1-2. Weer khan een Piipel xtutënt helfe pis aan taaf hin khome?

“ICH hat iwer kërn was ich hon in mayn Piipel xtuutyum kelërnt — saat Amy, woo in Fiji leept. — Ich wust tas es ti woerheet waar. Awer ploos wën ich aan kefang hon tsayt mit te priiter un xwestere fertraype, hon ich ti neetiche ënerunge kemacht un sin ich pis aan taaf hin khom.” Amy sayn wërter pringe een wichtich woerheet foer: een Piipel xtutënt hot mee xans fer pis aan taaf hin khome wën eyer hilef fon te priiter in te kemaynt kriit.

² Yeete puplikatoer khan mit helfe ti kemaynt wakse mache. (Ëfe. 4:16) Leilani, een pyoneerin woo in Vanuatu leept, saat: “Kepts een xprooch woo saat tas, fer een khint tsiie, al in te pikaat prayche helfe. Ich tenke tas es kilt aach in te aarwayt fer tisipele mache. Eftas, fer yemant tsu te woerheet pringe, al in te kemaynt prayche helfe.” Fer een khint tsiie, al hon een teel — ti familye, ti froynte un ti leerer. Tii mache tas wën se tas khint uf muute un tëm wichtiche lisyoone in lërne. In te selwich aat, al ti priiter un xwestere in te kemaynt khene aanreete kepe, uf muute un een kuut payxpiil fer ti Piipel xtutënte lose. Tas khan tëne helfe pis aan taaf hin khome. (Xpr. 15:22)

3. Was host tuu kelërnt mit te wërter fon Ana, Dorin un Leilani?

³ Een Piipel leerer sol petanklich sin wën ti anere in te kemaynt tëm sayn xtutënt helfe. Weeche was? Mërk mool was Ana, een spetsyaal pyoneerin in Moltaawya saat: “Wën een Piipel xtutënt fangt aan foran keen, hot eyer fiile neetichkheete; un es is aarich xweyer fer ploos eene persoon tas ales uf phase.” Dorin, eene spetsyaal pyoneer woo in tëm selwich lant tiint, saat: “Ofts mool, anere puplikatoore saan etwas woo aan  tëm xtutënt sayn hërts krayft, etwas woo ich nii foer heyer ketenkt hon.” Leilani kept een aner uersach warom sole mer froo sin wën anere ti xtutënte helfe: “Wën te xtutënt mërkt tas ti anere priiter un xwestere tëm liipe un tas se sich mit tëm khimere, es heleft tëm ferxteen tas mer sin wërklich Yeehoowa sayn folek.” (Yoo. 13:35)

4. Iwer was tuun mer in tiise artikel xpreche?

⁴ Awer, als mool, khanst tuu tich frooe: ‘Wii khan ich een Piipel xtutënt helfe foran keen wën ich net tëm sayn leerer sin?’ In tiise xtuutyum, wole mer kuke was khene mer mache wën mer in kelaat sin fer in een Piipel xtuutyum keen. Meyer tuun aach lërne was se mache wën een Piipel xtutënt fangt aan in te fersamlunge khome. Tsum xlus, tuun mer siin was khene ti elteste mache fer ti Piipel xtutënte helfe pis aan taaf hin khome.

5. Was is tayn flicht wëns tuu in kelaat pist fer in een Piipel xtuutyum keen?

⁵ In een Piipel xtuutyum, is es hauptseechlich te leerer sayn flicht te xtutënt helfe Kot sayn Wort ferxteen. Wën te leerer laat tich in fer in tëm xtuutyum mit tëm keen, tayn flicht tat is tëm helfe. (Ekl. 4:9, 10) Awer was khanst tuu mache fer een kuut mithelfer torich tas xtuutyum wëre?

6. Wëns tuu in een Piipel xtuutyum mit helfst, wii khanst tuu tas printsiipyum fon Xpriiche 20:18 aan wëne?

⁶ Richt tich in fer tas Piipel xtuutyum. Eyerst, ferlang te leerer tich een pisye iwer te xtutënt fertseele. (Lees Xpriiche 20:18.) * Tuu khenst tëm frooe: ‘Was weest tuu iwer te Piipel xtutënt? Was fer lisyoon tuust tuu mit tëm xtutiire? Was wilst tuu tas te xtutënt mit tiise lisyoon lërnt? Kepts etwas woo ich saan orer mache sole torich tas xtuutyum? Kepts etwas woo ich uf phase mise fer net se mache orer saan? Wii khan ich te xtutënt uf muute foran keen?’ Kewis, te leerer tuut net aus teele was eyer thërft net, awer was eyer tich saat khan tich helfe. Een misyoneerin, woo Joy heest, hot tiise sorte kexpreeche mit tëne woo se in laat fer in sayn xtuutye keen. Tii saat: “Tiise informatsyoone helfe ti persoon woo mit mich im xtuutyum keet, interes in tëm xtutënt tsayche un ëntxlise was se saan torich tas xtuutyum.”

7. Warom prauchst tuu tich in richte wëns tuu in een xtuutyum mit helfe tuust?

⁷ Wëns tuu in kelaat pist fer in een xtuutyum mit helfe, weyer es kuut tas tuu ti lisyoon in richte teest. (Ëst. 7:10) Dorin saat: “Ich hon iwer kërn wën mayn mithelfer tuut sich fer tas xtuutyum in richte; soo khan eyer nutsliche komentaare kepe.” Un noch, wën te leerer  un sayn mithelfer sich kuut in richte fer tas xtuutyum, te xtutënt tuut tas tsiimlich sicher mërke un tas lost tëm eene kuute payxpiil. Soo kaar wëns tuu kriist tich net kans kuut in richte, hool een tsayt fer am weenichs ti haupste phunkte fon te lisyoon fine.

8. Wii khanst tuu tich sicher sin tas tayn kepeete in tëm xtuutyum tuun te xtutënt tiif petrefe?

⁸ Tas kepeet is een wichtich teel fon een Piipel xtuutyum. Tan, tenk xon foner traan aan was tuu saan tuust wën te Piipel leerer tich ferlangt een kepeet mache. Soo tayn kepeet wërt wol te xtutënt tiifer petrefe. (Psal. 141:2) Hanae, woo in Yaapan leept, erinert sich noch fon te kepeete fon een xwester woo is mit tëne sayn Piipel leerin khom. Tii saat: “Ich hon kemërkt tas se een xtark froyntxaft mit Yeehoowa hat un ich wolt soo wii tii sin. Ich hon mich keliipt kexpiirt yeete mool woo se mayn naame in sayn kepeete penutst hot.”

9. Tëm noo Tyako 1:19, was khanst tuu mache fer een kuut mithelfer in tëm xtuutyum sin?

⁹ Helef te leerer torich tas xtuutyum. “Yemant woo wërklich mit heleft, tuut mit acht torich tas xtuutyum heere. Tee kept kuute komentaare, awer tuut net tsu fiil xpreche wayl eyer ferxteet tas te leerer mus tas xtuutyum fiire” — saat Omamuyovbi, een spetsyaal pyoneerin in Nikeerya. Tan, wanee solst tuu etwas saan? Un was solst tuu saan? (Xpr. 25:11) Horich mit acht soo lang wii te leerer un te xtutënt am xpreche sin. (Lees Tyako 1:19.) * Tan, in te richtich tsayt, wërst tuu fërtich fer se helfe. Sicher, must tuu ferninftichkheet tsayche. Tsum payxpiil, tuu thërfst net tsu fiil xpreche, te leerer xteere soo lang wii eyer etwas am aus leye is, orer aan fange se xpreche iwer een unerxiitlich sache. Awer mit een khorts komentaar, ferklaychung orer frooch, khanst tuu mit helfe fer te phunkt taytlich lose. Manich mool xpiirst tuu tas tuu host net fiil fer iwer te sache se saan, awer wëns tuu te xtutënt loopst un interes aan tëm tsaychst, machst tuu xon fiil fer tëm helfe foran keen.

10. Wëns tuu xprechst iwer was tuu xon mit keleept host, wii khan tas te xtutënt helfe?

¹⁰ Xprech iwer ti tinge woos tuu mit keleept host. Wën es phast, khanst tuu fer te xtutënt fertseele iwer wii host tuu ti woerheet kelërnt, wii host tuu een kefoer iwerkhom orer wii host tuu Yeehoowa sayn hilef in tayn leepe kesiin. (Psal. 78:4, 7) Im xtant, tas is kraat was te xtutënt heere praucht. Tas khan tëm sayn klaape ferxtërke orer tëm uf muute wayter pis aan taaf foran keen. Un tas khan tëm tsayche wii een proop woo eyer mit leept, iwerkhome. (1 Phe. 5:9) Gabriel, woo in Brasil leept un tiint yets wii pyoneer, erinert sich was hot tëm  keholef wii eyer ti Piipel am xtutiire waar. Tee fertseelt: “Wën ich ti priiter sayn speryense kehoricht hon, hon ich kelërnt tas Yeehoowa wees ti propleeme woo mer mit mache. Un wën tii sayn kefoore iwerkhome kriit hon, tan kriin ich tas aach hin!”

11-12. Warom sole mer hërtslich wilkhome ti Piipel xtutënte woo in te fersamlunge keen?

¹¹ Tas een Piipel xtutënt pis aan taaf hin khome khan, praucht eyer reeklich in te fersamlunge keen un nutse too tefun kriin. (Hep. 10:24, 25) Tsiimlich sicher, tee tuut tas eyerste mool in te fersamlung keen wayl te leerer tëm in kelaat hot. Wën eyer tsum Raych Saal khomt, meyer al khene tëm uf muute fer wayter tas mache. Wii?

¹² Tuu te xtutënt hërtslich wilkhome. (Rom. 15:7) Wën te xtutënt xpiirt tas eyer wilkhom in te fersamlunge is, tuut eyer tsiimlich sicher te wunx kriin fer wayter tsum Raych Saal keen. Tuu te xtutënt hërtslich pekriise un mach tëm tsu anere priiter pekhant; awer phas uf fer tëm net xeeme. Rechen net tas eyer xon uf kephast is; fiilaycht sayn leerer is noch net khom orer praucht welche flichte erfiile. Kep fiil acht fer was te xtutënt saat un tsaych tas tuu tich mit tëm khimerst. Macht tas wërklich een unerxiit, te xtutënt hërtslich wilkhome? Kuk tas payxpiil fon Dmitrii, woo waar phaar yoore tsurik ketaaft un tiint yets wii ministeryaal tiiner. Eyer saat iwer sayn eyerst fersamlung: “Eene pruuter hot kemërkt tas ich ausm Raych Saal unruych am waarte waar un tee hot mich liiplich in kelaat fer rin tsus keen. Fiile sin mich pekriise khom. Tas hot mich wërklich ferwunert! Ich hat tas soo kërn tas ich wolt tas yeete taach een fersamlung weyer. Ich hat noch nii soo was keleept!”

13. Wii khan tayn aanxtelung een Piipel xtutënt petrefe?

¹³ Say eene kuute payxpiil. Tayn aanxtelung khan te Piipel xtutënt sicher lose tas eyer ti woerheet kefun hot. (Mat. 5:16) Vitalii, woo tiint yets wii pyoneer in Moltaawya, saat: “Ich hon peopacht wii ti anere in te kemaynt keleept, ketenkt un sich aan kextelt hon. Tas hot mich sicher kelos tas Yeehoowa sayn Tsayer sin ti woere relichyoon.”

14. Wii khan tayn payxpiil yemant helfe wayter foran keen?

¹⁴ Eep eyer sich taafe khan, een Piipel xtutënt praucht aan wëne was eyer am lërne is. Tas is net imer laycht. Awer wën te xtutënt mërkt wii fiil nutse kriinst tuu fon te piiplixe printsiipye aan wëne, tas tuut tëm fiilaycht uf muute tich noo mache. (1 Kor. 11:1) Kuk mool ti speryens fon Hanae, iwer weem mer kraat kexproch hon. Tii saat: “Ti priiter un xwestere waare xon am mache was ich am lërne waar. Ich hon kelërnt wii khont ich ti  anere uf muute un fertsaye, un wii khont ich liip tsayche. Tii hon imer kuut iwer ti anere kexproch. Ich wolt soo wii tëne sin!”

15. Wii khene mer tas printsiipyum fon Xpriiche 27:17 mit een xtutënt aan wëne?

¹⁵ Say een froynt fer te xtutënt. Wii te xtutënt wayter in te fersamlunge keet, los net noo se tsayche tas tuu tich mit tëm khimerst. (Fili. 2:4) Was mënst tuu fon mit tëm xpreche? Tuu khanst tëm loope weeche ti ënerunge woo eyer xon kemacht hot, orer tuu khanst tëm frooe iwer sayn Piipel xtuutyum, sayn familye orer sayn aarwayt. Awer, phas uf fer net etwas frooe woo tëm xeeme tuut. Tiise kexpreeche khene aych tichter xafe. Wëns tuu een froynt fer te xtutënt wërst, tuust tuut tëm helfe pis aan taaf hin khome. (Lees Xpriiche 27:17.) * Hanae tuut yets wii rekulaar pyoneerin tiine. Tii saat iwer ti tsayt wën se aan kefang hot in te fersamlunge keen: “Wii ich froynte in te kemaynt kemacht hon, hon ich aan kefang ti fersamlunge yeete woch waarte. Un ich sin kang soo kaar wën ich miit waar. Ich hat iwer kërn mayn naye froynte. Un tas hot mich keholef ti froyntxafte ap xnayte woo ich hat mit te layt woo net Yeehoowa ketiint hon. Ich wolt mich tichter pay Yeehoowa un pay te priiter un xwestere xafe; tes weeche, hon ich ëntxlist mich taafe lose.”

16. Was noch khanst tuu mache fer een Piipel xtutënt helfe sich in te kemaynt tehëm fine?

¹⁶ Wii te xtutënt foran keet un ënerunge macht, heleft tëm sich tehëm in te kemaynt xpiire. Tuu khanst tas mache wëns tuu tëm kuut aan nëmst. (Hep. 13:2) Denis, woo in Moltaawya tiint, erinert sich fon te tsayt wën eyer noch eene Piipel xtutënt waar: “Phaar mools, waar ich un mayn fraa in kelaat fer tsayt mit te priiter fertraype. Tii hon uns kesaat wii Yeehoowa tëne keholef hot. Tas hot uns uf kemuut. Tiise keleechenheete hon uns noch sicher kelos tas mer wolte Yeehoowa tiine un tas een wunerlich leepe waar foer uns kewees.” Wën een Piipel xtutënt puplikatoer wërt, khanst tuu tëm aach in laate fer im preetich keen. Diego, een pruuter fon Brasil, saat: “Fiile priiter hon mich in kelaat fer in te preetich aarwayt keen. Es waar ti pest aat fer tëne kuut khëne lërne. Wii ich tas kemacht hon, hon ich fiil kelërnt un hon ich mich tichter pay Yeehoowa un Yeesus kexpiirt.”

17. Wii khene ti elteste ti Piipel xtutënte helfe?

¹⁷ Hool tsayt fer ti Piipel xtutënte. Elteste, wën teyer liip tsaycht un khimert aych mit te xtutënte, khent teyer tëne helfe pis aan taaf hin khome. Was mënst tuu fon reeklich mit te Piipel xtutënte in te fersamlunge xpreche? Tii tuun mërke tas tuu tich mit tëne khimerst  wëns tuu tëne sayn naame erinerst, hauptseechlich wën se aan fange antworte kepe. Khanst tuu tsayt hoole fer mit een puplikatoer keen wën eyer een Piipel xtuutyum fiirt? Tuu khanst een Piipel xtutënt tiifer petrefe wiis tuu rechenst! Jackie, een pyoneerin woo in Nikeerya leept, saat: “Fiile fon te Piipel xtutënte hon sich ferwunert wën se tsu wise kriit hon tas te pruuter woo mit mich khom is, waar een elteste kewees. Eene Piipel xtutënt hot kesaat: ‘Te faarer fon mayn khërich teet nii mools soo was mache. Tee pesuucht ploos ti rayche, un ploos wën se tëm petsaale!’” Tiise xtutënt keet yets in te fersamlunge.

18. Wii khene ti elteste Aphostele sayn Kexicht 20:28 aan wëne?

¹⁸ Tuu ti Piipel leerer iipe un uf muute. Elteste, teyer hot een wichtich flicht: ti puplikatoore helfe kuute preeticher un leerer wëre. (Lees Aphostele sayn Kexicht 20:28.) * Wën een puplikatoer xeemt sich een Piipel xtuutyum fiire wëns tuu paysamer pist, piit tich aan fer tas xtuutyum fiire. Jackie, iwer weem mer foner traan kexproch hon, fertseelt: “Ti elteste tuun mich eftas frooe iwer mayn Piipel xtutënte. Wën propleeme foer khome soo lang wii ich een Piipel xtuutyum fiire, tii kepe mich nutsliche aanreete.” Ti elteste khene fiil mache fer ti leerer uf muute wayter aus hale. (1 The. 5:11) Jackie saat noch: “Ich fine mich mechtich kuut wën ti elteste mich uf muute un saan mich tas se fiil weyert xetse fer mayn xweyer aarwayt. Tiise wërter sin fer mich wii een klas fol khil waser in een hayse taach! Tëne sayn loope helfe mich xpiire tas ich een kuut aarwayt mit mayn Piipel xtuutye am mache sin, un tii helfe mich noch mee frayt hon.” (Xpr. 25:25)

19. Was fer frayt khene mer al hon?

¹⁹ Fiilaycht sin mer khee Piipel xtuutyum yets am fiire. Awer soo wii soo, khene mer yemant helfe pis aan taaf hin khome. Meyer thërfe net tsu fiil torich tas Piipel xtuutyum xpreche; awer mer khene te leerer helfe mit kuute komentaare woo mer in kericht hon. Meyer khene froynte wëre fon te xtutënte woo tsum Raych Saal khome, un meyer khene eene kuute payxpiil tsu tëne sin. Ti elteste khene ti xtutënte uf muute wën se tsayt tsu tëne hoole; un tii khene ti leerer uf muute wën se tëne iipe un loope. Wëns tuu etwas machst — soo kaar wën es kleen is — fer yemant helfe Yeehoowa loope un tiine, tuust tuu woere frayt xpiire!