Warom hot te man woo Poaas wii “mayn fraaynt” keruuft hot, kesaat tas mit Rut sich hayrate, teet ‘sayn ërpxaft fersaue’? (Rut 4:1, 6)

In te piiplixe tsayte, wën eene ferhayrate man kextorep is un khee khiner hat, waars neetich etliche frooche antworte: Was teet mit sayn lant pasiire? Meecht te naame fon sayn familye fer imer ferxwiine? Tas mosayxe Kesets hot keholef tiise frooche antworte.

Was is pasiirt mit tëm lant fon eene man woo kextorep is orer woo aarm kep is un tas lant ferkhaaft hot? Eene pruuter orer een ticht parent khent tas tsurik khaafe. Soo teet tas lant noch tsu te familye keheere. (Lew. 25:23-28; Nuu. 27:8-11)

Es waar aach meechlich te naame hale fon te familye fom man woo kextorep is. Wii? Torich ti xwoochere hayrat, woo penutst waar in Rut sayn situatsyoon. Was waar ti xwoochere hayrat? Eene man teet sich mit te witfraa fon sayne pruuter hayrate fer khiner kriin woo teete te naame un ti ërpxaft fon sayne toote pruuter ërpe. Tas waar aach een liiplich aat fer ti witfraa uf phase. (Teut. 25:5-7; Mat. 22:23-28)

Kuk mool was mit Noemii pasiirt is. Tii waar mit Elimelëk kehayrat. Wën eyer un sayn tswaay soone kextorep sin, hat se khee mee man in sayn familye fer tii uf se phase. (Rut 1:1-5) Too is se tsu Yutaa tsurik kang mit Rut, sayn xwiichertochter. Noemii hot Rut oryentiirt tsu Poaas ferlange sayn lant tsurik khaafe. Tee waar een ticht parent fon Elimelëk. (Rut 2:1, 19, 20; 3:1-4) Awer Poaas wust tas es waar een aner tichter parent kewees, woo eyer keruuft hot wii “mayn fraaynt”. Soo waar tiise man te eyerste in te ray fer te tsurikhaafer sin. (Rut 3:9, 12, 13)

Am aanfang, waar te “fraaynt” wilich fer se helfe. (Rut 4:1-4) Eyer wust tas es teet tëm kelt khoste fer tas lant khaafe; awer tee wust aach tas Noemii tsu alt waar fer khiner kriin woo Elimelëk sayn lant ërpe khente. Soo weyer tas lant teel fon te “fraaynt” sayn ërpxaft. Tes weeche tas lant khaafe, teet sich loone.

Awer te “fraaynt” hot ëntxlist net mee tas lant khaafe wii eyer tsum wise kriit hot tas eyer mist mit Rut sich hayrate. Tee hot kesaat: “Ich khan es net tsurik khaafe tas ich net mayn aychne ërpxaft fersaue.” (Rut 4:5, 6) Warom hot eyer sayn ëntxlus keënert?

Wën te “fraaynt” orer een aner man sich mit Rut hayrate teet, un Rut een soon kreecht, teet te soon tas lant fon Elimelëk ërpe. Wii teet tas te “fraaynt” sayn “ërpxaft fersaue”? Ti Piipel tuut tas net antworte. Awer too sin etliche aate wii tas meechlich weyer.

• Eyerst, te “fraaynt” teet tas kelt ferliire woo eyer penutse teet fer Elimelëk sayn lant khaafe, wayl am ën teet tas lant net tsu tëm keheere. Es teet tsu Rut sayn soon keheere.

• Tsweet, eyer teet ti responsapiliteet hon fer Noemii un Rut uf phase.

• Trit, wën Rut anere khiner mit te tsurikhaafer kreecht, teete se ti ërpxaft teele mit te anere khiner fon te tsurikhaafer.

• Fiert, wën te tsurikhaafer khee anere khiner hët, teet Rut sayn soon tas lant fon Elimelëk un aach fon te tsurikhaafer ërpe. Tes weeche, wën te tsurikhaafer xtërpe teet, teet sayn lant tsu een soon keheere woo Elimelëk sayn naame hat, net tëm sayns. Te tsurikhaafer waar net wilich sayn ërpxaft ins kefoer xtele fer Noemii helfe. Tee hot kelos tas te neekste tsurikhaafer, Poaas, tiise flicht erfiile teet. Poaas hot tas kemacht wayl eyer wolt hon ‘tas te naame fon te ferxtorpener iwer sayn ërpxaft plaype teet’. (Rut 4:10)

Es siit aus tas te tsurikhaafer wolt sayn aychne naame un ërpxaft hale. Tee waar ekoiistix kewees. Awer, opwool eyer sich aan kextrengt hot fer sayn naame hale, hayt wise mer net weer eyer waar. Un tee hot aach net te ekstra priwilëj kriit woo Poaas kriit hot: een foerkhomer fon te Mesias, Yeesus Kristus, sin. Was een xlim resultaat fer yemant woo ekoiistix waar un wolt net anere helfe! (Mat. 1:5; Luk. 3:23, 32)