1-2. (a) Warom sole tii woo sich kraat kehayrat hon aan Yeehoowa traue? (Psalm 37:3, 4) (b) Was tuun mer in tiise artikel siin?

PIST tuu khërtslich ferhayrat orer machst tuu tas klaych? Tan sicher, wilst tuu een froo leepe hon mit te persoon woos tuu soo fiil liipst. Sicher is ti hayrat net imer laycht. Un es kept wichtiche ëntxlise woo teyer mache mist. Ti aat wii teyer mit te propleeme um keet un ti ëntxlise woo teyer macht, tuun tiif petrefe wii froo wërt ayre leepe sin. Was tuut pasiire wën teyer uf Yeehoowa traut? Teyer tuut kuute ëntxlise mache, ayre hayrat wërt xtërker un teyer wërt frooer. Awer was pasiirt wën teyer net Kot sayn oryentiirunge aan wënt? Tsiimlich sicher, tuut teyer xwiirichkheete mit mache woo tuun propleeme fer ayre hayrat pringe, un teyer wërt untsufriite sin. (Lees Psalm 37:3, 4.) *

² Opwool tiise artikel is hauptseechlich fer tii woo sich kraat kehayrat hon, tuut tee aach xpreche iwer propleeme woo al ti ferhayrate khene hon. Meyer tuun noo kuke was mer lërne khene mit te payxpiile fon etliche troye mëner un fraae fon te Piipel. Meyer lërne lisyoone woo in fiile situatsyoone fon unser leepe phase, too tepay ti hayrat. Meyer lërne aach fon te speryense fon etliche pheyerche fon unser taache.

3-4. Was fer propleeme khene tii woo sich kraat kehayrat hon mit mache?

³ Etliche tuun tii woo sich kraat kehayrat hon uf muute een  “normaale” leepe hon. Tsum payxpiil: im xtant eltere un anere parente wole tas pheyerche tswinge khiner hon soo xnel wiis meechlich is. Orer khan sin tas froynte un familye tëne uf muute een haus khaafe un tas fol mit kuute tinge lose.

⁴ Wën tas pheyerche net uf phast, khene se ëntxlise mache woo tëne fiile xulte pringe. Tan, tsiimlich sicher mise te man un ti fraa fiile xtune xafe fer tas petsaale. Tii khene manich mool soo fiil xafe, tas se khee mee tsayt hon fer ti Piipel xtutiire, ti familye aanpeetung mache un uf te preetich aarwayt keen. Im xtant, tuun se in te fersamlunge feele fer ekstra xtune xafe, wayl se wole mee kelt kriin orer sich sicher sin tas se net sayn aarwayt ferliire. Weeche tas, ferliire se ti xans fer mee in Yeehoowa sayn aarwayt mache.

5. Was lërnst tuu mit Klaus un Marisa sayn payxpiil?

⁵ Fiile payxpiile tuun es kans taytlich lose: wën tas haupste in unser leepe is mee tinge hon, sin mer net froo. Kuk mool was Klaus un Marisa too triwer kelërnt hon. * Wii se sich kehayrat hon, hon ti tswaay te kanse taach kexaft, tas ti khente een kuute leepe hon. Awer in woerheet waare se net wërklich froo. Klaus erkhënt: “Meyer hate mee wii mer praychte. Awer mer hate khee tsiil fer mee tsu Yeehoowa mache. Fer ti woerheet saan, hate mer fiile tinge fer uns ketanke mache un mer waare ofts stresiirt.” Im xtant, host tuu aach xon kemërkt tas materyaalixe tinge samele pringt net frooheet. Wën tas pasiirt is, playp net oone muut. Was uns too triwer helfe khan, is ti kuute payxpiile fon anere noo kuke. Fer aan se fange, wole mer siin was ti mëner khene mim kheenich Yeosafat lërne.

6. Wii hot Yeosafat te aanreet fon Xpriiche 3:5, 6 aan kewënt wii een kroos militeer keeche tëm khom is?

⁶ Ferhayrate mëner, xpiirt teyer aych als mool iwerlaat weeche ayre flichte? Wën yaa, te kheenich Yeosafat sayn payxpiil khan aych helfe. Wayl eyer te kheenich waar, mist eyer sicherheet fer ti kans natsyoon pringe! Wii hot eyer es hin kriit soo een kroos flicht uf phase? Yeosafat hot sayn pestes kemacht fer ti natsyoon xitse. Tee hot ti xtete fon Yuuta ferxtërkt un aach een kroos militeer kesamelt mit mee wii 1.160.000 soltaate. (2 Kro. 17:12-19) Xpeeter, hot Yeosafat een xweyer kefoer mit kemacht: een kroos militeer fon amoniiter, moapiiter, un mëner fon te përich rechyoon fon Seiir, is khom fer keeche tëm khëmpfe. Tes weeche, waare eyer, sayn familye un tas kanse folek ins kefoer. (2 Kro. 20:1, 2) Was hot Yeosafat tan kemacht? Tee hot hilef un kraft fer Yeehoowa ferlangt. Tas xtimt aach mit tëm kluuche aanreet woo in Xpriiche 3:5, 6 * xteet. (Lees.) Yeosafat sayn teemuutich kepeet in 2^te Kroonike 20:5-12, tsaycht wii fiil eyer uf  Yeehoowa ketraut hot. Wii hot Yeehoowa tëm sayn kepeet keantwort?

7. Wii hot Yeehoowa Yeosafat sayn kepeet keantwort?

⁷ Yeehoowa hot mit Yeosafat kexproch torich een lewiite woo Yaasyël keheest hot; Kot hot kesaat: “Xtelt aych hin, playpt xteen un siit wii Yeehoowa aych rete tuut.” (2 Kro. 20:13-17) Kewis, weyer tas net een normaale aat fer een kriich khëmpfe, kël? Awer tiise oryentiirunge sin net fon mënxe khom — tii sin fon Yeehoowa khom. Un mit een xtarke klaape aan Yeehoowa, is Yeosafat ti oryentiirunge noo kang. Kuk mool was Yeosafat kemacht hot wii eyer un tas folek ti faynte trefe kang sin. Tee hot ti singer, woo kheen wafe hate, foer tas militeer ketuun, net ti peste un kwapste soltaate. Yeehoowa hot sayn ferxpreche fer Yeosafat in kehal un hot ti faynte foer tëm ap kewun. (2 Kro. 20:18-23)

8. Was khene ti ferhayrate mëner mit Yeosafat sayn payxpiil lërne?

⁸ Yeosafat sayn payxpiil tuut etwas fer tich, ferhayrat man, in lërne. Tuu host ti flicht fer tayn familye uf phase; tes weeche, xafst tuu xtram fer tayn familye xitse un fersoriche. Wëns tuu een propleem mit machst, im xtant tenkst tuu: ‘Ich khan tas aleen resolwiire.’ Awer tuu net aan tayn aychne kraft traue! Xtats tas, ferlang Yeehoowa sayn hilef wëns tuu aleen pist. Un tuu aach eerliche kepeete mit tayn fraa mache. Xtutiir ti Piipel un ti puplikatsyoone fon Kot sayn Orkanisatsyoon fer Yeehoowa sayn oryentiirunge fine, un tan wën se aan. Khan sin tas etliche tenke tas ti ëntxlise woos tuu machst, woo sich aan te Piipel xtaype, net kuut sin. Un im xtant, tuun se soo kaar saan tas tuu tum pist. Fiilaycht, saan se tas ti pest aat fer tayn familye xitse is kelt un tinge samele. Awer tenk traan aan Yeosafat sayn payxpiil. Tee hot uf Yeehoowa ketraut un hot tas ketsaycht torich sayn aktsyoone. Yeehoowa hot net tiise troye man im xtich kelos, un tee tuut tich aach net im xtich lose. (Psal. 37:28; Hep. 13:5) Awer was noch khene ti pheyerche mache fer een froo leepe mitsamer hon?

9. Was khene mer saan iwer te profeet Isaiias un sayn fraa?

⁹ Tas haupste fer Isaiias un sayn fraa waar Yeehoowa tiine. Isaiias waar een profeet kewees. Un khan sin tas tëm sayn fraa een eenlich insetsung hat, wayl ti Piipel nënt se wii “ti profeetin”. (Isa. 8:1-4) Es is klaar tas Isaiias un sayn fraa hon sich traan kehal aan Yeehoowa sayn aanpeetung. Was fer een xeen payxpiil fer ti pheyerche hayt tsu taach!

10. Warom piiplixe profetsiie xtutiire khan een pheyerche helfe te wunx hon fer sayn pestes fer Yeehoowa kepe?

¹⁰ Wii khene ti pheyerche hayt tsu taach Isaiias un sayn fraa noo mache? Tii khene sayn pestes in Yeehoowa sayn tiinst mache. Un fer sayn klaape aan Yeehoowa ferxtërke, khene se piiplixe profetsiie mitsamer xtutiire un siin wii se sich imer erfiile. * (Tit. 1:2) Tii khene tenke aan was tii mache khene fer helfe etliche piiplixe profetsiie sich erfiile. Tsum payxpiil: tii khene mit helfe aan te erfiilung fon Yeesus sayn profetsii, tas ti kuute notisye teete uf te kans pewoont eyert kepreeticht wëre eep tas ën khemt. (Mat. 24:14) Woo xtërker tas pheyerche sayn klaape is tas ti piiplixe profetsiie sich erfiile tuun, woo kreeser wërt tëne sayn wunx fer sayn pestes tsu Yeehoowa kepe.

11. Was khonte Prisila un Akila mache, un warom?

¹¹ Tii woo khërtslich ferhayrat sin, khene fiil lërne mit tëm payxpiil fon Prisila un Akila, een yiitix pheyerche woo in Roma keleept hot. Tii hon ti kuute notisye iwer Yeesus keheert un sin kriste kep. Kewis waare se froo mit sayn leepe. Awer tan, hot tëne sayn situatsyoon sich uf een mool kans keënert. Te Imperatoer Klautyus hot al ti yuuter fon Roma fat kexikt. Tenk aan wii tas Akila un Prisila sayn leepe keënert hot. Tii miste tas plats lose woo se keleept hate, een nay haus fine un sayn kexeft noch mool aan fange in een nay xtat. Awer hon se noo kelos sayn pestes fer Yeehoowa mache weeche sayn nay situatsyoon? Tsiimlich sicher, weest tuu xon ti antwort. Wii se in Korinto am woone waare, hon Akila un Prisila aan kefang ti kemaynt tat helfe. Tii hon aach mim aphostel Phaul kexaft fer ti priiter tat ferxtërke. Xpeeter, hon se sich kewanert fer anere xtete woo praychte mee preeticher hon. (Aph. 18:18-21; Rom. 16:3-5) Sicher hon se een fol un froo leepe kehat!

12. Warom sol een pheyerche kaystliche tsiile xtele?

¹² Wii khene ti pheyerche hayt tsu taach Prisila un Akila noo mache? Tii mise tas Raych im eyerste plats tuun. Ti pest tsayt fer tas pheyerche iwer tsiile im leepe xpreche, is eep se sich hayrate. Was tuut pasiire wën een pheyerche tsiile xtelt un xtram xaft fer tëne trefe? Tii tuun in noch mee keleechenheete siin Yeehoowa tëne helfe in sayn leepe. (Ekl. 4:9, 12) Kuk mool tas payxpiil fon Russell un Elizabeth. Russell saat: “Eep mer uns kehayrat hon, hon mer kexproch iwer was mer fer Yeehoowa mache wolte.” Elizabeth saat: “Meyer hon too triwer kexproch, wayl xpeeter miste mer fiile ëntxlise uf een mool mache. Wën mer unser tsiile taytlich im khop hëte, teete unser ëntxlise uns net um hale tëne trefe.” Russell un Elizabeth sayn situatsyoon hot tëne erlaupt sich tsu Mikroneesya wanere, un soo khonte se tiine in een plats woo mee puplikatoore praucht.

13. Tëm noo Psalm 28:7, was tuut pasiire wën mer uf Yeehoowa traue?

 ¹³ Soo wii Russell un Elizabeth, hon fiile pheyerche raus kesuucht sayn leepe keweenlich lose. Soo, khene se mee tsayt aus kepe in te preetich un inlërnung aarwayt. Wën een pheyerche tsiile xtelt fer sayn pestes fer Yeehoowa kepe un tan xaft fer tas hin kriin, tuun kuute tinge pasiire. Tii tuun siin wii Yeehoowa tëne uf phast, tuun mee aan tëm traue un wëre wërklich froo sin. (Lees Psalm 28:7.) *

14. Wii hon te aphostel Pheeter un sayn fraa ketsaycht tas se ketraut hon aan tëm ferxpreche woo in Matheus 6:25, 31-34 xteet?

¹⁴ Ti pheyerche khene aach fiil lërne mit tëm payxpiil woo te aphostel Pheeter un sayn fraa kelos hon. Tswixich 6 moonate pis 1 yoer tëm noo wii Pheeter tas eyerste mool mit Yeesus kexproch hot, must eyer een wichtich ëntxlus mache. Tee hot wii een fixer kexaft fer sayn familye fersoriche. Awer, Yeesus hot tëm in kelaat fer eene fon sayn nookeener sin un fol tsayt mit tëm plaype. Soo, mist Pheeter aan sayn familye tenke eep tiise ëntxlus mache. (Luk. 5:1-11) Pheeter hot raus kesuucht mit Yeesus keen un mit tëm preetiche. Tee hot te richtich ëntxlus kemacht! Un mer hon uersache fer se klaape tas Pheeter sayn fraa tëm pay kextan hot. Ti Piipel kept tsum ferxteen tas noo Yeesus sayn ufxtaye, is se als mool mit Pheeter in sayn reese kang. (1 Kor. 9:5) Sicher, wayl eyer een kuut fraa hat, khont Pheeter aach aanreete kepe fer ti mëner un fraae oone sich xeeme. (1 Phe. 3:1-7) Kewis, hon Pheeter un sayn fraa aan Yeehoowa sayn ferxpreche ketraut, tas wën se tas Raych im eyerste plats xtele teete, teet Eyer se fersoriche. (Lees Matheus 6:25, * 31-34. *)

15. Was lërnst tuu fon Tiago un Esther sayn speryens?

¹⁵ Wëns tuu xon phaar yoore ferhayrat pist, wii khanst tuu te wunx hale fer mee tsu Yeehoowa mache? Een aat is lërne mit te speryense fon anere pheyerche. Tsum payxpiil: tuu khanst ti leepes kexichte leese woo in Te Wachthorm foer khome. Soo sorte artikele hon Tiago un Esther keholef, een pheyerche fon Brasil, te wunx kriin fer in een plats tiine woo mee puplikatoore praycht. Tiago leet aus: “Noo tas mer kelees hon wii Yeehoowa sayn tiiner hayt helft, wolte mer aach sayn oryentiirunge noo keen un sayn hilef xpiire.” Mit te tsayt, hon se sich pis Parakway kewanert, un tat preetiche se in prasilyaanix tsayt 2014 aan. Esther saat: “Eene tekst woo mer aarich liipe is Ëfeser 3:20. Noo un noo, siin mer tiise wërter sich erfiile in unser aarwayt tsu Yeehoowa.” In tiise priif fer ti ëfeser, hot Phaul ti karantii kep tas Yeehoowa uns mee kepe tuut wii mer ferlange. Tas is wërklich woer!

16. Wën een pheyerche am noo kuke is sayn tsiile fers leepe, fer weem khene se aanreete ferlange?

¹⁶ Tii woo sich kraat kehayrat hon, khene fiil nutse kriin fon te speryense fon tëne woo kelërnt hon uf Kot traue. Etliche pheyerche  hon fiilaycht xon fiile yoore in te fol tsayt tiinst kexaft. Wën teyer ayre tsiile am noo kuke sayt, was mënt teyer fon aanreete fer tëne ferlange? Tas is een aner aat wii teyer khent tsayche tas teyer uf Yeehoowa traut. (Xpr. 22:17, 19) Ti elteste khene aach helfe tii woo sich kraat kehayrat hon tsiile xtele un trefe.

17. Was is mit Klaus un Marisa pasiirt, un was lërne mer mit tëne sayn speryens?

¹⁷ Awer im xtant, unser ëntxlus fer mee tsu Yeehoowa mache pariirt net soo richtich wii mer waarte. Tas is mit Klaus un Marisa pasiirt, iwer weem mer foner traan kexproch hon. Tii waare xon 3 yoore ferhayrat; tan, sin se pis Finlant kang fer in te paueray fon te filyaal helfe. Awer, tii hon tsum wise kriit tas tii khonte ploos 6 moonate tat plaype. Am aanfang, sin se traurich kep. Awer klaych tëm noo, sin se in kelaat kep fer een khurs fon araapix xprooch mache. Hayt tuun se mit frooheet preetiche in araapix in een aner lant. Wën Marisa tenkt aan was pasiirt is, saat se: “Ich hat pang fer was nayes fersuuche, un ich must uf Yeehoowa kans traue. Awer ich hon kesiin wii Yeehoowa uns keholef hot in unkewaartne aate. Was mer mit kemacht hon, hot mayn klaape aan Yeehoowa xtërker kelos.” Wii tiise payxpiil tsaycht, tuu khanst tich sicher sin: Yeehoowa tuut tich imer peloone wëns tuu kans uf tëm traust.

18. Was khene ti pheyerche mache fer wayter uf Yeehoowa traue?

¹⁸ Ti hayrat is een kexenk fon Yeehoowa. (Mat. 19:5, 6) Tee wil hon tas ti ferhayrate froo mit tiise kexenk sin. (Xpr. 5:18) Teyer woo aych kraat kehayrat hot, tenkt aan was teyer mit ayre leepe am mache sayt. Yeehoowa hot aych fiile kexenke kep; sayt teyer ayre pestes am mache fer petanklichkheet tsu tëm tsayche? Xprecht mit Yeehoowa im kepeet. Suucht oryentiirunge in te Piipel woo aan ayre situatsyoon phase. Un tan wënt aan was teyer fint. Sicher, wërt ayre leepe froo un fol kuute tinge wën teyer aych traan halt aan Yeehoowa tiine!