1-2. Was tuut ofts pasiire wën ti layt sich taafe lose, un was tuun mer in tiise artikel siin?

 HOST tuu xon te taaf fon etliche layt kesiin? Tii tuun ti 2 frooche, woo foer sayn taaf kemacht wëre, mit sicherheet antworte. Tëne sayn familye un fraaynte sin aarich froo weeche tëne. Wën tii woo sich ketaaft hon, ausm waser khome, heerst tuu ti layt am phatxe un tuu siist ti frooheet in tëne sayn kesichte. Yeete woch tuun tausente layt sich tsu Yeehoowa tetikiire un tuun sich wii tëm sayn Tsayer taafe lose.

² Un tuu? Wëns tuu tich taafe lose wilst, pist tuu wii een heele licht in tiise tunkel welt, wayl tuu tuust “Yeehoowa suuche”. (Psal. 14:1, 2) Tiise artikel is fer tich kexrip kep — ekaal eps tuu yung orer alt pist. Awer meyer al woo xon ketaaft sin, wole aach unser pextimung ferxtërke fer Yeehoowa fer imer tiine. Soo wole mer xpreche iwer 3 fon te fiile uersache woo mer hon fer Yeehoowa tiine.

3. Warom tuun Yeehoowa sayn tiiner ti woerheet un ti kerechtichkheet liipe? (Psalm 119:128, 163)

³ Yeehoowa hot sayn folek kexikt: “Liipt ti woerheet.” (Sak. 8:19) Yeesus hot sayn tisipele uf kemuut ti kerechtichkheet suuche. (Mat. 5:6) Tas petayt tas mer mise een xtarke wunx hon fer se mache was richtich, kuut un phuer foer Yeehoowa sayn aue is. Tuust tuu ti woerheet un ti kerechtichkheet liipe? Sicher yaa. Tuu hast ti liieray un ales was xlecht un ferkheert is. (Lees Psalm 119:128, b 163. c) Yemant woo liie saat, tuut te fiirer fon tiise welt, Satanaas, noo mache. (Yoo. 8:44; 12:31) Etwas woo Satanaas wil is xlechte liie iwer Yeehoowa sayn hayliche naame aus prayte. Tee is tas xon am  mache tsayt ti repelyoon im Eetem kaate. Tee wil hon tas ti layt tenke tas Yeehoowa een ekoiistixe un uneerliche Rechiirente is, woo tas kuutes fon te mënxe ferxtekelt. (Xee. 3:1, 4, 5) Weeche Satanaas sayn liie, tuun fiile layt tenke tas Yeehoowa xlecht is. Un wën ti layt ëntxlise Yeehoowa net liipe, khan Satanaas se influentsiire ale sorte xlechte un unkerechte tinge mache. (Rom. 1:25-31)

4. Wii tsaycht Yeehoowa tas eyer te “Kot fon te woerheet” is? (Kuk aach tas pilt.)

⁴ Yeehoowa is te “Kot fon te woerheet”, un mit krooshërtslichkheet, tuut eyer ti woerheet in lërne fer tii woo tëm liipe. (Psal. 31:5) Soo tuut tee sayn tiiner helfe sich fon Satanaas sayn liie pefraye. Yeehoowa tuut aach sayn tiiner in lërne eerlich un kerecht sin. Tas helft tëne selepst respekt un inerlich friit hon. (Xpr. 13:5, 6) Hot eyer tas fer tich kemacht wiis tuu ti Piipel xtutiirt host? Tuu host kelërnt tas Yeehoowa sayn weeche sin ti peste fer ti kans mënxheet un fer tich aach. (Psal. 77:13) Tes weeche wilst tuu mache was Kot saat richtich is. (Mat. 6:33) Tuu wilst ti woerheet xitse un pewayse tas was Satanaas iwer Yeehoowa kesaat hot, falx is. Awer wii khanst tuu tas mache?

5. Wii khanst tuu ti woerheet un ti kerechtichkheet pay xteen?

⁵ Ti aat wiis tuu leepe tuust, khan tsayche tas tuu wilst Yeehoowa wii tayn Rechiirente hon. Es is wii wëns tuu am saan weyerst: ‘Ich xitse ti woerheet un nëme Satanaas sayn liie net aan! Es is Yeehoowa woo mich xikt un ich wil mache was tee saat richtich is.’ Wii khanst tuu soo een sort leepe raus suuche? Saa tsu Yeehoowa in kepeet tas tuu ferxprechst tëm fer imer tiine un tan tuu tich taafe lose. Liipe was woer un richtich is, is een xtark uersach fer sich taafe lose.

6. Was fer uersache kept Psalm 45:4 fer Yeesus liipe?

⁶ Warom liipst tuu Yeesus Kristus? Te Psalm 45:4 d kept etliche kuute uersache. (Lees.) Yeesus liipt ti woerheet, ti teemuut un ti kerechtichkheet. Wëns tuu ti woerheet un ti kerechtichkheet liipst, sicher tuust tuu  aach Yeesus liipe. Tenk tich traan wii Yeesus ti woerheet un ti kerechtichkheet mit koraaj kexitst hot. (Yoo. 18:37) Awer wii tuut Yeesus uns in lërne teemuutich sin?

7. Was finst tuu xeen iwer Yeesus sayn teemuut?

⁷ Yeesus sayn payxpiil tuut uns in lërne teemuutich sin. Tsum payxpiil, tee hot imer ti kans eer fer sayn Fater kep, net fer sich selepst. (Mar. 10:17, 18; Yoo. 5:19) Wii xpiirst tuu tich wëns tuu siist tas Yeesus soo teemuutich is? Sicher tas tuut tich uf muute Kot sayn Soon liipe un tëm sayn payxpiil noo mache. Warom is Yeesus teemuutich? Wayl eyer sayn Fater — woo teemuutich is — liipt un noo macht. (Psal. 18:35; Hep. 1:3) Yeesus macht Yeehoowa sayn kwaliteete perfekt noo un tas xaft uns tichter pay tëm.

8. Warom sin mer froo tas Yeesus unser Kheenich is?

⁸ Meyer sin froo tas Yeesus unser Kheenich is, wayl eyer te peste Rechiirente is. Yeehoowa selepst hot sayn Soon keiipt un in kextelt fer se rechiire. (Isa. 50:4, 5) Eriner tich aach tas Yeesus hot ti anere mee wii sich selepst keliipt. (Yoo. 13:1) Sicher, wii tayn Kheenich, fertiint Yeesus tayn liip. Tee hot aus keleet tas tii woo tëm wërklich liipe, sayn fraaynte sin; un tii tsayche sayn liip tsu Yeesus wën se sayn kepoote aan heere. (Yoo. 14:15; 15:14, 15) Es is wërklich een kroos eer fraaynt fon Kot sayn Soon sin!

9. Was is eenlich tswixich Yeesus sayn taaf un te taaf fon sayn tisipele?

⁹ Eene fon Yeesus sayn kepoote is tas sayn tisipele sich taafe lose sole. (Mat. 28:19, 20) Tee hot tas payxpiil kelos. Es is woer tas in etliche aate is Yeesus sayn taaf anerste wii te taaf fon sayn tisipele. (Kuk te khaste “ Wii is Yeesus sayn taaf anerste wii te taaf fon sayn tisipele?”.) Awer in anere aate is tas eenlich. Wii Yeesus sich taafe kelos hot, hot eyer ketsaycht tas tee wilich waar fer Yeehoowa sayn wile mache. (Hep. 10:7) Kraat soo, wën Yeesus sayn tisipele sich taafe lose, tsayche se tas se sayn leepe tsu Yeehoowa tetikiirt hon. Yets, tas haupste in sayn leepe is Yeehoowa sayn wile mache, net sayn aychne. Soo mache se Yeesus sayn payxpiil noo.

10. Was fer uersache host tuu fer Yeesus liipe un was sol tiise liip tich uf muute se mache?

¹⁰ Tuu klaapst tas Yeesus Yeehoowa sayn eensiche kepoerne Soon is un tuu pist froo tas eyer te Kheenich is woo Yeehoowa in kesetst hot fer uns rechiire. Tuu weest tas Yeesus teemuutich is un tuut sayn Fater perfekt noo mache. Tuu host kelërnt tas eyer ese kep hot fer ti layt woo hunger hate, tas eyer ketreest hot tii woo traurich waare un tas eyer ti kranke keheelt hot. (Mat. 14:14-21) Tuu siist wii eyer ti kemaynt hayt fiirt. (Mat. 23:10) Un tuu pist tich aach sicher tas eyer tuut noch fiil mee im futuer mache wii Kheenich fon Kot sayn Raych. Soo, wii khanst tuu tsayche tas tuu tëm liipst? Mach tëm sayn payxpiil noo. (Yoo. 14:21) Eene fon te eyerste xrite fer tëm sayn payxpiil noo mache, is tich tsu Yeehoowa tetikiire un tich taafe lose.

11. Was is ti haupst uersach fer sich taafe lose un warom is tas soo?

¹¹ Was is ti haupst uersach fer sich taafe lose? Yeesus hot ketsaycht was Kot sayn kreeste kepoot is, wii eyer kesaat hot: “Liip Yeehoowa, tayn Kot, mit tayn kans hërts, mit tayn kans seel, mit tayne kanse ferxtant un mit tayn kans kraft.” (Mar. 12:30) Tuun tiise wërter tayn liip tsu Kot pexraype?

12. Warom liipst tuu Yeehoowa? (Kuk aach tas pilt.)

¹² Es kept fiile uersache fer Yeehoowa liipe. Tsum payxpiil: tuu host xon ferxtan tas eyer “ti kwel fom leepe” is un tas “yeete kuute un  perfekte kexenk” fon tëm khomt. (Psal. 36:9; Tya. 1:17) Yeete kuut tings woo tich fraye tuut, khomt fon unser krooshërtsliche un liipliche Kot.

13. Warom is tas fray khaaf opfer soo een wunerliche kexenk?

¹³ Tas fray khaaf opfer is een wunerliche kexenk woo Yeehoowa uns kep hot. Warom khene mer tas saan? Tenk aan ti xtark fraayntxaft tswixich Yeehoowa un sayn Soon. Yeesus hot kesaat: “Te Fater liipt mich” un aach ‘ich liipe te Fater’. (Yoo. 10:17; 14:31) Wayl se paysamer waare torich pilyoone yoore, is sayn fraayntxaft noch xtërker kep. (Xpr. 8:22, 23, 30) Soo xtel tich mool foer wii fiil phayn Yeehoowa kexpiirt hot wii eyer sayn Soon layte un xtërpe kelos hot! Yeehoowa sayn liip tsu te mënxheet — too tepay tuu — is soo kroos tas eyer wilich waar fer sayn liipe Soon wii een opfer ap kepe tas tuu un anere fer imer leepe khente. (Yoo. 3:16; Kal. 2:20) Tas is ti kreest uersach woo mer hon fer Kot liipe.

14. Was is tas peste tsiil woos tuu raus suuche khanst?

¹⁴ Wayls tuu mee iwer Yeehoowa kelërnt host, is tayn liip tsu tëm xtërker kep. Sicher wilst tuu tichter pay Kot khome yets un fer imer — un tas is meechlich! Yeehoowa selepst tuut tich uf muute tëm sayn hërts froo lose. (Xpr. 23:15, 16) Tuu khanst tas mache torich  wërter un aktsyoone. Ti aat wiis tuu leepst tuut tsayche tas tuu Yeehoowa wërklich liipst. (1 Yo. 5:3) Raus suuche se leepe in een aat woo Yeehoowa kefalt, is tas peste tsiil woos tuu khanst hon.

15. Wii khanst tuu tsayche tas tuu Yeehoowa liipst?

¹⁵ Wii khanst tuu tayn liip tsu Yeehoowa tsayche? Eyerst, mach een ekstra kepeet un tuu tich fer unser woere Kot tetikiire. (Psal. 40:8) Tan tsaych fer ti anere tas tuu tich tetikiirt host torich te taaf. Wii mer xon kesaat hon, tayn taaf is een froo un wichtich momënt in tayn leepe. Tuu fangst een naye leepe aan: yets leepst tuu fer Yeehoowa, net mee fer tich selepst. (Rom. 14:8; 1 Phe. 4:1, 2) Tas heert sich aan wii een kroos ëntxlus, kël? Un tas is. Awer tas macht te weech uf fer tas peste leepe hon. Wii soo?

16. Tëm noo Psalm 41:12, was tuut Yeehoowa xenke fer tii woo sayn leepe penutse fer Tëm tiine?

¹⁶ Nimant is krooshërtslicher wii Yeehoowa. Ekaal was tuu tëm kepst, tuut eyer tich imer fiil mee tsurik kepe. (Mar. 10:29, 30) Soo kaar hayt, in tiise xlecht welt, tuut eyer uns een leepe xenke woo khent net interesanter, peser orer xeener sin. Un tas is ploos te aanfang. Tas leepe woo mit tayn taaf aan fangt, praycht khee ën kriin! Tuu khanst tayn liipe Fater fer ti kans eewichkheet tiine. Ti liip tswixich tich un tayn Fater Yeehoowa wërt yeete taach xtërker. Un tuu tuust fer imer leepe — kraat soo wii Yeehoowa. (Lees Psalm 41:12.) e

17. Was khanst tuu fer Yeehoowa kepe woo eyer noch net hot?

¹⁷ Wëns tuu tich tetikiirst un taafe lost, kriist tuu ti eer fer was weyertliches fer unser Fater kepe. Tee hot tich yeete kuut tings un yeete froo xtun kexenkt. Fer een kexenk tsurik kepe, khanst tuu fer te Hër fon te eyert un te himel etwas kepe woo eyer noch net hot: tayn troye tiinst fom hërts aus. (Yoop 1:8; 41:11; Xpr. 27:11) Tas is sicher ti pest aat fer tayn leepe nëme! Yawool, ti pest uersach fer tich taafe lose, is tayn liip tsu Kot.

18. Was fer frooche khanst tuu tich mache?

¹⁸ Soo, tuust tuu tich taafe lose? Ploos tuu khanst tas antworte. Etwas woo tich helfe khan, is tich frooe: ‘Warom sin ich am waarte fer mich taafe lose?’ (Aph. 8:36) Tenk tich traan ti 3 uersache woo mer noo kekukt hon. Eyerst: tuu liipst ti woerheet un ti kerechtichkheet. Froo tich: ‘Wil ich te taach siin wën al tuun ti woerheet saan un tas richtiches mache?’ Tsweet: tuu liipst Yeesus Kristus. Froo tich: ‘Wil ich hon tas Kot sayn Soon mayn Kheenich wërt un wil ich tëm sayn payxpiil noo mache?’ Trit un haupste: tuu liipst Yeehoowa. Froo tich: ‘Wil ich Yeehoowa tiine un, soo, tëm froo lose?’ Wën tayn antworte “yaa” sin, warom lost tuu tich net taafe? Warom waarte? (Aph. 16:33)

19. Warom solst tuu tich net tsurik hale fer tich taafe lose? Mach een ferklaychung. (Yoohan 4:34)

¹⁹ Pist tuu tich net sicher eps tuu tich taafe lose solst? Soo, tenk aan een ferklaychung woo Yeesus kemacht hot. (Lees Yoohan 4:34.) f Yeesus hot ferklaycht Kot sayn wile mache, mim ese. Warom? Tas ese is kuut fer uns. Un Yeesus wust tas ales was Yeehoowa uns ferlangt se mache, is kuut fer uns. Kot wil net hon tas mer etwas mache woo uns xaate pringt. Wil Yeehoowa hon tas tuu tich taafe lost? Ia. (Aph. 2:38) Soo khanst tuu tich sicher sin tas tiise kepoot aan heere tich nutse pringt. Wën tas peste ese woos kept foer tich weyer, teest tuu tich tsurik hale tas ese? Sicher net. Soo, warom tich tsurik hale fer tich taafe lose?

20. Was tuun mer im neekste artikel siin?

²⁰ Warom waarte? “Ich sin noch net fërtich” — khene fiile antworte. Sich tsu Yeehoowa tetikiire un taafe lose is te haupste ëntxlus woo yemant mache khan. Tes weeche mise mer kuut too triwer tenke un es khost tsayt un aanxtrengung fer fërtich sin. Awer wëns tuu te eerliche wunx host fer tich taafe lose, was khanst tuu yets mache fer tich foer perayte? Im neekste artikel, siin mer ti antwort fer tiise frooch.