Etliche woo tiise xtik fon te Piipel xnel leese, frooe sich tas. Awer in tiise wersikele, kept es 2 unerxiitliche mëner mit tiise selwiche naame, Mefiposët. Un meyer khene etwas lërne wën mer noo kuke was pasiirt is.

Te kheenich Saul fon Israël hat 7 soone un 2 meet. Yoonatan waar Saul sayn elste soon. Xpeeter hot Rispa, Saul sayn aner fraa, een soon kriit — Mefiposët. Es is interesant tas Yoonatan hat aach een soon woo Mefiposët keheest hot. Tes weeche, hat Saul een soon un een enkelskhint mit tëm selwiche naame — Mefiposët.

Mit te tsayt, hot te kheenich Saul aan kefang ti xipeoniiter hase, un hot fersuucht tëne al um pringe. Es siit aus tas etliche xipeoniiter um keprung kep sin. Sicher waar tas ferkheert kewees. Warom? Wayl in Yosuee sayn taache, hate ti israeliiter xëfe een pakt fon friit mit te xipeoniiter kemacht. (Yos. 9:3-27)

In te kheenich Saul sayn tsayt, hot tiise pakt imer noch kekilt. Awer Saul is keeche tiise pakt kang un hot fersuucht ti xipeoniiter fernichte. Weeche tas, ‘sin Saul un sayn haus pluutxultich kep’. (2 Sam. 21:1) Xpeeter, is Tawi te kheenich kep. Ti xipeoniiter woo iwerleept hon, hon mit Tawi kexproch iwer te kroose feele woo Saul kemacht hat. Tawi hot fer ti xipeoniiter ferlangt was must kemacht wëre fer ti sache in te ray tuun, tas soo Yeehoowa khent tas lant noch mool seechne. Ti xipeoniiter hon khee kelt ferlangt; xtats tas, hon se ferlangt tas 7 soone fon tëm man woo ‘een plaan kemacht hot fer tëne um pringe’, solte fer tëne ap kep sin un um keprung wëre. (Nuu. 35:30, 31) Tawi hot tas aan kenom. (2 Sam. 21:2-6)

In tiise tsayt, waare Saul un Yoonatan xon toot; awer Yoonatan sayn soon, Mefiposët, waar noch am leepe. Wii eyer een khint waar, weeche een unklik, is eyer laam kep un tee hat niks se tuun mit te atak woo sayn wowo keeche ti xipeoniiter kemacht hat. Tawi hat een pakt fon froyntxaft mit Yoonatan kemacht, un tas teet nutse pringe fer sayn nookhomer, too tepay Mefiposët. (1 Sam. 18:1; 20:42) Ti Piipel saat: “Te kheenich [Tawi] hot mitlayt ketsaycht tsu Mefiposët — soon fon Yoonatan, soon fon Saul — weeche tas ferxpreche woo Tawi un Yoonatan, Saul sayn soon, foer Yeehoowa kemacht hate.” (2 Sam. 21:7)

Noch soo, hot Tawi kemacht was ti xipeoniiter ferlangt hate. Tee hot 2 fon Saul sayn khiner ap kep — eene woo Mefiposët keheest hot — un 5 fon Saul sayn enkelskhiner. (2 Sam. 21:8, 9) Was Tawi kemacht hot, hot ti pluutxult woo iwer tas lant waar tsum ën keprung.

Tas is net ploos een kexicht. Kot sayn kesets waar taytlich. Es hot kesaat: “Ti khiner sole net xtërpe weeche was sayn eltere mache.” (Teut. 24:16) Yeehoowa hët sich net kefalt fon was mit tiise 7 nookhomer fon Saul kemacht kep is, wën se unxultich weyere. Tas kesets hot noch kesaat: “Yeete persoon sol ploos xtërpe weeche sayn aychne sint.” Es siit aus tas tiise 7 nookhomer fon Saul een teel xult hate in tiise atak keeche ti xipeoniiter. Tes weeche, hon tiise 7 mëner te prays petsaalt weeche sayn feeler.

Was lërne mer too temit? Wën een persoon etwas ferkheertes macht, khan eyer sich net aus reete, am saan: ‘Ich hon tas kemacht ploos wayl se mich tas kexikt hon.’ Tee mus aprechnunge mache weeche sayn aychne aktsyoone. Een kluuch xpruuch saat: “Mach te weech fer tayn fiis richt, un ale tayn weeche wëre tan sicher. Lënk tich net ap fer ti recht orer ti link sayt. Hal tayn fiis wech fon tas xlechtes.” (Xpr. 4:24-27; Ëfe. 5:15)