IN TE kleen insel fon Sangir Besar (Intoneesya) leepe 3 fon unser xwestere. Tii sin pekhant in te insel weeche sayn preetich aarwayt un wayl se ti layt helfe ti Piipel ferxteen. Awer phaar yoore tsurik, waare se een aner sort aarwayt in te praya am mache.

Eyerst, sin se im meer rin kang fer xweyer xteen fine un tëne tsu te praya nëme. Etliche xteen waare soo kroos wii een fuuspaal khuuchel. Tan hon ti xwestere sich uf kleene xtil kesetst un ti xteen tsu kleene xtike mit een hamer ferproch. Ti xtike miste kleener wii een hingel ay wëre. Too hon se tiise kleene xtike in plastik eema ketuun un tas trep ruf kenom, pis tas plats woo se keleept hon. Tan hon se tiise xtike in kroose sek ketuun, woo khente in kamyoone kelaat wëre un penutst wëre fer xtroose paue.

Eene fon tiise xwestere waar Hulda. Weeche sayn situatsyoon, khont se mee tsayt wii ti anere in tiise aarwayt aus kepe. Ofts hot se sayn kanse kelt penutst fer ti neetichkheete fon sayn familye fersoriche. Awer yets hat se een aner tsiil: een tablet khaafe fer ti aplikatiiw JW Library^® penutse. Tii wust tas ti wiiteos un anere artikele in te aplikatiiw teete se helfe se preetiche un ti Piipel xtutiire un peser ferxteen.

Fer tiise tsiil trefe, hot Hulda 2 xtune yeete taach too traan kexaft un tii hot tas kemacht torich 1 un halpe moonat. Noo se kenuuch xteen ferproch hot fer een kleen kamyoon fol lose, khont se sayn tablet khaafe.

“Ich waar kaput miit un fol phayn — saat Hulda —, awer ich hon tas klaych ferkes wii ich mayn nay tablet penutse khont fer se preetiche un laychter mich foer perayte fer ti fersamlunge.” Hulda hot aach kesaat tas te tablet se keholef hot torich ti pantemii, wayl al ti aktiwiteete fon te kemaynt waare torich wiiteokonferëns kemacht. Es frayt uns aarich fiil tas Hulda sayn tsiil erfiilt hot!