1-2. (a) Was fer frooche tuun mer in tiise artikel antworte? (b) Was tsaycht tas Yeehoowa een xtarke wunx hot fer uns helfe?

 YEEHOOWA khan uns helfe unser propleeme aus hale un frooheet in tëm sayn aarwayt fine. Wii tuut eyer uns helfe? Un wii khene mer ti kreeste nutse too tefun kriin? Meyer tuun tiise frooche in too te artikel antworte. Awer eep mer too triwer xpreche, wole mer eyerst een aner frooch antworte: meecht Yeehoowa uns wërklich helfe wole?

² In sayn priif fer ti hepreeyer, hot te aphostel Phaul een wort penutst woo uns helft ti antwort fine. Tee hot kexrip: “Yeehoowa is mayn helfer; ich tuun khee pang hon. Was khan te mënx mich mache?” (Hep. 13:6) Piicher woo ti piiplixe wërter aus leye saan tas, hiir, tas wort “helfer” petayt een persoon woo xpringt fer se helfe yemant woo noo hilef aan halt. Xtel tich mool foer Yeehoowa am xpringe fer se helfe yemant woo am layte is. Kewis, tiise ausleyung tuut taytlich tsayche tas Yeehoowa een xtark wunx hot fer uns helfe. Un, mit Yeehoowa pay uns, khene mer unser proope mit frooheet aus hale.

3. Was sin 3 aate wii Yeehoowa uns helft ti proope mit frooheet aus hale?

³ Wii meecht Yeehoowa uns helfe ti proope mit frooheet aus hale? Fer tas antworte, wole mer phaar xtike fom puuch Isaiias leese. Weeche was? Fiile profetsiie woo Yeehoowa fer Isaiias kep hot, phase aach fer Kot sayn tiiner hayt. Un noch: Isaiias tuut eftas Yeehoowa pexraype mit wërter woo ma laycht ferxteen khan. Kuk mool, tsum payxpiil, Isaiias 30. In tiise kapitel, penutst Isaiias xeene wërter woo pexraype wii  Yeehoowa sayn folek helft. Isaiias hot kexrip tas, fer uns helfe, tuut Yeehoowa (1) unser kepeete mit acht heere un antworte, (2) uns lënke un (3) uns yets un im futuer seechne. Wole mer noo kuke yeete eene fon tiise 3 aate wii Yeehoowa uns helft.

4. (a) Wii hot Yeehoowa ti yuute in Isaiias sayn taache keruuft un was hot eyer mit te tsayt erlaupt? (b) Was fer hofnung hot Yeehoowa fer ti troye layt kep? (Isaiias 30:18, 19)

⁴ Am aanfang fon Isaiias 30, ruuft Yeehoowa ti yuute wii “tikhopiche soone”, woo “een sint noo te aner” mache. Tee saat wayter: “Tii sin een repëlixe folek (…), woo Yeehoowa sayn kesets net heere wole.” (Isa. 30:1, 9) Wayl ti layt net heere wolte, hot Isaiias foer raus kesaat tas Kot teet erlaupe tas se unklik mit mache teete. (Isa. 30:5, 17; Yee. 25:8-11) Un kraat tas is pasiirt wii ti papilooner ti israeliiter wii inkexpërtner tsu Papiloon kenom hon. Awer es waare aach troye layt tswixich ti israeliiter un Isaiias hat een pexeet fon hofnung fer tëne. Tee hot kesaat tas, eene taach, teet Yeehoowa erlaupe tas se tsurik khemte fer noch mool in Israël leepe. (Lees Isaiias 30:18, 19.) b Un tas is wërklich pasiirt: Yeehoowa hot se fon Papiloon pefrayt. Awer tëne sayn pefrayung is net klaych khom. Ti wërter “Yeehoowa tuut ketultich waarte fer aych kuutheet tsayche” pewayse tas een tsayt rom keengt pis Yeehoowa ti troye layt rete teet. In woerheet, ploos 70  yoore noo ti israeliiter in Papiloon waare, sin etliche erlaupt tsurik tsu Yeruusalem keen. (Isa. 10:21; Yee. 29:10) Wii ti israeliiter inkexpërt in Papiloon waare, hon se weeche traurichkheet keprilt. Awer wii se tsurik tsu sayn haymat kang sin, waare ti treene weeche frooheet kewees.

5. Was fer sicherheet kept uns Isaiias 30:19?

⁵ Hayt tiise wërter khene uns uf muute: “Wëns tuu ruufst fer hilef kriin, tuut eyer sicher tich kuutheet tsayche.” (Isa. 30:19) Isaiias lost uns sicher tas Yeehoowa heert mit acht wën mer tëm hilef aan hale. Un eyer tuut unser kepeete klaych antworte. “Tee tuut tich antworte klaych wii eyer tich heert” — saat Isaiias. Tiise ufmuutiche wërter erinere uns tas unser Fater im himel een xtarke wunx hot fer se helfe tii woo tëm hilef ferlange. Tas se wise, helft uns mit frooheet aus hale.

6. Wii tsayche Isaiias sayn wërter tas Yeehoowa ti kepeete fon yeete eene fon sayne tiiner heert?

⁶ Was noch tuut tiise wersikel uns in lërne iwer unser kepeete? Yeehoowa heert mit acht ti kepeete woo yeete eene fon uns macht. Warom khene mer tas saan? Am aanfang fon Isaiias 30, sin ti wërter “teyer” un “aych” penutst, wayl Yeehoowa is mit sayn folek, wii een krup, am xpreche. Awer im wersikel 19, penutst Yeehoowa ti wërter “tuu” un “tich”, wayl eyer is mit yeete persoon am xpreche. Isaiias xraypt: ‘Tuu tuust sicher net prile; eyer tuut sicher tich kuutheet tsayche; tee tuut tich antworte.’ Yeehoowa is een liipliche Fater; tes weeche tuut eyer nii fer een soon orer tochter woo traurich is, saan: “Tuu must soo xtark wii tayn pruuter orer xwester sin!” Nee, kans anerste! — eyer khimert sich mit yeete eene fon uns un kept acht fer unser kepeete. (Psal. 116:1; Isa. 57:15)

7. Wii tuun Isaiias un Yeesus tsayche tas es wichtich is wayter peete?

⁷ Wën mer tsu Yeehoowa peete iwer etwas woo uns ketanke macht, fiilaycht tuut eyer uns eyerst ti kraft kepe woo mer prayche fer  tas aus hale. Als mool khan aach pasiire tas unser proop net soo xnel rom keet wii mer kewaart hon. Soo, fer tas aus hale, mise mer noo un noo kraft tsu Yeehoowa ferlange. Tee laat uns in tas mache. Meyer khene tas mërke in Isaiias sayn wërter: “Los [Yeehoowa] net ruue.” (Isa. 62:7) Was wil tas saan? Meyer mise soo ofts fer Kot peete, tas es weyer wii wën mer khee tsayt fer se ruue fer Yeehoowa kepe teete. Isaiias sayn wërter erinere uns was Yeesus iwer tas kepeet kesaat hot in Lukas 11:8-10, 13. Tat, tuut Yeesus uns uf muute uns net ferxeeme un net uf kepe wën mer peete, un aach hayliche kayst wayter ferlange. Meyer khene aach tsu Yeehoowa aan hale tas eyer uns lënkt fer kuute ëntxlise mache.

8. In te ferkangne yoore, wii hon ti wërter fon Isaiias 30:20, 21 sich erfiilt?

⁸ Lees Isaiias 30:20, 21. c Tas papiloonix militeer hot sich 1 un halpe yoer um Yeruusalem rom kextelt. Ti israeliiter hon soo fiil kelit, tas ti propleeme soo keweenlich wii proot un waser waare. Awer in te wersikele 20 un 21, hot Yeehoowa ferxproch tas, wën ti yuute sich peroye teete un sayn aanxtelung ënere teete, teet Eyer se rete. Isaiias hot Yeehoowa wii sayne “Kreeste Leerer” kenënt un hot kesaat tas Yeehoowa teet tas folek in lërne tëm aan peete in te aat woo tëm kefalt. Tiise wërter hon sich erfiilt wii ti yuute fon Papiloon pefrayt kep sin. Yeehoowa hot pewayst tas eyer te Kreeste Leerer fer tëne waar un, mit sayn lënkung, hot tas folek es noch mool hin kriit tëm in een phuer aat aan peete. Meyer sin aarich froo tas Yeehoowa unser Kreeste Leerer hayt is.

9. Wii tuut Yeehoowa uns hayt lënke?

⁹ In te wersikele 20 un 21, saat uns Isaiias tas mer soo wii xiiler sin woo in 2 aate fon Yeehoowa in kelërnt sin. Eyerst, tuut Isaiias saan: “Tuu tuust tayn Kreeste Leerer mit tayn aychne aue siin.” Too hiir, saat Isaiias tas te leerer foer sayn xiiler is. Es is een eer fer uns tas Yeehoowa uns hayt in lërnt. Wii meecht eyer tas mache? Torich sayn Orkanisatsyoon. Meyer sin aarich petanklich fer ti taytliche oryentiirunge woo mer fon Yeehoowa sayn Orkanisatsyoon kriin. Meyer kriin tiise oryentiirunge torich ti fersamlunge,  konkrëse, puplikatsyoone, prokrame fon JW Broadcasting^® un aach fiil anere aate. Tii al helfe uns ti xweyere tsayte mit frooheet aus hale.

10. Wii tuun mer “een wort hinich [uns]” heere?

¹⁰ Isaiias xprecht iwer een tsweet aat wii Yeehoowa uns in lërnt: “Tayn oore tuun een wort hinich tich heere.” Too hiir, pexraypt Isaiias Yeehoowa wii een leerer woo hinich ti xiiler laaft. Fer tëne lënke, saat eyer te weech woo se nëme sole. Wii tuun mer Yeehoowa sayn xtim hayt hinich uns heere? Yeehoowa hot sayn inspiriirte wërter in te Piipel kelos in een tsayt woo fiile yoore hinich uns is. Soo, wën mer ti Piipel leese, es is wii wën mer Kot sayn xtim hinich uns heere teete. (Isa. 51:4)

11. Fer mit frooheet aus hale, was fer xrite mise mer kepe un warom?

¹¹ Wii khene mer ti kreeste nutse kriin fon te lënkung woo Yeehoowa uns kept torich sayn Orkanisatsyoon un sayn Wort? Mërk mool tas Isaiias tswaay tinge saat. Eyerst: “tas is te weech”. Tsweet: “laaf aan tëm”. (Isa. 30:21) Es is net kenuuch ploos “te weech” khëne; meyer mise aach ‘aan tëm laafe’. Kot sayn Wort un ti ausleyunge fon sayn Orkanisatsyoon lërne uns was Yeehoowa fon uns ferlangt un tsayche uns aach wii tas aan wëne. Fer in unser aarwayt tsu Yeehoowa mit frooheet aus hale, mise mer tiise 2 xrite kepe. Ploos wën mer lërne un tan tas aan wëne, khene mer uns sicher sin tas Yeehoowa uns seechne tuut.

12. Tëm noo Isaiias 30:23-26, wii teet Yeehoowa sayn folek seechne?

¹² Lees Isaiias 30:23-26. d Wii hot tiise profetsii sich erfiilt fer ti yuute woo fon Papiloon tsurik tsu Israël kang sin? Yeehoowa hot tëne fiil kaystliche un fiisixe seechen kep. Tee hot fer sayn folek fiil ese kep. Awer tas haupste is tas Yeehoowa se keholef hot tichter pay tëm khome un aan fange tëm noch mool in te richtich aat aan peete. Ti kaystliche seechen woo tas folek in tiise tsayt kriit hot, waare fiil kreeser wii was se xon friier kriit hate. Te wersikel 26 tsaycht tas Yeehoowa hot tas  kaystlich licht ferkreest — es wil saan, tee hot se keholef sayn Wort peser ferxteen. (Isa. 60:2) Weeche Yeehoowa sayn seechen, hot tas folek ‘sayne hërts sich kuut kexpiirt’ un, tes weeche, khonte se Yeehoowa mit frooheet un kraft tiine. (Isa. 65:14)

13. Wii tuut ti profetsii iwer ti phuer aanpeetung noch mool fest xtele sich hayt erfiile?

¹³ Tuut ti profetsii iwer ti phuer aanpeetung noch mool fest xtele fer uns hayt phase? Kewis. Awer wii? Tsayt 1919 N.K., sin milyoone layt fon Papiloon ti Kroos — woo al ti falxe relichyoone petayt — pefrayt kep. Tii sin tsu een peser plats wii Israël sayn Ferxprochne Lant kenom kep: een kaystlich paratiis. (Isa. 51:3; 66:8) Was is tiise kaystlich paratiis?

14. Was is tas kaystlich paratiis un weer leept in tëm hayt? (Kuk “Tuu peser ferxteen”.)

¹⁴ Fon 1919 N.K. aan, tuun ti kesalpte in een kaystlich paratiis e leepe. Mit te tsayt, sin ti “anere xeef” — woo ti eyertlich hofnung hon —, aach in tiise kaystlich lant rin khom. Un tii hon Yeehoowa sayn seechen kriit. (Yoo. 10:16; Isa. 25:6; 65:13)

15. Woo playpt tas kaystlich paratiis?

¹⁵ Woo playpt tiise kaystlich lant, orer paratiis, hayt? Yeehoowa sayn aanpeeter leepe uf te kanse eke fon te eyert. Tes weeche tuut tas kaystlich paratiis uf te kans welt eksistiire. Soo, hayt, ekaal woo mer woone, khene mer in tëm kaystlich paratiis leepe soo lang wii mer unser pestes mache fer ti woer aanpeetung pay xteen.

16. Wii khene mer wayter ti xeenheet fom kaystlich paratiis siin?

¹⁶ Fer im kaystlich paratiis plaype, mise mer, tswixich anere tinge, wayter petanklich sin fer unser weltwayt pruuterxaft. Wii khene mer tas mache? Meyer mise uns traan hale aan te xeene kwaliteete, net aan te imperfektsyoone fon unser priiter un xwestere. (Yoo. 17:20, 21) Warom is tas soo wichtich? Tenk mool noo iwer tiise ferklaychung. In een xeen park orer kaate, fine mer unerxiitliche sorte peem. Kraat soo, in unser kemaynte hayt, kepts unerxiitliche layt woo soo wii peem sin. (Isa. 44:4; 61:3) Meyer mise uns wayter traan  hale aan wii xeen te “walt” is, net aan te imperfektsyoone fon te unerxiitliche “peem” woo neewich uns sin. Unser eenich weltwayt pruuterxaft is kans xeen! Un mer sole net lose tas unser imperfektsyoone orer ti imperfektsyoone fon anere in te kemaynt unser acht too tefun ap lënke.

17. Was khan yeete eene fon uns mache fer ti eenichkheet in te kemaynt hale?

¹⁷ Was khan yeete eene fon uns mache fer ti eenichkheet in te kemaynt hale? Meyer sole friitxafer sin. (Mat. 5:9; Rom. 12:18) Yeetes mool woo mer te eyerste xrit kepe fer friit mit te anere in te kemaynt uf muute, lose mer tas kaystlich paratiis xeener. Meyer erinere uns tas Yeehoowa hot yeete pewooner fom kaystlich paratiis tsu te phuer aanpeetung ketsoo. (Yoo. 6:44) Yeehoowa wërt wool aarich froo kepe wën eyer siit unser aanxtrengung fer te friit un ti eenichkheet tswixich tëm sayn tiiner hale, woo fer tëm fiil weyert hon. (Isa. 26:3; Axeu 2:7)

18. Aan was sole mer ofts triwer noo tenke un warom?

¹⁸ Yeehoowa kept fiil seechen fer sayn tiiner. Wii khene mer ti kreeste nutse too tefun kriin? Meyer khene triwer noo tenke aan was mer in Kot sayn Wort un unser puplikatsyoone xtutiire. Tas mache, tuut uns helfe kristliche kwaliteete ëntwikele woo uns uf muute “priiterlich liip” un “hërtsliche xpiirunge” tsu te anere in te kemaynt tsayche. (Rom. 12:10) Wën mer triwer noo tenke aan te seechen woo mer xon hayt hon, ferxtërke mer unser fraayntxaft mit Yeehoowa. Un wën mer triwer noo tenke aan te seechen woo Yeehoowa fer uns im futuer ferxprecht, tuun mer unser hofnung — Kot fer imer tiine — xtark hale. Tas ales tuut uns helfe Yeehoowa mit frooheet yets tiine.

19. (a) Tëm noo Isaiias 30:18, fon was khene mer uns sicher sin? (b) Was tuut uns helfe mit frooheet aus hale?

¹⁹ Yeehoowa “tuut sich uf xtele” fer uns helfe wën eyer tiise xlechte welt tsum ën pringt. (Isa. 30:18) Meyer sin uns sicher tas Yeehoowa een “Kot fon kerechtichkheet” is, un tas eyer net erlaupt tas Satanaas sayn xlechte welt een taach lënger wiis neetich is, eksistiirt. (Isa. 25:9) Meyer tuun mit Yeehoowa ketultich waarte pis tiise taach fon pefrayung khomt. Soo lang wii mer tas waarte, sin mer pextimt weyert fer tas kexenk fon kepeet kepe, Kot sayn Wort xtutiire un aan wëne, un aan unser seechen triwer noo tenke. Wën mer tas mache, tuut Yeehoowa uns helfe mit frooheet aus hale un tëm wayter aan peete.