Satanaas tëne atakiirt hot?

¹⁷ Apokalipsis 12 tuut tan tsayche tas Kot sayn folek teet hilef fon een unkewaartne plats kriin. Apokalipsis saat tas “ti eyert” hot te “te flus [fon yachtung] uner xlikt”. (Apo. 12:16) Un tas is kraat was pasiire tuut. Als mool, hon etliche teele fon Satanaas sayn welt, soo wii etliche kerichte, ferninftichkheet ketsaycht un Kot sayn folek keholef. Fiil mools, hon Yeehoowa sayn tiiner prosëse kewun woo tëne mee frayheet kep hon. Wii hon se tiise frayheet penutst? Tii hon sayn pestes kemacht in te aarwayt woo Yeehoowa tëne kep hat. (1 Kor. 16:9) Was is in tiise aarwayt tepay?

18. Was is unser haupst aarwayt torich ti letste taache?

¹⁸ Yeesus hot foer raus kesaat tas sayn folek  teet ti “kuute notisye fon [Kot sayn] Raych” uf te kans pewoont eyert preetiche eep tas ën kheemt. (Mat. 24:14) Wën se preetiche, kriin se hilef fon te engele. Ti Piipel saat tas tiise engele hon “eewiche kuute notisye fer tsu tëne woo uf te eyert woone se saan, fer yeete natsyoon, xtam, xprooch un folek”. (Apo. 14:6)

19. Was fer aner pexeet mise tii woo Yeehoowa liipe preetiche?

¹⁹ Ti kuute notisye fom Raych is net tas eensich pexeet woo Kot sayn folek aus xpreche mus. Tii mise aach ti aarwayt fon te engele — woo in Apokalipsis 8 pis 10 pexrip sin — uner xtitse. Tiise engele tuun etliche xwiirichkheete aus xpreche fer tii woo Kot sayn Raych net aan nëme. Tes weeche, sin Yeehoowa sayn Tsayer een pexeet am aus xpreche woo ferklaycht is mit “xloose un fayer”; tiise pexeet leet aus Kot sayn kerichte keeche ti unerxiitliche teele fon Satanaas sayn xlechte welt. (Apo. 8:7, 13) Ti layt mise wise tas tas ën ticht is. Soo, khene se ënerunge mache un te taach fon Yeehoowa sayn wuut iwerleepe. (Sof. 2:2, 3) Awer, ti meyerste layt heere net kërn tiise pexeet. Tes weeche, mise mer koraaj hon fer tas wayter preetiche. Torich ti kroos tripulatsyoon, wërt tiise pexeet fon kericht noch xtërker. (Apo. 16:21)

20. Was tuun mer in te neekste 2 artikele lërne?

²⁰ Meyer hon een teel tepay in te erfiilung fon was in Apokalipsis xteet. Tes weeche, mise mer wërklich foliche “ti wërter fon tiise profetsii”. (Apo. 1:3) Awer wii khene mer ti yachtung troy aus hale un wayter tiise pexeete mit koraaj preetiche? Tswaay tinge khene uns ferxtërke: (1) lërne was tas puuch Apokalipsis iwer Kot sayn faynte tsaycht, un (2) lërne iwer ti seechen woo mer in te futuer kriin wën mer troy plaype. Meyer xpreche too triwer in te neekste 2 artikele.