1. Wii waar tayn leepe kewees eeps tuu aan kefang host ti Piipel xtutiire?

 WII waar tayn leepe kewees eeps tuu aan kefang host ti Piipel mit Yeehoowa sayn Tsayer xtutiire? Fiile fon uns tenke net kërn too triwer. Tsiimlich sicher, waar unser aanxtelung un personaliteet influentsiirt fon was ti welt tenkt richtich un ferkheert is. Wëns soo is, ‘hate mer khee hofnung un mer waare oone Kot in te welt’. (Ëfe. 2:12) Awer ti Piipel xtutiire hot tas ales keënert!

2. Was is pasiirt noo tas tuu aan kefang host ti Piipel xtutiire?

² Wëns tuu aan kefang host ti Piipel xtutiire, host tuu raus kriit tas tuu een Fater im himel host woo tich aarich fiil liipe tuut. Tuu host kemërkt tas, fer Yeehoowa kefale un eene fon sayn aanpeeter sin, must tuu kroose ënerunge in tayn leepe un ketanke mache. Tuu must lërne se mache was Yeehoowa saat richtich is un tich wech hale fon was Yeehoowa saat ferkheert is. (Ëfe. 5:3-5)

3. Tëm noo Koloser 3:9, 10, was wil Yeehoowa hon tas mer mache, un was tuun mer in tiise artikel siin?

³ Yeehoowa is unser Kriatoer un unser Fater im himel. Tes weeche, hot eyer tas recht fer se ëntxlise wii sayn familye sich aan xtele sol. Un tee saat tas, eep mer uns taafe lose, mise mer uns aan xtrenge fer “ti alt personaliteet un sayn kewoonheete aus tuun”. * (Lees Koloser 3:9, 10.) * Tiise artikel helft tii woo sich taafe lose wole, 3 frooche antworte: (1) Was is “ti alt personaliteet”? (2) Warom xikt uns Yeehoowa ti alt personaliteet aus tuun? (3) Wii khene mer tas mache? Te artikel helft  aach tii woo sich xon ketaaft hon net lose ti alt personaliteet tsurik khome.

4. Wii tuut yemant sich aan xtele wën eyer “ti alt personaliteet” hot?

⁴ Yemant woo “ti alt personaliteet” hot, tuut eftas tenke un sich aan xtele tëm noo ti ferkheerte winxe fom flayx. Im xtant is eyer ekoiistix, klaych pees, unpetanklich un hoochmuutich. Fiilaycht, kukt eyer kërn pornokrafii un imoraalixe orer wyolente fiilme. Kewis hot eyer aach kuute kwaliteete; un khan sin tas eyer sich als mool xultich xpiirt weeche ti xlechte tinge woo eyer saat orer macht. Awer es feelt tëm te muut fer sayn aanxtelung un ketanke ënere. (Kal. 5:19-21; 2 Tim. 3:2-5)

5. Khene mer ti alt personaliteet kans aus tuun? Lee tas aus. (Aphostele sayn Kexicht 3:19)

⁵ Als mool, tuun mer etwas saan orer mache woo uns traurich lost. Wayl mer imperfekt sin, khan nimant fon uns ti xlechte winxe un ketanke fon unser hërts un khop kans aus rope. (Yee. 17:9; Tya. 3:2) Awer wën mer ti alt personaliteet aus tuun, tuut se uns net mee kontroliire. Khan ma saan tas mer een nay sort persoon sin! (Isa. 55:7; lees Aphostele sayn Kexicht 3:19. *)

6. Warom xikt uns Yeehoowa ti ferkheerte ketanke un kewoonheete fon te alt personaliteet im xtich lose?

⁶ Warom xikt uns Yeehoowa ti ferkheerte ketanke un kewoonheete im xtich lose? Wayl tee uns aarich fiil liipt un tee wil hon tas mer een froo leepe hon. (Isa. 48:17, 18) Tee wees tas tii woo net keeche sayn ferkheerte winxe khëmpfe, mache sich selepst un ti anere wee. Un tas pringt fiil xmërts tsu Yeehoowa sayn hërts.

7. Tëm noo Romaaner 12:1, 2, was mise mer ëntxlise?

⁷ Manich mool, yemant fon unser familye orer een froynt khan uns xpote wën mer uns aan xtrenge fer ënerunge in unser personaliteet mache. (1 Phe. 4:3, 4) Fiilaycht saan se: ‘Tuu host tas recht fer se mache ales was tuu wilst! Los tich net fon te anere xike!’ Ti layt woo Yeehoowa sayn kesetse ap xtose tenke tas nimant tëne xikt. Awer tas is net wërklich soo.  Tii lose tas ti welt — woo fon Satanaas rechiirt is — tëne mustere tuut. (Lees Romaaner 12:1, 2.) * Meyer al mise een ëntxlus mache: orer pehale mer ti alt personaliteet — woo fon te sint un Satanaas sayn welt kemustert is —, orer lose mer tas Yeehoowa uns mustere tuut in te pest persoon woo mer khene yets sin. (Isa. 64:8)

8. Was tuut uns helfe uns wech hale fon te ferkheerte ketanke un kewoonheete?

⁸ Yeehoowa wees tas es tsayt un aanxtrengung khost fer uns wech hale fon te ferkheerte ketanke un kewoonheete. (Psal. 103:13, 14) Awer Yeehoowa — torich sayn Wort, sayn kayst un sayn Orkanisatsyoon — kept uns ti kraft, ti kluucheet un ti hilef fer ti neetiche ënerunge mache. Kewis hot eyer tich xon keholef! Yets wole mer etliche tinge noo kuke woos tuu mache khanst woo tich wayter helfe tuun ti alt personaliteet aus tuun un fërtich sin fer tich taafe lose.

9. Was khan ti Piipel tich helfe se mache?

⁹ Penuts ti Piipel fer tich selepst noo kuke. Ti Piipel is wii een xpiichel: tii khan tich helfe noo kuke wiis tuu tenkst, xprechst un tich aan xtelst. (Tya. 1:22-25) Tayn Piipel leerer un anere rayfe kriste khene tich een hant kepe fer ti Piipel soo penutse. Tsum payxpiil: tii khene ti Piipel penutse fer tich helfe tayn xwacheete un kuute kwaliteete mërke. Tii khene tich in lërne wii piiplixe informatsyoone fine woo tich helfe ti xlechte kewoonheete im xtich lose. Un Yeehoowa wil tich aach hilef kepe. Tee wees was in tayn hërts is un soo wees eyer ti pest aat fer tich helfe. (Xpr. 14:10; 15:11) Tan, tuu yeete taach tsu Yeehoowa peete un tëm sayn Wort xtutiire — mach tas tayn kewoonheet.

10. Was host tuu mit Elie sayn speryens kelërnt?

¹⁰ Say tich sicher tas Yeehoowa sayn kesetse imer kuut fer uns sin. Ales was Yeehoowa uns ferlangt se mache, pringt uns nutse. Al tii woo Yeehoowa sayn kesetse aan heere, fine sich kuut mit sich selepst, hon een leepe mit opjetiiw un hon aach woere frooheet. (Psal. 19:7-11) Im keeche teel, tii woo Yeehoowa sayn kesetse net aan nëme, ernte xlechte resultaate wayl se ti aarwayte fom flayx pratikiire. Kuk mool was mer lërne khene iwer Yeehoowa sayn kesetse ap xtose mim pruuter Elie sayn speryens. Tee is kroos ketsoo kep fon eltere woo Yeehoowa liipe. Awer wii Elie am wakse waar, hot eyer aan kefang mit xlechte layt um keen. Tee hot aan kefang troke in nëme, een imoraalix leepe hon un xteele. Tee saat tas eyer imer wuuticher un wyolenter kep is. Elie erkhënt: “Ales was een krist net mache thërft, hon ich kemacht.” Awer Elie hot sich net ferkest was eyer kelërnt hat wii eyer yinger waar. Mit te tsayt, hot eyer aan kefang ti Piipel noch mool xtutiire. Tee hot sich aan kextrengt fer ti xlechte kewoonheete im xtich lose un hot sich taafe kelos im yoer 2000. Was fer nutse hot Elie kriit wayl eyer Yeehoowa sayn kesetse aan heert? “Yets, hon ich inerlich friit un een sauwer kewise” — saat eyer. * Elie sayn payxpiil tsaycht tas tii woo Kot sayn kesetse ap xtose, mache sich selepst wee. Awer noch soo, is Yeehoowa wilich fer tëne helfe sich ënere.

11. Was fer tinge tuut Yeehoowa hase?

 ¹¹ Lërn se hase was Yeehoowa hast. (Psal. 97:10) Ti Piipel saat tas Yeehoowa hast “hoochmuutiche aue, een tsung woo liie tuut [un] hënt woo unxultich pluut aus xite”. (Xpr. 6:16, 17) Tee hast aach “tii woo wyolent sin un woo anere hiner keen”. (Psal. 5:6) Yeehoowa hast tiise tinge soo fiil, tas in Noee sayn taache, hot eyer ti xlechte layt fernicht wayl se ti eyert fol wyolents kelos hon. (Xee. 6:13) Kuk mool een aner payxpiil. Torich te profeet Malakias, hot Yeehoowa kesaat tas eyer hast tii woo hinerlistiche pleen mache fer sich fon sayn unxultiche man orer fraa tiworsiire. Yeehoowa nëmt tëne sayn aanpeetung net aan un tee tuut se richte weeche sayn aanxtelung. (Mal. 2:13-16; Hep. 13:4)

12. Was petayt “tiif hase was xlecht is”?

¹² Yeehoowa wil hon tas mer “tiif hase was xlecht is”. (Rom. 12:9) Mërk mool: is net ploos net kërn hon, awer “tiif hase”; es wil saan, meyer sole te eekel too tefun hon. Xtel tich mool foer: wii teest tuu tich xpiire wën se tich ferlange teete was faules ese? Ploos too traan tenke kept uns xon te eekel, kël? Meyer sole tas selwiche xpiire wën mer tenke aan etwas mache woo Yeehoowa saat ferkheert is.

13. Warom mise mer unser ketanke xitse?

¹³ Xits tayn ketanke. Was mer tenke influentsiirt was mer mache. Tes weeche, hot Yeesus uns in kelërnt ti ketanke ap xtose woo khente tsu een xweyer sint nëme. (Mat. 5:21, 22, 28, 29) Kewis, meyer wole imer unser Fater im himel kefale, kël? Tan, wën een xlecht ketanke foer khomt, xtos tas klaych ap!

14. Was tuun unser wërter iwer uns tsayche un was fer frooche sole mer antworte?

¹⁴ Phas tayn wërter uf. Yeesus hot kesaat: “Ales was fom maul raus khomt, khomt fom hërts.” (Mat. 15:18) Yawool, unser wërter tsayche fiil iwer weer mer wërklich sin. Tan, froo tich: ‘Tuun ich ti woerheet saan, un net liie, soo kaar wën tas mich propleeme pringe khan? Wën ich ferhayrat sin, tuun ich uf phase fer net romantix interes tsayche aan yemant aneres? Tuun ich mich kans wech hale fon imoraalixe wërter? Wën yemant mich ëricht, tuun ich ketultich antworte?’ Es weyer kuut tas tuu too triwer tenke teest. Tayn wërter khene ferklaycht wëre mit te knep fon een tsaych. Es is laychter een tsaych aus tuun, wën mer eyerst  ti knep uf mache. Kraat soo, wërts laychter fer tich ti alt personaliteet aus tuun, wëns tuu eyerst noo lost liie saan orer krope un imoraalixe wërter penutse.

15. Was petayt ‘unser alt personaliteet aan tëm kweel phoste aan naachele’?

¹⁵ Say wilich fer se mache ales was neetich is. Te aphostel Phaul hot een ferklaychung kemacht woo helft uns ferxteen tas es seer wichtich is unser aanxtelung ënere. Tee hot kesaat tas mer mise unser ‘alt personaliteet aan tëm kweel phoste aan naachele’. (Rom. 6:6) Yeesus waar wilich kewees fer in een kweel phoste aan kenaachelt wëre fer Yeehoowa kefale. Kraat soo, wën mer Yeehoowa kefale wole, mise mer aach wilich sin fer xlechte kewoonheete un aktsyoone woo Yeehoowa hast, “um pringe”. Soo, khene mer een sauwer kewise hon un aach ti hofnung fer eewiche leepe kriin. (Yoo. 17:3; 1 Phe. 3:21) Ferkes tich net: Yeehoowa tuut net sayn kesetse ënere fer uns froo lose; xtats tas, sin meyer woo ënere mise fer tëm sayn kesetse foliche. (Isa. 1:16-18; 55:9)

16. Warom must tuu wayter khëmpfe keeche ti ferkheerte winxe?

¹⁶ Tuu wayter khëmpfe keeche ti ferkheerte winxe. Tuu must tas wayter mache soo kaar noo tayn taaf. Kuk mool Maurício sayn speryens. Wii eyer noch yung waar, hot eyer aan kefang homoseksualismus pratikiire. Mit te tsayt, hot eyer aan kefang ti Piipel mit Yeehoowa sayn Tsayer xtutiire. Tee hot ënerunge in sayn leepe kemacht un hot sich taafe kelos in 2002. Opwool Maurício xon fiile yoore Yeehoowa tiint, eyer saat: “Ich mus erkhëne tas, als mool, mus ich keeche ferkheerte winxe khëmpfe.” Awer tee wërt net oone muut too teweeche. Tee saat: “Etwas woo mich treeste tuut, is se wise tas ich Yeehoowa kefale tuun wën ich ëntxlise mich net aan xtele tëm noo mayn winxe.” *

17. Was hot tich uf kemuut in Nabiha sayn speryens?

¹⁷ Peet fer Yeehoowa sayn hilef kriin un trau uf tëm sayn kayst, net aan tayn aychne kraft. (Kal. 5:22; Fili. 4:6) Meyer mise uns fiil aan xtrenge fer ti alt personaliteet aus tuun un uns wayt wech fon tëne hale. Kuk mool Nabiha sayn speryens. Sayn fater hot se im xtich kelos wii se ploos 6 yoore alt waar. “Tas hot mayn hërts fiil wee kemacht…” — saat  se. Wii Nabiha am wakse waar, is se imer wuuticher un kroper kep. Tii hot aan kefang troke ferkhaafe un is een tsayt in te katee keplip. Yeehoowa sayn Tsayer hon se in te katee pesuucht un hon aan kefang ti Piipel mit tëne xtutiire. Too hot Nabiha kroose ënerunge kemacht. “Es waar laycht etliche fon mayn xlechte kewoonheete im xtich lose — saat Nabiha. — Awer noo lose se rauche waar kans xweyer kewees.” Nabiha hot sich mee wii een yoer aan kextrengt un, tsum xlus, hot se es hin kriit. Wii waar soo was meechlich? Tii saat: “Imer tsu Yeehoowa peete. Tas is was mich te meyerst keholef hot noo lose se rauche.” Hayt, saat se fer ti anere: “Ich sin mich kans sicher: wën ich es hin kriit hon ënerunge mache fer Yeehoowa kefale, tan khan kwalkee persoon es aach hin kriin!” *

18. Tëm noo 1^te Korinter 6:9-11, was hon fiile fon Yeehoowa sayn tiiner es hin kriit se mache?

¹⁸ Im eyerste yoer hunert, etliche layt — woo Yeehoowa raus kesuucht hot fer mit Yeesus rechiire — hon xlechte tinge friier kemacht. Etliche waare untroy in te hayrat, hon homoseksualismus pratikiirt, waare xpitspuupe un soo wayter. Awer, mit te hilef fon Kot sayn hayliche kayst, hon se es hin kriit sayn personaliteet ënere. (Lees 1^te Korinter 6:9-11.) * Un tas selwiche pasiirt hayt: ti Piipel hot xon milyoone layt keholef ënerunge in sayn leepe mache. * Tii hon xlechte kewoonheete im xtich kelos, opwool se tiif kewortselt waare. Tëne sayn payxpiil lost uns sicher: tuu khanst aach ënerunge in tayn personaliteet mache un xlechte kewoonheete im xtich lose, un soo fërtich fer te taaf sin.

19. Was tuun mer im neekste artikel siin?

¹⁹ Tii woo sich taafe lose wole, mise sich aan xtrenge fer ti alt personaliteet aus tuun. Awer tas is net kenuuch. Tii mise sich aach miie fer ti nay personaliteet aan tsiie. Wii khene mer tas mache? Un wii khene ti anere uns helfe? Tas is was mer im neekste artikel siin tuun.