EEN xeen numer fon unser priiter un xwestere woo hon in te ferkangne yoore fer een aner lant kewanert fer mee kelt kriin, sin tsurik fer sayn muter lant kang. Weeche liip tsu Yeehoowa un tsu tëm neekste, sin se pis pletse kang woo mee puplikatoore prauchte. (Mat. 22:37-39) Fon was fer tinge hon se uf kep un was fer seechen hon se keërnt? Fer es raus fine, wole mer ti payxpiile fon welche priiter fon Kameruun kuke, een lant aan oëst fon Afrika.

In 1998, een pruuter woo Onésime heest, is fon sayn muter lant, Kameruun, aus kewanert. Fer 14 yoore, hot eyer in te auslënter keleept. Een mool, in een fersamlung, hot eyer een ferklaychung iwer ti preetich aarwayt keheert. Te reetner hot kesaat: “Wën tswaay froynte teete in tswaay unerxiitliche pletse fixe, un eene teet mee fixe wii te aner fange, teet net te froynt woo weenich fixe am fange waar, fer tas plats keen aan woo mee fixe waare?”

Weeche tiise ferklaychung, hot Onésime ketenkt iwer tsurik tsu Kameruun keen fer ti puplikatoore tat helfe, wayl es waare fiile layt woo wolte ti Piipel xtutiire. Awer, eyer hot sich ketanke kemacht. Khent eyer sich noch mool traan keweene in Kameruun leepe, noo tas eyer hot al tiise yoore in te auslënter keleept? Fer es raus fine, Onésime hot Kameruun fer 6 moonate pesuucht. Tan, in 2012, is eyer tsurik kang, awer yets, fer se plaype.

Onésime saat: “Ich praucht mich noch mool traan keweene mit tëm hays weter un wii tas leepe tat waar. In tëm Raych Saal, praucht ich mich noch mool traan keweene aan mich in hëter xtiile setse.” Tee saat am lache: “Woo mee hon ich mich aan te fersamlung traan kehal, woo mee hon ich ferkes wii waar tas sich in xtiile setse woo kiise hate.”

In 2013, Onésime hot sich mit Géraldine kehayrat. Tii is xon retuer tsu Kameruun khom, noo tas se hot in Frankraych 9 yoore kewoont. Wii hot Yeehoowa tëne keseechent wayl tëm sayn wile mache waar tas haupste in tëne sayn leepe? Onésime saat: “Mitsamer, sin mer tsu te Xuul fer Preeticher fom Raych kang un hon mer in Petël ketiint. In tëm letste yoer, 20 Piipel xtutënte fon unser kemaynt hon sich ketaaft. Ich xpiire tas yets, sin ich in tëm richtich plats fer se ‘fixe’.” (Mar. 1:17, 18) Géraldine saat noch: “Ich hon mee seechen kriit wii ich mich foer xtele khent.”

Judith hot sich pis ti Fereenichte Xtaate fon Amërika kewanert, awer wolt mee aan Yeehoowa sayn aarwayt mache. Tii saat: “Am ën fon yeete pesuuch woo ich hon fer mayn familye in Kameruun kemacht, hon ich keprilt. Es waar aarich xweyer ti Piipel xtuutye woo ich aan kefang hat, hiner lose.” Awer, Judith waar sich net sicher fer  pis Kameruun sich wanere. Weeche sayn aarwayt, woo hot een kuut loon petsaalt, khont se een tratamënt petsaale fer sayn papa in Kameruun, woo krank waar. Awer, Judith hot uf Yeehoowa ketraut un is tsurik tsu Kameruun kang. Tii erkhënt tas tii hat ferlangre fon welche kuute tinge woo se in te auslënter kehat hot. Tii hot tsu Yeehoowa hilef im kepeet ferlangt fer sich traan keweene, un tii waar fon een sirkuyt superintentent un sayn fraa uf kemuut.

Wën se retuer kukt, Judith saat: “In tray yoore, hon ich een kroos frayt kriit: fier layt helfe tisipele wëre.” Judith hot aan kefang wii spetsyaal pyoneerin tiine. Hayt, tuut se mit sayn man, Sam-Castel, tiine in te sirkuyt aarwayt. Awer, was is mit Judith sayn fater pasiirt? Tii un sayn familye khonte een krankehaus in te auslënter fine, woo wilich waar fer ti operatsyoon fon sayn fater petsaale un mache. Kliiklich, ti operatsyoon is kans kuut ap kelaaf.

Een pruuter woo Victor heest, hot sich pis te Kanata kewanert. Noo tas eyer hot een artikel fon Te Wachthorm keleest iwer hoochxuul, hot tee aan kefang se tenke iwer sayn situatsyoon. Tee hot noo kelos in te hoochxuul keen, un hot aan kefang een “tëkniko” mache. Tee saat: “Es hot mich erlaupt een aarwayt xneler fine un se mache was ich imer wolt — pyoneer sin.” Noo heyer, Victor hot sich mit Caroline kehayrat, un ti tswaay hon Kameruun pesuucht. Tat, wii se Petël am pesuuche waare, waare se uf kemuut fer traan tenke ep se khonte in Kameruun tiine. Victor saat: “Meyer hate khee uersach fer ‘nee’ saan, un wayl mer hon unser leepe keweenlich kehal, khonte mer tiise inlaatung aan nëme.” Opwool Caroline hat welche kesunt propleeme, hon se ëntxlist sich wanere.

Victor un Caroline hon aan kefang wii rekulaare pyoneere tiine fer al ti layt helfe woo interes in te Piipel ketsaycht hon. Fer een tsayt, khonte se leepe mit tëm kelt woo se samer kexpaart hate. Noo heyer, hon se fer phaar moonate in Kanata kexaft. Tas hot tëne erlaupt tsurik tsu Kameruun keen un wayter wii pyoneere tiine. Was fer seechen hon se kriit? Tii hon ti Xuul fer Preeticher fom Raych kemacht, wii spetsyaale pyoneere ketiint un yets, tuun se in te paueray tiine. Victor saat: “Wayl mer hon ti situatsyoon woo mer keweent waare hiner kelos, khonte mer Yeehoowa sayn unerxtitsung xpiire.”

In 2002, Alain, woo waar een xiler fon een hoochxuul in Taytxlant, hot tas pleetche Jovens — Como Usarão Sua Vida? keleest. Was tat kexrip waar, hot tëm uf kemuut naye tsiile pleene. In 2006, hot eyer ti Escola de Treinamento Ministerial kemacht un waar fer Kameruun, sayn muter lant, kexikt.

In Kameruun, Alain hot een mitetaach aarwayt kefun. Noo heyer, hot eyer een aarwayt aan kenom woo teet peser petsaale. Awer, tee hot sich sorich kemacht tas tiise aarwayt teet sayn tiinst xteere. Tan, wii eyer in kelaat waar fer spetsyaal pyoneer wëre, Alain hot net tswaay mool ketenkt. Sayn xëf hot soo kaar een kreeser loon tëm aan kepoot, awer Alain hot sayn ëntxlus net keënert. Noo heyer, Alain hot sich mit Stéphanie kehayrat, woo hat phaar yoore in Frankraych kewoont. Was fer xwiirichkheete hot Stéphanie ketrof wii se pis Kameruun sich kewanert hot?

Stéphanie saat: “Ich hon welche kleene kesunt propleeme un alerkii kriit. Awer, ich hon een reeklich tratamënt kemacht un sin peser kewoer.” Wayl tas pheyerche aus kehal hot,  waare se peloont. Alain saat: “Wën mer sin pis een wayt pikaat preetiche kang, woo Katé heest, hon mer welche layt kefun woo wolte ti Piipel xtutiire. Noo heyer, khonte mer tëne sayn Piipel xtuutye fiire torich telefoon. Tswaay fon tiise Piipel xtutënte hon sich taafe kelos un een krup fon puplikatoore hot tat aan kefang.” Stéphanie saat noch: “Es kept khee kreeser frayt wii ti layt helfe sich tsu Yeehoowa tetikiire. Wayl mer too tiine, hon mer tiise frayt fiil mools kexpiirt.” Hayt, Alain un Stéphanie tuun in te sirkuyt aarwayt tiine.

Gisèle hot sich taafe kelos wii se sayn tokter xuul am mache waar in Itaalya. Een pheyerche fon pyoneere hot mit tëne ti Piipel xtutiirt. Tii hot sich ferwunert mit tëm pheyerche sayn keweenliche leepe un tii wolt mee in te preetich aarwayt mache. Tan, eep se fërtich waar mit sayn hoochxuul, hot Gisèle xon aan kefang wii rekulaar pyoneerin tiine.

Gisèle wolt tsurik tsu Kameruun keen fer mee in Yeehoowa sayn tiinst mache, awer tii hot sich ketanke kemacht. Tii saat: “Ich teet mayn recht fer in Itaalya woone ferliire un mich aus naner mache fon mayn familye un froynte woo hon tat in Itaalya kewoont.” Soo wii soo, in maay fon 2016, Gisèle is tsurik tsu Kameruun kewanert. Een pisye xpeeter, hot se sich mit Léonce kehayrat. Te Petël fon Kameruun hot tëne ti aanung kep fer pis Ayos sich wanere, een xtat woo praucht mee puplikatoore hon.

Wii waar tas leepe in Ayos kewees? Gisèle saat: “Eftas, es hot licht fer phaar woche kefeelt un meyer khonte net unser selulaare laate. In te meyerst tsayt, hon se net pariirt. Ich hon kelërnt mit hols se koche; un in te nacht, sin mer mit xupkhaare un plitslampe waser hoole kang, wayl es weenicher layt in te kwel waare.” Was hot tëne keholef aus hale? Gisèle saat: “Yeehoowa sayn kayst hot uns keholef aus hale; aach, ich un mayn man hon mer uns naner kextitst un ti familye un froynte hon uns uf kemuut un, als mool, uns kelt kexikt.”

Is Gisèle froo wayl se is tsurik tsu sayn muter lant kang? Tii saat: “Yaa! Kewis! Am aanfang, waare welche xwiirichkheete un sin mer een pisye oone muut keplip. Awer, wii mer tiise tinge iwerkhom hon, ich un mayn man hon kexpiirt tas mer hon kraat kemacht was mer prauchte. Meyer traue uf Yeehoowa un xpiire mer uns tichter pay tëm.” Léonce un Gisèle hon ti Xuul fer Preeticher fom Raych kemacht un yets, tuun se fer een tsayt, wii spetsyaale pyoneere tiine.

Koraajiche fixer tuun unerxiitliche xwiirichkheete mit mache fer een kuut fixeray hon. In te selwich aat, tii woo tsurik fer sayn muter lant keen, tuun wilich fon fiile tinge uf kepe fer eerliche layt helfe woo ti pexeet fom Raych aan nëme. Sicher, Yeehoowa tuut sich net ferkese fon tiise flaysiche puplikatoore, weeche ti liip woo se hon tsu tëm sayn naame ketsaycht. (Nee. 5:19; Heb. 6:10) Wëns tuu in te auslënter am leepe pist un tayn muter lant praucht mee puplikatoore hon, khenst tuu retuer keen? Wëns tuu es machst, fiile seechen tuun tich waarte. (Prov. 10:22)