XTUUTYUM ARTIKEL 49
Meecht Yeehoowa mayn kepeete antworte?
“Iir wërt mich ruufe un tsu mich in kepeet khome, un ich tuun aych horiche.” (YEEREMIAS 29:12)
LIIT 41 “Oo Kot, heer mayn kepeet”
WAS TUUN MER SIIN? a
1-2. Warom khene mer rechne tas Yeehoowa unser kepeete net antworte tuut?
“FIN in Yeehoowa ti kreest frayt, un tee tuut ti winxe fon tayn hërts erfiile.” (Psal. 37:4) Tas is een wunerlich ferxpreche! Awer khene mer waarte tas Yeehoowa uns klaych kepe tuut ales was mer tëm ferlange? Warom is tas een wichtich frooch? Kuk mool ti neekste situatsyoone. Een letich xwester peet tas se in kelaat wërt fer ti Xuul fer Preeticher fom Raych mache. Awer phaar yoore sin rom kang, un tii is noch net in kelaat kep. Een yunge pruuter peet tas eyer khan peser fon sayn xlim krankheet wëre un, soo, mee in te kemaynt mache. Awer sayn kesuntheet wërt net peser. Ti eltere fon een khint peete tas tas khint in te woerheet playpt. Awer tas khint ëntxlist noo lose Yeehoowa tiine.
2 Fiilaycht host tuu aach net kriit etwas woos tuu tsu Kot ferlangt host. Im xtant host tuu too teweeche kerechent tas Yeehoowa etliche kepeete antworte tuut, awer net tayns. Orer khan sin tas tuu tenkst tas tuu was ferkheertes kemacht host. Een xwester woo Janice b heest, hot sich soo kexpiirt. Tii un sayn man hon tsu Kot kepeet iwer sayn wunx fer in Petël tiine. Tii saat: “Ich waar mich sicher tas mer teete klaych in Petël sin.” Awer fiile yoore xpeeter, is tas pheyerche noch net in kelaat kep. “Ich hon mich traurich un konfus kexpiirt — saat Janice. — Ich hon mich kefroot was ich kemacht hat fer Yeehoowa traurich lose. Ich hon soo ofts too triwer kepeet… Warom hot eyer mich net keantwort?”
3. Iwer was tuun mer in tiise artikel xpreche?
3 Als mool khene mer uns frooe ep Yeehoowa unser kepeete am heere is. Soo kaar etliche troye mëner fon te piiplixe tsayte hon tas kemacht. (Yoop 30:20; Psal. 22:2; Hap. 1:2) Was khan tich sicher lose tas Yeehoowa acht tsu tayn kepeete kept? (Psal. 65:2) Fer uns helfe ti antwort fine, mise mer ti neekste frooche noo kuke: (1) Was khene mer fon Yeehoowa waarte? (2) Was waart Yeehoowa fon uns? (3) Warom mise mer fiilaycht ënere was mer in kepeet ferlange?
WAS KHENE MER FON YEEHOOWA WAARTE?
4. Tëm noo Yeeremias 29:12, was ferxprecht Yeehoowa uns mache?
4 Yeehoowa ferxprecht unser kepeete horiche. (Lees Yeeremias 29:12.) c Unser Kot liipt uns wayl mer tëm troy tiine; soo kept eyer imer acht tsu unser kepeete. (Psal. 10:17; 37:28) Awer tas petayt net tas eyer uns kepe tuut ales was mer ferlange. Im xtant, mise mer pis ti nay welt waarte fer etliche tinge woo mer ferlange, kriin.
5. Aan was tenkt Yeehoowa wën eyer unser kepeete heert? Lee tas aus.
5 Yeehoowa tenkt aan sayn tsiil wën eyer unser kepeete heert. (Isa. 55:8, 9) Een tings woo Yeehoowa wil hon, is tas ti eyert fol wërt mit layt woo tëm wii Rechiirente froo aan heere. Awer Satanaas saat tas ti layt frooer wëre wën se sich selepst rechiire. (Xee. 3:1-5) Fer se pewayse tas was Satanaas saat een lii is, tuut Yeehoowa erlaupe tas ti mënxe sich selepst rechiire. Un ti mënxlich rechiirung hot ti xult fer fiile fon te propleeme woo mer hayt mit mache. (Ekl. 8:9) Meyer wise tas Yeehoowa tuut net al unser propleeme yets wech xafe. Wën eyer tas mache teet, khente etliche mënxe woo net uf Kot klaape, tenke tas ti mënxliche rechiirunge unser propleeme resolwiire khene.
6. Warom mise mer traue tas ales was Yeehoowa macht, imer kerecht un liiplich is?
6 Yeehoowa khan eenliche kepeete in unerxiitliche aate antworte. Tsum payxpiil, wii te kheenich Esekias aarich krank waar, hot eyer tsu Kot aan kehal tas Eyer tëm heele solt un Yeehoowa hot tas kemacht. (2 Khe. 20:1-6) Im keeche teel, wii te aphostel Phaul tsu Yeehoowa ferlangt hot sayn “taarn ins flayx” — fiilaycht een kesuntheet propleem — wech xafe, hot Kot tas net kemacht. (2 Kor. 12:7-9) Tenk aach aan tëm payxpiil fon te aphostele Tyako un Pheeter. Te kheenich Herootes wolt tëne 2 um pringe. Ti kemaynt hot fer Pheeter kepeet un tsiimlich sicher fer Tyako aach. Tyako is um keprung kep, awer Pheeter is fon een engel keret kep. (Aph. 12:1-11) Meyer khene uns frooe: ‘Warom hot Yeehoowa Pheeter keret, awer Tyako net?’ Ti Piipel kept net ti antwort. d Awer meyer khene uns sicher sin tas Yeehoowa sayn weeche sin “nii unkerechtich”. (Teut. 32:4) Un meyer wise tas Yeehoowa hot ti tswaay — Pheeter un Tyako — keliipt. (Apo. 21:14) Als mool tuut Yeehoowa unser kepeete net antworte soo wii mer kewaart hon. Awer wayl mer traue tas ales was Yeehoowa macht imer kerecht un liiplich is, tuun mer uns net pexweere weeche ti aat wii eyer raus suucht unser kepeete antworte. (Yoop 33:13)
7. Was sole mer fersuuche net mache, un warom?
7 Meyer fersuuche unser situatsyoon net ferklayche mit te anere sayns. Meyer khene, tsum payxpiil, was spetsiifixes in kepeet ferlange, awer tas net kriin. Xpeeter kriin mer tsum wise tas een aner persoon tas selwiches ferlangt hot un siits aus tas se tas kriit hot. Een xwester, woo Anna heest, hot tas mit kemacht. Tii hot kepeet tas sayn man, Matthew, fon sayn kreeps keheelt wëre teet. In te selwich tsayt, 2 xwestere woo fiil elter wii Matthew waare, hate aach kreeps. Anna hot hërtslich kepeet weeche Matthew un ti xwestere. Ti xwestere sin peser kep, awer Matthew is kextorep. Am aanfang hot Anna sich kefroot: “Wën ti xwestere peser kep sin weeche Yeehoowa sayn hilef, warom hot eyer net mayn kepeet keantwort fer Matthew heele?” Sicher khene mer net wise warom ti xwestere peser kep sin. Awer meyer wise tas Yeehoowa pringt een ën fer al ti xwiirichkheete un tas eyer wil sayn fraaynte, woo kextorep sin, uf ruufe. (Yoop 14:15)
8. (a) Tëm noo Isayas 43:2, wii tuut Yeehoowa uns helfe? (b) Wii tuun unser kepeete uns helfe wën mer xwiirichkheete mit mache? (Kuk te wiiteo Peete heleft mit propleeme um se keen.)
8 Yeehoowa helft uns imer. Wii unser liipliche Fater, wil Yeehoowa net hon tas mer layte. (Isa. 63:9) Noch soo, tuut eyer uns net pefraye fon al unser propleeme, woo soo wii fluse un fayer sin khene. (Lees Isayas 43:2.) e Awer tee ferxprecht uns helfe torich ti propleeme keen. Een tuun ti xwiirichkheete woo mer yets mit mache, lost eyer imer meechlich tas mer tëm wayter tiine. Yeehoowa kept uns aach sayn mechtich hayliche kayst fer uns helfe wayter aus hale. (Luk. 11:13; Fili. 4:13) Tes weeche, khene mer uns sicher sin tas eyer tuut uns imer tas neetiches kepe fer wayter aus hale un tëm troy tiine. f
WAS WAART YEEHOOWA FON UNS?
9. Tëm noo Tyako 1:6, 7, warom mise mer traue tas Yeehoowa uns helfe tuut?
9 Yeehoowa waart tas mer uf tëm traue. (Hep. 11:6) Meyer khene uns als mool iwerlaat xpiire weeche unser propleeme un tenke tas se soo wii “mauere” sin woo mer net ruf krapele khene. Meyer khene soo kaar tswayfele ep Yeehoowa uns helfe tuut. Awer ti Piipel lost uns sicher tas, torich Kot sayn kraft, khene mer “een mauer ruf krapele”. (Psal. 18:29) Soo, xtats lose tiise tswayfele wakse, sole mer mit klaape peete un traue tas Yeehoowa unser kepeete antworte tuut. (Lees Tyako 1:6, 7.) g
10. Kep een payxpiil woo tsaycht wii mer unser teel mache khene noo se peete.
10 Yeehoowa waart tas mer unser teel mache noo se peete. Tsum payxpiil, een pruuter khan hilef tsu Yeehoowa ferlange fer een taach fray fon sayn aarwayt kriin fer tsum rechyonaal konkrës keen. Wii khan Yeehoowa tiise kepeet antworte? Tee khan fiilaycht koraaj fer te pruuter kepe fer mit sayn xëf xpreche. Awer te pruuter mus noch sayn teel mache un een taach fray fer sayn xëf ferlange. Im xtant, mus eyer tas noo un noo mache. Tee khan sich soo kaar aan piite fer in een aner taach xafe un, wëns neetich is, khan eyer een kleener loon tiise moonat aan nëme.
11. Warom sole mer noo un noo iwer unser soriche peete?
11 Yeehoowa waart tas mer noo un noo iwer unser soriche peete. (1 The. 5:17) Torich Yeesus sayn wërter, khene mer ferxteen tas etliche tinge woo mer ferlange, wëre uns net klaych kep. (Luk. 11:9) Tes weeche, kep net uf! Tuu noo un noo hërtslich peete. (Luk. 18:1-7) Wën mer wayter iwer een sache peete, tsayche mer tsu Yeehoowa tas was mer ferlange wichtich fer uns is; meyer tsayche aach tas mer klaape tas eyer uns helfe khan.
WAROM MISE MER FIILAYCHT ËNERE WAS MER IN KEPEET FERLANGE?
12. (a) Was fer frooch sole mer mache iwer was mer in kepeet ferlange, un warom? (b) Wii khene mer respekt tsu Yeehoowa in unser kepeete tsayche? (Kuk te khaste “ Meechte mayn kepeete respekt tsu Kot tsayche?”)
12 Wën mer net kriin was mer in kepeet ferlangt hon, khene mer uns 3 frooche mache. Eyerst: ‘Sin ich tas richtich tings in kepeet am ferlange?’ Ofts tenke mer tas mer wise was peser fer uns is. Awer ti tinge woo mer ferlange, khene in woerheet net kuut fer uns sin. Wën mer iwer een propleem peete, khan sin tas es een peser solutsyoon kept wii tii woo mer ferlange. Un im xtant, etliche tinge woo mer ferlange, xtime net mit Yeehoowa sayn wile. (1 Yo. 5:14) Tsum payxpiil, tenk aan te eltere, iwer weem mer am aanfang fom artikel keproch hon. Tii hon tsu Yeehoowa ferlangt tas sayn khint wayter in te woerheet plaype solt. Es is net ferkheert soo was ferlange. Awer Kot tuut nimant tswinge tëm tiine. Eyer wil hon tas meyer al, soo kaar ti khiner, raus suuche tëm aan peete. (Teut. 10:12, 13; 30:19, 20) Tes weeche, khente ti eltere tsu Kot ferlange tas eyer se helft tas hërts fom khint aan krayfe. Soo, wërt tas khint uf kemuut Yeehoowa liipe un sayn fraaynt sin. (Xpr. 22:6; Ëfe. 6:4)
13. Tëm noo Hepreeyer 4:16, wanee tuut Yeehoowa uns helfe? Lee tas aus.
13 Ti tsweet frooch woo mer uns mache khene, is: ‘Meecht es ti richtich tsayt sin fer Yeehoowa mayn kepeete antworte?’ Meyer khene tenke tas mer prayche klaych een antwort fer unser kepeete kriin. Awer in woerheet, Yeehoowa wees ti pest tsayt fer uns helfe. (Lees Hepreeyer 4:16.) h Wën mer net klaych kriin was mer ferlangt hon, khene mer tenke tas Yeehoowa sayn antwort “Nee” is. Awer im xtant is tëm sayn antwort “Noch net”. Tsum payxpiil, tenk noch mool aan tëm yung woo kepeet hot fer keheelt wëre fon sayn krankheet. Wën Yeehoowa een wuner mache teet fer te pruuter heele, khent Satanaas saan tas te pruuter wayter Yeehoowa ketiint hot ploos wayl eyer keheelt waar. (Yoop 1:9-11; 2:4) Un noch, Yeehoowa hot een tsayt pextimt fer al ti krankheete heele. (Isa. 33:24; Apo. 21:3, 4) Pis tiise tsayt khomt, khene mer net waarte tas Yeehoowa een wuner macht fer unser krankheete heele. Soo, tiise pruuter khent tsu Yeehoowa ferlange tas Eyer tëm ti neetich kraft un inerlich friit kept fer ti krankheet wayter aus hale un troy tsu Tëm plaype. (Psal. 29:11)
14. Was host tuu mit Janice sayn speryens kelërnt?
14 Tenk iwer Janice sayn speryens, woo kepeet hot iwer in Petël tiine. Tii hot aan kefang se mërke tas Yeehoowa sayn kepeet keantwort hot 5 yoore xpeeter, awer net in te aat wii se kewaart hot. Tii saat: “Yeehoowa hot tiise tsayt penutst fer mich fiile tinge in lërne un mich helfe een peser krist wëre. Yets traue ich noch mee uf tëm. Ich must lërne peser ti Piipel xtutiire, un aach tas ich khan froo sin, ekaal ti situatsyoon.” Xpeeter, sin Janice un sayn man in kelaat kep fer in te sirkuyt aarwayt tiine. Wii se tsurik kukt, Janice saat: “Yeehoowa hot mayn kepeete keantwort, awer net in te aat wii ich kewaart hon. Es hot een tsayt kenom pis ich kemërkt hon tas ti antwort woo Yeehoowa mich kep hot, een xeen kexenk waar. Ich sin soo petanklich tas ich ti xans hat fer tëm sayn liip un kuutheet xpiire!”
Wëns tuu xpiirst tas Yeehoowa tayn kepeete net keantwort hot, was mënst tuu iwer was aneres peete? (Kuk te apsats 15.) j
15. Warom sole mer als mool net tsu spetsiifix in unser kepeete sin? (Kuk aach ti pilter.)
15 Een trit frooch woo mer uns mache khene, is: ‘Sol ich was aneres in kepeet ferlange?’ Es is kuut spetsiifix sin wën mer peete; awer als mool is es peser net tsu spetsiifix sin. Soo khene mer raus fine was Yeehoowa fer uns wil. Tenk noch mool aan tëm payxpiil fon te letich xwester woo kepeet hot fer ti Xuul fer Preeticher fom Raych mache. Tii wolt ti xuul mache tas se tiine khont in een plats woo mee puplikatoore praycht. Tes weeche, soo lang wii se kepeet hot fer in kelaat wëre tsu te xuul, khent se aach hilef in kepeet ferlange fer aate fine fer Kot peser tiine. (Aph. 16:9, 10) Noo se peete, khent se fer te sirkuyt superintentent frooe ep tas een ticht kemaynt weyer woo mee pyoneere praycht; orer khent se tsu Petël xraype un frooe in was fer plats mee puplikatoore neetich sin. i
16. Was fer sicherheet khene mer hon?
16 Wii mer kesiin hon, khene mer uns sicher sin tas Yeehoowa unser kepeete in een kerecht un liiplich aat antworte tuut. (Psal. 4:3; Isa. 30:18) Als mool kriin mer net ti antwort woo mer kewaart hon. Awer Yeehoowa kept imer acht tsu unser kepeete. Tee liipt uns aarich fiil. Un tee lost uns nii im xtich. (Psal. 9:10) Soo “trau uf iim in ale tsayte” un tuu tayn hërts foer tëm in kepeet aus xiite. (Psal. 62:8)
LIIT 43 Uma oração de agradecimento
a Tiise artikel leet aus warom mer khene uns sicher sin tas Yeehoowa imer unser kepeete in een kerecht un liiplich aat antworte tuut.
b Etliche naame waare keënert.
c (Yeeremias 29:12) Iir wërt mich ruufe un tsu mich in kepeet khome, un ich tuun aych horiche.’
d Kuk te artikel “Traust tuu tas Yeehoowa imer tas richtiches macht?” in Te Wachthorm Feepruer 2022, apsetse 3-6.
e (Isayas 43:2) Wëns tuu torich tas waser keest, wëre ich pay tich sin. Un, wëns tuu ti fluse torich keest, tuun se tich net iwerkhome. Un wëns tuu torich tas fayer laafst, tuust tuu tich net ferprëne, un sayn flame tuun tich net prëne.
f Fer mee wise iwer wii Yeehoowa uns helft ti proope aus hale, kuk te wiiteo Peete heleft mit propleeme um se keen im site jw.org.
g (Tyako 1:6, 7) Awer eyer sol noo un noo mit klaape ferlange, mit khee tswayfel, wayl weer tswayfele hot, is wii een wele fom meer woo te wint hiner un heyer xupt. 7 Yaa, tiise persoon sol net waarte etwas fon Yeehoowa kriin.
h (Hepreeyer 4:16) Soo, mit fertraung, wole mer ticht am troon fon unfertiint kuutheet khome, fer parmhërtslichkheet kriin un unfertiint kuutheet fine fer uns helfe in te richtich tsayt.
i Fer se wise wiis tuu tich aan piite khanst fer se tiine unich tëm teritooryum fon een aner filyaal, kuk tas puuch Organizados para Fazer a Vontade de Jeová, kapitel 10, apsetse 6-9.
j PILT AUSLEYUNG: Tswaay xwestere peete foer een petitsyoon fer ti Xuul fer Preeticher fom Raych aus fiile. Xpeeter is eene fon tëne in kelaat, awer ti aner net. Xtats tsu traurich wëre, tuut ti xwester woo net in kelaat waar tsu Yeehoowa peete tas eyer se helft aate fine fer mee in te preetich mache. Tan xraypt se tsu te filyaal un piit sich aan fer se tiine woos neeticher is.
