XTUUTYUM ARTIKEL 45
Wii helft uns Yeehoowa ti preetich aarwayt mache?
“Tii tuun sicher wise tas een profeet tswixich tëne waar.” (ESEKYËL 2:5)
LIIT 67 “Tuu tas wort preetiche”
WAS TUUN MER SIIN? a
1. Was khene mer xon waarte un fon was khene mer uns sicher sin?
MEYER khene waarte tas etliche layt sich keeche uns xtele wën mer preetiche. Un im futuer, tuut tas tsiimlich sicher noch mee pasiire. (Tan. 11:44; 2 Tim. 3:12; Apo. 16:21) Soo wii soo, khene mer uns sicher sin tas Yeehoowa uns ti hilef woo mer prayche kepe tuut. Warom? Wayl Yeehoowa helft imer sayn tiiner sayn flichte erfiile, ekaal wii xweyer se sin. Wole mer xpreche, tsum payxpiil, iwer etliche tinge woo te profeet Esekyël mit kemacht hot; tee hot kepreeticht fer ti yuute woo tsu Papiloon kenom waare.
2. Wii hot Yeehoowa ti layt pexrip fer weem Esekyël preetiche solt un was tuun mer in tiise artikel siin? (Esekyël 2:3-6)
2 Fer was fer sorte layt mist Esekyël preetiche? Yeehoowa hot se pexrip wii “tikhopich”, “repëlix”, un wii layt “woo een harte hërts hon”. Tii waare soo kefeerlich wii taarne phutxe un skorpyoone. Es is net umsonst tas Yeehoowa noo un noo fer Esekyël kesaat hot: “Tuu khee pang hon.” (Lees Esekyël 2:3-6.) b Esekyël khont erfiile ti flicht woo eyer fon Kot kriit hat wayl (1) Yeehoowa hat tëm kexikt, (2) Kot sayn kayst hot tëm ti neetich kraft kep un (3) Kot sayn wërter hon tëm sayn klaape ferxtërkt. Wii hon tiise 3 tinge Esekyël keholef? Un wii khene se uns hayt helfe? Tas is was mer in too te artikel siin.
YEEHOOWA HOT ESEKYËL KEXIKT
3. Was fer wërter hon tsiimlich sicher Esekyël ferxtërkt un wii hot Yeehoowa tëm sicher kelos tas Eyer tëm helfe teet?
3 Yeehoowa hot fer Esekyël kesaat: “Ich xike tich.” (Ese. 2:3, 4) Tiise wërter wëre wool Esekyël ferxtërkt hon. Warom? Wayl eyer sich tsiimlich sicher traan ketenkt hot tas Yeehoowa hat eenliche wërter fer Mooses un Isaiias kesaat wën Eyer se wii profeete raus kesuucht hot. (Eeks. 3:10; Isa. 6:8) Esekyël wust aach wii Yeehoowa tiise profeete keholef hat torich ti propleeme triwer wech khome. Tes weeche, wii Yeehoowa 2 mool fer Esekyël kesaat hot: “Ich xike tich”, hat te profeet kuute uersache fer se traue tas Kot tëm helfe teet. Esekyël hot aach phaar mool kexrip: “Ich hon Yeehoowa sayn wort kriit.” (Ese. 3:16) Ti wërter “ich hon Yeehoowa sayn wort noch mool kriit” tuun aach noo un noo im puuch foer khome. (Ese. 6:1) Es is taytlich tas Esekyël sich sicher waar tas Yeehoowa tëm kexikt hat. Esekyël waar aach soon fon een priister kewees. Tsiimlich sicher, hot sayn fater tëm in kelërnt tas Yeehoowa imer fer sayn profeete kesaat hot tas Eyer se helfe teet. Tsum payxpiil: Yeehoowa hot fer Isak, Yaakop un Yeeremias kesaat: “Ich sin mit tich.” (Xee. 26:24; 28:15; Yee. 1:8)
4. Was fer ufmuutiche wërter hon tsiimlich sicher Esekyël ferxtërkt?
4 Wii teete ti meyerste israeliiter sich aan xtele foer Esekyël sayn preetich? Yeehoowa hot kesaat: “Tas haus fon Israël tuut tich net aan heere, wayl se wole net mich aan heere.” (Ese. 3:7) Wën ti layt Esekyël ap kextos hon, hon se in woerheet Yeehoowa ap kextos. Tiise wërter hon Esekyël ti sicherheet kep tas ti layt sayn xlecht aanxtelung wolt net saan tas eyer net een kuut aarwayt wii profeet kemacht hat. Yeehoowa hot Esekyël aach sicher kelos tas, wën Sayn kerichte sich erfiile teete, teete ti layt “wise tas een profeet tswixich tëne waar”. (Ese. 2:5; 33:33) Kewis, tiise ufmuutiche wërter hon Esekyël ti kraft kep fer sayn flicht erfiile.
YEEHOOWA XIKT UNS HAYT
Soo wii mit Esekyël pasiirt is, etliche wole niks wise orer xtele sich keeche unser preetich aarwayt, awer mer wise tas Yeehoowa mit uns is (Kuk ti apsetse 5-6.)
5. Tëm noo Isaiias 44:8, was tuut uns koraaj kepe?
5 Soo wii Esekyël, kriin mer aach koraaj wayl mer wise tas Yeehoowa uns kexikt hot. Tee ruuft uns wii sayne tsayer un tas is wërklich een kroos eer! (Isa. 43:10) Yeehoowa saat uns tas selwiche woo eyer fer Esekyël kesaat hot: “Tuut khee pang hon.” Warom sole mer khee pang hon fon tëne woo sich keeche uns xtele? Wayl, soo wii Esekyël, sin mer fon Yeehoowa kexikt un mer hon Tëm sayn unerxtitsung. (Lees Isaiias 44:8.) c
6. (a) Wii lost Yeehoowa uns sicher tas eyer uns helfe tuut? (b) Warom xpiire mer uns ufkemuut?
6 Yeehoowa ferxprecht tas eyer uns helfe tuut. Tsum payxpiil: een pisye foer se saan “teyer sayt mayne tsayer”, hot Kot kesaat: “Wëns tuu torich tas waser keest, wëre ich pay tich sin. Un, wëns tuu ti fluse torich keest, tuun se tich net iwerkhome. Un wëns tuu torich tas fayer laafst, tuust tuu tich net ferprëne, un sayn flame tuun tich net prëne.” (Isa. 43:2) Als mool, wën mer preetiche, mache mer propleeme mit woo soo wii een iwerxwemung sin; orer proope, woo soo wii tas fayer sin. Ale weeche, mit Yeehoowa sayn hilef, tuun mer wayter preetiche. (Isa. 41:13) Soo wii in Esekyël sayn taache, hayt tsu taach tuun ti meyerste tas pexeet ap xtose. Awer tas wil net saan tas mer net kuute tsayer sin. Meyer xpiire uns ufkemuut wayl Yeehoowa kefalt sich wën mer wayter preetiche. Te aphostel Phaul hot kesaat: “Yeete eene kriit sayn peloonung tëm noo sayn aychne aarwayt.” (1 Kor. 3:8; 4:1, 2) Een xwester woo xon een lang tsayt pyoneerin is, saat: “Es frayt mich se wise tas Yeehoowa unser aanxtrengung peloont.”
KOT SAYN KAYST HOT ESEKYËL TI NEETICH KRAFT KEP
Ezekyël kriit een wisyoon fon Yeehoowa sayn himlix waan; ti wisyoon ferxtërkt sayn sicherheet tas Yeehoowa tëm helfe tuut sayn aarwayt fërtich pringe (Kuk te apsats 7.)
7. Wii hot Esekyël sich kexpiirt wii eyer ketenkt hot aan te wisyoon woo eyer kriit hat? (Kuk tas pilt am aanfang fom piichelche.)
7 Esekyël hot kesiin wii xtark Kot sayn kayst is. In een wisyoon, hot Esekyël kemërkt tas te hayliche kayst ti xtarke engele keholef hot un ti mechtich kroose rete fon een himlixe waan kelënkt hot. (Ese. 1:20, 21) Wii hot Esekyël sich aan kextelt? “Wii ich tas kesiin hon, hon ich mich ufm pootem kexmis” — hot eyer kexrip. Tee hot sich soo fiil ferwunert tas eyer khont net mee xteen plaype! (Ese. 1:28) Xpeeter, wii Esekyël sich traan ketenkt hot fon tiise wunerlich wisyoon, is eyer sich noch sicher kep tas, mit te hilef fon Kot sayn kayst, khont eyer sayn preetich aarwayt fërtich mache.
8-9. (a) Was is mit Esekyël pasiirt wii Yeehoowa tëm kexikt hot xteen plaype? (b) Was noch hot Yeehoowa kemacht fer Esekyël ferxtërke fer sayn xweyer teritooryum?
8 Yeehoowa hot Esekyël kexikt: “Tuu mënxe soon, playp xteen, tas ich mit tich xpreche khan.” Was Yeehoowa kesaat hot un aach Sayn kayst, hon Esekyël ti neetich kraft kep fer sich uf xtele. Esekyël hot kexrip: “Kayst [is] in mich rin khom un hot kemacht tas ich xteen plaype teet.” (Ese. 2:1, 2) Xpeeter, un torich sayn kanse tiinst, hot Yeehoowa sayn “hant” — es wil saan, tëm sayn hayliche kayst — Esekyël keholef. (Ese. 3:22; 8:1; 33:22; 37:1; 40:1) Kot sayn kayst hot Esekyël keholef sayn flicht erfiile — preetiche fer ti tikhopiche layt, mit een harte hërts, fon sayn teritooryum. (Ese. 3:7) Yeehoowa hot fer Esekyël kesaat: “Ich hon tayn kesicht soo hart wii tëne sayns kemacht; un tayn xtërn, soo hart wii tëne sayns. Ich hon tayn xtërn soo wii een tyamant kemacht, hërter wii een xteen. Tuu khee pang fon tëne orer sayn kesicht hon.” (Ese. 3:8, 9) Es waar wii wën Yeehoowa fer Esekyël am saan weyer: ‘Los net ti layt sayn tikhopich aanxtelung tich oone muut lose. Ich tuun tich ferxtërke.’
9 Nochter, hot Kot sayn kayst Esekyël kelënkt torich tas teritooryum woo eyer preetiche solt. Esekyël hot kexrip: “Yeehoowa sayn hant waar xtark iwer mich.” Es hot Esekyël een woch kenom tas eyer khont tas pexeet woo eyer aus xpreche solt, kans lërne un ferxteen; soo khont eyer mit sicherheet preetiche. (Ese. 3:14, 15) Too hot Kot kesaat tas eyer solt pis een taal keen un, tat, ‘is kayst in tëm rin khom’. (Ese. 3:23, 24) Esekyël waar yets fërtich fer sayn tiinst aan fange.
KOT SAYN KAYST KEPT UNS TI NEETICH KRAFT HAYT
Soo wii mit Esekyël pasiirt is, was tuut uns hayt helfe wayter preetiche? (Kuk te apsats 10.)
10. Was fer hilef mise mer hon fer unser preetich aarwayt mache un warom?
10 Was fer hilef mise mer hon fer unser preetich aarwayt mache? Fer tas antworte, tenk aan was mit Esekyël pasiirt is. Eep eyer aan kefang hot se preetiche, hot Kot sayn kayst tëm ti neetich kraft kep. Hayt khene mer preetiche ploos wayl Kot sayn kayst uns helft, soo wii mit Esekyël pasiirt is. Warom prayche mer hilef? Wayl Satanaas khëmpft keeche uns, tas mer noo lose se preetiche. (Apo. 12:17) Etliche tenke tas Satanaas soo xtark is tas mer khene net unser khampf keeche tëm kewine. Awer, torich unser preetich aarwayt, tuun mer tëm ap kewine. (Apo. 12:9-11) Wii soo? Satanaas saat tas eyer uns fiil xlechtes mache tuut, awer wën mer preetiche, tsayche mer tas mer khee pang too tefun hon. Yeetes mool woo mer preetiche, tuut Satanaas een khampf ferliire. Yawool, meyer khene wayter preetiche, opwool ti opositsyoon. Was khene mer taytlich mërke too temit? Yeehoowa kept uns kraft torich sayn hayliche kayst un mer tuun tëm kefale. (Mat. 5:10-12; 1 Phe. 4:14)
11. Was macht Kot sayn kayst fer uns, un wii khene mer tëm wayter kriin?
11 Was noch khene mer lërne wën mer tenke aan wii Yeehoowa ti neetich kraft fer se preetiche fer Esekyël kep hot? Kot sayn kayst khan uns ti neetich kraft kepe, tas mer torich kwalkee propleem in te preetich aarwayt triwer wech khome khene. (2 Kor. 4:7-9) Awer was mise mer mache fer uns sicher lose tas mer wayter Kot sayn kayst kriin? Meyer mise tas imer in unser kepeete ferlange, mit te sicherheet tas Yeehoowa uns heert. Yeesus hot sayn tisipele in kelërnt: ‘Tuut wayter ferlange; tuut wayter suuche; tuut wayter klope.’ Fer unser kepeete antworte, tuut Yeehoowa “hayliche kayst kepe fer tii woo iim ferlange”. (Luk. 11:9, 13; Aph. 1:14; 2:4)
KOT SAYN WËRTER HON ESEKYËL SAYN KLAAPE FERXTËRKT
12. Tëm noo Esekyël 2:9–3:3, fon woo is te rol heyer khom un was waar uf tëm kexrip?
12 Kot sayn kayst hot Esekyël ti neetich koraaj fer se preetiche kep. Awer Kot sayn wërter hon aach Esekyël sayn klaape ferxtërkt. In een wisyoon, hot Esekyël een hant kesiin woo een rol kehalt hot. (Lees Esekyël 2:9–3:3.) d Fon woo is te rol heyer khom? Was waar uf tëm kexrip? Un wii hot tiise rol Esekyël ferxtërkt? Wole mer tas yets siin. Te rol is fon Kot sayn troon khom. Tsiimlich sicher hot Yeehoowa eene fon te 4 engele — woo Esekyël friier kesiin hot — penutst fer tëm te rol kepe. (Ese. 1:8; 10:7, 20) In tëm rol, waare Kot sayn wërter kewees — es wil saan, een lang pexeet fon kericht keeche ti repëlixe israeliiter woo in Papiloon waare; Esekyël mist tiise pexeet fer tëne aus xpreche. (Ese. 2:7) Tas pexeet waar foner sayt un hinich te rol kexrip.
13. Was hot Yeehoowa Esekyël kexikt mit tëm rol mache un warom waar tee siis?
13 Yeehoowa hot sayn profeet kexikt te rol ese un ‘sayn maache fol mit tëm lose’. Esekyël hot kraat tas kemacht. Was hot tiise teel fon te wisyoon petayt? Esekyël must kans ferxteen tas pexeet woo eyer aus xpreche solt. Tee must aan tëm pexeet traan klaape tas es tëm uf muute teet, preetiche keen. Tan is etwas pasiirt woo Esekyël net kewaart hot: tee hot kemërkt tas te rol “soo siis wii honich” waar. (Ese. 3:3) Warom? Fer Esekyël, Yeehoowa foer xteen, waar was kuutes un siises. (Psal. 19:8-11) Tee waar petanklich tas Yeehoowa tëm raus kesuucht hat fer sayn profeet sin.
14. Was hot Esekyël keholef fërtich sin fer sayn flicht aan nëme?
14 Xpeeter, hot Yeehoowa fer Esekyël kesaat: “Tuu mënxe soon, heer un nëm in tayn hërts aan al ti wërter woo ich tich saan.” (Ese. 3:10) Mit too ti wërter, hot Yeehoowa Esekyël uf kemuut sich traan tenke was uf tëm rol kexrip waar un aach too triwer noo tenke. Wii Esekyël tas kemacht hot, is sayn klaape xtërker kep. Te rol hot aach Esekyël een xtark pexeet kep woo eyer solt fer ti layt aus xpreche. (Ese. 3:11) Mit Kot sayn pexeet in sayn hërts un lipe, is Esekyël fërtich kep fer se preetiche un sayn flicht erfiile. (Kuk aach Psalm 19:14.)
KOT SAYN WËRTER FERXTËRKE UNSER KLAAPE HAYT
15. Fer aus hale, was mise mer in unser hërts aan nëme?
15 Fer in te preetich aarwayt aus hale, mise mer aach lose tas Kot sayn wërter wayter unser klaape ferxtërke. Meyer mise in unser hërts aan nëme ales was Yeehoowa uns saat. Hayt xprecht Yeehoowa mit uns torich sayn Wort, ti Piipel. Wii khene mer uns sicher lose tas Kot sayn Wort wayter unser ketanke, xpiirunge un motiwatsyoone petreft?
16. Wii khene mer Kot sayn Wort kuut ferxteen?
16 Wën mer etwas ese un tas fertaue, wërt unser khërper xtërker. Wën mer Kot sayn Wort xtutiire un too triwer noo tenke, wërt unser klaape xtërker. Tas is ti lisyoon woo Yeehoowa uns in lërne wil. Tee wil hon tas mer ‘unser maache fol’ mit tëm sayn Wort lose, es wil saan, mer sole sayn Wort kuut ferxteen. Meyer kriin tas hin wën mer peete, leese un triwer noo tenke. Eyerst, tuun mer peete fer unser hërts foer perayte. Tan tuun mer een xtik fon te Piipel leese. Nochter, tuun mer xtil hale fer triwer noo tenke — es wil saan, tiif tenke aan was mer kelees hon. Was wërt te resultaat sin? Woo mee mer triwer noo tenke, woo peser tuun mer Kot sayn Wort ferxteen un tas tuut unser klaape ferxtërke.
17. Warom is es neetich triwer noo tenke aan was mer in te Piipel leese?
17 Warom is es wichtich ti Piipel leese un too triwer noo tenke? Tas mache, kept uns ti kraft fer tas pexeet fom Raych yets preetiche; un tas tuut uns aach kraft im futuer kepe, wën mer tsiimlich sicher een xtark kericht pexeet aus xpreche mise. Un aach: wën mer triwer noo tenke aan Yeehoowa sayn xeene kwaliteete, wërt unser fraayntxaft mit tëm xtërker. Tes weeche kriin mer etwas woo wërklich siis un kuut is: meyer tuun in friit un tsufriite sin. (Psal. 119:103)
MEYER SIN UF KEMUUT AUS HALE
18. Wën ti kericht tsayt khomt, was mise ti layt in unser teritooryum erkhëne?
18 Meyer sin net profeete soo wii Esekyël waar. Awer meyer sin pextimt Kot sayn pexeet, woo eyer in te Piipel kelos hot, wayter aus xpreche, pis eyer saat ti preetich aarwayt komplët is. Wën ti kericht tsayt khomt, tuun ti layt in unser teritooryum khee uersach hon fer se saan tas se net awisiirt kep sin orer tas Kot sich fon tëne ferkes hat. (Ese. 3:19; 18:23) Xtats tas, mise se erkhëne tas tas pexeet woo mer kepreeticht hon fon Kot khom is.
19. Was kept uns ti kraft fer ti preetich aarwayt fërtich mache?
19 Was tuut uns ti kraft kepe fer unser preetich aarwayt fërtich mache? Ti selwiche 3 tinge woo Esekyël ferxtërkt hon. Meyer tuun wayter preetiche wayl Yeehoowa uns kexikt hot, wayl sayn kayst uns kraft kept, un wayl sayn Wort unser klaape ferxtërke tuut. Mit Yeehoowa sayn hilef, tuun mer es hin kriin wayter unser flicht erfiile un “pis tsum ën” aus hale. (Mat. 24:13)
LIIT 65 Confiantes, nós vamos continuar!
a In tiise artikel, tuun mer iwer 3 tinge xpreche woo te profeet Esekyël keholef hon sayn preetich aarwayt mache. Soo lang wii mer siin wii Yeehoowa Esekyël keholef hot, ferxtërke mer unser klaape tas Kot uns aach helfe tuut.
b (Esekyël 2:3-6) Tee hot mich kesaat: “Tuu mënxe soon, ich xike tich tsum folek Israël, tsu repëlixe natsyoone woo sich keeche mich kextelt hon. Tii un sayne foerkhomer tuun mayn kesetse pis hayt iwertreete. 4 Ich xike tich tsu soone woo tikhopich sin un woo een harte hërts hon. Saa tëne: ‘Soo saat te Soweraan Hër Yeehoowa.’ 5 Ekaal ep se heere orer net — wayl se een repëlixe haus sin —, tii tuun sicher wise tas een profeet tswixich tëne waar. 6 “Awer tuu, mënxe soon, tuu khee pang fon tëne orer sayn wërter hon, opwool um tich rom sin taarne phutxe un tëner un tuu tswixich skorpyoone leepst. Los net tëne sayn wërter orer kesicht tich pang mache, wayl tii sin een repëlix haus.
c (Isaiias 44:8) Tuut khee pang hon un lost net te pang aych um hale. Hon ich tas net fer yeete eene fon aych foer heyer kesaat un pekhant kemacht? Teyer sayt mayne tsayer. Kept es een aner Kot woo net ich sin? Nee, es kept khee aner Fels; ich khëne khee aner.’”
d (Esekyël 2:9–3:3) Wii ich kekukt hon, hon ich kesiin een hant tsu mich aus kextrekt un mit een kexripne rol trin. 10 Tee hot te rol foer mich uf kewikelt un es waar etwas kexrip — foner traan un hiner traan. Es waare trauer liite, yaamere un peklaae kexrip. 3 Too hot eyer mich kesaat: “Mënxe soon, tuu ese was foer tich is. Tuu te rol ese; nochter, kee un xprech mit Israël sayn haus.” 2 Tan hon ich mayn maul uf kemacht un tee hot kemacht tas ich te rol ese teet. 3 Tee hot aach kesaat: “Mënxe soon, tuu te rol woo ich tich kepe ese un los tayn maache fol mit tëm wëre.” Too hon ich aan kefang se ese un, in mayn maul, waar tee soo siis wii honich.