1. Wii hot Yoop Yeehoowa peser khëne kelërnt?

 TORICH sayn kanse leepe hat Yoop fiile kexpreeche kehat, awer tas wichtichste waar mit Yeehoowa kewees. In tiise kexpreech, hot Yeehoowa fer Yoop ketsaycht etliche wunerliche tinge woo eyer kemacht hat. Tas teet Yoop helfe se wise wii kluuch Yeehoowa is un aach sayn fertraung ferxtërke tas Yeehoowa sayn tiiner uf phase khan. Tsum payxpiil, Kot hot Yoop erinert tas eyer ti tiere fersoricht. Soo khont eyer aach Yoop uf phase. (Yoop 38:39-41; 39:1, 5, 13-16) Wii Yoop payxpiile fon te kriatsyoon peopacht hot, hot eyer fiil iwer Yeehoowa sayn kwaliteete kelërnt.

2. Warom is es als mool xweyer fer uns ti kriatsyoon peopachte?

² Meyer aach khene fiil iwer unser Kot lërne wën mer mit acht kuke was eyer kemacht hot. Awer tas mache is net imer laycht. Wën mer in een kroos xtat leepe, fiilaycht tuun mer net yeete taach siin was Yeehoowa kemacht hot. Awer aach wën mer net in een kroos xtat leepe, fiilaycht tenke mer tas mer net tsayt hon fer ti kriatsyoon peopachte. Warom is es kuut tsayt hoole un uns aan xtrenge fer ti kriatsyoon kuke? Wii hon Yeehoowa un Yeesus ti kriatsyoon penutst fer in se lërne? Was khene mer mache fer noch mee lisyoone fon te kriatsyoon lërne? Tas is was mer in tiise artikel siin tuun.

3. Was tsaycht tas Yeehoowa wolt hon tas Aatam mit te kriatsyoon sich fraye teet?

³ Yeehoowa wolt hon tas te eyerst mënx sich fraye teet mit Sayn kriatsyoon. Wii Kot Aatam kemacht hot, hot eyer tëm  een xeen paratiis kep fer se leepe un aach ti aarwayt fer tas uf phase un kreeser mache. (Xee. 2:8, 9, 15) Tenk mool wii froo meecht Aatam sich kexpiirt hon wii eyer kesiin hot ti soome aus xlaa un ti pluume pliie. Was een kroos priwilëj hat Aatam — te Eetem kaate uf phase! Yeehoowa hot Aatam aach kexikt te naame fer unerxiitliche tiere kepe. (Xee. 2:19, 20) Yeehoowa selepst khent te naame fon yeete tier raus kesuucht hon. Awer xtats tas, hot eyer tiise flicht fer Aatam kep. Sicher, foer een naame fer ti tiere kepe, hot Aatam se mit acht peopacht — wii se aus kesiin hon un wii se sich aan kextelt hon. Sicher tas mache hot Aatam fiil kefrayt. Tas hot tëm ketsaycht wii kluuch Yeehoowa is un wii xeen sin ti tinge woo eyer kemacht hot.

4. (a) Was is een uersach warom mer sole ti kriatsyoon peopachte? (b) Was fer tings woo Yeehoowa kemacht hot, host tuu te liipst?

⁴ Warom sole mer ti kriatsyoon peopachte? Een uersach is wayl Yeehoowa wil hon tas mer tas mache. Tee saat uns: “Heept ti aue tsum himel un kukt.” Tan eyer froot uns: “Weer hot tas ales kemacht?” Ti antwort is taytlich. (Isa. 40:26) Yeehoowa hot ales im himel, uf te eyert un im meer kemacht un tas ales lërnt uns etwas iwer tëm. (Psal. 104:24, 25) Un tenk mool aan wii Yeehoowa uns kemacht hot. Meyer hon ti apiliteet kriit fer se siin, heere, krayfe, riiche un xmeke. Un soo khene mer uns fraye mit te unerxiitliche tinge woo Eyer kemacht hot.

5. Tëm noo Romaaner 1:20 was fer nutse khene mer kriin wën mer Yeehoowa sayn kriatsyoon peopachte?

⁵ Ti Piipel tsaycht een aner wichtich uersach warom mer sole ti kriatsyoon peopachte. Tas lërnt uns in iwer Yeehoowa sayn kwaliteete. (Lees Romaaner 1:20.) b Tsum payxpiil, kuk al ti tinge woo Yeehoowa kemacht hot un mërk wii xeen sin se kepleent kep. Meyer lërne too temit tas Yeehoowa aarich kluuch is. Un tenk aach aan te unerxiitliche ese woo mer hon. Tas lost taytlich wii fiil Kot ti mënxheet liipt. Wën mer Yeehoowa sayn personaliteet in tëm sayn kriatsyoon mërke, tuun mer tëm peser khëne lërne un tichter pay tëm khome. Yets, kuk wii Yeehoowa ti kriatsyoon penutst fer wichtiche lisyoone fer ti mënxheet lërne.

6. Was fer lisyoon khene mer lërne wën mer siin feechel im himel am reese?

⁶ Yeehoowa hot een tsayt fer ti ewënte pextimt. Yeetes yoer tswixich tas ën fon feepruer un mite maay, hon ti israeliiter xtoriche im himel  kesiin wii se tsum nort kefloo sin. Yeehoowa hot fer ti israeliiter kesaat: “Ti xtorich im himel khënt sayn yooretsayte.” (Yee. 8:7) Yeehoowa hot ti tsayt pextimt fer tiise feechel reese. Kraat soo, hot eyer een tsayt pextimt fer sayn kerichte pringe. Hayt, wën mer siin feechel im himel am reese, wëre mer erinert tas Yeehoowa een pextimt tsayt hot fer tiise xlecht welt tsum ën pringe. Meyer khene uns sicher too tefun sin. (Hap. 2:3)

7. Was khene mer lërne mit te aat wii een foochel fliie tuut? (Isayas 40:31)

⁷ Yeehoowa kept kraft fer sayn tiiner. Torich Isayas, hot Yeehoowa fer tas folek ferxproch tas eyer teet se ferxtërke fer soo ‘hooch wii ti atler fliie’, wën se xwach un traurich waare. (Lees Isayas 40:31.) c Ti israeliiter hon ofts kesiin atler im himel hooch am fliie, mit weenich aanxtrengung. Tas waar meechlich wayl tii kuut penutst hon te wint woo keploost hot. Tas erinert uns tas Yeehoowa khan uns kraft kepe soo wii Eyer kraft fer tiise feechel kept. Wëns tuu siist een kroos foochel heecher un heecher am fliie mit weenich aanxtrengung, tenk tich traan: Yeehoowa khan tich kraft kepe fer torich tayn propleeme triwer wech khome.

8. Was hot Yoop kelërnt wii eyer Yeehoowa sayn kriatsyoon peopacht hot, un was khene meyer lërne?

⁸ Yeehoowa fertiint unser fertraung. Yeehoowa hot Yoop keholef noch mee uf Tëm traue. (Yoop 32:2; 40:6-8) In sayn kexpreech mit Yoop, hot Yeehoowa kexproch iwer ti fiile tinge woo eyer kemacht hot — wii ti xtërne, ti wolke un ti plitse. Yeehoowa hot aach iwer etliche tiere kexproch soo wii te wilt xtiir un te khaul. (Yoop 38:32-35; 39:9, 19, 20) Tas ales hot pewayst tas Yeehoowa hot net ploos iwermeesich kraft, awer aach liip un fiil kluucheet. Weeche tiise kexpreech, hot Yoop kelërnt noch mee uf Yeehoowa traue. (Yoop 42:1-6) Kraat soo, wën mer ti kriatsyoon peopachte, wëre mer erinert tas Yeehoowa fiil mee kluucheet un kraft wii meyer hot. Un noch, Yeehoowa khan un tuut al unser proope tsum ën pringe. Tas khan uns helfe noch mee uf tëm traue.

9-10. Was lërne mer iwer Yeehoowa mit te sun un te reen?

⁹ Yeesus wust fiil iwer ti natuer. Wii een “kuute aarwayter”, hat eyer ti priwilëj fer mit sayn Fater xafe wii Eyer tas kanse uniwërsum kemacht hot. (Xpr. 8:30) Xpeeter, wii Yeesus uf te eyert waar, hot eyer ti kriatsyoon penutst fer sayn tisipele in lërne iwer sayn Fater. Kuk etliche lisyoone woo eyer in kelërnt hot.

¹⁰ Yeehoowa tsaycht liip fer ale kaar. In sayn Përich Preetich, hot Yeesus kexproch iwer tswaay tinge fon te kriatsyoon woo ti layt net fiil weyert kepe: ti sun un te reen. Ti tswaay sin wichtich fer tas leepe. Yeehoowa khent ëntxlist hon tiise tinge net kepe fer tii woo tëm net tiine. Xtats tas, tuut eyer mit liip sun un reen fer ale kaar kepe. (Mat. 5:43-45) Was fer lisyoon wolt Yeesus fer sayn tisipele too temit in lërne? Yeehoowa wil hon tas mer ale kaar liipe. Imer wën mer uns ferwunere mit een xeen unerkang fon te sun orer een khil reen, khene mer triwer noo tenke aan Yeehoowa sayn liip tsu ale layt. Sayn payxpiil tuut uns uf muute een eenlich sort liip tsayche un fer ale kaar preetiche.

11. Wën mer ti feechel peopachte, wii tuut tas uns uf muute?

¹¹ Yeehoowa kept uns was mer prayche fer se leepe. In te selwich Përich Preetich, hot Yeesus soo kesaat: “Kukt ti feechel im himel; tii tuun net seeye un net ërnte, un tuun net in xope samele, awer ayer Fater, woo im himel is,  fersoricht se.” Tsiimlich sicher, tii woo Yeesus keheert hon, khonte feechel siin wii eyer kefroot hot: “Meecht teyer net mee weyert hon wii tii?” (Mat. 6:26) In tiise liiplich aat, hot Yeesus uns sicher kelos tas Yeehoowa uns fiisix uf phase tuut! (Mat. 6:31, 32) Tiise lisyoon tuut wayter Yeehoowa sayn troye tiiner uf muute. Een yung pyoneerin in Xpanya hot sich oone muut kexpiirt wii se net een kuut plats fer se woone kefun hot. Awer noo se kesiin hot ti feechel khërneche un peere am ese, hot se sich ufkemuut kexpiirt. Tii saat: “Tiise feechel erinere mich tas Yeehoowa tëne uf phast un tas Eyer mich uf phase tuut.” Klaych tëm noo, hot ti xwester een plats kefun.

12. Tëm noo Matheus 10:29-31, was lërne mer iwer Yeehoowa mit te xpërlinge?

¹² Yeehoowa kept weyert fer yeete eene fon uns. Eep sayn aphostele preetiche xike, hot Yeesus se keholef torich te pang fon te keechner triwer wech khome. (Lees Matheus 10:29-31.) d Tee hot tas kemacht wii eyer kexproch hot iwer eene fon te keweenlichste foochel in Israël: ti xparling. Tiise feechel hate een kans kleen weyert in Yeesus sayn taache. Awer tee hot fer sayn tisipele kesaat: “Soo kaar wën eene fon tëne ufm pootem falt, wees ayre Fater es xon.” Tan hot eyer noch kesaat: “Teyer hot mee weyert wii fiile xpërlinge.” Soo hot Yeesus tëne sicher kelos tas Yeehoowa weyert fer yeete eene fon tëne kep hot. Tes weeche praychte se khee pang fon te yachtung hon. Ti tisipele hon sich fon Yeesus sayn wërter erinert wii se ti xpërlinge kesiin hon in sayn preetich aarwayt in te xtete un pikaate. Wëns tuu een feechelche siist, eriner tich tas tuu wichtich fer Yeehoowa pist, wayls tuu “mee weyert wii fiile xpërlinge” host. Mit tëm sayn hilef, praychst tuu khee pang hon wën ti anere sich keeche tich xtele. (Psal. 118:6)

13. Was tuut uns helfe lisyoone fon te kriatsyoon lërne?

¹³ Meyer khene fiile anere lisyoone iwer Yeehoowa mit te kriatsyoon lërne. Wii? Eyerst, mise mer tsayt hoole fer ti kriatsyoon peopachte. Tan mise mer tenke aan was mer iwer Yeehoowa too temit lërne. Fiilaycht is es net imer laycht fer uns tas mache. Géraldine, een xwester fon Kameruun, saat: “Ich sin in een kroos xtat kroos kewakst. Tes weeche, must ich mich aan xtrenge fer Yeehoowa sayn kriatsyoon peopachte.” Een elteste, woo Alfonso heest, leet aus: “Ich hon kemërkt tas ich mus pleen mache fer aleen sin tas ich khan Yeehoowa sayn kriatsyoon peopachte un triwer noo tenke aan was ich iwer tëm too temit lërne khan.”

14. Was hot Tawi kelërnt wii eyer iwer Yeehoowa sayn kriatsyoon triwer noo ketenkt hot?

¹⁴ Tawi hot tiif iwer Yeehoowa sayn kriatsyoon triwer noo ketenkt. Tee hot fer Yeehoowa  kesaat: “Wën ich tayn himel siin, ti aarwayt fon tayn finger, te moont un ti xtërne woos tuu kemacht host, was is te xtërpliche man tas tuu aan tëm tenkst?” (Psal. 8:3, 4) Yawool, wii Tawi in te nacht tsum himel kekukt hot, hot eyer net ploos ti xtërne peopacht. Tee hot aach triwer noo ketenkt aan was ti xtërne iwer Kot in kelërnt hon. Tee hot kelërnt wii mechtich Yeehoowa is. Anere mool, hot Tawi triwer noo ketenkt aan wii sayn khërper sich ëntwikelt hot wii eyer im muterlayp waar. Wii eyer ketenkt hot aan wii wunerlich sayn khërper kemacht waar, is eyer noch petanklicher weeche Yeehoowa sayn kluucheet kep. (Psal. 139:14-17)

15. Host tuu xon Yeehoowa sayn kwaliteete in sayn kriatsyoon kesiin? Kep payxpiile. (Psalm 148:7-10)

¹⁵ Tsiimlich sicher is es aach laycht fer uns, soo wiis fer Tawi waar, etwas in te natuer fine fer triwer noo tenke. Wëns tuu um tich rom kukst, khanst tuu fiile fon Yeehoowa sayn kwaliteete mërke. Tsum payxpiil, wëns tuu xpiirst ti sun tich wërme, khanst tuu Yeehoowa sayn kraft mërke. (Yee. 31:35) Tenk iwer Yeehoowa sayn kluucheet wëns tuu siist een foochel een nest am paue. Un wëns tuu siist een huntche noo sayn xwants am xpringe, mërk wii Yeehoowa een frooe Kot is. Un tank Yeehoowa weeche sayn liip imer wëns tuu siist een mama mit sayn nëneche am xpiile. Meyer hon fiile oportuniteete fer iwer Yeehoowa lërne, wayl ales was eyer kemacht hot, tuut tëm loope — ekaal ep se kleen orer kroos sin, wayt orer ticht. (Lees Psalm 148:7-10.) e

16. Was sole mer pextimt sin se mache?

¹⁶ Unser Kot is iwermeesich kluuch, liiplich un mechtich un ales was eyer macht is xeen. Tiise kwaliteete un fiile anere sin taytlich in tëm sayn kriatsyoon. Meyer mise tii ploos suuche. Meyer sole imer tsayt hoole fer ti kriatsyoon peopachte un triwer noo tenke aan was mer iwer Yeehoowa too temit lërne. Wën mer tas mache, tuun mer uns noch tichter pay unser Kriatoer xafe. (Tya. 4:8) Wii khene ti eltere Yeehoowa sayn kriatsyoon penutse fer sayn khiner helfe noch tichter pay tëm khome? Tas is was mer im neekste artikel siin tuun.