XTUUTYUM ARTIKEL 20
LIIT 67 “Tuu tas wort preetiche”
Wole mer wayter weeche liip preetiche!
“In te kanse natsyoone, mise ti kuute notisye tsu eyerst kepreeticht wëre.” (MARKUS 13:10)
WAS TUUN MER SIIN?
Wii ti liip uns uf muute tuut flaysich in te preetich aarwayt sin.
1. Was hon mer kelërnt in te yoers fersamlung fon 2023?
IN TE yoers fersamlung fon 2023, a hon mer naye ferxtëntnise iwer unser klaape kriit un xeene pekhantmachunge iwer ti preetich aarwayt keheert. Meyer hon, tsum payxpiil, tsum wise kriit tas etliche layt khene ti xans kriin fer Yeehoowa tiine soo kaar noo te fernichtung fon Papiloon ti Kroos. Meyer hon aach tsum wise kriit tas fon nofemper 2023 aan, prayche ti puplikatoore net mee ti kanse aktiwiteete in te preetich aarwayt relatoorye xike. Wil tas saan tas, weeche tiise ënerunge, is unser preetich aarwayt net soo important wii friier? Sicher net!
2. Warom wërt ti preetich aarwayt yeete taach wichticher? (Markus 13:10)
2 Yeete taach, wërts wichticher se preetiche. Warom? Wayl es feelt ploos noch een kleen pisye tsayt fer tas ën khome. Tenk aan was Yeesus iwer ti preetich aarwayt in te letste taache foer raus kesaat hot. (Lees Markus 13:10.) b Tëm noo Matheus sayn Ewankeelyum, hot Yeesus kesaat tas ti kuute notisye teete uf te kans pewoont eyert kepreeticht wëre eep “tas ën” khemt. (Mat. 24:14) “Tas ën” petayt ti komplët fernichtung fon Satanaas sayn xlechte welt. Yeehoowa hot xon “te taach un ti xtun” pextimt fer ti ewënte woo klaych pasiire. (Mat. 24:36; 25:13; Aph. 1:7) Tiise taach is yeete xtun tichter. (Rom. 13:11) Foerlaywich, mise mer wayter preetiche.
3. Was muut uns uf se preetiche?
3 Too is een wichtich frooch woo meyer al uns mache wole: Warom tuun mer ti kuute notisye preetiche? In khortse wërter, weeche liip. Wën mer preetiche, tsayche mer unser liip tsu te kuute notisye, tsu te layt un hauptseechlich tsu Yeehoowa un sayn naame. Wole mer yets yeete eene fon tiise phunkte noo kuke.
MEYER PREETICHE WAYL MER TI KUUTE NOTISYE LIIPE
4. Wii tuun mer uns aan xtele wën mer kuute notisye kriin?
4 Khanst tuu tich traan tenke wiis tuu tich kexpiirt host wiis tuu een kuute notisye kriit host? Fiilaycht is een nëneche in tayn familye uf te welt khom. Orer khan sin tas se tich een aarwayt, woos tuu wërklich praychst, aan kepoot hon. Tsiimlich sicher, pist tuu soo froo too temit kep tas tuu wolst tiise kuute notisye mit tayn familye un fraaynte teele. Meecht was eenliches pasiirt sin wiis tuu ti peste notisye keheert host — ti kuute notisye fon Kot sayn Raych?
5. Wii host tuu tich kexpiirt wiis tuu ti woerheet fon Kot sayn Wort kelërnt host? (Kuk aach ti pilter.)
5 Tenk tich traan wiis tuu tich kexpiirt host wiis tuu tas eyerste mool ti woerheet fon te Piipel keheert host. Tuu host kelërnt tas Yeehoowa, tayn Fater, tich fiil liipt un tas eyer wil hon tas tuu teel fon sayn familye fon aanpeeter wërst. Tuu host aach kelërnt tas eyer ferxproch hot ti phayn un ti eelent tsum ën pringe, tas tuu khanst noch mool tayn keliipte woo kextorep sin trefe wën se tsurik tsum leepe khome in te nay welt — un noch fiil mee! (Mar. 10:29, 30; Yoo. 5:28, 29; Rom. 8:38, 39; Apo. 21:3, 4) Was tuu kelërnt host, hot tich tiif aan kekrif. (Luk. 24:32) Tuu host keliipt was tuu am lërne waarst un tuu wolst mit ale kaar too triwer fertseele. (Kuk aach Yeeremias 20:9.)
Wën mer ti woerheet fon te Piipel kelërnt hon, khonte mer es net fer uns selepst pehale! (Kuk te apsats 5.)
6. Was lërnst tuu mit te speryens fon Ernest un Rose?
6 Kuk mool was mit een pruuter, woo Ernest c heest, pasiirt is. Tee waar unkefeer 10 yoore alt wii sayn papa kextorep is. Ernest tenkt sich traan: “Ich hon kefroot: ‘Meecht tee im himel sin? Orer meecht tee net mee eksistiire?’ Ich hon nayt kehat fon te khiner woo eene papa hate.” Ernest hot ofts te friit hoof pesuucht, sich foer te kraap fon sayn papa kekniit un kepeet: “Pite, Kot, ich wil wise woo mayne papa is.” Unkefeer 17 yoore noom toot fon sayn papa, hot een Yeehoowa sayn Tsayer een Piipel xtuutyum fer Ernest aan kepoot un Ernest hot tas klaych aan kenom. Tee hot sich ferwunert wii eyer kelërnt hot tas ti toote niks wise tuun, wii wën se tiif am xloofe weyere un tas ti Piipel aach ferxprecht tas een ufxtaye fon te toote im futuer pasiirt. (Ekl. 9:5, 10; Aph. 24:15) Ëntlich, hot eyer ti antworte kefun fer ti frooche woo tëm soo een lang tsayt net in ruu kelos hate. Ernest hot sich kefrayt mit te piiplixe woerheete woo eyer am lërne waar. Sayn fraa, Rose, hot aach aan kefang se xtutiire un tii hot aach keliipt was se am lërne waar. In 1978, hon se sich taafe kelos. Tii hon flaysich kepreeticht fer sayn familye, fraaynte un anere iwer ti weyertliche woerheete woo se kelërnt hate. Soo hon Ernest un Rose mee wii 70 layt keholef Yeehoowa khëne lërne un sich taafe lose!
7. Was pasiirt wën mer ti piiplixe woerheete liipe? (Lukas 6:45)
7 Es is taytlich tas wën mer ti piiplixe woerheete liipe, khene mer net ruych plaype. (Lees Lukas 6:45.) d Meyer xpiire uns soo wii Yeesus sayn tisipele, woo kesaat hon: “Meyer khene net noo lose se xpreche iwer was mer kesiin un keheert hon.” (Aph. 4:20) Meyer liipe ti woerheet soo fiil tas mer wole tas mit soo fiil layt wiis meechlich is, teele.
MEYER PREETICHE WAYL MER TI LAYT LIIPE
8. Was muut uns uf ti kuute notisye fer ti anere preetiche? (Kuk te khaste “ Liip ti layt — Mach tisipele”.) (Kuk aach tas pilt.)
8 Soo wii Yeehoowa un sayn Soon, liipe mer ti layt. (Xpr. 8:31; Yoo. 3:16) Meyer xpiire tiif mitlayt fer tii woo “oone Kot” sin un “khee hofnung” hon. (Ëfe. 2:12) Weeche ti propleeme, khene se sich xpiire wii wën se in een tiif loch weyere. Awer meyer hon een “xtrik” woo se raus tsiie khan: ti kuute notisye fon Kot sayn Raych. Wayl mer ti layt liipe un mitlayt tsu tëne xpiire, wole mer uns aan xtrenge fer ti kuute notisye mit tëne teele. Tiise weyertlich pexeet khan se fol hofnung lose, tëne tas peste leepe kepe woos hayt meechlich is un tëne ti xans kepe fer “tas woere leepe” kriin — es wil saan, eewiche leepe in Kot sayn nay welt. (1 Tim. 6:19)
Weeche liip un mitlayt tsu te layt, tuun mer uns aan xtrenge fer tëne ti kuute notisye preetiche (Kuk te apsats 8.)
9. Was tuun mer ti layt iwer te futuer aan saan un warom mache mer tas? (Esekyël 33:7, 8)
9 Unser liip fer ti layt muut uns aach uf tëne aan saan tas tas ën fon tiise xlecht welt ticht is. (Lees Esekyël 33:7, 8.) e Meyer xpiire mitlayt tsu ale kaar, too tepay unser parente woo Yeehoowa net tiine. Fiile layt nëme sayn leepe un xtele sich kaar net foer was noch khome tuut: “een kroos tripulatsyoon (…), wii es noch nii fom aanfang fon te welt pis yets kep hot, un woos nii mee kept”. (Mat. 24:21) Meyer wole hon tas ti layt wise was in tiise tsayt fon kericht pasiire tuut. Eyerst, wëre ti falxe relichyoone fernicht un tan, im Armaxeton, ti kans xlecht welt. (Apo. 16:14, 16; 17:16, 17; 19:11, 19, 20) Meyer peete tas soo fiil layt wiis meechlich is unser pexeet heere un ëntxlise Yeehoowa mit uns yets tiine. Awer was khene mer saan iwer tii woo uns fiilaycht yets net heere wole, too tepay unser liipe parente?
10. Warom is es wichtich tas mer ti layt wayter aan saan?
10 Wii mer im letste artikel kesiin hon, khan Yeehoowa ëntxlise se rete ti layt woo aan fange uf tëm klaape noo se ti fernichtung fon Papiloon ti Kroos siin. Wën es soo is, hayt is es wichticher wii noch nii tëne too triwer aan saan. Tenk mool noo: im futuer, khene ti layt sich traan tenke was mer tëne hayt kesaat hon. (Kuk aach Esekyël 33:33.) Im xtant, tuun se sich traan tenke fon was mer kepreeticht hon un wëre uf kemuut Yeehoowa mit uns tiine eeps tsu xpeet wërt. Fiilaycht etliche woo unser preetich hayt net aan nëme, tuun im futuer raus suuche Yeehoowa tiine wën se ti pletslich fernichtung fon Papiloon ti Kroos siin. Was eenliches is mim katee wachter in Filipos pasiirt: tee hot sayn aanxtelung keënert ploos noo tas “een kroos eyertxuter pasiirt” is. (Aph. 16:25-34)
MEYER PREETICHE WAYL MER YEEHOOWA UN SAYN NAAME LIIPE
11. Wii kepe mer Yeehoowa hërlichkheet, eer un macht? (Apokalipsis 4:11) (Kuk aach ti pilter.)
11 Ti haupst uersach warom mer ti kuute notisye preetiche, is wayl mer Yeehoowa un sayn hayliche naame liipe. Fer uns, is ti preetich aarwayt een aat wii mer khene unser liipe Kot loope. (Lees Apokalipsis 4:11.) f Meyer xtime mit unser kans hërts tas Yeehoowa fertiint hërlichkheet, eer un macht fon sayn leaale tiiner kriin. Meyer kepe tëm hërlichkheet un eer wën mer mit te anere teele ti taytliche pewaysunge tas eyer “ales kemacht” hot un tas mer eksistiire wayl eyer uns leepe kep hot. Meyer xenke Yeehoowa unser macht wën mer unser tsayt, kraft un tinge penutse fer unser pestes in te preetich aarwayt mache. (Mat. 6:33; Luk. 13:24; Kol. 3:23) In khortse wërter: meyer liipe se xpreche iwer te Kot woo mer liipe. Meyer wole aach mit te anere xpreche iwer tëm sayn naame un was fer sort Kot tee is. Warom?
Meyer xenke Yeehoowa unser macht wën mer unser tsayt, kraft un tinge penutse fer unser pestes in te preetich aarwayt mache (Kuk te apsats 11.)
12. Wii tuun mer Yeehoowa sayn naame in te preetich aarwayt ferhayliche?
12 Unser liip tsu Yeehoowa muut uns uf tëm sayn naame ferhayliche. (Mat. 6:9) Fer tas hin kriin, tsayche mer fer ti layt tas ales was Satanaas keeche Yeehoowa kesaat hot, een lii is. (Xee. 3:1-5; Yoop 2:4; Yoo. 8:44) Wën mer preetiche, unser wunx is fer al woo heere wole tsayche weer un wii Yeehoowa wërklich is. Meyer wole hon tas ti layt wise sole tas Yeehoowa sayn haupst kwaliteet ti liip is, tas eyer kerecht rechiirt un tas sayn Raych tuut klaych ti kans eelent tsum ën pringe un friit un frooheet tsu te mënxheet pringe. (Psal. 37:10, 11, 29; 1 Yo. 4:8) Wën mer ti woerheet iwer Yeehoowa preetiche, tuun mer sayn naame ferhayliche. Meyer wëre aach froo wayl mer am mache sin was mer mache mise wii Yeehoowa sayn Tsayer. Wii soo?
13. Warom is es een eer fer uns te naame Yeehoowa sayn Tsayer nëme? (Isayas 43:10-12)
13 Yeehoowa hot uns raus kesuucht wii sayn tsayer. (Lees Isayas 43:10-12.) g Phaar yoore tsurik, hot een priif fon te Rechiirente Khërperxaft kesaat: “Ti kreest eer woo mer kriin khene, is Yeehoowa sayn Tsayer keruuft wëre.” Warom khene mer tas saan? Kuk mool een ferklaychung. Xtel tich mool foer tas tuu akusiirt wërst was ferkheertes mache. Soo, must tuu een tsayer raus suuche fer tich foer tas kericht xitse. Weer teest tuu raus suuche? Sicher yemant woos tuu khënst, traust un een kuute naame foer ti anere hot, wayl soo, teete ti layt aan tëm klaape. Tas is was Yeehoowa kemacht hot. Wii eyer uns wii sayn tsayer raus kesuucht hot, hot eyer ketsaycht tas eyer uns kuut khënt un tas eyer traut tas mer fer ti anere saan tuun tas eyer te woere Kot is. Es is een eer fer uns tëm sayn tsayer sin! Tes weeche, penutse mer yeete oportuniteet fer sayn naame pekhant mache un fer se pewayse tas ti xlime tinge woo keeche tëm kesaat waare, net woer sin. Wën mer tas mache, lose mer fer ti anere taytlich tas mer wërklich Yeehoowa sayn Tsayer sin! (Psal. 83:18; Rom. 10:13-15)
MEYER TUUN WAYTER PREETICHE PIS TAS ËN
14. Was fer xeene ewënte khene im futuer pasiire?
14 Meyer tuun hërtslich waarte was im futuer pasiire tuut! Mit Yeehoowa sayn seechen, hofe mer tas noch fiil mee layt ti woerheet aan nëme eep ti kroos tripulatsyoon aan fangt. Es frayt uns aach se wise tas, soo kaar torich ti kroos tripulatsyoon — ti xlimst tsayt fon te mënxlich kexicht —, khan sin tas etliche layt Satanaas sayn welt im xtich lose un mit uns Yeehoowa loope khome. (Aph. 13:48)
15-16. Was tuun mer wayter mache, un pis wan?
15 Foerlaywich, hon mer ti eer fer ti kuute notisye fon Kot sayn Raych uf te kans eyert preetiche — een wichtich aarwayt woo nii noch mool kemacht wërt. In te selwich tsayt, sole mer wayter ti layt aan saan iwer was klaych pasiire tuut: tas ën fon tiise xlecht welt is fiks am khome. Tan, wën ti tsayt fon kericht khomt, tuun se wise tas tas pexeet woo mer kepreeticht hon fon Yeehoowa khom is. (Ese. 38:23)
16 Soo, was sin mer pextimt se mache? Meyer wole wayter weeche liip preetiche — liip tsu te kuute notisye, tsu te layt un hauptseechlich tsu Yeehoowa un sayn naame. Ti preetich aarwayt is aylich! Meyer wole wayter too traan flaysich xafe pis Yeehoowa saat: “Tas is kenuuch!”
LIIT 54 “Tas is te weech”
a Ti yoers fersamlung is am 7te oktooper fon 2023 pasiirt in te Newburgh Konkrës Saal fon Yeehoowa sayn Tsayer in Nay York (Fereenichte Xtaate fon Amërika). Xpeeter, waar tas kanse prokram foer kextelt in te JW Broadcasting — tas eyerste teel in nofemper 2023 un tas tsweete teel in yanuer 2024.
b (Markus 13:10) Un aach, in te kanse natsyoone, mise ti kuute notisye tsu eyerst kepreeticht wëre.
c Kuk te artikel “Ti Piipel tuut leepe ënere — Ti taytliche antworte fon te Piipel hon mich ferwunert” in Te Wachthorm 1te Feepruer fon 2015.
d (Lukas 6:45) Eene kuute mënx pringt kuute sache raus fom kuute xats fon sayn hërts, awer te xlechte mënx pringt tas xlechtes raus fon sayn xlechte xats; wayl sayn munt xprecht fon was tas hërts fol is.
e (Esekyël 33:7, 8) “Ich hon tich, mënxe soon, wii wachter fer Israël sayn haus in kextelt. Wëns tuu een wort aus mayn munt heerst, solst tuu tëne aan saan. 8 Wën ich fer een xlechte mënx saan: ‘Tuu tuust sicher xtërpe!’, un tuu halst tich ruych un saast tëm net tas eyer sich ënere sol, tuut eyer wii een xlechte mënx xtërpe weeche sayn aychne feele, awer ich tuun aprechnunge mit tich mache weeche tëm sayn toot.
f (Apokalipsis 4:11) “Tuu Yeehoowa, unser Kot, fertiinst ti hërlichkheet, ti eer un ti macht, wayls tuu ale tinge kemacht host, un weeche tayn wile tuun se eksistiire un sin se kemacht kep.”
g (Isayas 43:10-12) “Teyer sayt mayn tsayer”, saat Yeehoowa, “yaa, mayne tiiner woo ich raus kesuucht hon, tas teyer mich khënt un aan mich klaapt, un ferxteet tas ich te selwiche sin. Foer mich waar es khee aner Kot kemacht kep un noo mich tuuts wayter khee aner kepe. 11 Ich sin Yeehoowa: es kept khee aner reter.” 12 “Ich hon es kesaat, keret un pekhant kemacht, wën es khee frëmte kot tswixich aych waar. Tes weeche sayt teyer mayn tsayer”, saat Yeehoowa, “un ich sin Kot.
