1. Was mërke ti layt wën se tas eyerste mool tsu unser fersamlunge khome? (Kuk aach tas pilt.)

 XTEL tich mool foer een pheyerche woo tas eyerste mool tsum Raych Saal fon Yeehoowa sayn Tsayer khomt. Tas pheyerche ferwunert sich mit te fraayntlichkheet fon te priiter un xwestere un wii se sich naner liip tsayche. Wii se tsurik hëm khome, saat ti fraa fer sayn man: “Tiise Yeehoowa sayn Tsayer sin anerste wii ti layt woo mer xon khëne, kël? Es waar kuut mit tëne sin.”

2. Warom hon etliche noo kelos Yeehoowa tiine?

² Ti liip tswixich Kot sayn folek is wërklich was ekstras. Kewis sin Yeehoowa sayn Tsayer net perfekt. (1 Yo. 1:8) Tes weeche woo peser mer ti layt in te kemaynt khëne lërne, woo taytlicher wëre sayn feeler fer uns. (Rom. 3:23) Es is xaat, awer etliche hon noo kelos Yeehoowa tiine weeche ti imperfektsyoone fon te anere.

3. Was itentifitsiirt Yeesus sayn woere nookeener? (Yoohan 13:34, 35)

³ Kuk noch mool te haupste tekst fon tiise artikel. (Lees Yoohan 13:34, 35.) b Was itentifitsiirt Yeesus sayn woere nookeener? Is ti liip, net ti perfektsyoon. Mërk aach tas Yeesus hot net soo kesaat: ‘Torich tas, tuut teyer wise tas teyer mayn tisipele sayt.’ Xtats tas, hot eyer kesaat: “Torich tas, tuun al wise tas teyer mayne tisipele sayt.” Soo hot Yeesus ketsaycht tas net ploos sayn nookeener, awer aach tii woo net kriste sin,  teete erkhëne weer tëm sayn woere tisipele sin torich ti liip woo se sich naner tsayche.

4. Was wole etliche layt wise iwer ti woere kriste?

⁴ Etliche woo net Yeehoowa sayn Tsayer sin, khene sich frooe: ‘Wii tuut ti liip Yeesus sayn woere nookeener itentifitsiire? Wii hot Yeesus liip tsu sayn aphostele ketsaycht? Un wii is es meechlich hayt, Yeesus sayn payxpiil noo mache?’ Soo kaar meyer, woo xon Yeehoowa sayn Tsayer sin, khene triwer noo tenke aan te antworte fon tiise frooche. Tas helft uns noch mee liip tsayche, hauptseechlich wën mer mit te imperfektsyoone eene fon te anere um keen. (Ëfe. 5:2)

5. Was petayte Yeesus sayn wërter in Yoohan 15:12, 13?

⁵ Yeesus hot taytlich kelos tas een ekstra sort liip teet sayn nookeener itentifitsiire. (Lees Yoohan 15:12, 13.) c Mërk mool tas Yeesus se kexikt hot: “Liipt eene te anere, soo wii ich aych keliipt hon.” Was wil tas saan? Yeesus hot aus keleet tas es petayt ti anere mee wii sich selepst liipe, orer ti sort liip tsayche woo een krist uf muute tuut im plats fon een aner krist xtërpe, wën tas neetich weyer. d

6. Wii tuut ti Piipel uns in lërne wii wichtich ti liip is?

⁶ Ti Piipel lërnt uns in tas ti liip aarich wichtich is. Tsum payxpiil, fer fiile layt ti neekste sin etliche fon sayn liipste tekste: “Kot is liip.” (1 Yo. 4:8) “Liip ti anere wii tich selepst.” (Mat. 22:39) “Ti liip tuut fiile sinte teke.” (1 Phe. 4:8) “Ti liip hot khee ën.” (1 Kor. 13:8) Tii too un anere tekste lose es taytlich wii wichtich es is tiise xeen kwaliteet tsayche.

7. Warom khent Satanaas nii ti layt in lërne eene ti anere liipe un eenich sin?

⁷ Fiile layt frooe sich: ‘Wii khan ich wise  was ti woer relichyoon is? Al ti relichyoone saan tas se ti woerheet hon, awer yeete eene tuut was anerstes iwer Kot in lërne.’ Satanaas hot fiile falxe relichyoone foer keprung un tas lost es xweyer fer ti layt se wise was ti woer relichyoon is. Awer es kept etwas woo ploos Yeehoowa mache khan, etwas woo te Taywel nii foer pringe khan: een weltwayt pruuterxaft woo sich naner liipt. Meyer sin uns too tefun sicher, wayl ti liip fon Yeehoowa khomt. Ploos tii woo Yeehoowa sayn kayst un seechen hon, khene woere liip tswixich sich hon. (1 Yo. 4:7) Tes weeche hot Yeesus kesaat tas ploos sayn nookeener teete woere liip eene tsum aner hon.

8-9. Wii sin fiile layt petrof kep wii se ti liip tswixich Yeehoowa sayn Tsayer kemërkt hon?

⁸ Soo wii Yeesus foer raus kesaat hot, fiile erkhëne weer wërklich tëm sayn tisipele sin weeche ti woer liip woo se sich naner tsayche. Tsum payxpiil: een pruuter woo Ian heest, erinert sich te eyerste konkrës woo eyer kang is. Te konkrës is kehal kep in een xtaatyum ticht pay sayn haus. Phaar moonate eente, is eyer tsum selwiche xtaatyum kang fer een xpiil kuke. Tee saat: “Te unerxiit tswixich te konkrës un tas xpiil khent net kreeser kewees sin. Yeehoowa sayn Tsayer hon respekt ketsaycht, hon sich xeen aan ketsoo un sayn khiner hate een kuut aanxtelung. (…) Un tas haupste: ti layt waare friitlich un tsufriite — etwas woo ich fer mayn leepe wolt. Ich tenke mich net mee traan ti reete woo kehal kep sin, awer ich tuun mich noch erinere ti aanxtelung fon Yeehoowa sayn Tsayer.” e Kewis, tiise sort aanxtelung khomt fon te woere liip woo mer eene noom aner hon. Wayl mer unser priiter liipe, tuun mer se mit respekt un fraayntlichkheet pehantele.

⁹ Een pruuter woo John heest, hot was eenliches kexpiirt wii eyer aan kefang hot in te fersamlunge keen: “Ich hon mich ferwunert mit te fraayntlichkheet (…) woo se al ketsaycht hon. Ich hon ketenkt: ‘Tii wëre wool perfekt sin.’ Sayn eerlich liip hot mich sicher kelos tas ich hat ti woer relichyoon kefun.” f Soo sorte speryense tsayche tas Yeehoowa sayn Tsayer wërklich woere kriste sin.

10. Hauptseechlich wanee hon mer een oportuniteet fer woere liip tsayche? (Kuk aach ti noote.)

¹⁰ Wii mer am aanfang fom artikel kesiin hon, khee Yeehoowa sayn Tsayer is perfekt. Als mool, tuun unser priiter un xwestere was saan orer mache woo uns pelaytiche tuut. g (Tya. 3:2) Unser aanxtelung un wërter tuun tsayche, hauptseechlich in tiise xtune, tas mer se wërklich liipe. Wën soo was mit uns pasiirt, was khene mer mit Yeesus sayn payxpiil lërne? (Yoo. 13:15)

11. Was fer xwacheete hon Tyako un Yoohan ketsaycht? (Kuk aach tas pilt.)

¹¹ Yeesus hot net perfektsyoon fon sayn nookeener kewaart. Xtats tas, hot eyer se liiplich keholef sayn xwacheete korikiire; soo khente se Yeehoowa kefale. Een mool, hon tswaay aphostele — Tyako un Yoohan — etwas fer sayn mama ferlangt: tii solt fer Yeesus frooe ep eyer khent wichtiche xtele im Raych fer ti tswaay kepe. (Mat. 20:20, 21) Was Tyako un Yoohan kemacht hon, hot ketsaycht tas se hoochmuutich waare un tas se wolte wichticher wii ti anere sin. (Xpr. 16:18)

12. Waare Tyako un Yoohan ti eensiche woo sich xlecht aan kextelt hon? Lee tas aus.

 ¹² Tyako un Yoohan waare net ti eensiche woo sich xlecht aan kextelt hon in tiise situatsyoon. Mërk ti aanxtelung fon te anere aphostele: “Wii ti anere tseen tas tsum wise kriit hon, sin se pees mit te tswaay priiter kep.” (Mat. 20:24) Meyer khene uns iwerleye ti krope wërter woo Tyako, Yoohan un ti anere aphostele sich naner kesaat hon. Fiilaycht, hon ti anere soo was kesaat: ‘Tenkt teyer tas teyer peser wii meyer sayt fer wichticher xtele im Raych ferlange? Teyer sayt net ti eensiche woo xtram mit Yeesus kexaft hot. Meyer fertiine aach een ekstra xtel im Raych!’ Ekaal was se kesaat orer ketenkt hon, tii hon kelos tas tiise situatsyoon ti priiterlich liip tswixich tëne fer een tsayt fersaue teet.

13. Wii is Yeesus mit te xwacheete fon sayn aphostele um kang? (Matheus 20:25-28)

¹³ Lees Matheus 20:25-28. h Was hot Yeesus in tiise situatsyoon kemacht? Tee is net pees kep. Tee hot net kesaat: ‘Ich tuun peser aphostele suuche, mëner woo teemuuticher sin un woo ti anere imer mit liip pehantele.’ Xtats tas, hot Yeesus ketultich mit tëne  kexproch, wayl eyer wust tas se wolte tas richtiches mache. Yeesus hot se wayter mit liip pehantelt, opwool se noo un noo ketsënkt hon iwer weer te kreeste weyer. (Mar. 9:34; Luk. 22:24)

14. In was fer sort kultuer sin Yeesus sayn aphostele kroos kewakst?

¹⁴ Sicher hot Yeesus sich erinert fon te aphostele sayn kultuer un wii tas tëne petrof hot. (Yoo. 2:24, 25) Im plats woo se kroos kewakst sin, hon ti relichyeese fiirer in kelërnt tas ploos tii woo wichtiche xtele hate, important weyere. (Mat. 23:6; kuk aach te wiiteo Primeiros assentos na sinagoga, in te xtuutyum noote fon Matheus 23:6.) Ti yitixe relichyeese fiirer hon aach ketenkt tas se peser wii ti anere waare. i (Luk. 18:9-12) Yeesus wust tas soo sorte ketanke khente influentsiire wii ti aphostele sich selepst un ti anere kesiin hon. (Xpr. 19:11) Tee hot net perfektsyoon fon sayn aphostele kewaart un tee waar ketultich mit tëne wën se feeler kemacht hon. Eyer wust tas se een kuut hërts hate; soo hot eyer se ketultich in kelërnt teemuuticher sin un liip fer ti anere tsayche, xtats fersuuche imer peser wii ti anere sin.

15. Was khene mer lërne mit was pasiirt is mit Tyako, Yoohan un ti anere aphostele?

¹⁵ Meyer khene fiil lërne mit was pasiirt is mit Tyako, Yoohan un ti anere aphostele. Ti tswaay priiter waare ferkheert wii se wichticher xtele im Raych ferlangt hon. Awer ti anere aphostele waare aach ferkheert. Tii hon kelos was pasiirt is, tëne sayn eenichkheet fersaue. Noch soo, waar Yeesus fraayntlich un liiplich mit al sayn 12 aphostele. Was lërne mer too temit? Tas haupste is net ploos was ti anere mache, awer aach wii mer uns aan xtele foer sayn feeler un xwacheete. Was khan uns helfe ti richtich aanxtelung hon? Wën mer keëricht mit een pruuter sin, khene mer uns selepst frooe: ‘Warom hot tas was te pruuter kemacht hot, mich soo fiil keëricht? Meecht tas tsayche tas ich een xwacheet hon woo ich ferpesere mus? Is ti persoon woo mich keëricht hot, fiilaycht propleeme am mit mache? Soo kaar wën ich tenke tas ich een kuut uersach hon fer keëricht sin, khan ich liip tsayche un ti persoon fertsaye?’ Woo mee liip mer fer ti anere tsayche, woo taytlicher mer pewayse tas mer Yeesus sayn woere nookeener sin.

16. Was noch khene mer mit Yeesus sayn payxpiil lërne?

¹⁶ Meyer lërne aach mit Yeesus sayn payxpiil tas mer sole uns aan xtrenge fer unser priiter un xwestere ferxteen. (Xpr. 20:5) Meyer wise tas Yeesus hërtse leese khont — etwas woo mer net kemacht kriin. Awer mer khene ketultich mit unser priiter un xwestere sin wën se uns ëriche. (Ëfe. 4:1, 2; 1 Phe. 3:8) Es is laychter tas mache wën mer se peser khëne lërne. Kuk mool een payxpiil.

17. Was fer nutse hot een sirkuyt superintentent kriit wii eyer fersuucht hot een pruuter peser khëne lërne?

¹⁷ Een sirkuyt superintentent erinert sich fon een pruuter fon een kemaynt woo eyer im Lëst Afrika pesuucht hot. Am aanfang, hot te superintentent ketenkt tas te pruuter krop waar. Wii hot te superintentent sich aan kextelt? “Xtats wayt fon tëm pruuter plaype — saat eyer —, hon ich ëntxlist tëm peser khëne lërne.” Wii te superintentent mee tsayt mit tëm pruuter fertrip hot, hot eyer tsum wise kriit etliche kleenichkheete iwer wii te  pruuter kroos ketsoo waar un wii tas sayn personaliteet influentsiirt hot. Te sirkuyt superintentent saat noch: “Es waar xweyer fer te pruuter ënerunge mache fer peser mit te layt um keen; awer eyer hat xon fiile ënerunge kemacht. Wii ich tas tsum wise kriit hon, hot mayn respekt tsu tëm sich ferkreest. Meyer sin kuute fraaynte kep!” Yawool, wën mer uns aan xtrenge fer unser priiter un xwestere ferxteen, ofts wërts laychter fer uns tëne liip tsayche.

18. Was fer frooche khene mer uns selepst mache wën een pruuter uns pelayticht hot? (Xpriiche 26:20)

¹⁸ Manich mool, khene mer tenke tas mer mise mit een pruuter xpreche woo uns pelayticht hot. Awer eyerst, weyers kuut uns selepst frooe: ‘Tuun ich ferxteen ales was pasiirt is?’ (Xpr. 18:13) ‘Meecht es meechlich sin tas te pruuter mich net fer kërn pelayticht hot?’ (Ekl. 7:20) ‘Hon ich xon een eenlich feele kemacht?’ (Ekl. 7:21, 22) ‘Wën ich mit te persoon too triwer xpreche, meecht ich te propleem noch xlimer lose?’ (Lees Xpriiche 26:20.) j Wën mer tsayt hoole fer tiise frooche antworte, fiilaycht fine mer raus tas ti liip khan uns uf muute noo lose se tenke aan was pasiirt is.

19. Was pist tuu pextimt se mache?

¹⁹ Yeehoowa sayn Tsayer pewayse tas se Yeesus sayn woere tisipele sin wën se sich naner liip tsayche. Un yeete eene fon uns khan pewayse tas mer wërklich Yeesus sayn nookeener sin, wën mer woere liip fer unser priiter tsayche, opwool sayn imperfektsyoone. Wën mer tiise liip tsayche, fiilaycht tuun anere erkhëne tas mer ti woer relichyoon sin un aach Yeehoowa, te Kot fon liip, aan peete. Soo, wole mer pextimt sin wayter tsayche ti liip woo ti woere kriste itentifitsiirt!