1. Was fer sort propleeme tuun Yeehoowa sayn tiiner mit mache?

MACHST tuu een xweyer propleem mit? Fiilaycht yemant in te kemaynt hot tich pelayticht. (Tya. 3:2) Orer im xtant tayn xuul orer aarwayt koleke xpote tich wayls tuu Yeehoowa tiine tuust. (1 Phe. 4:3, 4) Orer, es khan sin tas tayn parente fersuuche tich um hale in te fersamlunge keen orer iwer tayn klaape mit anere xpreche. (Mat. 10:35, 36) Wën een propleem aarich xweyer is, fiilaycht tenkst tuu tas es peser weyer uf kepe. Awer tuu khanst tich sicher sin tas, ekaal te propleem woos tuu mit machst, Yeehoowa tuut tich ti kluucheet kepe fer mit tëm um keen un ti kraft fer tëm aus hale.

2. Tëm noo Romaaner 15:4, wii Kot sayn Wort leese tuut uns petrefe?

² Yeehoowa hot in tëm sayn Wort welche payxpiile kelos iwer wii sin imperfekte layt mit sayn propleeme um kang. Warom? Tas mer khene mit tëne lërne. Yeehoowa hot te aphostel Phaul penutst fer iwer tas xraype in Romaaner 15:4. * (Lees.) Wën mer tiise kexichte leese, khene mer troost un hofnung kriin. Awer mer prayche mee mache wii ploos ti Piipel leese — meyer thërfe tëne lose unser ketanke mustere un aan unser hërts krayfe. Tsum payxpiil, was khene mer mache wën mer prayche oryentiirung kriin fer mit een kefoer um keen? Meyer khene tiise 4 xrite kepe: (1) peete, (2) sich foer xtele, (3) triwer noo tenke un (4) aan wëne. Wole mer siin was is tepay in yeete eene fon tiise xrite. * Noo heyer, tuun mer tiise aat fer se xtutiire penutse fer welche tinge lërne fon was is mim kheenich Tawi un tëm aphostel Phaul pasiirt.

3. Eeps tuu aan fangst ti Piipel leese, was solst tuu mache un warom?

 ³ (1) Peete. Eeps tuu aan fangst ti Piipel leese, ferlang Yeehoowa fer tich helfe se siin wii khanst tuu nutse kriin fon was tuu leest. Tsum payxpiil, wëns tuu oryentiirunge am suuche pist fer mit een propleem um keen, ferlang Yeehoowa sayn hilef fer printsiipye in te Piipel fine woo khene tich lënke. (Fili. 4:6, 7; Tya. 1:5)

4. Was khan tich helfe noch mee nutse fon een piiplix kexicht raus hoole?

⁴ (2) Sich foer xtele. Yeehoowa hot uns ti wunerlich apiliteet kep fer uns foer xtele. Tan, wëns tuu een Piipel kexicht leese tuust, fersuuch tich foer xtele was am pasiire is un tenk tas tuu ti persoon pist iwer weem tuu leest. Fersuuch se siin ti tinge woo ti persoon kesiin hot un xpiire was se fiilaycht kexpiirt hot. Wëns tuu es machst, tuust tuu noch mee nutse fon tas piiplix kexicht raus hoole.

5. Was petayt triwer noo tenke un wii khanst tuu tas mache?

⁵ (3) Triwer noo tenke. Tas petayt mit acht tenke iwer was tuu am leese pist un iwer wii ti informatsyoon phast fer tich. Tas heleft tich ti aanunge ferpiine un peser ferxteen was tuu am leese pist. Wole mer een ferklaychung mache: xtel tich mool foer tiise sort xpiil woos tuu prauchst fiile kleene xtikche samer setse fer een komplët pilt mache. Wën mer ti Piipel leese oone se triwer noo tenke, es is wii tiise xtikche ufm tix ploos kuke. Wën mer triwer noo tenke, es is wii wën mer tiise xtikche samer setse teete — soo kriin mer tas komplët pilt siin! Fer tich helfe triwer noo tenke, khanst tuu tich tiise sorte frooche mache: ‘Was hot ti haupst persoon fon tëm kexicht kemacht fer sayn propleem resolwiire? Wii hot Yeehoowa tëne keholef? Wii khene ti lisyoone woo ich kelërnt hon mich helfe ti kefoore aus hale?’

6. Warom mise mer aan wëne was mer lërne?

⁶ (4) Aan wëne. Yeesus hot kesaat tas wën mer net aan wëne was mer lërne, sin mer wii eene man woo paut sayn haus ufm sant: tee tuut xtram xafe, awer sayn aanxtrengung is umsonst. Weeche was? Wayl wën een weter xtorm orer een iwerxwëmung sayn haus petreft, tuut tas in preche. (Mat. 7:24-27) In te selwich aat, wën mer peete, uns foer xtele un triwer noo tenke awer net aan wëne was mer lërne, unser mii wërt umsonst. Tan, wën mer propleeme layte orer wën mer keyacht sin, unser klaape wërt net kenuuch xtark sin. Uf te aner sayt, wën mer xtutiire un tan aan wëne was mer lërne, mache mer peser ëntxlise, kriin mer mee friit un ferxtërke mer unser klaape. (Isa. 48:17, 18) Wole mer yets ti 4 xrite woo mer kelërnt hon penutse un siin was khene mer lërne mit was is mim kheenich Tawi pasiirt.

7. Was fer piiplixe kexicht tuun mer yets xtutiire?

⁷ Hot een froynt orer een parent tayn hërts wee kemacht? Wëns yaa, etwas woo tich helfe khan is se xtutiire was te kheenich Tawi kemacht hot wën sayn soon Apsaloon tëm hinerkang hot un wolt sich kheenich uf tëm sayn plats mache. (2 Sam. 15:5-14, 31; 18:6-14)

8. Was khanst tuu mache fer Yeehoowa sayn hilef kriin?

⁸ (1) Peete. Eeps tuu tas kexicht leese tuust, saa fer Yeehoowa wii xpiirst tuu tich weeche ti xlecht aat wiis tuu pehantelt waarst. (Psal. 6:6-9) Say spetsiifix. Tan, ferlang Yeehoowa sayn hilef fer printsiipye fine woo khene tich helfe se siin was se mache.

9. Was is tswixich Tawi un Apsaloon pasiirt?

⁹ (2) Sich foer xtele. Tenk iwer was pasiirt is in tiise kexicht un iwerlee tich wii waar  te kheenich Tawi petrof. Tëm sayn soon, Apsaloon, hot yoore kexaft fer tas folek sayn liip kriin. (2 Sam. 15:7) Wën Apsaloon kemënt hot tas ti richtich tsayt khom is, hot eyer spyoone torich tas kans Israël kexikt fer tas folek uf rechne tëm wii kheenich aan nëme. Tee hot soo kaar Aytofël — eene fon Tawi sayn tichste froynte un aanreeter — rom kepapelt fer sich keeche Tawi xtele. Noo heyer, Apsaloon hot sich kheenich kemacht. Tan, hot eyer fersuucht Tawi — woo waar tsiimlich sicher aarich krank kewees — fange un um pringe. (Psal. 41:1-9) Wii Tawi tas ales tsu wise kriit hot, is eyer fon Yeruusalem aus keris. Am ën, Apsaloon sayn militeer hot keeche Tawi sayns kekhëmpft. Tas repëlixe militeer is ap kewun kep un Apsaloon is um keprung kep.

10. Was khont te kheenich Tawi kemacht hon?

¹⁰ Yets, xtel tich mool foer wii hot Tawi sich kexpiirt soo lang wii tas ales am pasiire waar. Eyer hot Apsaloon keliipt un hot uf Aytofël ketraut. Soo wii soo, hon ti tswaay tëm hinerkang. Tii hon Tawi sayn hërts wee kemacht un hon soo kaar fersuucht tëm um pringe. Tawi khont ëntxlist hon net mee uf sayn anere froynte traue, fiilaycht am tenke: ‘Tii sin al uf Apsaloon sayn sayt.’ Tee khont im xtant ploos aan sich selepst ketenkt hon un fersuucht hon fom lant aleen aus rayse. Orer khont eyer noore kelos hon ti unmuutichkheet tëm iwerlaate. Awer Tawi hot khee eene fon tiise tinge kemacht. Xtats tas, hot eyer tiise xweyer kefoer iwerkhom. Wii khont eyer soo was mache kriin?

11. Was hot Tawi in tiise xweyer situatsyoon kemacht?

¹¹ (3) Triwer noo tenke. Was fer printsiipye khanst tuu mit tiise kexicht lërne? Tuu tiise frooch antworte: ‘Was hot Tawi kemacht fer te propleem resolwiire?’ Tawi is in ruu keplip un hot mit ketult kluuche ëntxlise kemacht. Un noch, tee is net soo panglich kewoer tas eyer khont net raus suuche was se mache. Xtats tas, hot eyer tsu Yeehoowa kepeet fer hilef kriin. Tee hot aach hilef fer sayn froynte ferlangt un hot xnel kemacht was eyer ëntxlist hat. Opwool Tawi aarich traurich waar, hot eyer net noo kelos uf te anere traue un is aach net piterlich kep. Tee hot wayter aan Yeehoowa un uf sayn froynte ketraut.

12. Wii hot Yeehoowa Tawi keholef?

¹² Wii hot Yeehoowa Tawi keholef? Wëns tuu unersuuchunge machst, tuust tuu raus fine tas Tee hot Tawi ti neetich kraft kep fer tiise kefoer aus hale. (Psal. 3:1-8; iwerxrift) Yeehoowa hot keseechent ti ëntxlise woo Tawi kemacht hot, un Tee hot Tawi sayn troye froynte uner xtitst wii se kekhëmpft hon fer sayn kheenich xitse.

13. Wii khanst tuu Tawi noo mache wën yemant tayn hërts wee macht? (Matheus 18:15-17)

¹³ (4) Aan wëne. Froo tich: ‘Wii khan ich Tawi noo mache?’ Tuu xnel in krayfe fer te propleem resolwiire. In welche situatsyoone, khanst tuu ti xrite kepe woo Yeesus pexrip hot in Matheus kapitel 18. In anere, khanst tuu tas printsiipyum hinich tiise wërter noo keen. (Lees Matheus 18:15-17.) * Awer tuu thërfst tayn ëntxlise mit ketult mache un net wëns tuu pees pist. Tuu solst tsu Yeehoowa peete tas eyer tich heleft in ruu plaype un kluucheet hon fer se wise was se mache. Tuu net noo lose aan tayn froynte traue; xtats tas, nëm ti hilef aan woo se tich aan piite. (Xpr. 17:17) Un tas haupste: tuu Yeehoowa sayn aanreete, woos tuu in te Piipel finst, noo keen. (Xpr. 3:5, 6)

14. In was fer situatsyoone khan 2^te Timoteus 1:12-16; 4:6-11, 17-22 tich uf muute?

¹⁴ Is tayn familye keeche tich wayls tuu Yeehoowa tiinst? Orer leepst tuu uf een lant woo een teel orer ti kans aarwayt fon Yeehoowa sayn folek ferpoot is? Wëns yaa, tuu khanst uf kemuut wëre wëns tuu leest 2^te Timoteus 1:12-16 un 4:6-11, 17-22. * Phaul hot tiise wërter kexrip wii eyer inkexpërt waar.

15. Was khanst tuu fer Yeehoowa ferlange?

¹⁵ (1) Peete. Eeps tuu tiise wersikele leest, xprech mit Yeehoowa iwer tayn propleem un wiis tuu tich too triwer xpiirst. Say spetsiifix. Tan, ferlang Yeehoowa sayn hilef fer printsiipye fine in te kexichte iwer Phaul sayn kefoore, woo khene tich helfe se wise was se mache.

16. Was fer waar Phaul sayn situatsyoon kewees?

¹⁶ (2) Sich foer xtele. Xtel tich mool foer tas tuu Phaul pist. Tee waar mit khete ferpun in een katee in Roma. Tee waar xon foer heyer inkexpërt kewees, awer yets waar eyer sich sicher tas eyer um keprung weyer. Etliche froynte hate tëm im xtich kelos un Phaul sayn khërper waar xon kaput miit kewees. (2 Tim. 1:15)

17. Was khont Phaul kemacht hon?

¹⁷ Phaul khont sich aan te ferkangne yoore traan kehal hon, am tenke: ‘Wën ich net een krist weyer, weyer ich fiilaycht net inkexpërt.’ Tee khont pees kewoer sin mit te mëner fon te prowins fon Asya, woo hate tëm im xtich kelos; un khont aach ëntxlist hon net mee uf sayn anere froynte traue. Awer Phaul hot khee eene fon tiise tinge kemacht. Wii hot eyer es hin kriit wayter uf sayn froynte traue un hofnung aan Yeehoowa hon?

18. Was hot Phaul in tiise xweyer situatsyoon kemacht?

¹⁸ (3) Triwer noo tenke. Tuu ti frooch antworte: ‘Was hot Phaul kemacht fer te propleem resolwiire?’ Opwool Phaul wust tas eyer klaych xtërpe teet, hot eyer sich net ferkes fon etwas seer wichtich — eer tsu Yeehoowa pringe. Un tee hot wayter ketenkt aan wii khont eyer ti anere uf muute. Tee hot uf Yeehoowa ketraut torich reekliche kepeete. (2 Tim. 1:3) Phaul hot sich net traan kehal aan te priiter woo hate tëm im xtich kelos. Xtats tas, hot eyer ketsaycht tas eyer aarich petanklich waar weeche ti liiplich aat wii sayn froynte tëm uner xtitst un keholef hon. Phaul hot aach Kot sayn Wort wayter xtutiirt. (2 Tim. 3:16, 17; 4:13) Un tas haupste: tee waar sich kans sicher tas Yeehoowa un Yeesus tëm keliipt hon. Tii hate tëm net im xtich kelos un tii teete tëm peloone weeche sayn troy aarwayt.

19. Wii hot Yeehoowa Phaul keholef?

¹⁹ Yeehoowa hat Phaul aan kesaat tas, wayl eyer een krist waar, teet eyer yachtung mit mache. (Aph. 21:11-13) Wii hot Yeehoowa Phaul keholef? Tee hot Phaul sayn kepeete keantwort un tëm imer kraft kep. (2 Tim. 4:17) Yeehoowa hot Phaul sicher kelos tas eyer ti peloonung kreecht woo eyer soo xweyer kexaft hot fer se kriin. Yeehoowa hot aach Phaul sayn troye froynte uf kerechent tëm praktix hilef kepe.

20. Wii khanst tuu Phaul sayn klaape noo mache, woo eyer ketsaycht hot in Romaaner 8:38, 39?

²⁰ (4) Aan wëne. Froo tich: ‘Wii khan ich Phaul noo mache?’ Soo wii Phaul, khene mer xon waarte tas mer keyacht weeche unser klaape wëre. (Mar. 10:29, 30) Fer wayter troy tsu Yeehoowa plaype wën mer proope mit mache, prayche mer wayter tsu tëm peete un sayn Wort reeklich xtutiire. Un meyer mise uns imer erinere tas eene fon te haupste tinge woo mer mache khene is eer tsu Yeehoowa pringe.  Meyer khene uns sicher sin tas Yeehoowa tuut uns nii mools im xtich lose un tas niks woo yemant macht, khan tëm um hale uns liipe. (Lees Romaaner 8:38, 39; * Hep. 13:5, 6.)

21. Was hot Aya un Hector keholef sayn kefoore iwerkhome?

²¹ Een tuun was unser situatsyoon is, meyer khene kraft fon te piiplixe payxpiile kriin. Tsum payxpiil, Aya — een pyoneerin in Yaapan — saat tas se pang hat fon puuplix tsaye kepe; awer Yoonas sayn kexicht hot tëne keholef tas iwerkhome. Hector is eene yunge pruuter in Intoneesya un sayn eltere tuun net Yeehoowa tiine. Tee saat tas Rut sayn payxpiil hot tëm uf kemuut iwer Yeehoowa lërne un tëm tiine.

22. Wii khanst tuu noch mee nutse kriin fon te piiplixe tramas un ti sekwens fon artikele “Imite a Sua Fé”?

²² Woo khanst tuu piiplixe payxpiile fine woo tich ferxtërke tuun? Unser wiiteos, ti tramatisiirte Piipel leesunge un ti sekwens fon artikele “Imite a Sua Fé” helfe uns ti piiplixe kexichte foer xtele. * Tii sin ti resultaate fon tiife unersuuchunge. Eeps tuu tëne kukst, heerst orer leest, ferlang Yeehoowa sayn hilef fer spetsiifixe phunkte fine woos tuu aan wëne khanst. Xtel tich mool foer tas tuu ti haupste persoon fom kexicht pist. Tenk triwer noo iwer was tiise troye tiiner fon Yeehoowa kemacht hon un wii hot eyer tëne keholef sayn xwiirichkheete iwerkhome. Tan, tuu ti lisyoone in tayn aychne situatsyoon aan wëne. Tank Yeehoowa fer ti hilef woo eyer tich xon am kepe is un tsaych tas tuu petanklich fer tiise hilef pist — suuch keleechenheete fer ti anere uf muute un uner xtitse.

23. Tëm noo Isaiias 41:10, 13, was ferxprecht Yeehoowa uns mache?

²³ Tas leepe in tiise welt — woo is fon Satanaas kontroliirt — khan xweyer sin; un als mool, wise mer net was se mache. (2 Tim. 3:1) Awer mer prayche net ëngstlich wëre orer pang hon. Yeehoowa wees was mer am mit mache sin. Wën meyer fale, ferxprecht eyer uns fest hale mit sayn xtarke recht hant. (Lees Isaiias 41:10, * 13. *) Meyer sin uns sicher tas Yeehoowa uns helfe tuut un ti Piipel kept uns ti kraft woo mer prayche fer kwalkee propleem iwerkhome.