XTUUTYUM ARTIKEL 45
Wii ti anere helfe Yeesus sayn kepoote aan heere
“Tan keet un macht tisipele . . . , un tuut se in lërne aan heere ales was ich aych kexikt hon.” (MATEUS 28:19, 20)
LIIT 89 Heert, macht, un wërt keseechent
WAS TUUN MER SIIN? *
1. Tëm noo Mateus 28:18-20, was fer kepoot hot Yeesus kep?
NOO tas Yeesus fom toot uf kextii is, tee is foer sayn tisipele khom, woo waare in Kalilëa kesamelt kewees. Eyer hat was wichtiches tsu tëne saan! Was? Ti wërter woo in Mateus 28:18-20 * kexrip sin. (Lees.)
2. Was fer frooche tuun mer noo kuke?
2 Yeesus sayn kepoot fer tisipele mache tiint aach fer yeete eene fon Kot sayn tiiner hayt tsu taach. Tes weeche, wole mer noo kuke tray frooche woo mit tiise kepoot se tuun hon. Eyerst, tepay mit Kot sayn kesetse fer ti naye tisipele in lërne, was noch sole mer mache? Tsweet, wii khan yeete puplikatoer in te kemaynt mit helfe tas ti Piipel xtutënte foran keen? Trit, wii khene mer helfe unser priiter un xwestere woo inatiiw sin, noch mool tisipele mache?
TUU TËNE IN LËRNE YEESUS SAYN KEPOOTE AAN HEERE
3. Was fer kenau oryentiirung hot Yeesus tepay aan sayn kepoot kep?
3 Yeesus sayn oryentiirung is taytlich: meyer mise ti layt in lërne ti tinge woo eyer kexikt hot. Awer, mer sole net een wichtich phunkt ferkese. Yeesus hot net kesaat: ‘Tuut se in lërne ales was ich aych kexikt hon.’ Xtats tas, hot eyer kesaat: “Tuut se in lërne aan heere ales was ich aych kexikt hon.” Fer tiise kenau oryentiirung aan wëne, thërfe mer net ploos unser Piipel xtutënt in lërne was se mache, awer aach tëm tsayche wii tas mache. (Atos 8:31) Weeche was thërfe mer tas mache?
4. Kep een payxpiil woo tsaycht wii khene mer eene Piipel xtutënt in lërne se aan heere was Yeesus kexikt hot.
4 Wii khene mer yemant in lërne ti tinge woo Yeesus kexikt hot aan heere? Tas neekste payxpiil tuut uns helfe ferxteen was thërfe mer mache. Wii tuut eene faare leerer sayn xiler in lërne ti kesetse iwer wii richtich faare aan heere? Eyerst, lërnt te leerer ti kesetse in woo ti xiler mise aan te xtroos noo keen. Awer, tas sayn xiler lërne tiise kepoote aan heere, tee praucht noch etwas mache. Soo lang wii ti xiler am faare un am fersuuche sin se aan wëne was se kelërnt hon, te leerer praucht mit tëne keen un tëne aanreete kepe. Was khene mer mit tiise payxpiil lërne?
5. (a) Tëm noo João 14:15 un 1 João 2:3, was thërfe mer unser Piipel xtutënte lërne se mache? (b) Wii khene mer unser xtutënte helfe piiplixe printsiipye in fiire?
5 Wën mer ti Piipel mit anere xtutiire, tuun mer tëne in lërne was Kot fon uns ferlangt. Awer tas is net kenuuch. Meyer mise unser xtutënte lërne in sayn leepe in fiire was se am lërne sin. (Lees João 14:15 * un 1 João 2:3 *.) Torich was mer mache, khene mer fer unser xtutënte tsayche wii khene se piiplixe printsiipye aan wëne in te xuul, in te aarwayt, orer wën se sich ferkniiche. Meyer khene tëne saan iwer etwas woo is mit uns pasiirt woo tsaycht wii een Piipel oryentiirung aan wëne hot uns kexitst orer wii hot tas uns keholef een kluuche ëntxlus mache. Wën mer mit unser xtutënte sin, khene mer tsu Yeehoowa peete un tëm ferlange tas eyer mit sayn hayliche kayst tëne fiirt. (João 16:13)
6. Was is tepay aan te anere lërne Yeesus sayn kepoote aan heere?
6 Was is tepay aan te anere lërne Yeesus sayn kepoote aan heere? Mer prauche unser Piipel xtutënte helfe te wunx kriin fer tisipele mache. Etliche xtutënte fiilaycht hon pang fer se preetiche. Tan, mer prauche ketultich sin un tëne in lërne in een aat woo ferkreest sayn ferxtëntnis, krayft sayn hërts aan, un tëne uf rechent fer se preetiche. Was khene mer mache fer unser xtutënte helfe te wunx kriin fer ti kuute oter preetiche?
7. Wii khene mer een xtutënt helfe te wunx kriin fer se preetiche?
7 Fiilaycht, khene mer fer unser Piipel xtutënt soo sorte frooche mache: “Wii hot tayn leepe sich ferpesert wayls tuu ti piiplixe woerheete aan wënst? Mënst tuu net tas ti anere prauche aach tiise piiplixe woerheete heere? Was khanst tuu mache fer tëne helfe?” (Pro. 3:27; Mat. 9:37, 38) Tsaych te xtutënt ti pleetche fon unser Inlërnung Kit un los tëm raus suuche tii woo eyer mënt tas sayn parente, froynte orer aarwayt koleke teete kërn leese. * Kep te xtutënt welche fon tiise pleetche. Tuu mit tëm iipe wii khan eyer, mit kexik, tiise pleetche fer anere aan piite. Sicher, noo unser xtutënt een puplikatoer wërt, meyer wole pay tëm sin fer tee helfe. (Ecl. 4:9, 10; Luc. 6:40)
WII KHAN TI KEMAYNT TI PIIPEL XTUTËNTE HELFE FORAN KEEN
8. Warom is tas wichtich tas unser xtutënte een xtark liip tsu Kot un tsu te neekste ëntwikele? (Kuk aach te khaste “ Wii unser xtutënt helfe sayn liip tsu Kot ferkreese”.)
8 Ferkes net tas Yeesus hot uns kesaat fer ti anere in lërne “aan heere ales” was eyer kexikt hat. Kewis, too tepay sin ti tswaay kreeste kepoote — Kot liipe un te neekste liipe — woo sin ticht ferpunt mit preetiche un tisipele mache. (Mat. 22:37-39) Was is ti ferpiinung? Wën te Piipel xtutënt een xtark liip tsu Kot un sayn neekste hot, tuut eyer te wunx kriin fer se preetiche. Is tsum ferxteen tas welche Piipel xtutënte tuun pang kriin wën se tenke tas se preetiche prauche. Awer mer khene tëne sicher lose tas, mit Yeehoowa sayn hilef, tuun se lamsam ti pang fon te mënxe iwerkhome. (Sal. 18:1-3; Pro. 29:25) Te khaste woo mit tiise xtuutyum khomt, pexraypt ti xrite woo mer khene kepe fer unser xtutënt helfe sayn liip tsu Kot ferkreese. Awer, was khan ti kemaynt mache fer ti naye tisipele helfe noch mee liip tsayche?
9. In te ferklaychung fon tëm faare xiler, in was fer aate tuut te xiler wichtiche lisyoone lërne?
9 Tenk noch mool aan te ferklaychung fon tëm faare xiler. Wii eyer aan te xtroos faart, mit tëm leerer uf sayn sayt, in was fer aate tuut te xiler lërne? Tee heert sayn leerer un phast uf wii ti anere kuute xofeer faare. Tsum payxpiil, te leerer fiilaycht tsaycht een aner xofeer hin woo lost een aner khare foer tëm rin keen. Orer fiilaycht tsaycht eyer hin eene aner xofeer woo ferxweecht sayn licht fer ti anere net plint lose. Tiise payxpiile lërne te xiler wichtiche lisyoone woo eyer aan wëne khan wën tee am faare is.
10. Was tuut een Piipel xtutënt helfe kaystlich foran keen?
10 Kenau soo, een Piipel xtutënt woo fangt aan im weech fom leepe keen, tuut net ploos fon sayn leerer lërne, awer aach fon te xeene payxpiile fon anere tiiner fon Yeehoowa. Tan, was tuut een Piipel xtutënt fiil helfe kaystlich foran keen? In te fersamlunge khome. Weeche was? Was tee in te fersamlunge heert, tuut tëm helfe mee lërne, sayn klaape ferxtërke un sayn liip tsu Kot ferkreese. (Atos 15:30-32) Un noch, in te fersamlunge, khan te Piipel leerer sayn xtutënt helfe priiter un xwestere khëne lërne, woo tuun eenliche tinge mit leepe. Was fer xeene payxpiile fon priiter un xwestere woo liip tsayche, khan te xtutënt in te kemaynt siin?
11. Was fer payxpiile khan een xtutënt in te kemaynt mërke, un wii khan tas tëm petrefe?
11 Iwerlee tich ti neekste situatsyoone. Een Piipel xtutëntin, woo een leetich muter is, peopacht een xwester woo hot een eenlich situatsyoon. Es krayft aan te xtutëntin sayn hërts se siin wii fiil aanxtrengung tuut ti xwester mache fer in tëm Raych Saal mit sayn kleene khiner khome. Een xtutënt woo khëmpft fer noo lose se rauche, khënt een aner puplikatoer woo hat een eenlich khampf, awer woo hot tas iwerkhom. Te puplikatoer saat fer te xtutënt wii sayn liip tsu Yeehoowa ferkreese, hot tëm uf kerechent fer Kot sayn kepoote aan heere. (2 Cor. 7:1; Fil. 4:13) Noo tas te pruuter saat fer te xtutënt wii hot tee noo kelos se rauche, tee saat: “Tuu khanst tas aach hin kriin.” Te xtutënt is uf kemuut un klaapt tas eyer khan tas mache. Een meetche woo ti Piipel xtutiirt, mërkt een yung xwester woo hot iwer kërn sayn leepe wii Yeehoowa sayn Tsayer. Wën tii mërkt wii froo ti yung xwester is, ti Piipel xtutëntin wil mee wise iwer warom ti xwester tuut imer froo aus siin.
12. Warom khene mer saan tas yeete eene in te kemaynt khan etwas mache fer ti Piipel xtutënte helfe?
12 Wën ti Piipel xtutënte tuun unerxiitliche troye puplikatoore khëne, tii lërne fon tëne sayn payxpiil was petayt Kristus sayn kepoot fer Kot un te neekste liipe, aan heere. (João 13:35; 1 Tim. 4:12) Un wii mer kraat kesiin hon, een Piipel xtutënt khan lërne fon puplikatoore woo tuun eenliche kefoere mit mache. Te xtutënt lërnt fon tiise payxpiile tas ti ënerunge mache woo neetich sin fer Yeesus sayn tisipele wëre, meechlich is. (Deut. 30:11) Yeete eene in te kemaynt khan in unerxiitliche aate mit helfe tas ti Piipel xtutënte foran keen. (Mat. 5:16) Was fer tinge pist tuu xon am mache fer ti Piipel xtutënte woo in te fersamlunge khome, uf muute?
TUU TI INATIIWE HELFE NOCH MOOL PREETICHE
13-14. Wii hot Yeesus ti aphostele pehantelt, wii se oone muut waare?
13 Meyer wole unser priiter un xwestere woo inatiiw sin helfe noch mool preetiche un tisipele mache. Ti aat wii Yeesus sayn aphostele pehantelt hot wën se oone muut waare, tsaycht was khene mer hayt mache.
14 Am ën fon Yeesus sayn preetich uf te eyert, wën sayn toot ticht waar, ‘hon al ti aphostele tëm im xtich kelos un hon ap kehaut’. (Mar. 14:50; João 16:32) Wii hot Yeesus ti aphostele pehantelt, wii se oone muut waare? Klaych wii eyer fom toot uf kextii is, hot Yeesus fer etliche fon sayn tisipele kesaat: ‘Tuut khee pang hon! Keet, fertseelt fer mayn priiter [tas ich uf kextii sin].’ (Mat. 28:10a) Yeesus hot net fon sayn aphostele uf kep. Opwool se tëm im xtich kelos hon, hot eyer tëne wayter wii “mayn priiter” keruuft. Soo wii Yeehoowa, waar Yeesus parmhërtslich un hot imer fertsayt. (2 Reis 13:23)
15. Wii xpiire mer uns iwer tii woo hon noo kelos preetiche keen?
15 In te selwich aat, meyer tuun uns fiil khimere mit tëne woo hon noo kelos se preetiche. Tii sin unser priiter un xwestere un meyer liipe tëne! Meyer tuun uns net ferkese wii hon tiise priiter xtram fer Yeehoowa kexaft — welche, fer fiile yoore. (Heb. 6:10) Meyer hon ferlangre noo tëne! (Luc. 15:4-7) Soo wii Yeesus, wii khene mer tsayche tas mer uns mit tëne khimere?
16. Wii khene mer tsayche tas mer uns mit unsere priiter un xwestere, woo inatiiw sin, khimere?
16 Tuu tëne liiplich in laate. Fer sayn aphostele woo oone muut waare uf muute, hot Yeesus tëne in kelaat fer een fersamlung. (Mat. 28:10b; 1 Cor. 15:6) In te selwich aat hayt, wën se xon net am keen sin, khene mer ti inatiiwe uf muute fer in te fersamlunge khome. Meyer wise tas, fiilaycht, prauche mer tëne phaar mool in laate eep se fer ti fersamlunge khome. Un kewis, Yeesus waar iwer froo tas sayn tisipele hon tëm sayn inlaatung aan kenom. (Kuk aach Mateus 28:16 un Lucas 15:6.)
17. Wii sole mer uns aan xtele wën een inatiiw tsu te fersamlung khomt?
17 Tuu tëne hërtslich wilkhome. Yeesus hot sayn tisipele hërtslich wilkhom wën se tëm ketrof hon. Eyer hot te eyerste xrit kep fer mit tëne xpreche. (Mat. 28:18) Wii tuun mer uns aan xtele wën een inatiiw khomt in te Raych Saal rin? Meyer sole te eyerste xrit kepe un tëm hërtslich wilkhome. Am aanfang, fiilaycht tuun mer uns ketanke mache tas mer tuun net wise was se saan. Awer, oone tëm xeeme, khene mer aynfach saan: “Ich sin froo tas tuu too hiir pist!”
18. Wii khene mer ti puplikatoore woo inatiiw sin, uf muute?
18 Tuu tëne eerlich uf muute. Yeesus sayn tisipele, tsiimlich sicher, hon sich kleen kefun neewich sayn kroose flicht — ti kuute oter uf te kans welt preetiche. Awer Yeesus hot tëne tiise sicherheet kep: “Ich sin mit aych ti kans tsayt.” (Mat. 28:20) Hot tas ti tisipele keholef? Kewis. Klaych tëm noo, tii waare flaysich ‘am in lërne un ti kuute notisye am pekhant mache’. (Atos 5:42) Puplikatoore woo inatiiw sin, prayche aach uf kemuut wëre. Fiilaycht hon se pang fer aan fange noch mool preetiche. Meyer khene tëne sicher lose tas tii tuun net aleen preetiche. Wën se fërtich sin, khene mer mit tëne in tëm preetich keen. Tii tuun sicher froo plaype wayl se unser hilef hon wën se noch mool ti kuute oter preetiche. Wën mer ti inatiiwe aan siin un pehantele wii unser priiter un xwestere, khene se fiilaycht noch mool aktiiw wëre — etwas woo tuut fiil frayt fer ti kans kemaynt pringe!
MEYER WOLE FËRTICH PRINGE TI AARWAYT WOO UNS FERTRAUT WAAR
19. Was is unser hërtslich wunx, un warom?
19 Wii lang tuun mer wayter preetiche un tisipele mache? Pis aans ën fon tiise xlecht welt. (Mat. 28:20; kuk te Glossário, “Final do sistema de coisas”.) Tuun mer es hin kriin — preetiche un tisipele mache — pis tan? Meyer sin pextimt fer tas mache! Meyer tuun froo fon unser tsayt, kraft un kelt kepe fer se fine tii woo “ti richtich muut fer tas eewiche leepe hon”. (Atos 13:48) Wën mer tas mache, tuun mer Yeesus sayn payxpiil noo mache. Tee hot kesaat: “Mayn esmitel is te wile fon tee woo mich kexikt hot mache un sayn aarwayt fërtich pringe.” (João 4:34; 17:4) Tas is aach unser hërtslich wunx. Meyer wole fërtich pringe ti aarwayt woo uns fertraut waar. (João 20:21) Un mer wole tas anere, tepay ti inatiiwe, mit uns in tiise aarwayt wayter aus hale. (Mat. 24:13)
20. Tëm noo Filipenses 4:13, weeche was khene mer fërtich pringe ti aarwayt woo Yeesus uns kexikt hot?
20 Es is net laycht se mache was Yeesus uns kexikt hot. Awer meyer tuun tiise aarwayt net aleen mache. Yeesus hot ferxproch tas eyer teet mit uns sin. Wën mer tisipele mache, sin mer “Kot sayn mitaarwayter” un “xafe mer mitsamer mit Kristus”. (1 Cor. 3:9; 2 Cor. 2:17) Tes weeche, khene mer es hin kriin. Tiise flicht erfiile un anere helfe tas mache is een kroos eer un pringt kroos frooheet! (Lees Filipenses 4:13.) *
LIIT 79 Lërn se fest im klaape se plaype
^ parágrafo 5 Yeesus hot fer sayn nookeener kesaat fer tisipele mache un tëne in lërne aan heere ales was eyer tëne kexikt hat. Tiise artikel tuut xpreche iwer wii khene mer Yeesus sayn oryentiirung noo keen.
^ parágrafo 1 (Mateus 28:18-20) Yeesus is tichter khom un hot tëne kesaat: “Es waar mich te kans autoriteet im himel un uf te eyert kep. 19 Tan keet un macht tisipele fon mënxe fon ale natsyoone, taaft se im naame fom Fater un fom Soon un fom hayliche kayst, 20 un tuut se in lërne aan heere ales was ich aych kexikt hon. Un ferkes net: Ich sin mit aych ti kans tsayt, pis tsum ën fom sisteem.”
^ parágrafo 5 (João 14:15) “Wën teyer mich liipt, tuut teyer mayn kepoote aan heere.
^ parágrafo 5 (1 João 2:3) Un torich tas, wise mer tas meyer iim khëne tuun: wën mer wayter tëm sayn kepoote aan heere tuun.
^ parágrafo 7 Wën mer iwer een Piipel xtutënt xpreche, es kilt fer ti mëner un aach fer ti fraae.
^ parágrafo 20 (Filipenses 4:13) Fer ales sin ich xtark torich tee woo meer kraft kept.
^ parágrafo 71 PILTER AUSLEYUNGE: Ti xwester, woo tas Piipel xtuutyum fiirt, leet fer ti xtutëntin aus was fer xrite praucht se kepe fer sayn liip tsu Kot ferkreese. Noo heyer, ti xtutëntin tuut ti tray aanunge aan wëne, woo se fon sayn leerin kriit hot.
