1-2. Wëns tuu noch net fërtich fer te taaf pist, warom praychst tuu net traurich plaype? (Kuk tas pilt am aanfang fom piichelche.)

 WILST tuu tich taafe lose? Wën yaa, tan host tuu een wunerlich tsiil kextelt. Pist tuu xon fërtich fer tich taafe lose? Wëns tuu tenkst yaa un ti elteste mit tich xtime, hal tich net tsurik ketaaft wëre in te neekst xans woos tuu host. Een wunerlich leepe in Yeehoowa sayn tiinst tuut tich waarte.

² Awer khan sin tas se tich kesaat hon tas tuu must noch wayter foran keen foer tich taafe lose. Orer im xtant host tuu selepst tas kemërkt. Wën tas pasiirt is, playp net traurich. Es is meechlich foran keen un tiise wichtich tsiil trefe — ekaal eps tuu yung orer alt pist.

3. Was hot een etyoopixe ofitseer fer Fiilip kefroot un was fer frooch is foer khom? (Aphostele sayn Kexicht 8:36, 38)

³ Lees Aphostele sayn Kexicht 8:36, b 38. c Een ofitseer fon te kheenichin fon Etyoopya hot fer Fiilip, te preeticher, kefroot: “Was hinert mich ketaaft se kepe?” Te etyoopixe man wolt sich taafe lose, awer waar eyer xon fërtich fer tiise wichtich xrit kepe?

4. Wii hot te etyoopixe man ketsaycht tas eyer wayter lërne wolt?

⁴ Te etyoopixe man “is tsu Yeruusalem kang fer Kot aan  peete”. (Aph. 8:27) Soo tsiimlich sicher, hat eyer ti yitix relichyoon aan kenom. Kewis hat eyer iwer Yeehoowa in te Hepreeyxe Xrifte kelërnt. Noch soo, wolt eyer mee lërne. Tas is taytlich kep wii Fiilip tëm uf te xtroos ketrof hot. Was waar te man am mache in tiise xtun? Tee waar een rol fom profeet Isayas am leese. (Aph. 8:28) Tas waare tiife woerheete fon te Piipel. Te ofitseer wolt net ploos ti haupste inlërnunge fon te Xrifte lërne — tee wolt wayter lërne.

5. Was hot te etyoopixe man kemacht mit was eyer kelërnt hot?

⁵ Te man waar een wichtich ofitseer fon Kantase, ti kheenichin fon Etyoopya; tee hot ti kheenichin “sayn kanse raychtum uf kephast”. (Aph. 8:27) Sicher, hat eyer fiil se tuun weeche sayn fiile flichte. Noch soo, hot eyer tsayt kehool fer Yeehoowa aan peete. Tee wolt net ploos ti woerheet lërne; tee hot aan kewënt was eyer kelërnt hot. Tes weeche hot eyer ti lang rees fon Etyoopya pis Yeruusalem kemacht fer Yeehoowa im thempel aan peete. Sicher tiise rees mache, hot tëm fiil tsayt un kelt kekhost; awer te man wolt Yeehoowa aan peete, ekaal was tas tëm khoste teet.

6-7. Wii is te etyoopixe man sayn liip tsu Yeehoowa kreeser kep?

⁶ Te etyoopixe man hot phaar naye wichtiche woerheete fon Fiilip kelërnt; eene fon tëne waar tas Yeesus te Mesias waar. (Aph. 8:34, 35) Wii eyer kelërnt hot was Yeesus fer tëm kemacht hot, hot tas sicher tëm tiif aan kekrif. Was teet eyer mache noo too triwer lërne? Tee khent wayter plaype soo wii eyer waar — een respektiirte man woo ti yuute sayn relichyoon noo kang is. Awer xtats tas, wayl sayn liip tsu Yeehoowa un sayn Soon kreeser kep is, hot eyer ti wichtich ëntxlus kemacht fer sich taafe lose un Yeesus sayn tisipel wëre. Fiilip hot kesiin tas te man fërtich waar; un tes weeche, hot eyer tëm ketaaft.

⁷ Wëns tuu te etyoopixe man sayn payxpiil noo machst, khanst tuu aach fërtich fer te taaf sin. Es wërt aach meechlich fer tich se saan: “Was hinert mich ketaaft se kepe?” Te etyoopixe man hot wayter kelërnt, hot aan kewënt was eyer kelërnt hot un hot sayn liip tsu Kot wayter ferkreest. Wole mer siin wiis tuu tëm sayn payxpiil noo mache khanst.

8. Was saat Yoohan 17:3 tas mer mache mise?

⁸ Lees Yoohan 17:3. d Hon tiise wërter fon Yeesus tich keholef aan fange ti Piipel xtutiire? Tas is mit fiile fon uns pasiirt. Awer tiise selwiche wërter tsayche aach tas mer mise wayter lërne. Meyer tuun nii noo lose ‘te eensiche woere Kot se khëne’. (Ekl. 3:11) Yaa, fer ti kans eewichkheet, tuun mer wayter iwer tëm lërne.  Un woo mee mer lërne, woo tichter xafe mer uns pay Yeehoowa. (Psal. 73:28)

9. Noo te haupste inlërnunge fon te Piipel ferxteen, was mise mer mache?

⁹ Meyer fange aan Yeehoowa khëne lërne torich ti haupste inlërnunge fon te Piipel. In sayn priif fer ti hepreeyer, hot te aphostel Phaul ti haupste inlërnunge fon te Piipel wii “haupste funtamente” un “eyerste inlërnung” keruuft. Tee wolt net saan tas se net wichtich waare; xtats tas, wolt eyer tsayche tas se wii ti milich sin, woo een nëneche fersoriche tuut. (Hep. 5:12; 6:1) Awer tee hot aach al ti kriste uf kemuut tiifer inlërnunge fon te woerheet lërne, net ploos ti haupste inlërnunge. Host tuu een xtark wunx noo te tiifer inlërnunge fon te Piipel ëntwikelt? Wilst tuu wayter foran keen un iwer Yeehoowa un sayn tsiile lërne?

10. Warom fine etliche layt es xweyer se xtutiire?

¹⁰ Awer fer fiile fon uns is es net laycht se xtutiire. Un fer tich? Host tuu in te xuul kelërnt wii kuut leese un xtutiire? Host tuu tas kërn kemacht? Host tuu kexpiirt tas tuu fiil kelërnt host? Orer host tuu kerechent tas tuu net kemacht kep pist fer fon te piicher lërne? Tuu pist net aleen wëns tuu soo tenkst. Awer Yeehoowa khan tich helfe. Tee is perfekt un te peste Leerer woos kept.

11. Wii tuut Yeehoowa tsayche tas eyer te “Kreeste Leerer” is?

¹¹ Yeehoowa ruuft sich selepst wii “tayne Kreeste Leerer”. (Isa. 30:20, 21) Tee ferxteet tich un is een ketultiche un liipliche leerer. Tee suucht aach tas kuutes in sayn xiiler. (Psal. 130:3) Un tee tuut net mee fon uns ferlange wii mer kepe khene. Tenk tich traan: tee hot tayn wunerlich kehërn kepleent. (Psal. 139:14) Te wunx fer mee lërne is natiirlich fer uns. Unser Kriatoer wil hon tas mer fer ti kans eewichkheet lërne un tas mer uns too temit fraye. Tes weeche is es kluuch te wunx noo piiplixe woerheete yets ferkreese. (1 Phe. 2:2) Xtel tsiile woos tuu trefe khanst un tuu ti Piipel imer leese un xtutiire. (Yos. 1:8) Mit Yeehoowa sayn hilef, es tuut tich imer mee kefale iwer tëm leese un lërne.

12. Warom sole mer Yeesus sayn leepe un preetich xtutiire?

¹² Hool tich imer tsayt fer aan Yeesus sayn leepe un preetich triwer noo tenke. Wën mer Yeehoowa tiine wole, is es aarich wichtich tas mer Yeesus sayn payxpiil ticht noo keen, hauptseechlich in tiise xweyere tsayte. (1 Phe. 2:21) Yeesus hot taytlich kexproch iwer ti propleeme woo sayn tisipele mit mache teete. (Luk. 14:27, 28) Noch soo, waar eyer sich sicher tas sayn woere nookeener khente troy tsu Kot plaype, soo wii eyer selepst. (Yoo. 16:33) Xtutiir ti kleenichkheete iwer Yeesus sayn leepe un xtel tas tsiil fer tëm in tayn leepe noo mache.

13. Was solst tuu imer fer Yeehoowa ferlange un warom?

¹³ Ploos khëntnis hon, is net kenuuch. Ti haupst uersach warom mer khëntnis prayche is fer uns helfe mee iwer Yeehoowa lërne un kwaliteete wii liip un klaape ëntwikele. (1 Kor. 8:1-3) Soo lang wiis tuu am lërne pist, tuu wayter Yeehoowa sayn hilef ferlange fer mee klaape kriin. (Luk. 17:5) Tee tuut soo sorte kepeete krooshërtslich antworte. Te woere klaape, woo sich aan te kenaue khëntnis fon unser Kot xtaypt, tuut tich helfe wayter foran keen. (Tya. 2:26)

14. Wii hot te aphostel Pheeter ketsaycht wii wichtich es is aan wëne was mer lërne? (Kuk aach tas pilt.)

¹⁴ Te aphostel Pheeter hot ketsaycht wii wichtich es is tas Yeesus sayn tisipele aan wëne  was se lërne. Tee hot iwer tas piiplix kexicht fon Noee kexproch. Yeehoowa hot fer Noee kesaat tas eyer teet ti kanse xlechte layt fon tëm sayn taache fernichte torich een sintfluut. Ploos wise tas te sintfluut am khome waar, waar net kenuuch fer Noee un sayn familye rete. Mërk mool tas Pheeter am xpreche waar iwer ti tsayt foer te sintfluut, “wii Noee ti arich am paue waar”. (1 Phe. 3:20) Yawool, Noee un sayn familye hon aan kewënt was se fon Kot kelërnt hon: tii hon ti arich, eene kroose xif, kepaut. (Hep. 11:7) Tan hot Pheeter ferklaycht was Noee kemacht hot mit tëm taaf; tee hot kexrip: “Te taaf, woo tas representiirt, tuut aach aych yets rete.” (1 Phe. 3:21) Soo khene mer ferklayche was tuu yets machst fer fërtich fer te taaf sin mit te aarwayt woo Noee un sayn familye torich yoore kemacht hon fer ti arich paue. Was fer “aarwayt” must tuu mache fer fërtich fer te taaf sin?

15. Wii khene mer tsayche tas mer uns wërklich peroyt hon?

¹⁵ Eene fon te eyerste tinge woo mer mache mise, is uns hërtslich peroye fon unser sinte. (Aph. 2:37, 38) Wën mer uns wërklich peroyt hon, tuun mer woere ënerunge mache. Host tuu etliche tinge woo Yeehoowa net kefale — soo wii een imoraalix leepe, tsiker, orer xlechte un imoraalixe wërter — uf sayt kelos? (1 Kor. 6:9, 10; 2 Kor. 7:1; Ëfe. 4:29) Wëns tuu tas noch net kemacht host, tuu tich wayter too traan aan xtrenge. Xprech mit te persoon woo mit tich xtutiirt orer ferlang hilef un oryentiirung fer ti elteste in te kemaynt. Wëns tuu yung pist un mit tayn eltere leepst, ferlang tëne sayn hilef fer ti xlechte kewoonheete, woo khene tich um hale ketaaft sin, uf sayt lose.

16. Was is tepay in een kuut kaystlich rutiin?

¹⁶ Es is aach wichtich een kuut kaystlich rutiin hale. Too tepay is tsu te fersamlunge keen un in tëne mit helfe. (Hep. 10:24, 25) Un wëns tuu fërtich pist fer een puplikatoer sin, xtreng tich aan fer reeklich in te preetich aarwayt xafe. Woo mee tuu preetiche tuust, woo liiper tuust tuu tas mache. (2 Tim. 4:5) Wëns tuu yung pist un mit tayn eltere leepst, froo tich: ‘Mise mayn eltere mich erinere tsu te fersamlunge keen orer in te preetich xafe? Orer tuun ich te eyerste xrit kepe fer tas mache?’ Wëns tuu tich too traan aan xtrengst, tuust tuu tayn klaape, tayn liip un aach tayn petanklichkheet  tsu Yeehoowa tsayche. Tas sin “aktsyoone fon aanpeetung tsu Kot” — kexenke woos tuu tëm kepst. (2 Phe. 3:11; Hep. 13:15) Al ti kexenke woo mer fom hërts aus tsu Yeehoowa kepe, kefale tëm. (Kuk aach 2^te Korinter 9:7.) Un meyer xtrenge uns too traan aan, wayl es lost uns froo wën mer unser pestes tsu Yeehoowa kepe.

17-18. Was fer wichtich kwaliteet tuut tich helfe pis tsum taaf hin khome un warom? (Xpriiche 3:3-6)

¹⁷ Te weech fom taaf is net fray fon propleeme. Etliche khene tich xpote weeche tayn naye klaape; tii khene sich soo kaar keeche tich xtele. (2 Tim. 3:12) Orer khan sin tas tuu tich aan xtrengst fer noo lose etwas mache woo ferkheert is. Awer als mool, machst tuu tas noch mool. Orer fiilaycht tuust tuu ti ketult ferliire un tich traurich xpiire wayl tayn tsiil soo wayt wech aus siit. Was khan tich helfe net uf kepe? Een wichtich kwaliteet: ti liip tsu Yeehoowa.

¹⁸ Tayn liip tsu Kot is een xeen kwaliteet, ti pest woos tuu host. (Lees Xpriiche 3:3-6.) e Een xtark liip tsu Kot khan tich helfe Yeehoowa wayter tiine soo kaar foer ti propleeme. Ti Piipel xprecht ofts iwer Yeehoowa sayn leaale liip tsu sayn tiiner. Weeche sayn leaale liip, tuut Yeehoowa sayn tiiner nii im xtich lose orer noo lose tëne liipe. (Psal. 100:5) Tuu pist tëm noo Kot sayn pilt kemacht kep. (Xee. 1:26) Soo wii khanst tuu tiise sort liip noo mache?

19. Wii khanst tuu tayn petanklichkheet fer ales was Yeehoowa kemacht hot, ferkreese? (Kalater 2:20)

¹⁹ Fang aan mit te petanklichkheet. (1 The. 5:18) Froo tich yeete taach: ‘Wii hot Yeehoowa mich hayt liip ketsaycht?’ Tan ferkes tich net Yeehoowa tanke in tayn kepeete un xprech iwer spetsiifixe tinge woo eyer tich kemacht hot. Mërk tas selwiche woo te aphostel Phaul iwer Yeehoowa ferxtan hot: tas kanse kuutes woo Kot tich macht, is weeche sayn liip tsu tich. (Lees Kalater 2:20.) f Froo tich: ‘Wil ich tsayche tas ich Yeehoowa aach liipe?’ Ti liip tsu Yeehoowa helft tich fest keeche ti fersuuchunge  plaype un aach ti proope aus hale. Es tuut tich uf muute tayn kaystlich rutiin hale un liip tsu tayn Fater yeete taach tsayche.

20. Was must tuu mache fer tayn leepe tsu Yeehoowa tetikiire un wii wichtich is tiise ëntxlus?

²⁰ Mit te tsayt, tuut tayn liip tsu Yeehoowa tich uf muute een ekstra kepeet mache: tuu tuust tich fer Yeehoowa tetikiire. Tenk tich traan ti wunerlich hofnung woos tuu kriist wëns tuu tich fer Yeehoowa tetikiirst: tuu khanst tëm fer imer keheere. Wëns tuu tayn leepe tetikiirst, ferxprechst tuu Kot tiine in te kuute un xlechte momënte fon tayn leepe. Es wërt nii neetich tiise ferxpreche noch mool mache. Yawool, sich tetikiire is een ërnst ëntxlus. Awer tenk too triwer: fon te kanse ëntxlise woos tuu in tayn leepe mache khanst, ekaal wii kuut se sin, tas is te pest. (Psal. 50:14) Satanaas tuut fersuuche tayn liip tsu Kot ferxweeche un tee wil hon tas tuu uf kepst un noo lost troy tsu tayn Fater plaype. Los Satanaas nii kewine! (Yoop 27:5) Tayn xtark liip tsu Yeehoowa tuut tich helfe tayn ferxpreche in hale fer tëm imer tiine un soo, yeete taach tichter pay tayn himlixe Fater khome.

21. Warom khene mer saan tas te taaf te aanfang, net tas ën, is?

²¹ Noo tich tsu Yeehoowa tetikiire, xprech mit te elteste fon tayn kemaynt fer te neekste wichtiche xrit kepe: te taaf. Soo, tuu xon yets tayn liip tsu tayn Fater ferxtërke. Xtel tsiile woo tich helfe tayn liip yeete taach ferkreese. Soo sorte xrite tuun tich lenke im weech tsum taaf. Es wërt iwer xeen wën tiise taach khomt! Awer eriner tich imer tas te taaf is net tas ën, awer te aanfang — te aanfang fon een eewiche leepe fon tiinst tsu Kot. Meyer winxe tas tayn liip tsu Yeehoowa un sayn Soon sich fer imer ferkreese tuut!