1-2. Warom khene etliche piiplixe funtamente wichticher fer uns wëre wën unser situatsyoon sich ënert?

 WËN eene man un een fraa sich hayrate, tuun se ofts een piiplix reet iwer ti hayrat heere. Ti piiplixe funtamente in tiise reet sin net nay fer tëne; awer fon tiise taach aan, tuun tiise informatsyoone noch wichticher fer tëne sin. Warom? Wayl tii tuun tas wii een pheyerche aan wëne.

² Etwas eenliches pasiirt wën een kristlich pheyerche khiner kriit. Torich ti yoore, fiilaycht hon se phaar reete keheert iwer wii khiner tsiie. Awer yets, sin ti piiplixe funtamente in tiise reete noch wichticher fer tëne — tii sin sayn aychne khint am tsiie! Tas is een mechtich kroos flicht! Tan, wën ti situatsyoon in unser leepe sich ënert, wëre etliche piiplixe funtamente noch wichticher fer uns. Tas is een uersach warom Yeehoowa sayn tiiner ti Piipel leese. Un soo wii ti kheeniche fon Israël, tuun se aan tëne triwer noo tenke “ti kanse taache fon sayn leepe.” (Teut. 17:19)

3. Was tuun mer in tiise artikel lërne?

³ Eltere, teyer hot eene fon te kreeste eere woo een krist khan hon: ayre khiner iwer Yeehoowa in lërne. Awer teyer solt mee mache wii ploos informatsyoone iwer unser Kot fer tëne kepe. Teyer solt ayre khiner in lërne Yeehoowa hërtslich liipe. Wii khent iir tas mache? In tiise artikel, tuun mer xpreche iwer 4 piiplixe funtamente woo khene aych wii eltere helfe. (2 Tim. 3:16) Meyer tuun aach siin was fer nutse etliche kristliche eltere kriit hon wayl se ti piiplixe aanreete aan kewënt hon.

4. Was fer piiplixe funtament khan ti eltere helfe sayn khiner in lërne Yeehoowa liipe? (Tyako 1:5)

⁴ 1^te funtament: Suuch Yeehoowa sayn oryentiirung. Ferlang fer Yeehoowa tas eyer tich kluucheet kept fer tayn khiner helfe liip tsu Tëm ëntwikele. (Lees Tyako 1:5.) * Tee is ti pest Persoon fer aanreete kepe. Warom? Kuk mool 2 uersache. Eyerst: nimant hot mee speryens wii fater wii Yeehoowa. (Psal. 36:9) Un tsweet: ti kluuche aanreete woo Yeehoowa kept, pringe imer nutse fer uns. (Isa. 48:17)

5. (a) Was fer hilef tuut Yeehoowa sayn Orkanisatsyoon fer ti eltere kepe? (b) Tëm noo te wiiteo in te noote, was host tuu kelërnt mit te pruuter un xwester Amorim iwer wii se sayn khiner ketsoo hon?

⁵ Torich sayn Wort un sayn Orkanisatsyoon, kept Yeehoowa fiile nutsliche informatsyoone fer ti eltere woo tëne helfe khene sayn khiner tsiie fer Yeehoowa liipe. (Mat. 24:45) Tsum payxpiil: tuu khanst fiile nutsliche aanreete fine in te sekwëns fon artikele “Ajuda para a Família”. Tas waar teel fom piichelche Despertai! torich fiile yoore un yets is tas im site jw.org. Un noch: fiile wiiteos im jw.org khene ti eltere helfe Yeehoowa sayn aanreete aan wëne wën se sayn khiner tsiie. * (Xpr. 2:4-6)

6. Wii xpiirt sich een fater iwer ti oryentiirunge woo eyer un sayn fraa fon te Orkanisatsyoon kriin?

⁶ Fiile eltere hon kesaat tas se petanklich sin fer ti hilef woo Yeehoowa kept torich sayn Orkanisatsyoon. Een fater, woo Joe heest, saat: “Tray khiner in te woerheet tsiie is net laycht. Ich un mayn fraa tuun imer peete tas Yeehoowa uns helft. Un meyer hon kemërkt tas ofts, is een artikel orer een wiiteo in te richtich tsayt khom fer uns helfe mit een situatsyoon um keen. Meyer hon imer aan Yeehoowa sayn oryentiirunge ketraut.” Joe un sayn fraa hon kemërkt tas tiise artikele un wiiteos tuun tëne sayn khiner helfe sich tichter pay Yeehoowa xafe.

7. Warom is es wichtich tas ti eltere sayn pestes mache fer een kuut payxpiil kepe? (Romaaner 2:21)

⁷ 2^te funtament: Say een kuut payxpiil. Ti  khiner tuun sayn eltere ofts peopachte un noo mache was se siin. Kewis sin ti eltere net perfekt. (Rom. 3:23) Noch soo, ti eltere woo kluuch sin, mache sayn pestes fer een kuut payxpiil fer sayn khiner kepe. (Lees Romaaner 2:21.) * Een fater hot kesaat: “Ti khiner sin soo wii een esponja: tii tsiie ales in.” Tee saat noch: “Ti khiner tuun uns saan wën unser payxpiil net xtimt mit was mer tëne in lërne.” Tan, wën mer wole tas unser khiner Yeehoowa liipe, unser aychne liip tsu Yeehoowa mus xtark un taytlich sin.

8-9. Was host tuu mit Andrew un Emma sayn wërter kelërnt?

⁸ Es kept fiile aate wii ti eltere khene sayn khiner in lërne Yeehoowa liipe. Kuk mool was Andrew, een pruuter woo 17  yoore alt is, saat: “Mayn eltere hon mich imer in kelërnt tas peete aarich wichtich is. Yeete nacht hot mayn papa mit mich kepeet, soo kaar wën ich xon mayn aychne kepeet kemacht hat. Mayn eltere hon mich un mayn xwester imer erinert: ‘Teyer khent mit Yeehoowa xpreche imer wën teyer wolt.’ Tes weeche, is tas kepeet aarich wichtich fer mich kep. Yets, is es laycht fer mich peete un Yeehoowa wii een liipliche Fater siin.” Eltere, tuut aych nii ferkese: ayre aychne liip tsu Yeehoowa khan ayre khiner helfe tëm aach liipe.

⁹ Kuk mool aach tas payxpiil fon Emma. Wii sayn fater ti familye im xtich kelos hot, hot eyer een mechtich kroos xulte fer Emma sayn mama kelos. Emma saat: “Es is ofts pasiirt tas mayn mama net kenuuch kelt hat, awer tii hot imer kexproch iwer wii Yeehoowa sayn tiiner uf phast. Torich ti aat wii mayn mama keleept hot, khont ich siin tas se wërklich too traan keklaapt hot. Mayn mama hot aan kewënt was se mich in kelërnt hot.” Was is ti lisyoon fer uns? Ti eltere khene kuute payxpiile sin soo kaar in xweyere situatsyoone. (Kal. 6:9)

10. Was fer keleechenheete hon fiile israeliitixe eltere kehat fer mit sayn khiner fertseele? (Teuteronoomyum 6:6, 7)

¹⁰ 3^te funtament: Xprech eftas mit tayn khiner. Yeehoowa hot fer ti friirixe israeliiter kesaat tas tii solte ofts iwer Tëm fer sayn khiner in lërne. (Lees Teuteronoomyum 6:6, 7.) * Torich te taach, hate tiise eltere fiile keleechenheete fer mit sayn khiner fertseele un tëne in lërne Yeehoowa liipe. Tsum payxpiil: een israeliitixe puup hot tsiimlich sicher fiile xtune mit sayn papa in te plantaaj kexaft. Sayn xwester hot neekst te kanse taach sayn mama keholef neer un anere tinge fom haus mache. Ti tsayt woo ti eltere mit sayn khiner kexaft hon, khonte se iwer fiile wichtiche sache xpreche. Tsum payxpiil: tii khonte fertseele iwer Yeehoowa sayn kuutheet un wii eyer ti familye am helfe waar.

11. Was fer keleechenheet hon ti kristliche eltere fer mit sayn khiner fertseele?

¹¹ Hayt is tas leepe anerste wii es friier waar. In fiile lënter, khene ti eltere net fiil tsayt mit sayn khiner torich te taach fertraype. Fiilaycht, sin ti eltere in te aarwayt un ti khiner, in te xuul. Tes weeche, mise ti eltere tsayt suuche fer mit sayn khiner fertseele. (Ëfe. 5:15, 16; Fili. 1:10) Een kuut xtun fer tas mache is ti familye aanpeetung. Een yunge pruuter, woo Alexander heest, saat: “Mayn papa macht imer ti familye aanpeetung un tee lost niks tiise  xtun woo mer mitsamer hon, xteere. Noo tëm xtuutyum, tuun mer iwer unerxiitliche sache xpreche.”

12. Fon was sol te familye xëf sich erinere wën eyer ti familye aanpeetung macht?

¹² Wëns tuu een familye xëf pist, was khanst tuu mache tas ti familye aanpeetung interesant fer tayn khiner wërt? Fiilaycht, khanst tuu mit tayn khiner xtutiire unser nay puplikatsyoon: Los tich kuut keen im leepe fer imer! Tiise puuch lost es laycht ufmuutiche kexpreeche hon. Tayn opjetiiw is tas ti khiner iwer sayn xpiirunge un soriche xpreche. Tes weeche, tuu net ti familye aanpeetung penutse fer tëne kritikiire orer xëne. Un fersuuch net pees wëre wën se als mool etwas saan woo net mit te Piipel xtimt. Xtats tas, say froo tas se tich eerlich saan was se tenke un los es laycht fer tëne tas wayter mache. Ploos wëns tuu ferxteest wii tayn khiner sich wërklich xpiire, khanst tuu tëne helfe.

13. Was fer anere keleechenheete hon ti eltere fer sayn khiner helfe sich tichter pay Yeehoowa xafe?

¹³ Eltere, suucht keleechenheete torich te taach fer ayre khiner helfe sich tichter pay Yeehoowa xafe. Teyer praycht net waarte pis tas Piipel xtuutyum fer iwer unser liipliche Kot in lërne. Kuk mool was een muter, woo Lisa heest, saat: “Meyer hon ales was um uns rom waar penutst fer unser khiner iwer Yeehoowa in lërne. Tsum payxpiil: wii unser hunt etwas kemacht hot woo ti khiner lache kemacht hot, hon mer fer tëne kesaat tas es tsaycht tas Yeehoowa een frooe Kot is un tas eyer wil hon tas mer aach froo sin.”

14. Warom is es wichtich tas ti eltere sayn khiner helfe kuute fraaynte raus suuche? (Xpriiche 13:20)

¹⁴ 4^te funtament: Helf tayn khiner kuute fraaynte raus suuche. Ti Piipel lost es taytlich tas unser fraaynte khene uns fer tas kuutes orer fer tas xlechtes influentsiire. (Lees Xpriiche 13:20.) * Eltere, tuut teyer ayre khiner sayn fraaynte khëne? Hot teyer xon tsayt mit tëne fertrip? Was khent teyer mache fer ayre khiner helfe fraaynte mache woo Yeehoowa liipe? (1 Kor. 15:33) Een aat  fer ayre khiner helfe, is priiter in laate woo een kuut fraayntxaft mit Yeehoowa hon fer tinge mit aych un mit ayre khiner mache. (Psal. 119:63)

15. Was khene ti eltere mache fer sayn khiner helfe kuute fraaynte hon?

¹⁵ Een fater, woo Tony heest, leet aus was tee un sayn fraa mache fer sayn khiner helfe kuute fraaynte fine: “Torich ti yoore, hon ich un mayn fraa fiile unerxiitliche priiter un xwestere — yunge un elter — tsu unser haus in kelaat. Meyer tuun ese un ti familye aanpeetung mitsamer mache. Tas is een xeen aat fer se khëne tii woo Yeehoowa liipe un tëm mit frooheet aan peete. Sirkuyt superintentente, misyoneere un anere sin in unser haus xon keplip. Unser khiner hon fiil kelërnt mit te speryense woo se fertseelt hon, mit tëm muut woo se ketsaycht hon un mit te xweyer aarwayt woo se in Yeehoowa sayn tiinst kemacht hon. Tas ales hot unser khiner keholef sich tichter pay Yeehoowa xafe.” Eltere, sayt pextimt ayre khiner helfe kuute fraaynte hon.

16. Wii solst tuu tich aan xtele wën tayn khint saat tas eyer net mee Yeehoowa tiine wil?

¹⁶ Awer, un wën eene fon tayn khiner saat tas eyer wil net mee Yeehoowa tiine, opwool tuu tich fiil aan kextrengt host? Tuu net rechne tas es tayn xult is. Yeehoowa hot fer ale kaar — too tepay tayn khiner — een fray wile kep, es wil saan, ti apiliteet fer raus suuche ep mer tëm tiine tuun orer net. Wën tayn khint ëntxlist hot Yeehoowa im xtich lose, kep net uf fon tayn hofnung tas eyer retuer khomt. Ferkes tich net fom kexicht fon tëm ferloerne soon. (Luk. 15:11-19, 22-24) Te yunge man hot fiile xlechte tinge kemacht. Awer am ën, is eyer retuer khom. “Tas is ploos een kexicht — khene etliche saan. — Khent mayn khint wërklich tsurik tsu Yeehoowa khome?” Yawool, tee khan. In woerheet, tas is was mit een yunge man, woo Elie heest, pasiirt is.

17. Wii tuut Elie sayn speryens tich uf muute?

¹⁷ Elie saat iwer sayn eltere: “Tii hon sayn pestes kemacht fer mich in lërne Yeehoowa  un sayn Wort, ti Piipel, liipe. Awer wii ich unkefeer 15  yoore alt waar, hon ich aan kefang mich repeliire.” Elie hot aan kefang een topelt leepe nëme. Sayn eltere hon fersuucht tëm helfe ticht pay Yeehoowa plaype, awer tee hot tëne net aan keheert. Noo tas eyer tehëm faart kang is, hot eyer aan kefang ferkheerte tinge mache. Noch soo, hot eyer als mool iwer ti Piipel mit een fraaynt kexproch. Elie saat: “Woo mee ich mit mayn fraaynt iwer Yeehoowa kexproch hon, woo mee hon ich aan Yeehoowa ketenkt. Ti soome fon te woerheet, woo mayn eltere sich aan kextrengt hon fer in mayn hërts planse, hon lamsam aan kefang se wakse.” Mit te tsayt, is Elie retuer tsu Yeehoowa khom. * Sayn eltere wëre wool aarich froo kep sin tas se sayn pestes kemacht hon fer Elie in lërne Yeehoowa liipe wii eyer een khint waar! (2 Tim. 3:14, 15)

18. Was mënst tuu iwer ti eltere woo xtram xafe fer sayn khiner in lërne Yeehoowa liipe?

¹⁸ Eltere, teyer hot een wunerliche kexenk kriit: een nay xeneratsyoon fon Yeehoowa sayn tiiner tsiie. (Psal. 78:4-6) Tas is khee laycht flicht. Meyer loope aych weeche ayre xweyer aarwayt fer ayre khiner helfe. Wën teyer wayter ayre pestes macht fer ayre khiner helfe Yeehoowa liipe un tëm aan heere, sayt aych sicher tas unser liipliche Fater im himel wërt aarich froo sin. (Ëfe. 6:4)