1. Was fer frooch fiilaycht mache mer uns?

WËNS tuu tenkst aan was klaych in te futuer pasiirt — ti fernichtung fon te falx relichyoon, te atak fon Kok fon Makok un te Armaxetom — wërst tuu ëngstlich too triwer? Tuust tuu tich als mool frooe: ‘Meecht ich es hin kriin troy plaype wën tas ales pasiirt?’ Wëns tuu tich xon tas kefroot host, noo kuke ti wërter fom haupste tekst fon tiise artikel tuut tich helfe. Yeesus hot fer sayn tisipele kesaat: “Lost ayer hërts net unruych kepe. Klaapt.” (Yoo. 14:1) Een xtarke klaape helft uns koraajich sin, ekaal was in te futuer pasiirt.

2. Wii khene mer unser klaape ferxtërke un was lërne mer in tiise artikel?

² Wii khene mer unser klaape ferxtërke fer ti proope woo in te tsukhunft pasiire? Een aat is siin wii mer mit te proope xon hayt um keen. Soo khene mer raus fine woo mise mer unser klaape ferxtërke. Yeetes mool woo mer een proop aus hale, wërt unser klaape xtërker. Un tas helft uns ti proope woo noch khome aus hale. In tiise artikel, tuun mer iwer 4 situatsyoone xpreche woo Yeesus sayn tisipele mit kemacht hon un woo ketsaycht hon tas se miste mee klaape hon. Noo heyer, siin mer wii mer khene mit eenliche situatsyoone hayt tsu taach um keen un wii tuun se uns foer perayte fer was in te tsukhunft pasiirt.

3. Was helfe Yeesus sayn wërter in Matheus 6:30, 33 uns se ferxteen?

³ Es is normaal tas een man wil ese, tsaych un woonung fer sayn fraa un khiner fersoriche. Awer tas is net imer laycht se mache in tiise xweyere tsayte. Etliche fon unser priiter un xwestere hon sayn aarwayt ferloer; un opwool se sich fiil miie, kriin se es net hin een aner aarwayt fine. Anere mise aarwayte ap xtose woo net richtich fer ti kriste sin. Wën soo was pasiirt, mise mer een xtark klaape hon tas Yeehoowa een aat fint fer unser familye fersoriche mit was mer prayche. Yeesus hot tas taytlich  fer sayn tisipele kelos in te Përich Reet. (Lees Matheus 6:30, * 33. *) Wën mer uns sicher sin tas Kot uns net im xtich lost, khene mer uns traan hale aan tas haupste: Yeehoowa tiine. Wën mer siin Kot uns helfe ti materyaalixe tinge fersoriche, khome mer tichter pay tëm un unser klaape wërt xtërker.

4-5. Was hot een familye keholef wën se ëngstlich waare weeche sayn materyaalixe neetichkheete?

⁴ Kuk mool wii Yeehoowa een familye fon Wenetsuëla keholef hot wii se ëngstlich waare iwer sayn materyaalixe neetichkheete. Ti familye Castro hot een xtik lant kehat, un too teweeche khonte se kenuuch kelt fer sich fersoriche kriin. Awer tan, sin etliche mëner mit wafe khom un hon tas lant fer sich kehool. Tii hon aach ti familye ketswung tat fat keen. Te fater, Miguel, saat: “Yets, woone mer uf een kleen xtik lant woo se uns keporicht hon. Fer uns fersoriche, planse mer too truf. Tas eyerste tings woo ich im taach mache is tsu Yeehoowa peete. Ich ferlange tëm tas eyer uns fersoricht mit was mer fer te taach prayche.” Tas leepe is net laycht fer tiise familye; awer tii klaape tas Kot tuut tëne sayn neetichkheete fer yeete taach uf phase. Tes weeche, tuun se imer in te fersamlunge keen un in te preetich aarwayt xafe. Yeehoowa tiine is tas haupste in tëne sayn leepe un tee fersoricht ales was se prayche.

⁵ Torich tiise xweyer tsayt, tuun Miguel un sayn fraa, Yurai, sich traan hale aan wii Kot tëne uf phast. Als mool, penutst Yeehoowa ti priiter fer tëne fersoriche was se prayche orer fer Miguel helfe aarwayte fine fer se mache. In anere momënte, penutst Yeehoowa ti filyaal fer tëne tas neetiches fer se leepe kepe. Yeehoowa hot se nii im xtich kelos. Tes weeche, is te familye sayn klaape yeete taach xtërker. Yoselin, ti elste tochter, hot fertseelt iwer een ekstra hilef woo Yeehoowa tëne kexenkt hat; too, hot se kesaat: “Es is ufmuutich se siin wii Yeehoowa uns keholef hot. Tee is mayn froynt un ich sin mich sicher tas eyer mich imer helfe tuut.” Tii saat aach: “Ti propleeme woo unser familye aus halt, tuun uns foer perayte fer ti xwiirichkheete woo noch khome.”

6. Wii khanst tuu tayn klaape ferxtërke wëns xweyer fer tich is tich fersoriche?

⁶ Machst tuu aach propleeme mit fer tich fersoriche? Wën yaa, tas is sicher een xweyer tsayt fer tich. Awer noch soo, khanst tuu tiise tsayt penutse fer tayn klaape ferxtërke. Peet tsu Yeehoowa, lees Yeesus sayn wërter in Matheus 6:25-34 un tenk too triwer noo. Tenk aan payxpiile fon unser taache woo pewayse tas Kot uf phast tii woo fiil se tuun hon in tëm sayn aarwayt. (1 Kor. 15:58) Wëns tuu siist tas Kot anere keholef hot tas neetiches fersoriche, wërt tayn klaape ferxtërkt tas eyer tich aach uf phase tuut. Tee wees was tuu prauchst un wii tas  fersoriche. Un wëns tuu in tayn leepe Yeehoowa sayn hilef xpiirst, wërt tayn klaape xtërker. Tes weeche, kriist tuu es hin noch xlimer kefoore in te futuer aus hale. (Hap. 3:17, 18)

7. Tëm noo Matheus 8:23-26, wii hot een “xroo xtorm” ti tisipele sayn klaape keproopt?

⁷ Wii Yeesus un sayn tisipele in een xif am reese waare, hot een xtorm aan kefang. Yeesus hot tiise situatsyoon penutst fer ti tisipele helfe ferxteen tas se miste sayn klaape ferxtërke. (Lees Matheus 8:23-26.) * Te xtorm waar soo xtark tas ti weele fom meer hon tas xif fol waser kelos. Awer Yeesus waar in ruu am xloofe. Fol pang, hon ti tisipele tëm uf kewacht un tëm ferlangt fer tëne rete. Yeesus hot tëne mit kuutheet kefroot: “Mëner mit weenich klaape, warom hot teyer soo fiil pang?” Ti tisipele miste kemërkt hon tas es laycht fer Yeehoowa weyer Yeesus un tii woo mit tëm waare xitse. Was is ti lisyoon fer uns? Een xtarke klaape khan uns helfe xrooe xtorme orer yeete propleem woo soo wii een xtorm aus siit, aus hale.

8-9. Wii waar Anel sayn klaape keproopt un was hot se keholef?

⁸ Kuk mool was pasiirt is mit Anel, een letich xwester fon Porto Riko. Tëne sayn klaape is xtërker kep weeche een xlim proop — een xrooe xtorm. Tas ales hot aan kefang in 2017 wii te triles xtorm Maria Anel sayn haus fernicht hot. Un weeche te xtorm, hot Anel aach sayn aarwayt ferloer. Tii saat: “Ich hon mich ëngstlich kefun torich tiise xweyere taache. Awer ich hon kelërnt uf Yeehoowa traue torich tas kepeet; un ich hon aach kelërnt net ti ëngstlichkheete mich um hale lose se mache was ich mache mus.”

⁹ Awer noch een tings hot Anel keholef torich tiise proope triwer wech khome: ti folichkheet. Tii saat: “Ti oryentiirunge fon te Orkanisatsyoon noo keen, hot mich keholef in ruu plaype. Yeehoowa hot mich keholef torich ti priiter un xwestere. Tii hon mich uf kemuut un aach ti neetiche tinge kep.” Tii saat noch: “Yeehoowa hot mich fiil mee kep wii ich ferlange khent un mayn klaape is fiil xtërker kep.”

10. Was khanst tuu mache wëns tuu een “xroo xtorm” mit machst?

¹⁰ Pist tuu een “xroo xtorm” in tayn leepe am mit mache? Fiilaycht pist tuu am layte weeche een natuer unklik. Orer im xtant host tuu een xroo krankheet woo tich oone muut lost un tuu weest net was se mache. Tas khan tich als mool ëngstlich lose; awer los net ti ëngstlichkheete tich um hale uf Yeehoowa traue. Mach hërtsliche kepeete tsu tëm. Tenk traan aan wii Yeehoowa tich xon friier keholef hot; tas tuut tayn klaape ferxtërke. (Psal. 77:11, 12) Un say tich sicher: Yeehoowa lost tich nii net im xtich.

11. Warom sole mer pextimt sin se foliche ti inkexteltne mëner in Kot sayn Orkanisatsyoon?

 ¹¹ Was noch khan tich helfe ti proope aus hale? Ti folichkheet, soo wii Anel kesaat hot. Lërn se traue uf tëne woo Yeehoowa un Yeesus traue. Manich mool, khene tiise inkexteltne mëner uns oryentiirunge kepe woo xpasich aus siin. Awer Kot seechent ti folichkheet. Torich ti Piipel un ti speryense fon troye tiiner, wise mer tas ti folichkheet tuut leepe rete. (Eeks. 14:1-4; 2 Kro. 20:17) Tenk aan tiise payxpiile traan. Tas mache, tuut tayn wunx ferxtërke fer ti oryentiirunge fon Kot sayn Orkanisatsyoon noo keen — yets un in te futuer. (Hep. 13:17) Tan, wën te kreeste xtorm woo pasiire tuut khomt — ti kroos tripulatsyoon —, tuust tuu net pang xpiire. (Xpr. 3:25)

12. Wii helft uns tas kexicht in Lukas 18:1-8 ti ferpiinung siin tswixich klaape hon un unkerechtichkheet aus hale?

¹² Yeesus wust tas ti unkerechtichkheet teet te klaape fon sayn tisipele proope. Fer tëne helfe tas aus hale, hot eyer een kexicht fertseelt woo im puuch Lukas xteet. Tas kexicht is iwer een witfraa woo hot noo un noo fer een unkerecht richter ferlangt: “Tuu mich mit kerechtichkheet pehantele in tiise xtrayt keeche mayn faynt.” Tii waar sich sicher kewees tas wën se noo un noo fer te richter ferlange teet, teet eyer se heere. Mit te tsayt, is kraat tas pasiirt. Sicher, is Yeehoowa net unkerecht soo wii te richter. Tes weeche, hot Yeesus kesaat: “Tan, meecht Kot net mache tas sayn rauskesuuchtne, woo tsu Tëm taach un nacht aan hale, kerechtichkheet kriin?” (Lees Lukas 18:1-8.) * Yeesus hot aach kesaat: “Wën te Mënxe Soon khomt, meecht eyer soo een sort klaape uf te eyert fine?” Was is ti lisyoon fer uns? Wën mer een unkerechtichkheet mit mache, mise mer een xtark klaape hon, soo wii ti witfraa sayns. Wën mer ketultich sin un aus hale, pewayse mer tas mer tiise sort klaape hon. Un mit soo een sort klaape, sin mer uns aach sicher tas, friier orer xpeeter, tuut Kot uns helfe. Meyer mise aach klaape tas tas kepeet fiil kraft hot. Manich mool, khome ti antworte fer unser kepeete in aate woo mer kaar net kewaart hon.

13. Wii hot tas kepeet een familye keholef woo unkerecht pehantelt waar?

¹³ Kuk mool ti speryens fon Vero, een xwester woo in Konko Temokraatix Repuuplik leept.  Een krup soltaate hot ti pikaat woo sayn familye kewoont hot atakiirt. Tes weeche, miste tii, sayn meetche woo 15 yoore alt waar, un sayn man woo net Yeehoowa sayn Tsayer is, aus rayse. Im weech, hon ti soltaate tëne um kehal un hon kesaat tas se teete ti familye um pringe. Vero hot aan kefang se prile. Awer sayn meetche hot fersuucht tëne in ruu lose. Tii hot in hart xtim kepeet un Yeehoowa sayn naame noo un noo penutst. Wën se fërtich mit sayn kepeet waar, hot te xëf fon te soltaate kefroot: “Meetche, weer hot tich in kelërnt se peete?” “Mayn mama — hot se keantwort. — Tii hot tas payxpiil fon Matheus 6:9-13 penutst.” Too, hot te xëf fon te soltaate kesaat: “Meetche, kee mit tayn eltere in friit un tas Yeehoowa tayn Kot tayn familye xitst!”

14. Was khan unser klaape proope un was helft uns aus hale?

¹⁴ Meyer sole uns nii mool ferkese wii fiil weyert ti kepeete hon, un soo sorte speryense helfe uns tas mache. Awer, wën tayn kepeete net klaych orer in een wunerlich aat keantwort sin, tas khan tayn klaape proope. Wën tas tayn situatsyoon is, was tuut tich helfe aus hale? Soo wii ti witfraa fon Yeesus sayn kexicht, los net noo se peete. Trau tas unser Kot tich net im xtich lost un tas eyer tayn kepeete in te richtich xtun un in te richtich aat antworte tuut. Tuu wayter aan hale fer Kot sayn hayliche kayst kriin. (Fili. 4:13) Tenk imer traan: klaych tuut Yeehoowa tich soo fiil seechne tas tuu ferkese tuust was tuu kelit hast. Wëns tuu ti proope aus halst mit Kot sayn hilef, wërst tuu xtërker fer ti proope woo in te futuer khome. (1 Phe. 1:6, 7)

15. Tëm noo Matheus 17:19, 20, was fer kefoer hon Yeesus sayn tisipele mit kemacht?

¹⁵ Yeesus hot sayn tisipele in kelërnt tas te klaape teet tëne helfe torich ti kefoore triwer wech khome. (Lees Matheus 17:19, 20.) * Een mool, khonte se net een temoon raus xike, opwool se tas xon anere mools kemacht hate. Was fer waar te propleem kewees? Yeesus hot aus keleet tas tii miste mee klaape hon. Tee hot kesaat tas wën se kenuuch klaape hëte, kreechte se es hin een përich fom plats ënere — es wil saan: torich kefoore triwer wech khome woo soo kroos wii een përich sin. Hayt, khene mer aach propleeme hon woo soo kroos sin, tas es unmeechlich aus siit torich tëne triwer wech khome.

16. Wii hot te klaape Geydi keholef aus hale noo tas sayn man um keprung kep is?

¹⁶ Kuk mool tas payxpiil fon Geydi, een xwester fon Kwatemaala. Wii se hëm tsus am keen waare noo een fersamlung, is sayn man, Edi, um keprung kep. Opwool se aarich traurich waar, wii hot te klaape Geydi keholef aus hale? Tii saat: “Tas kepeet helft mich mayn last uf  Yeehoowa xmayse un tas kept mich friit. Ich siin wii Yeehoowa mich uf phast torich mayn familye un mayn froynte in te kemaynt. Was mich helft mayn phayn ferxweeche, mich net tsu fiil ketanke mache mit was moye pasiirt un aus hale, is imer fiil se tuun hon in Yeehoowa sayn aarwayt. Ich hon was kelërnt mit tiise xwiirichkheete: ekaal was in te futuer pasiirt, khan ich tas phake mit te hilef fon Yeehoowa, Yeesus un ti Orkanisatsyoon.”

17. Was khene mer mache wën mer een kroos propleem mit mache, woo soo wii een përich aus siit?

¹⁷ Pist tuu am layte weeche te toot fon yemant woos tuu liipst? Hool een tsayt fer tayn klaape in tëm ufxtaye fom toot ferxtërke. Fer tas, khanst tuu ti piiplixe kexichte leese fon tëne woo uf keruuft kep sin. Pist tuu traurich wayl yemant fon tayn familye tesasosiirt kep is? Tan, mach een xtuutyum too triwer un peways fer tich selepst tas Yeehoowa sayn tisipliin imer ti pest is. Een tuun te propleem woos tuu mit machst, penuts tas wii een keleechenheet fer tayn klaape ferxtërke. Mach aach tayn hërts fer Yeehoowa uf. Xtats aleen plaype, playp ticht pay tayn priiter un xwestere. (Xpr. 18:1) Un soo kaar mit treene in tayn aue, fersuuch tinge mache woo tich helfe aus hale. (Psal. 126:5, 6) Tuu wayter in te fersamlunge keen, preetiche, un ti Piipel leese. Un hal tayn aue wayter traan aan te wunerliche seechen woo Kot fer ti futuer ferxproch hot. Wëns tuu siist wii Yeehoowa tich helft, wërt tayn klaape noch xtërker.

18. Wëns tuu mërkst tas tayn klaape net xtark kenuuch is, was khanst tuu mache?

¹⁸ Wën ti proope woos tuu friier orer hayt mit machst tich tsayche tas tayn klaape net xtark kenuuch is, playp net oone muut. Sii tas wii een keleechenheet fer tayn klaape ferxtërke. Ferlang tas selwiche woo Yeesus sayn tisipele ferlangt hon: “Kep uns mee klaape.” (Luk. 17:5) Un tenk aach aan te payxpiile woo mer in tiise artikel kexproch hon. Soo wii Miguel un Yurai, tenk aan te tsayte traan woo Kot tich keholef hot. Soo wii Vero sayn meetche un Anel, mach hërtsliche kepeete tsu Yeehoowa, hauptseechlich wëns tuu xrooe propleeme mit machst. Un soo wii Geydi, erkhën tas Kot khan tich ti neetich hilef kepe torich tayn familye un froynte. Wëns tuu lost Yeehoowa tich helfe mit te proope woos tuu hayt mit machst um keen, wërst tuu noch sicher tas eyer tich helft mit te proope woo in te futuer khome.

19. Fon was waar Yeesus sich sicher un was fer sicherheet khanst tuu hon?

¹⁹ Es is woer tas Yeesus hot sayn tisipele keholef se siin woo miste se mee klaape hon. Awer tee waar sich sicher kewees tas tii khonte, mit Yeehoowa sayn hilef, ti proope woo noch khemte troy aus hale. (Yoo. 14:1; 16:33) Un tee waar sich aach sicher tas een kroos folek teet ti kroos tripulatsyoon iwerleepe weeche sayn xtarke klaape. (Apo. 7:9, 14) Wërst tuu too tepay sin? Wëns tuu yets tayn pestes machst fer tayn klaape ferxtërke un mit Yeehoowa sayn hilef, tuut ti antwort ‘yaa’ sin! (Hep. 10:39)