1. Wii wise mer tas Yeehoowa wil ticht pay uns sin?

 YEEHOOWA laat uns in tichter pay tëm khome. (Tya. 4:8) Tee wil unser Kot, unser Fater un unser Fraaynt sin. Tee tuut unser kepeete antworte un helft uns torich ti xweyere tsayte. Un tee penutst sayn Orkanisatsyoon fer uns in lërne un xitse. Awer was mise meyer mache fer ticht pay Yeehoowa khome?

2. Wii khene mer uns tichter pay Yeehoowa xafe?

² Meyer khene tichter pay unser Fater khome wën mer tsu tëm peete, tëm sayn Wort leese un too triwer noo tenke. Wën mer tas mache, kepe mer fol liip un petanklichkheet tsu tëm. Tas tuut uns uf muute tëm loope un aan heere, soo wii eyer es fertiint. (Apo. 4:11) Woo peser mer Yeehoowa khëne lërne, woo kreeser wërt unser fertraung uf tëm un uf te Orkanisatsyoon woo eyer fersoricht hot fer uns helfe.

3. Wii fersuucht Satanaas uns fon Yeehoowa aus naner mache, awer was tuut uns helfe nii unser Kot un sayn Orkanisatsyoon im xtich lose? (Psalm 31:13, 14)

³ Satanaas fersuucht uns fon Yeehoowa aus naner mache, hauptseechlich wën mer xwiirichkheete am mit mache sin. Wii macht eyer tas? Tee fersuucht se mache tas mer lamsam noo lose uf Yeehoowa un sayn Orkanisatsyoon traue. Awer meyer khene uns keeche tëm sayn atake xitse. Wën mer een xtark klaape hon un fest uf Yeehoowa traue, tuun mer net unser Kot un sayn Orkanisatsyoon im xtich lose. (Lees Psalm 31:13, 14.) b

4. Iwer was tuun mer in tiise artikel xpreche?

⁴ In tiise artikel, tuun mer iwer 3 kefoore xpreche woo khene fon aus te kemaynt khome; yeete eene fon tëne khan unser fertraung uf Yeehoowa un sayn Orkanisatsyoon ferxweeche.  Wii khente tiise kefoore uns fon Yeehoowa aus naner mache? Un was khene mer mache fer uns keeche Satanaas sayn atake xitse?

5. Wii khene ti propleeme unser fertraung uf Yeehoowa un sayn Orkanisatsyoon ferxweeche?

⁵ Als mool tuun mer propleeme mit mache. Tsum payxpiil: unser familye khan sich keeche uns xtele orer meyer khene unser aarwayt ferliire. Wii khente soo sorte propleeme unser fertraung uf Yeehoowa sayn Orkanisatsyoon ferxweeche un uns fon Yeehoowa aus naner mache? Wën mer propleeme torich een lang tsayt mit mache, fiilaycht xpiire mer uns tiifsinich un oone hofnung. Satanaas penutst tiise oportuniteete fer uns tenke mache tas Yeehoowa uns net liipt. Satanaas wil hon tas mer tenke tas Yeehoowa orer sayn Orkanisatsyoon ti xult fer unser propleeme hon. Was eenliches is mit etliche israeliiter in Ejipt pasiirt. Am aanfang, hon se keklaapt tas Mooses un Aran fon Kot kexikt waare fer tëne fon te sklaaweray pefraye. (Eeks. 4:29-31) Awer xpeeter, wii Faraoo tëne sayn leepe xweyerer kelos hot, hon se ti xult fer Mooses un Aran kep. Tii hon tëne kesaat: “Weeche aych, tuun Faraoo un sayn tiiner uns hase; un teyer hot een xwaart in tëne sayn hant ketuun, fer uns um pringe.” (Eeks. 5:19-21) Es is xaat, awer tii hon ti xult fon sayn propleeme fer Kot sayn troye tiiner kep. Wëns tuu xon een propleem fer een lang tsayt mit machst, wii khanst tuu tayn fertraung uf Yeehoowa un sayn Orkanisatsyoon xtark hale?

6. Was lërnst tuu mim profeet Hapakuk iwer wii mit te propleeme um keen? (Hapakuk 3:17-19)

⁶ Mach tayn hërts tsu Yeehoowa uf im kepeet un suuch tëm fer hilef kriin. Te profeet Hapakuk hot fiile propleeme mit kemacht. Siits aus tas een mool, hot eyer tswayfele kehat ep Yeehoowa sich mit tëm kekhimert hot. Tes weeche hot eyer sayn hërts tsu Yeehoowa im kepeet uf kemacht. Tee hot kesaat: “Pis wan, oo Yeehoowa, mus ich noo hilef aan hale, un tuu heerst mich net aan? (...) Un warom erlaupst tuu tas es unertrikung kept?” (Hap. 1:2, 3) Yeehoowa hot tas hërtslich kepeet fon sayn troye tiiner keantwort. (Hap. 2:2, 3) Noo tas Hapakuk triwer noo ketenkt hot aan wii Yeehoowa sayn folek keret hat, is eyer noch mool froo kep. Tee is sich sicher kep tas Yeehoowa sich mit tëm kekhimert hot un tas eyer tëm helfe teet kwalkee proop aus hale. (Lees Hapakuk 3:17-19.) c Was is ti lisyoon fer uns? Wëns tuu propleeme mit machst, peet tsu Yeehoowa un saa tëm wiis tuu tich xpiirst. Tan suuch tëm fer hilef kriin. Wëns tuu tas machst, khanst tuu tich sicher sin tas Yeehoowa tich ti neetich kraft kept fer aus hale. Un wëns tuu tëm sayn unerxtitsung xpiirst, wërt tayn klaape aan tëm xtërker.

7. Wii hon Shirley sayn parente fersuucht tëne sayn fertraung uf Yeehoowa ferxweeche, un was hot se keholef wayter uf Yeehoowa klaape?

⁷ Hal tayn kaystlich rutiin. Tas is was Shirley, een xwester fon Papuua Nay Kinë, keholef hot wii se xwiirichkheete mit kemacht hot. d Shirley sayn familye waar aarm un als mool waar es xweyer fer tëne kenuuch ese hon. Een parent hot fersuucht tëne sayn fertraung aan Yeehoowa ferxweeche. Tee hot kesaat: “Tuu saast tas te hayliche kayst tich am helfe is, awer woo is ti hilef? Tayn familye is noch  aarm. Preetiche keen is tsayt ferliire.” Shirley erkhënt: “Ich hon mich kefroot: ‘Meecht Kot sich mit uns wërklich khimere orer net?’ Soo hon ich klaych tsu Yeehoowa kepeet un kesaat ales was in mayn hërts waar. Ich hon net noo kelos ti Piipel un unser puplikatsyoone leese un ich sin wayter tsu te preetich un ti fersamlunge kang.” Klaych hot Shirley aan kefang se mërke tas Yeehoowa sayn familye am helfe waar. Tii hon khee hunger mit kemacht un waare froo kewees. Tii saat: “Ich hon kexpiirt tas Yeehoowa mayn kepeete keantwort hot.” (1 Tim. 6:6-8) Soo wii Shirley, wëns tuu tayn kaystlich rutiin halst, tuust tuu net erlaupe tas ti propleeme orer tswayfele tich fon Yeehoowa aus naner mache.

8. Was khan pasiire mit priiter woo flichte in Yeehoowa sayn Orkanisatsyoon hon?

⁸ Torich ti mitya un sotsyaale weepe, tuun unser faynte liie un hinerlistiche informatsyoone aus prayte iwer priiter woo flichte in Yeehoowa sayn Orkanisatsyoon hon. (Psal. 31:13) Etliche priiter sin wii kriminoose akusiirt kep un sin in kexpërt kep. Ti kriste im eyerste yoer hunert hon was eenliches mit keleept wii te aphostel Phaul falx akusiirt un in kexpërt kep is. Was hon se tan kemacht?

9. Wii hon etliche kriste sich aan kextelt wii te aphostel Phaul in kexpërt kep is?

⁹ Etliche kriste hon noo kelos te aphostel Phaul helfe wii eyer in Roma inkexpërt waar. (2 Tim. 1:8, 15) Warom? Hon se sich fon Phaul ferxeemt wayl ti layt tëm wii een kriminoos kesiin hon? (2 Tim. 2:8, 9) Orer hate se pang tas se aach keyacht weyere? Ekaal ti uersach, xtel tich mool foer wii meecht Phaul sich kexpiirt hon. Weeche tëne, hot eyer fiile propleeme mit kemacht un hot soo kaar sayn leepe ins kefoer kextelt. (Aph. 20:18-21; 2 Kor. 1:8) Awer yets, kraat in te xtun woo Phaul se te meyerst praycht, hon se tëm im xtich kelos. Meyer wole nii soo wii tii sin! Was sole mer uns erinere wën ti priiter woo flichte hon, keyacht sin?

10. Was sole mer uns erinere wën ti priiter woo flichte hon, keyacht sin?

 ¹⁰ Eriner tich warom mer keyacht sin un weer too hiner traan is. Tsweete Timoteus 3:12 saat: “Al woo een leepe fon aanpeetung tsu Kot nëme wole, in eenichkheet mit Yeesus Kristus, tuun aach keyacht wëre.” Tes weeche sole mer uns net ferwunere wën Satanaas tuut hauptseechlich ti priiter atakiire woo flichte in te Orkanisatsyoon hon. Tëm sayn haupste opjetiiw is tas tiise priiter noo lose troy tsu Yeehoowa plaype un tas meyer pang kriin. (1 Phe. 5:8)

11. Was lërne mer mit Onesiiforo sayn payxpiil? (2^te Timoteus 1:16-18)

¹¹ Tuu ti priiter wayter helfe un los se nii im xtich. (Lees 2^te Timoteus 1:16-18.) e Een krist woo Onesiiforo keheest hot, hot sich anerste aan kextelt wii Phaul in kexpërt kep is. Tee “hot sich net kexeemt wayl [Phaul] inkexpërt waar”. Kraat anerste, Onesiiforo hot Phaul kesuucht; un wii eyer tëm kefun hot, hot eyer sich aan kextrengt fer Phaul praktix hilef kepe. Onesiiforo hot soo kaar sayn leepe ins kefoer kextelt fer tas mache. Was is ti lisyoon fer uns? Meyer sole net lose te pang fom mënx uns um hale unser priiter woo keyacht sin, uner xtitse. Xtats tas, wole mer tëne xitse un unser pestes mache fer tëne helfe. (Xpr. 17:17) Tii prayche unser liip un unerxtitsung kriin.

12. Was lërne mer mit unser priiter un xwestere in Ruslant?

¹² Kuk mool wii unser pruuterxaft in Ruslant tuut sayn liipe priiter helfe woo inkexpërt sin. Wën een pruuter mus foer tas kericht keen, fiile priiter un xwestere khome fer tëm uner xtitse. Was is ti lisyoon fer uns? Tuu khee pang kriin wën ti layt liie iwer ti priiter woo flichte hon, tëne yachte orer tëne in xpërte. Peet fer tiise priiter, phas tëne sayn familye uf un suuch praktixe aate fer tëne hilef kepe. (Aph. 12:5; 2 Kor. 1:10, 11)

13. Wii khan ti xpoteray unser fertraung uf Yeehoowa un sayn Orkanisatsyoon ferxweeche?

¹³ Parente, aarwayts orer xuul koleke, khene uns xpote wayl mer preetiche orer wayl mer Yeehoowa sayn kesetse aan heere. (1 Phe. 4:4) Im xtant saan se: “Ich hon tich kërn… awer tayn relichyoon is tsu xtreng un phast net mee hayt.” Anere fiilaycht kritikiire uns weeche ti aat wii mer um keen mit tëne woo tesasosiirt sin; tii khene saan: “Wii khanst tuu saan tas tuu een liiplich persoon pist?” Soo sorte wërter khene tswayfele in unser khop planse. Meyer khene aan fange uns frooe: ‘Meecht Yeehoowa net tsu fiil fon mich ferlange? Meecht sayn Orkanisatsyoon net tsu xtreng sin?’ Wëns tuu soo een sort situatsyoon mit machst, wii khanst tuu ticht pay Yeehoowa un sayn Orkanisatsyoon plaype?

14. Wii sole mer uns aan xtele wën ti layt uns xpote wayl mer Yeehoowa sayn kesetse noo keen? (Psalm 119:50-52)

¹⁴ Say pextimt wayter mache was Yeehoowa saat richtich is. Yoop hot tas kemacht, opwool ti layt tëm too teweeche ferxpot hon. Eene fon Yoop sayn falxe fraaynte hot soo kaar fersuucht Yoop klaape mache tas, fer Kot, waar es een tuun ep eyer tas richtiches kemacht hot. (Yoop 4:17, 18; 22:3) Awer Yoop hot net keklaapt aan soo sorte liie. Tee wust tas was Yeehoowa saat richtich un ferkheert  is, waar kerecht kewees un tee waar pextimt tas aan heere. Tee hot net noo kelos troy tsu Yeehoowa plaype, ploos weeche was ti anere kesaat hon. (Yoop 27:5, 6) Was is ti lisyoon fer uns? Es is laycht iwer Yeehoowa sayn kesetse tswayfele wën mer xpoteray mit mache, awer los tas net pasiire! Tenk mool noo iwer tayn aychne leepe. Tsiimlich sicher host tuu xon fiil mools kemërkt tas tayn leepe peser is wayls tuu machst was Yeehoowa saat richtich is. Say pextimt imer teel sin fon te Orkanisatsyoon woo Yeehoowa sayn kesetse pay xteet. Soo, ekaal wii fiil ti layt uns xpote, kriin se uns nii fon Yeehoowa aus naner kemacht! (Lees Psalm 119:50-52.) f

15. Warom hot Brizit xpoteray mit kemacht?

¹⁵ Kuk mool ti speryens fon Brizit, een xwester in Intya. Sayn familye hot se ferxpot weeche sayn klaape. Klaych noo sayn taaf, in 1997, hot sayn man, woo net Yeehoowa sayn Tsayer waar, sayn aarwayt ferloer. Soo hot eyer ëntxlist tas eyer, Brizit un sayn meetche solte mit tëm sayn eltere woone, woo in een aner xtat keleept hon. Awer Brizit teet noch xlimer proope mit mache. Wayl sayn man khee aarwayt hat, must se te kanse taach xafe fer sayn familye fersoriche. Un noch: ti tichste kemaynt waar unkefeer 350 km wech. Es is traurich, awer ti familye fon sayn man hot sich keeche tii kextelt weeche sayn klaape. Ti situatsyoon is soo xlim kep tas Brizit sayn familye must sich noch mool wanere. Tan is was unkewaartnes pasiirt: sayn man is kextorep. Xpeeter, eene fon sayn meetche, woo ploos 12 yoore alt waar, is weeche kreeps kextorep. Fer tas noch xlimer lose, Brizit sayn parente hon tëne ti xult too teweeche kep. Tii hon kesaat tas wën Brizit net Yeehoowa sayn Tsayer weyer, weyere al tiise unklike net pasiirt. Noch soo, hot se wayter uf Yeehoowa ketraut un is ticht pay sayn Orkanisatsyoon keplip.

16. Wii waar Brizit keseechent wayl se ticht pay Yeehoowa un sayn Orkanisatsyoon keplip is?

¹⁶ Wayl Brizit soo wayt wech fon te  kemaynt kewoont hot, hot te sirkuyt superintentent se uf kemuut se preetiche fer ti layt fom plats un ti fersamlunge in sayn haus fiire. Am aanfang hot se ketenkt tas es tsu xweyer weyer. Awer tii hot te aanreet kefolicht. Tii hot fer ti anere kepreeticht, ti fersamlunge in sayn haus kefiirt un tsayt kehool fer ti familye aanpeetung mit sayn meetche mache. Was fer waar te resultaat? Brizit hot fiile Piipel xtuutye aan kefang un kefiirt un fiile fon tëne hon sich taafe kelos. In 2005, hot se aan kefang wii rekulaar pyoneerin tiine. Sayn fertraung uf Yeehoowa un sayn leaaliteet tsu sayn Orkanisatsyoon hon sich peloont. Sayn meetche sin Yeehoowa troy am tiine, un yets kept es 2 kemaynte im plats woo se kewoont hon! Brizit is sich sicher tas Yeehoowa hot tëne ti kraft kep fer mit te propleeme um keen un ti xpoteray fon te familye aus hale.

17. Was sole mer pextimt sin se mache?

¹⁷ Satanaas wil hon tas mer klaape tas Yeehoowa tuut uns im xtich lose wën mer propleeme mit mache un tas in Yeehoowa sayn Orkanisatsyoon plaype, tuut ploos unser leepe xweyerer lose. Satanaas wil aach hon tas mer pang kriin wën ti layt liie saan keeche ti priiter woo flichte in te Orkanisatsyoon hon, orer tëne yachte un in xpërte. Un torich ti xpoteray, wil eyer unser fertraung uf Yeehoowa sayn kesetse un sayn Orkanisatsyoon ferxweeche. Awer meyer khëne tëm sayn xlechte pleen un meyer sin net hiner kang. (2 Kor. 2:11) Say pextimt Satanaas sayn liie ap xtose un leaal tsu Yeehoowa un sayn Orkanisatsyoon plaype. Eriner tich: Yeehoowa tuut tich nii im xtich lose. (Psal. 28:7) Tes weeche los niks tich fon tëm aus naner mache! (Rom. 8:35-39)

18. Was tuun mer im neekste artikel siin?

¹⁸ In tiise artikel, hon mer kexproch iwer kefoore fon aus te kemaynt woo mer mit mache khene. Awer unser fertraung uf Yeehoowa un sayn Orkanisatsyoon khan aach keproopt wëre fon kefoore woo in te kemaynt foer khome. Wii khene mer es hin kriin mit soo sorte kefoore um keen? Tas is was mer im neekste artikel siin tuun.