XTUUTYUM ARTIKEL 19
LIIT 22 Kot sayn Raych sol khome!
Wii tuut Yeehoowa ti layt im futuer richte?
‘Yeehoowa winxt net tas yemant fernicht wërt.’(2 PHEETER 3:9)
WAS TUUN MER SIIN?
Meyer khene uns sicher sin tas wën Yeehoowa ti layt im futuer richt, wëre Sayn ëntxlise richtich un kerecht.
1. Warom khene mer saan tas mer in wunerliche tsayte leepe?
TI TSAYTE woo mer leepe sin wërklich wunerlich! Yeete taach, siin mer piiplixe profetsiie sich erfiile. Tsum payxpiil: “te kheenich fom nort” un “te kheenich fom siit” tuun foer unser aue tsënke fer se siin weer iwer ti welt rechiire tuut. (Tan. 11:40) Meyer siin ti kuute notisye fom Raych uf te kans eyert kepreeticht wëre un milyoone layt suuche raus Yeehoowa tiine. (Isa. 60:22; Mat. 24:14) Meyer kriin aach fiil kaystlich esmitel “in te richtich tsayt”. (Mat. 24:45-47)
2. Fon was khene mer uns sicher sin, awer was mise mer erkhëne?
2 Yeehoowa tuut uns wayter helfe peser ferxteen ti wichtiche ewënte woo klaych pasiire. (Xpr. 4:18; Tan. 2:28) Meyer khene uns sicher sin tas wën ti kroos tripulatsyoon aan fangt, tuun mer tas neetiches wise fer troy aus hale un uns eenich hale torich tiise xweyer tsayt. Awer meyer mise etwas erkhëne: meyer wise net etliche tinge woo im futuer pasiire tuun. In tiise artikel, tuun mer eyerst xpreche iwer warom mer keënert hon etliche tinge woo mer friier kesaat hon iwer tiise ewënte. Tan xpreche mer iwer etliche tinge woo mer wise iwer te futuer un iwer ti aat wii unser himlixe Fater sich aan xtele tuut.
WAS MER NET WISE TUUN
3. (a) Was hon mer friier ketenkt mit te layt pasiire teet noom aanfang fon te kroos tripulatsyoon? (b) Warom hon mer soo ketenkt?
3 Friier, hon mer kesaat tas wën ti kroos tripulatsyoon aan fangt, tuun ti layt khee mee xans hon fer Yeehoowa pay xteen un te Armaxeton iwerleepe. Warom hon mer tas kesaat? Meyer hon ketenkt tas ales in te tsayt fon te Sintfluut hot etwas representiirt woo in unser tsayt pasiire teet. Tsum payxpiil: noo tas Yeehoowa ti arich sayn teer tsu kemacht hot, waars net mee meechlich tas yemant rin khome khent. Meyer hon ketenkt tas, kraat soo, nimant khont klaape aan Yeehoowa tsayche un keret wëre noom aanfang fon te kroos tripulatsyoon. (Mat. 24:37-39)
4. Warom hon mer noo kelos se saan tas ales was in Noee sayn taache pasiirt is een kreeser erfiilung hayt hët?
4 Awer meecht es richtich sin se saan tas ales was in te Sintfluut pasiirt is etwas representiirt woo im futuer pasiire tuut? Nee, ti Piipel saat tas net. a Es is woer tas Yeesus “Noee sayn taache” mit te tsayt fon sayn presens ferklaycht hot. Awer tee hot net kesaat tas ales was in Noee sayn taache pasiirt is, sich im futuer erfiile teet. Tsum payxpiil: tee hot net kesaat tas ti teer fon te arich tsu mache, een kreeser erfiilung im futuer hët. Kewis, tas wil net saan tas mer net lisyoone lërne khene mit te kexicht iwer Noee un ti Sintfluut.
5. (a) Wii hot Noee klaape foer te Sintfluut ketsaycht? (Hepreeyer 11:7; 1 Pheeter 3:20) (b) Was is eenlich tswixich Noee sayn preetich aarwayt un unseres?
5 Wii Noee tsum wise kriit hot was Yeehoowa mache teet, hot eyer ti arich kepaut; soo hot eyer sayn klaape ketsaycht. (Lees Hepreeyer 11:7; b 1 Pheeter 3:20. c) Kraat soo, ti layt woo ti kuute notisye iwer Kot sayn Raych heere, mise aan wëne was se lërne fer sayn klaape tsayche. (Aph. 3:17-20) Pheeter hot Noee wii “een preeticher fon te kerechtichkheet” keruuft. (2 Phe. 2:5) Awer wii mer im letste artikel kesaat hon, wise mer net ep Noee fersuucht hot fer yeete persoon uf te eyert preetiche foer te Sintfluut. Hayt tsu taach, tuun mer es net hin kriin fer ti kanse layt preetiche foer tas ën, opwool meyer uns flaysich too traan aan xtrenge. Warom is tas net meechlich?
6-7. Warom khan ma saan tas es net meechlich wërt fer yeete persoon preetiche eep tas ën khomt?
6 Tenk iwer was Yeesus kesaat hot iwer unser preetich aarwayt. Tee hot foer raus kesaat tas ti kuute notisye weyere “uf te kans pewoont eyert kepreeticht, tsum tsaye fer ale natsyoone”. (Mat. 24:14) Hayt, mee wii noch nii, tuut tiise profetsii sich erfiile. Khan ma tas pexeet fom Raych fine in mee wii 1.000 xprooche. Un weeche unser site jw.org, khene ti meyerste layt uf te welt ti kuute notisye fon Kot sayn Raych heere.
7 Awer Yeesus hot aach fer sayn tisipele kesaat tas se teete “net torich ti kanse xtete fon Israël keen” eep eyer tsurik khemt. (Mat. 10:23; 25:31-33) Soo, meyer tuun es net hin kriin fer yeete persoon preetiche eep Yeesus khomt fer ti mënxe richte. Milyoone layt leepe in pletse woo mer net fray preetiche khene. Fiile nëneche tuun aach yeete minut uf te welt khome. Meyer xtrenge uns aan fer layt fon “yeete natsyoon, xtam [un] xprooch” trefe mit te kuute notisye. (Apo. 14:6) Awer es wërt net meechlich fer yeete persoon preetiche eep tas ën khomt.
8. Was fer frooch iwer Yeehoowa sayn kerichte khent foer khome? (Kuk aach ti pilter.)
8 Tas pringt een frooch foer: Wii tuun Yeehoowa un Yeesus ti layt richte woo net een xans hate fer ti kuute notisye heere foer te aanfang fon te kroos tripulatsyoon? (Yoo. 5:19, 22, 27; Aph. 17:31) Te haupste tekst fon tiise artikel tsaycht tas Yeehoowa “net winxt tas yemant fernicht wërt”; xtats tas, wil eyer hon “tas se al sich peroye”. (2 Phe. 3:9; 1 Tim. 2:4) Opwool meyer tiise tinge iwer Yeehoowa wise, hot eyer uns noch net kesaat wii eyer ti layt richte tuut woo net een xans hate fer ti kuute notisye heere. Un kewis, tee praycht uns tas net saan.
Wii tuut Yeehoowa um keen mit tëne woo net een xans hate fer ti kuute notisye heere foer te aanfang fon te kroos tripulatsyoon? (Kuk te apsats 8.) f
9. Was hot Yeehoowa uns in te Piipel ketsaycht?
9 In te Piipel, hot Yeehoowa etliche tinge ketsaycht woo eyer noch mache tuut. Tsum payxpiil: ti Piipel saat tas Yeehoowa ti “unkerechte” tsurik tsum leepe pringt, es wil saan, mënxe woo net een xans hate fer iwer ti kuute notisye lërne un sayn aanxtelung ënere. (Aph. 24:15; Luk. 23:42, 43) Tas pringt anere wichtiche frooche foer.
10. Was fer anere frooche tuun foer khome?
10 Meechte al woo torich ti kroos tripulatsyoon xtërpe fer imer fernicht wëre, oone een hofnung fon ufxtaye? Ti Piipel lost es taytlich tas ti faynte woo torich te Armaxeton fon Yeehoowa un sayn militeer fernicht wëre, wëre net uf keruuft. (2 The. 1:6-10) Awer was khene mer iwer ti anere layt saan? Etliche, tsum payxpiil, khene xtërpe weeche een krankheet, sayn elter, een unfal orer wayl een aner mënx se um pringt. (Ekl. 9:11; Sak. 14:13) Khene etliche fon tiise layt tepay sin in te “unkerechte” woo in te nay welt uf keruuft wëre? Meyer wise net ti antwort.
WAS MER WISE TUUN
11. Tëm noo was wëre ti layt kericht im Armaxeton?
11 Meyer wise phaar tinge woo im futuer pasiire. Meyer wise, tsum payxpiil, tas im Armaxeton wëre ti layt kericht tëm noo te aanxtelung woo se mit Yeesus sayn priiter hate. (Mat. 25:40) Tii woo ti kesalpte un Yeesus pay kextan hon, wëre wii “xeef” kericht. Meyer wise aach tas etliche fon Yeesus sayn kesalpte priiter wëre noch uf te eyert noom aanfang fon te kroos tripulatsyoon un tii wëre ploos tsum himel kenom kraat foer te aanfang fom Armaxeton. Soo lang wii etliche fon Yeesus sayn priiter uf te eyert sin, is es meechlich tas eerliche layt raus suuche tëne un sayn aarwayt pay xteen. (Mat. 25:31, 32; Apo. 12:17) Warom is es wichtich tas wise?
12-13. Wii tuun etliche fiilaycht sich aan xtele noo te fernichtung fon Papiloon ti Kroos? (Kuk aach ti pilter.)
12 Soo kaar noo tëm aanfang fon te kroos tripulatsyoon, is es meechlich tas etliche woo ti fernichtung fon “Papiloon ti Kroos” siin, sich traan tenke tas Yeehoowa sayn Tsayer een lang tsayt kesaat hon tas es pasiire teet. Meechte etliche aan fange uf Yeehoowa klaape wën se tiise ewënte siin? (Apo. 17:5; Ese. 33:33)
13 Wën soo was pasiirt, es wërt net fiil anerste wii was pasiirt is im Ejipt in Mooses sayn taache. Fiile layt woo “net israeliiter” waare, sin mit te israeliiter kang wii se Ejipt kelos hon. (Eeks. 12:38) Etliche fon tëne hon fiilaycht aan kefang uf Yeehoowa klaape wën se kesiin hon Mooses sayn wërter iwer ti 10 pheste sich erfiile. Wën soo was pasiirt noo te fernichtung fon Papiloon ti Kroos, meechte mer tenke tas es net richtich is tas tiise layt pay uns khome kraat foer te Armaxeton? Kewis net! Meyer wole soo wii unser himlixe Fater sin, “een Kot woo parmhërtslich un mitlaytich is, ketultich un fol mit leaale liip un woerheet”. d (Eeks. 34:6)
Fiilaycht, etliche woo ti fernichtung fon “Papiloon ti Kroos” siin, tuun sich traan tenke tas Yeehoowa sayn Tsayer een lang tsayt too triwer kexproch hon (Kuk ti apsetse 12-13.) g
14-15. Tuut een persoon sayn eewiche futuer ap hënge aan te tsayt woo se kextorep is orer tas plats woo se leept? Lee tas aus. (Psalm 33:4, 5)
14 Als mool, khan sin tas mer heere yemant saan: “Es weyer peser wën mayn parent foer ti kroos tripulatsyoon xtërpe teet, wayl soo hët eyer ti hofnung fer uf keruuft wëre.” Kewis, weer tas saat hot een liiplich uersach hiner traan. Awer een persoon sayn eewiche futuer hëngt net ap aan te tsayt woo se xtërpt. Yeehoowa is te perfekte Richter un sayn ëntxlise sin imer richtich un kerecht. (Lees Psalm 33:4, 5.) e Meyer khene uns sicher sin tas “te Richter fon te kans eyert” tuut tas richtiches mache. (Xee. 18:25)
15 Es xtimt aach se saan tas een persoon sayn eewich futuer hëngt net ap aan tëm plats woo se leept. Yeehoowa teet nii milyoone layt wii “kaprite” richte ploos wayl se leepe in een lant woo se nii ti xans hate fer iwer tas Raych lërne. (Mat. 25:46) Meyer khimere uns mit tiise layt, awer te Richter fon te kans eyert khimert sich noch fiil mee! Meyer wise net wii Yeehoowa ti ewënte lenkt torich ti kroos tripulatsyoon. Fiilaycht kriin etliche fon tiise layt ti xans fer iwer Yeehoowa lërne un aan tëm klaape wën eyer sayn naame foer ti kanse natsyoone ferhaylicht. (Ese. 38:16)
Noo tëm aanfang fon te kroos tripulatsyoon (…), meechte etliche aan fange uf Yeehoowa klaape wën se tiise ewënte siin?
16. Was hon mer xon iwer Yeehoowa kelërnt?
16 Torich unser xtuutyum fon te Piipel, hon mer kelërnt tas Yeehoowa fiil weyert kept fer ti mënxe sayn leepe. Tee hot tas leepe fon sayn Soon kep tas meyer al ti xans hëte fer eewiche leepe kriin. (Yoo. 3:16) Meyer al hon Yeehoowa sayn liip kexpiirt. (Isa. 49:15) Tee khënt te naame fon yeete eene fon uns. Un net ploos tas: tee khënt uns soo kuut tas, soo kaar wën mer xtërpe, khan eyer uns noch mool uf ruufe mit unser kanse kleenichkheete un erinerunge. (Mat. 10:29-31) Sicher khene mer traue tas unser himlixe Fater tuut yeete persoon perfekt richte, wayl tee is kluuch, kerecht un parmhërtslich. (Tya. 2:13)
Meyer khene uns sicher sin tas Yeehoowa net xtreng wërt wën eyer yeete persoon richt; tee wërt kerecht un parmhërtslich (Kuk te apsats 16.)
17. Iwer was tuun mer im neekste artikel xpreche?
17 Tiise ënerunge in unser ferxtëntnis lose unser preetich aarwayt aylicher wii noch nii. Warom khene mer tas saan? Was tuut uns uf muute ti kuute notisye preetiche un net uf kepe? Meyer xpreche too triwer im neekste artikel.
LIIT 76 Was pringt uns mee frooheet?
a Fer se wise ti uersache hinich tiise ënerung, kuk te artikel ‘Esse é o modo aprovado por ti’ in A Sentinela 15te Mërts fon 2015, sayte 7-11.
b (Hepreeyer 11:7) Torich klaape hot Noee, noo eyer fon Kot awisiirt kep is fon tings woo noch net kesiin waare, tiif respekt tsu Kot ketsaycht un een arich kepaut fer ti retung fon sayn familye; un, torich tiise klaape, hot eyer ti welt konteniirt un is een ërper kep fon te kerechtichkheet woo fom klaape khomt.
c (1 Pheeter 3:20) Tii hate Kot net aan keheert wii Tee mit ketult in Noee sayn taache kewaart hot, wii Noee ti arich am paue waar. In tiise arich sin phaar layt — 8 mënxe — in sicherheet torich tas waser ketraa kep.
d Noo te fernichtung fon Papiloon ti Kroos, al Yeehoowa sayn tiiner wëre keproopt torich te atak fon Kook fon Makook. Ale woo pay Kot sayn folek khome noo te fernichtung fon Papiloon ti Kroos wëre aach keproopt.
e (Psalm 33:4, 5) Wayl Yeehoowa sayn wort is ufrichtich, ales was eyer macht, khene mer fertraue. 5 Tee liipt ti kerechtichkheet un was richtich is. Ti eyert is fol mit Yeehoowa sayn leaale liip.
f PILT AUSLEYUNG: Tray pilter tsayche warom khan es xweyer sin etliche trefe mit te preetich aarwayt: (1) Een fraa leept in een rechyoon woo ti haupst relichyoon es kefeerlich lost ti preetich aan nëme. (2) Een pheyerche leept in een lant woo, weeche sayn politix sisteem, es kefeerlich un keeche tas kesets is ti woerheet aan nëme. (3) Een man leept uf een plats woo es aarich xweyer is hin khome.
g PILT AUSLEYUNG: Een yung fraa woo ti woerheet kelos hat, erinert sich was se kelërnt hat iwer ti fernichtung fon “Papiloon ti Kroos”. Tii ëntxlist tsurik tsu Yeehoowa un sayn kristliche eltere khome. Wën soo was pasiirt, meyer wole, soo wii unser Fater im himel, parmhërtslich un mitlaytich sin un uns fraye tas een sintiche persoon tsurik khomt.
