1-2. Wii khene mer te aanreet fon Provérbios 4:25 noo keen? Kep een payxpiil.

IWERLEE tich ti neekste situatsyoone. Een altche xwester tenkt aan te frooe tsayte woo se hat wii se yinger waar. Opwool sayn leepe yets xlimer is, tuut se wayter sayn pestes tsu Yeehoowa mache. (1 Cor. 15:58) Yeete taach tuut se sich in tëm Paratiis foer xtele, mit sayn familye un froynte paysamer. Een aner xwester erinert sich tas yemant in te kemaynt hot tëne keëricht; awer, tii ëntxlist net wayter too triwer tenke. (Col. 3:13) Eene pruuter erinert sich fon te feeler woo eyer friier kemacht hot; awer, eyer halt sich traan aan wayter troy plaype fon yets am foran. (Sal. 51:10)

² Aan was sin tiise tray kriste eenlich? Tii al erinere sich fon was is friier pasiirt; awer, tii tuun net tat leepe. Xtats tas, tuun se “richt foran” fer ti tsukhunft kuke. (Lees Provérbios 4:25.) *

3. Warom prauche mer “richt foran” fer ti futuer kuke?

³ Warom is es wichtich “richt foran” fer ti futuer kuke? Een persoon woo imer hinich sich kukt, khan net richt weech laafe. In te selwich aat, mer khene net foran aan Yeehoowa sayn aarwayt keen wën mer imer fer ti ferkangne tsayte kuke. (Luc. 9:62)

4. Iwer was tuun mer in tiise artikel xpreche?

⁴ In tiise artikel tuun mer iwer tray fale xpreche woo khente uns mache in te ferkangne yoore leepe. * Tii sin: (1) ferlangre hon fon wii tas friier waar, (2) piter xpiirunge iwer yemant pehale, un (3) sich iwermeesich xultich fine. In yeete situatsyoon tuun mer piiplixe printsiipye noo kuke woo khene uns helfe net uns traan hale aan “was xon rom kang is”, awer uns xtreke “fer was noch khomt hin kriin”. (Fil. 3:13)

5. Iwer was fer fal tuut te tekst fon Eclesiastes 7:10 uns aan saan?

⁵ Lees Eclesiastes 7:10. * Mërk tas tiise tekst saat net tas es ferkheert is sich frooe: “Warom waar es friier kuut kewees?” Kuute erinerunge sin een kexenk fon Yeehoowa. Xtats tas, te wersikel saat: “Saa net: ‘Warom waar es friier peser wii hayt?’” In anere wërter, ti fal is ferklayche wii unser leepe friier waar mit wii unser leepe hayt is, un rechne tas hayt is ales xlechter kep. Een aner Piipel hot te tekst soo iwersetst: “Tuu nii net frooe: ‘Warom waar tas ales fiil peser in te friirixe tsayte kewees?’ Tas is net een xlau frooch.”

6. Warom is es net kluuch se tenke tas unser leepe waar peser in te friirixe tsayte kewees? Kep een payxpiil.

⁶ Warom is es net kluuch wayter se tenke tas unser leepe waar peser in te friirixe tsayte kewees? Wayl fiilaycht tuun mer uns ploos erinere fon was kuut waar, awer uns ferkese fon te xwiirichkheete woo mer mit kemacht hon. Tsum payxpiil, tenk aan was is mit te israelite pasiirt. Noo tas se ausm Ejipt kang sin, hon se sich xnel ferkes wii xweyer waar sayn leepe tat kewees. Xtats tas, hon se sich traan kehal aan tëm kuute ese woo se hate. Tii hon kesaat: “Wii ferlange mer ti fixe woo mer hon umsonst im Ejipt kes; un aach ti kumere, ti wasermeloone, ti poroo knoploche, ti tswiple un ti knoploche!” (Núm. 11:5) Awer, hon se wërklich “umsonst” kes? Kewis net! Ti israelite hon een tayer prays petsaalt: tii waare aan tiise tsayt xroo unerketrikt wii sklaawe im Ejipt. (Êxo. 1:13, 14; 3:6-9) Soo wii soo, tii hon sich noo heyer ferkes fon tiise xwiirichkheete, un hate ferlangre fon te friirixe tsayte. Tii hon raus kesuucht sich traan hale aan “wii xeen waar tas friier kewees!” xtats sich traan hale aan te kuute tinge woo Yeehoowa hat tëne kraat kemacht. Tiise aanxtelung hot Yeehoowa net kefalt. (Núm. 11:10)

7. Was hot een xwester keholef net tenke tas sayn leepe waar peser in te friirixe tsayte kewees?

⁷ Wii khene mer uns fon tiise fal wech hale? Kuk tas payxpiil fon een xwester woo hot aan kefang aan tëm Petël fon Brooklyn xafe im yoerkang 1945. Phaar yoore xpeeter, tii hot sich mit  een pruuter kehayrat woo aach in Petël kexaft hot un tii hon tat mitsamer fiile yoore ketiint. Awer, im yoer 1976, sayn man is krank kep. Tii saat tas wën eyer kemërkt hot tas sayn toot ticht waar, hot eyer tëne kuute aanreete kep woo teete se helfe noo tas eyer xtërpe teet. Tee hot tëne kesaat: “Meyer hate een froo hayrat. Fiile hon tas nii net kehat.” Awer, tee hot tëne aach aan kereet: “Tuu net aan te ferkangne yoore leepe — opwool tayn erinerunge tuun wayter mit tich keen. Ti tsayt tuut helfe tayn wee heele. Tuu net kriinsich wëre un tuu net tich selepst taure. Say froo fer ti kuute tsayte woo mer hon Yeehoowa paysamer ketiint. . . . Ti erinerunge sin een kexenk fon Yeehoowa fer uns.” Was fer een kuut aanreet, kël?

8. Wii hot unser xwester nutse kriit wayl se hot net in te ferkangne yoore keleept?

⁸ Unser xwester hot te aanreet fon sayn man noo kang. Tii hot Yeehoowa troy ketiint pis sayn toot, wii se 92 yoer alt waar. Phaar yoore foer sayn toot, hot se kesaat: “Wën ich traan tenke aan te mee wii 63 yoore woo ich hon fer Yeehoowa in te fol tsayt tiinst kexaft, khan ich saan tas mayn leepe waar, un noch is, een frooes leepe.” Weeche was? Tii hot aus keleet: “Was tas leepe wërklich froo macht is unser wunerlich pruuterxaft un ti hofnung fer in tëm Paratiis uf te eyert mit unser priiter un xwestere leepe, wën mer tuun unser Kroos Kriatoer — te eensiche woere Kot, Yeehoowa — fer ti kans eewichkheet tiine.” * Was fer een xeen payxpiil fon yemant woo hot richt foran fer ti futuer kekukt!

9. Tëm noo Levítico 19:18, wanee khan tas hauptseechlich xweyer sin ti piter xpiirunge uf sayt lose?

⁹ Lees Levítico 19:18. * Als mool, is tas xweyer ti piter xpiirunge uf sayt lose wën weer uns keëricht hot waar yemant fon te kemaynt, een kuute froynt, orer een parent. Tsum payxpiil, een xwester hot een aner xwester pexulticht fon sayn kelt xtele. Noo heyer,  hot se kemërkt tas se ferkheert waar un hot sich ënxulticht. Awer, ti xwester woo se pexulticht hat, hot tas net ferkese kriit. Host tuu tich xon soo kexpiirt? Soo kaar wën mer hon net ti selwich situatsyoon mit kemacht, ti meyerste fon uns hon xon tsiimlich sicher piter xpiirunge pehal; un hon mer keklaapt tas mer khonte tas net uf sayt lose.

10. Was khan uns helfe wën mer piter xpiirunge hon?

¹⁰ Was khan uns helfe wën mer piter xpiirunge hon? Meyer mise uns erinere tas Yeehoowa siit ales. Tee wees ales was mer mit leepe — too tepay wën ti anere uns unkerecht pehantele. (Heb. 4:13) Wën mer layte, tee tuut sich traurich xpiire. (Isa. 63:9) Un eyer ferxprecht tas, am ën, tuut eyer fermache al ti xaate woo mer weeche unkerechtichkheet mit keleept hon. (Apo. 21:3, 4)

11. Was fer nutse khene mer kriin wën mer ti piter xpiirunge uf sayt lose?

¹¹ Mer wole uns aach erinere tas mer tuun uns peser fine wën mer ti piter xpiirunge uf sayt lose. Ti xwester woo falx pexulticht waar hot tas kemërkt. Mit te tsayt, hot se ti piter xpiirunge uf sayt kelos kriit. Tii hot erkhënt tas wën mer ti anere fertsaye, Yeehoowa fertsayt uns. (Mat. 6:14) Tii wust tas was ti aner xwester kemacht hat ferkheert waar. Awer, tii hot raus kesuucht ti piter xpiirunge net pehale. Weeche tas, unser xwester is frooer kep un khont sich traan hale aan Yeehoowa sayn tiinst.

12. Was lërne mer mit 1 João 3:19, 20?

¹² Lees 1 João 3:19, 20. * Meyer tuun al uns als mool xultich xpiire. Tsum payxpiil, welche tuun sich xultich xpiire weeche ti tinge woo se kemacht hon eep se ti woerheet kelërnt hon. Anere tuun sich xultich xpiire weeche ti feeler woo se noo sayn taaf kemacht hon. Es is net unkeweenlich sich soo fine. (Rom. 3:23) Kewis, meyer wole mache was richtich is, awer “meyer al tuun fiil mools xtolpere”. (Tia. 3:2; Rom. 7:21-23) Opwool mer net kërn hon uns xultich fine, es khan nutse fer uns pringe. Warom? Wayl tiise sorte xpiirunge khene uns uf muute ënerunge in unser leepe mache un uns ti pextimung kepe fer net ti selwiche feeler mache. (Heb. 12:12, 13)

13. Warom mise mer uns uf phase keeche ti fal fon uns iwermeesich xultich fine?

¹³ Uf te aner sayt, es is meechlich sich iwermeesich xultich fine — es wil saan, uns wayter pexultiche noo tas mer uns peroyt hon un noo tas Yeehoowa ketsaycht hot tas eyer uns fertsayt hat. Soo sorte xult khan uns xaate mache. (Sal. 31:10; 38:3, 4) Wii soo? Kuk tas payxpiil fon een xwester woo sich wayter xultich kefun hot weeche ti sinte woo se friier kemacht hat. Tii hot kesaat: “Ich hon kemënt tas es hat khee tswek xtram tsu Yeehoowa xafe, wayl es waar woerxaynlich tsu xpeet fer mich kewees.” Fiile fon uns fine sich kraat soo. Tan, meyer mise uns uf phase keeche ti fal fon uns iwermeesich xultich fine. Ploos tenk aan wii froo Satanaas plaype teet wën mer fon uns selepst uf kepe teete — soo kaar wën Yeehoowa hot net fon uns uf kep! (Kuk aach 2 Coríntios 2:5-7, 11.)

14. Wii khene mer uns sicher sin tas Yeehoowa net fon uns uf kep hot?

¹⁴ Soo wii soo, fiilaycht tuun mer uns frooe: ‘Wii khan ich mich sicher sin tas Yeehoowa net fon mich uf kep hot?’ Wëns tuu tich tiise frooch machst, es tsaycht tas Yeehoowa khan tich fertsaye. Fiile yoore tsurik, Te Wachthorm hot kesaat: “Fiilaycht tuun mer eftas xtolpere un fale weeche een xlecht kewoonheet. Un es khan aus siin tas mer tëm net iwerkhome kriin. Awer tuu net tayn hofnung ferliire. Tuu net rechne tas tuu een sint kemacht host woo net fertsayt wëre  khan. Es is kraat wii Satanaas teet kërn tas tuu tich xpiire teest. Wëns tuu traurich un pees mit tich selepst playpst, es tsaycht xon tas tuu net tsu wayt kang pist. Tuu wayter tsu Yeehoowa mit teemuut peete tas eyer tich fertsayt, rayn macht un heleft. Fertseel mit tëm wii een khint woo te papa sayn hilef ferlangt, wën eyer propleeme am mit mache is. Es is een tuun wii fiil mools tuu tuust weeche ti selwich xwacheet peete, say tich sicher tas Yeehoowa, weeche sayn unfertiint kuutheet, tuut tich helfe.”

15-16. Wii hon welche sich kexpiirt wën se kemërkt hon tas Yeehoowa net fon tëne uf kep hot?

¹⁵ Fiile fon Yeehoowa sayn tiiner hon sich ketreest kefun wën se kemërkt hon tas Yeehoowa net fon tëne uf kep hot. Tsum payxpiil, phaar yoore tsurik, een speryens fon te sesyoon “A Bíblia Muda a Vida das Pessoas” * hot een pruuter tiif aan kekrif. In tiise artikel, een xwester hot kesaat tas weeche ti xlechte tinge woo se in sayn leepe mit kemacht hat, es waar xweyer fer tëne se klaape tas Yeehoowa khont tëne liipe. Tii hot mit tiise xpiirunge soo kaar fer phaar yoore noo sayn taaf kekhëmpf. Awer, aan tëm fray khaaf opfer triwer noo tenke hot tëne keholef se klaape tas Yeehoowa tuut tëne liipe.

¹⁶ Wii hot tiise speryens te pruuter keholef? Eyer hot kexrip: “Wii ich yung waar, hon ich keeche ti sucht fon pornokrafii kuke kekhëmpf. Un khërtslich, hon ich tas noch mool kemacht. Ich hon ti hilef fon te elteste kesuucht un ich sin ti xrite am kepe fer mayn propleem iwerkhome. Ti elteste hon mich sicher kelos tas Kot liipt mich un tas eyer parmhërtslich is. Soo wii soo, tuun ich mich als mool unutslich fine, wii wën Yeehoowa mich net liipe khent. Ti speryens fon ti xwester leese hot mich fiil keholef. Yets ferxteen ich tas, wën ich tenke tas Kot mich net fertsaye tuut, es is wii wën ich saan teet tas tas opfer fon sayn Soon net kenuuch is fer mayn sinte teke. Ich hon tiise artikel aus kexnit tas ich khan es leese un too triwer tenke imer wën ich mich unutslich fine.”

17. Wii hot Phaul sich wech kehal fon te fal fon sich iwermeesich xultich fine?

¹⁷ Soo sorte speryense tuun uns fon tëm aphostel Phaul erinere. Eep eyer een krist kep is, hot eyer fiile xweyere sinte kemacht. Phaul hot net ferkes was eyer kemacht hat, awer eyer hot net imer too triwer ketenkt. (1 Tim. 1:12-15)  Tee hot tas fray khaaf opfer kesiin wii een perseenlich kexenk fon Kot tsu tëm. (Gál. 2:20) Tes weeche, Phaul hot sich wech kehal fon te fal fon sich iwermeesich xultich fine, un hot sich traan kehal aan sayn pestes tsu Yeehoowa kepe fon tiise xtun am foran.

18. Was hon mer in tiise artikel kelërnt?

¹⁸ Was hon mer pis yets kelërnt? (1) Kuute erinerunge sin een kexenk fon Yeehoowa. Awer, een tuun wii waar unser leepe friier kewees, unser futuer in te naye welt wërt sicher peser sin. (2) Anere fiilaycht tuun uns ëriche; awer wën mer raus suuche se fertsaye, khene mer uns traan hale aan Yeehoowa tiine. (3) Sich iwermeesich xultich fine khan unser frooheet in Yeehoowa sayn tiinst xtele. Tan, soo wii Phaul, prayche mer klaape tas Yeehoowa uns fertsayt hot.

19. Wii wise mer tas in te naye welt, ti trauriche erinerunge fon te ferkangne tsayte tuun uns nii mee kweele?

¹⁹ Unser hofnung is fer imer se leepe. Un in te naye welt, ti trauriche erinerunge fon te ferkangne tsayte tuun uns nii mee kweele. Ti Piipel saat iwer tiise tsayt: “Ti ferkangne tinge wëre net mee erinert.” (Isa. 65:17) Tenk traan: welche fon uns hon xon Yeehoowa fer een lang tsayt ketiint, un yets sin mer elter kep; awer, in te naye welt tuun mer noch mool yung wëre. (Jó 33:25) Tes weeche, wole mer net in te ferkangne yoore leepe. Xtats tas, wole mer uns traan aan te futuer hale un wayter richt foran kuke!