Ich sin uf te welt khom in 1948 in een kleen pikaat im siitoëst fon Nikeerya. Torich tiise tsayt, mayn papa sayn yunge pruuter, Moustapha, un mayn elste pruuter, Wahabi, hon sich wii Yeehoowa sayn Tsayer taafe kelos. Wii ich 9 yoore alt waar, is mayn papa kextorep. Ich sin mechtich traurich kep… Wahabi hot mich kesaat tas mer khente unser papa noch mool siin in tëm ufxtaye fon te toote. Tas hot mich ketreest un uf kemuut ti Piipel xtutiire. Ich hon mich taafe kelos in 1963. Klaych tëm noo, hon mayn 3 anere priiter sich aach taafe kelos.

In 1965, sin ich in Lagos woone kang mit mayn pruuter Wilson, woo elter wii ich waar. Tat hat ich een ticht fraayntxaft mit rekulaare pyoneere in te Igbobi kemaynt. Sayn frooheet un muut hon mich aan kextoch, un in yanuer fon 1968 sin ich aach een pyoneer kep.

Albert Olugbebi, eene pruuter woo in Petël ketiint hot, hot een ekstra fersamlung mit uns, ti yunge layt, orkanisiirt. Tee hot kexproch iwer ti neetichkheet fer spetsyaale pyoneere tsum nort fon Nikeerya xike. Ich khan mich noch erinere te pruuter Albert sayn ufmuutiche wërter: “Teyer sayt yung un teyer khent ayre tsayt un kraft fer  Yeehoowa penutse. Es kept fiil aarwayt fer aych tat!” Ich wolt soo wii Isayas sin un tsu kwalkee plats keen woo Yeehoowa wolt hon; tes weeche hon ich een petitsyoon aus kefiilt. (Isa. 6:8)

In maay fon 1968, sin ich wii spetsyaal pyoneer in kesetst kep fer in Kano tiine (im nort fon Nikeerya). Tas is pasiirt torich te Kriich fon Pyafra (1967-1970). Weeche te kriich, hon ti layt im nort fon Nikeerya fiil kelit un fiile layt sin kextorep. Tan is te kriich tsum lëst fon Nikeerya kang. Eene pruuter hot fersuucht mich in reete fer net keen, wayl tee wolt net hon tas ich mich wee mache teet. Awer ich hon tëm kesaat: “Tanke xeen tas tuu tich mit mich khimerst. Awer wën Yeehoowa wil hon tas ich tëm in tiise insetsung tiine sol, sin ich mich sicher tas eyer mit mich wërt.”

Ti situatsyoon in Kano waar aarich traurich. Te kriich hat tiise kroos xtat fernicht. In te preetich aarwayt, hon mer als mool ti toote khërper kesiin fon te layt woo torich te kriich kextorep sin. Opwool es phaar kemaynte in Kano waare, sin ti meyerste priiter aus keris. Weenicher wii 15 puplikatoore sin keplip un tii waare mit pang un oone muut. Wii ich un anere 5 spetsyaale pyoneere khom sin, sin se mechtich froo kep. Meyer hon se uf kemuut un tii hon sich peser kexpiirt. Meyer hon se keholef ti fersamlunge un ti preetich aarwayt orkanisiire un tii hon noch mool aan kefang relatoorye xike un puplikatsyoone fer ti filyaal ferlange.

Ich un ti anere spetsyaale pyoneere hon aan kefang ti hausa xprooch lërne. Wii se ti kuute notisye in sayn aychne xprooch keheert hon, hon fiile layt fom plats uns kehoricht. Awer ti mitkliiter fon te kreest relichyoon in Kano hate unser preetich aarwayt net kërn. Tes weeche, miste mer fiil uf phase. Een mool, hot een man mit een meser mich un een aner pruuter noo kexprung! Tsum klik, hon mer xneler kexprung un tee khont uns net fange. Es waar kefeerlich; awer Yeehoowa hot kemacht tas mer “in sicherheet woone” teete un ti numer puplikatoore hot aan kefang se wakse. (Psal. 4:8) Hayt kepts 11 kemaynte in Kano un mee wii 500 puplikatoore.

Xpeeter, in akust fon 1968, noo tas ich ploos phaar moonate in Kano waar, sin ich kexikt kep tsu Niamey (ti haupst xtat fon Niker). Tswaay anere spetsyaale pyoneere sin mit mich kexikt kep. Klaych hon mer raus kriit tas Niker, im Oëst Afrika, is in eene fon te wërmste rechyoone fon te eyert. Awer ti hits waar net unser eensich propleem: meyer miste aach ti haupst xprooch, franseesix, lërne. Opwool tiise propleeme, hon mer uf Yeehoowa ketraut. Meyer hon aan kefang se preetiche mit phaar puplikatoore woo tat kewoont hon. In een khorts tsayt, hon neekst al ti layt in Niamey woo leese khonte, een kopye fom puuch A Verdade Que Conduz à Vida Eterna kriit. Ti layt hon soo kaar uns kesuucht fer een kopye fon tiise puuch kriin, woo penutst waar fer ti Piipel xtutiire!

Klaych hon mer kemërkt tas ti autoriteete hon net Yeehoowa sayn Tsayer kërn kehat. In yuuli fon 1969, hate mer te eyerst sirkuyt konkrës im lant un unkefeer 20 layt sin khom. Meyer waare hërtslich am waarte te taaf fon 2 naye priiter. Awer im eyerste taach fom konkrës, is ti polis khom un hot tas prokram xtil kehal. Tii hon ti spetsyaale pyoneere un te sirkuyt superintentent tsu te telekasii kenom. Noo tas se uns aus kefroot hon, hon se uns kexikt te neekste taach tsurik khome. Meyer hon kemërkt tas ti autoriteete propleeme fer uns pringe teete; soo hon mer ti taaf reet in yemant sayn haus kehal un tan ti priiter heelich in een flus ketaaft.

Phaar woche xpeeter, hot ti rechiirung ich un anere 5 spetsyaale pyoneere kexikt faart fon Niker keen. Meyer hate ploos 48 xtune fer faart keen un meyer muste unser aychne pleen mache. Meyer hon tas kefolicht un mer sin terëk tsu te filyaal fon Nikeerya kang. Tat hon mer naye insetsunge kriit.

Mayn nay insetsung waar in Orisunbare (een nikeerix pikaat). Ich hon kërn tat kepreeticht un Piipel xtuutye kefiirt. Ich hon kexaft mit een kleen krup puplikatoore woo tat kewoont hot. Awer noo 6 moonate, hot ti filyaal mich in kelaat tsurik tsu Niker aleen keen. Am aanfang, waar ich ferxrok un nerwees. Awer nochter, wolt ich wërklich fiil ti priiter in Niker noch mool trefe.

Ich sin tsurik tsu Niamey kang. Te taach truf woo ich hin khom sin, hot een nikeerix kexefts man erkhënt tas ich Yeehoowa sayn Tsayer waar un hot aan kefang frooche iwer ti Piipel mache. Meyer hon mitsamer xtutiirt. Un noo tas eyer noo kelos hot se rauche un tsu fiil trinke, hot eyer sich taafe kelos. Torich ti yoore, es hot mich frooheet keprung mit priiter un xwestere in unerxiitliche rechyoone fon Niker preetiche un siin ti layt ti woerheet aan nëme. Tas eyerste mool woo ich tsu Niker khom sin, es waare 31 Yeehoowa sayn Tsayer; wii ich faart kang sin, es waare 69.

In teetsemper fon 1977, sin ich tsurik tsu Nikeerya kang fer een iipung kriin woo 3 woche kehal  hot. Am ën fom khurs hot Malcolm Vigo, kortenatoer fon te Filyaal Komisyoon, mich een priif fon te filyaal fon Sierra Leone ketsaycht. Ti priiter waare een pyoneer am suuche woo kesunt un letich waar un woo ënglix un franseesix xpreche khent, fer wii sirkuyt superintentent in Kinë tiine. Te pruuter Vigo hot mich kesaat tas se mich am iipe waare fer tiise flicht kriin. Tee hot taytlich aus keleet tas es net een laycht insetsung weyer. Tee hot mich aan kereet: “Tenk kuut traan eep tayn ëntxlus mache!” “Ich keen — hon ich klaych keantwort —, wayl Yeehoowa is mich am xike.”

Ich sin tsu Sierra Leone kang un ich hon ti priiter in te filyaal ketrof. Een mitkliit fon te Filyaal Komisyoon hot mich kesaat: “Meyer wise net fiil iwer wii unser priiter in Kinë traan sin.” Ti filyaal in Sierra Leone hot ti aarwayt in Kinë uf kephast, awer tii khonte net mit te puplikatoore xpreche weeche ti politix unruychkheet in tiise lant. Tii hon phaar mool fersuucht een pruuter xike fer ti priiter in Kinë pesuuche, awer tas hot net funtsyoniirt. Tes weeche, hon se mich ferlangt se reese tsu Conakry (ti haupst xtat fon Kinë). Ich solt tat hin keen fer se fersuuche erlaupnis fon te rechiirung kriin fer tat plaype.

Wii ich in Conakry hin khom sin, sin ich tsu te nikeerix empayxata kang. Ich hon mit tëm empayxatoer fertseelt un tëm kesaat tas ich wolt in Kinë preetiche. Tee hot mich aan kehal fer net plaype, wayl se khente mich in xpërte orer wee mache. Tee hot mich kesaat: “Kee tsurik tsu Nikeerya un preetich tat.” Too hon ich keantwort: “Ich sin pextimt se plaype.” Soo hot eyer een priif kexikt fer een ofitseer fon te rechiirung. Tee hot fer tiise ofitseer ferlangt tas eyer mich helfe solt un tee hot tas kemacht.

Klaych tëm noo, sin ich tsurik tsu te filyaal in Sierra Leone kang. Ich hon fer ti priiter kesaat was te ofitseer ëntxlist hat: ti rechiirung hot mich erlaupt in Kinë plaype. Ti priiter hon keyukst fon phuer frooheet wii se tsum wise kriit hon wii Yeehoowa mayn rees keseechent hat!

Fon 1978 pis 1989, hon ich in te sirkuyt aarwayt in Kinë un Sierra Leone kexaft; ich hon aach wii ersetser sirkuyt superintentent ketiint in Lipeerya. Am aanfang, sin ich ofts krank kep. Als mool is tas pasiirt in pletse woo wayt wech waare. Awer ti priiter hon sich aan kextrengt fer mich tsum krankehaus nëme.

Een mool, sin ich aarich krank kep. Ich hon malarya kriit un ich hat aach wërm in mayn tërm. Wii ich peser traan kep sin, hon ich tsum wise kriit tas ti priiter am pleene waare woo se mich pekraape teete! Opwool tiise kefeerliche situatsyoone, hon ich nii ketenkt mayn insetsung lose. Ich sin mich sicher tas ploos Yeehoowa khan uns woere xitsung kepe, wayl soo kaar wën mer xtërpe, khan eyer uns tsurik tsum leepe pringe.

In 1988, hon ich Dorcas khëne kelërnt. Tii waar een teemuutich pyoneerin woo Yeehoowa fiil keliipt hot. Meyer hon uns kehayrat un tii hot aan kefang mit mich in te sirkuyt aarwayt xafe. Dorcas hot xtram mit mich in te sirkuyt kexaft un tii waar wilich fer fiiles uf kepe fer Yeehoowa kefale. Meyer  sin pis 25 kilometer tswixich ti kemaynte kelaaft, un meyer hon unser thaxe mit kenom. Wën ti kemaynte noch wayter waare, hon mer kwalkee faartsaych penutst woo mer fine khonte. Meyer sin lamsam kereest torich xtroose woo fol leeche un knatx waare.

Dorcas is een koraajiche fraa. Tsum payxpiil, als mool muste mer torich fluse keen woo fol krokotile waare. Een mool muste mer torich 5 taache reese un meyer miste torich een flus mit kanoo keen, wayl ti hols priike fernicht waare. Wii Dorcas sich uf kextelt hot fer aus xtaye, is se im waser kefal. Ich un Dorcas wuste net xwime un es waare krokotile im flus! Tsum klik, waare etliche yunge mëner tat ticht woo uner taucht hon un se keret hon. Torich een tsayt, hate ich un Dorcas xlechte treem too triwer, awer meyer hon wayter in te sirkuyt ketiint.

Am aanfang fon 1992, hon mer tsum wise kriit tas Dorcas xwanger waar, etwas woo mer net kewaart hon. Meyer hate een ëntxlus fer se mache: teete mer wayter wii spetsyaale pyoneere tiine? Meyer hon ketenkt: “Yeehoowa hot uns een kexenk kep!” Tes weeche, hon mer unser tochter wii Jahgift kenënt (woo in ënglix, “kexenk fon Yeehoowa” petayt). Fier yoore xpeeter is Jahgift sayn pruuter, Eric, uf te welt khom. Unser 2 khiner sin wërklich kexenke fon Yeehoowa. Torich een tsayt, hot Jahgift in een iwersetsung skritooryum in Conakry ketiint un Eric is eene ministeryaale tiiner.

Mit te tsayt, must Dorcas noo lose wii spetsyaal pyoneerin tiine; awer tii hot wayter wii rekulaar pyoneerin ketiint, soo kaar wii mer unser khiner kroos ketsoo hon. Mit Yeehoowa sayn hilef, sin ich wayter in te spetsyaal fol tsayt tiinst keplip. Noo tas unser khiner kroos kewakst sin, khont Dorcas noch mool wii spetsyaal pyoneerin tiine. Yets sin ich un Dorcas misyoneere in Conakry.

Ich sin imer kang woo Yeehoowa mich kenom hot. Ich un mayn fraa hon ofts Yeehoowa sayn xitsung un seechen kexpiirt. Wayl mer uf Yeehoowa traue, net uf materyaalixe tinge, hon mer uns fon fiile ëngstlichkheete un propleeme kexoont. Torich unser leepe, hon ich un Dorcas kelërnt tas ti Kwel fon te woere sicherheet is Yeehoowa, te “Kot fon unser retung”. (1 Kro. 16:35) Ich sin mich sicher tas tas leepe fon ale woo uf Kot traue, is “kuut wech ketuun im thax fom leepe pay Yeehoowa”. (1 Sam. 25:29)