1-2. (a) Warom hot te aphostel Phaul kesaat tas ti liip ti kreest kwaliteet is? (b) Was fer frooche tuun mer antworte?

 WII te aphostel Phaul iwer te klaape, ti hofnung un ti liip kexproch hot, hot eyer tsum xlus kesaat: ‘Ti kreeste fon tiise kwaliteete is ti liip.’ (1 Kor. 13:13) Warom khont Phaul tas saan? Wayl, im futuer, prayche mer net mee klaape hon aan Kot sayn ferxpreche iwer een nay welt orer hofnung hon tas tiise ferxpreche sich erfiile tuun, wayl tii wëre xon erfiilt. Awer meyer mise imer liip tsu Yeehoowa un ti layt hon. In woerheet, tiise liip tuut sich fer imer un eewich ferkreese.

² Wayl ti liip imer wichtich in unser leepe wërt, wole mer 3 frooche antworte: Warom sole mer uns naner liipe? Wii khene mer liip eene tsu te anere tsayche? Wii khene mer tiise liip xtark hale?

3. Was fer uersache hon mer fer uns naner liipe?

³ Warom is es wichtich uns naner liipe? Een uersach is tas ti liip uns itentifitsiirt wii woere kriste. Yeesus hot fer sayn aphostele kesaat: “Torich tas, tuun al wise tas teyer mayne tisipele sayt: wën teyer liip unich aych hot.” (Yoo. 13:35) Un noch: uns eene ti anere liipe, halt uns eenich. Phaul hot kesaat tas “ti liip is ti perfekt aat fer ti eenichkheet samer hale”. (Kol. 3:14) Awer es kept noch een aner wichtich uersach warom mer sole uns naner liipe. Te  aphostel Yoohan hot fer sayn priiter un xwestere kexrip: “Tee woo Kot liipe tuut, mus aach sayn pruuter liipe.” (1 Yo. 4:21) Wën mer liip eene tsu te anere tsayche, pewayse mer tas mer Kot liipe.

4-5. Was is ti ferpiinung tswixich unser liip tsu Kot un unser liip tsu te priiter un xwestere? Mach een ferklaychung.

⁴ Was is ti ferpiinung tswixich unser liip tsu Kot un unser liip tsu te priiter un xwestere? Fer se ferklayche, kuk mool ti ferpiinung tswixich unser hërts un anere teele fom khërper. Wën een tokter unser puls xpiirt fer se siin op tas xtark orer xwach is, khan eyer als mool raus fine wii kesunt unser hërts is. Was fer lisyoon khene mer mit tiise ferklaychung lërne?

⁵ Wën een tokter unser puls xpiirt, khan eyer raus fine wii xtark unser hërts is. Kraat soo, khene mer raus fine wii xtark unser liip tsu Kot is wën mer noo kuke wii xtark unser liip tsu te anere is. Wën mer mërke tas unser liip tsu te priiter sich ferxweecht hot, khan tas tsayche tas unser liip tsu Kot is aach am sich ferxweeche. Awer wën mer imer liip tsu unser priiter tsayche, wise mer tas unser liip tsu Kot xtark is.

6. Warom sole mer uns ketanke mache wën unser liip tsu unser priiter un xwestere am sich ferxweeche is? (1 Yoohan 4:7-9, 11)

⁶ Meyer sole uns ketanke mache wën unser liip tsu te priiter un xwestere am sich ferxweeche is. Warom? Wayl tas khan petayte tas unser fraayntxaft mit Yeehoowa ins kefoer is. Te aphostel Yoohan hot tas taytlich kelos: “Weer sayne pruuter net liipt, woo eyer siit, khan net Kot liipe, woo eyer net siit.” (1 Yo. 4:20) Was is ti lisyoon? Yeehoowa kefalt sich mit uns ploos wën mer eene te anere liipe. (Lees 1 Yoohan 4:7-9, b 11. c)

7-8. Was fer sin etliche aate wii mer khene liip eene tsu te anere tsayche?

⁷ In te Piipel, fine mer noo un noo tas kepoot fer “eene te anere liipe”. (Yoo. 15:12, 17; Rom. 13:8; 1 The. 4:9; 1 Phe. 1:22; 1 Yo. 4:11) Awer ti liip is een inerlich xpiirung woo nimant siin khan. Soo, wii khene mer unser liip tsu te priiter un xwestere tsayche? Torich unser wërter un aktsyoone.

⁸ Es kept fiile aate wii mer khene fer unser priiter un xwestere tsayche tas mer tëne liipe. Kuk mool etliche payxpiile: “Tuut ti woerheet eene mim anere xpreche.” (Sak. 8:16) “Halt te friit eene mit te anere.” (Mar. 9:50) “Tuut te eyerste xrit kepe fer ti anere eere.” (Rom. 12:10) “Tuut eene te aner hërtslich aan nëme.” (Rom. 15:7) “Tuut aych wayter naner (…) fertsaye.” (Kol. 3:13) “Tuut wayter ti laste eene fom anere nëme.” (Kal. 6:2) “Tuut aych wayter naner treeste.” (1 The. 4:18) “Tuut wayter eene ti anere ferxtërke.” (1 The. 5:11) “Peet eene fer ti anere.” (Tya. 5:16)

9. Warom is ti anere treeste een wichtich aat fer tëne liip tsayche? (Kuk aach tas pilt.)

⁹ Wole mer kuke eene fon te aate wii mer khene liip eene tsu te anere tsayche.  Phaul hot kesaat: “Tuut aych wayter naner treeste.” Warom is ti anere treeste een wichtich aat fer tëne liip tsayche? Tëm noo een piiplix puuch, tas wort woo Phaul penutst hot un woo iwersetst is “treeste”, petayt “pay yemant plaype fer tëm uf muute wën eyer am layte is weeche een xlim propleem”. Soo, wën mer een pruuter woo am layte is treeste, helfe mer tëm wayter Yeehoowa tiine. Yeetes mool woo mer unser pruuter treeste, tsayche mer tëm liip. (2 Kor. 7:6, 7, 13)

10. Was is ti ferpiinung tswixich mitlayt un troost?

¹⁰ Mitlayt xpiire un troost kepe, sin ticht ferpunt. Wii soo? Wën yemant am layte is, wil een mitlaytich persoon tëm treeste un etwas mache fer tëm helfe. Soo, eyerst xpiire mer mitlayt; tan kepe mer troost. Kuk mool wii Phaul ferpiint Yeehoowa sayn mitlayt mit tëm troost woo eyer kept. Phaul pexraypt Yeehoowa wii “te Fater fon te parmhërtslichkheet un te Kot fom kanse troost”. (2 Kor. 1:3) Too penutst Phaul tas wort “parmhërtslichkheet” fer se pexraype ti xpiirung fon mitlayt tsu te anere. Soo, weeche sayn xtark mitlayt tsu te layt, is Kot kenënt wii Fater, orer Kwel, fon te parmhërtslichkheet. Un tiise mitlayt tuut tëm uf muute “uns in al unser proope” treeste. (2 Kor. 1:4) Soo wii tas phuer waser fon een kwel ferxtërkt tii woo torst hon, tuut Yeehoowa ferxtërke un treeste tii woo propleeme hon. Wii khene mer Yeehoowa noo mache un mitlayt tsu te anere xpiire un tëne treeste? Een tings is kwaliteete ëntwikele woo uns helfe tas mache. Was fer sin etliche fon tiise kwaliteete?

11. Tëm noo Koloser 3:12 un 1 Pheeter 3:8, was fer anere kwaliteete tuun uns helfe ti anere wayter liipe un treeste?

¹¹ Was tuut uns helfe wayter eene te anere liipe un treeste? Meyer mise empatii, priiterlich liip, un fraayntlichkheet ëntwikele. (Lees Koloser 3:12; d 1 Pheeter 3:8. e) Wii tuun tiise kwaliteete uns helfe? Wën mer mitlayt tsu unser priiter xpiire un uns wërklich mit tëne khimere, tuun mer een xtarke wunx kriin fer tëne treeste wën se propleeme mit mache. Es is soo wii Yeesus kesaat hot: “Te munt xprecht fon was tas hërts fol is. Te kuute man hoolt kuute tinge raus fon sayn kuute xats.” (Mat. 12:34, 35) Ti neetich troost fer unser priiter un xwestere kepe, is een wichtich aat wii mer tëne liip tsayche khene.

12. (a) Warom mise mer uns uf phase? (b) Iwer was fer frooch xpreche mer yets?

¹² Meyer al wole wayter “eene te anere liipe”. (1 Yo. 4:7) Awer mer sole uns net ferkese was Yeesus kesaat hot: “Ti liip fon te meyerste [wërt] khalt.” (Mat. 24:12) Yeesus waar net am saan tas ti meyerste fon sayn tisipele teete noo lose sich naner liipe. Awer mer sole uns uf phase tas ti aanxtelung fon te welt uns net influentsiirt. Mit tas in unser ketanke, wole mer iwer tiise wichtich frooch xpreche: Was tuut uns helfe se wise ep unser liip tsu te priiter xtark is?

13. Wii khene mer wise ep unser liip tsu te priiter xtark is?

 ¹³ Een aat fer se wise ep unser liip xtark is, is unser aanxtelung in etliche situatsyoone noo kuke. (2 Kor. 8:8) Pheeter hot iwer eene fon tëne kexproch: “Iwer ales, tuut tiif liip eene tsu te anere hon, wayl ti liip tuut fiile sinte teke.” (1 Phe. 4:8) Yaa, ti xwacheete un imperfektsyoone fon te anere khene unser liip proope.

14. Tëm noo 1 Pheeter 4:8, was fer sort liip sole mer hon? Mach een ferklaychung.

¹⁴ Wole mer iwer Pheeter sayn wërter tenke. Tas eyerste teel fom wersikel 8 saat tas mer sole een “tiif liip” hon. Tas wort woo penutst is fer “tiif”, petayt “aus kextrekt” orer “aus kexpant”. Tas tsweete teel fom wersikel saat was mer mache wën mer tiise sort liip hon: ti tiif liip helft uns ti sinte fon unser priiter teke. Meyer khene tas soo ferklayche: xtel tich mool foer tas een tix fiile imperfektsyoone hot. Meyer khene een tix tuuch hoole un iwer te tix aus xpane. Soo, tuun mer net ploos eene orer tswaay imperfektsyoone teke, awer fiile. Kraat soo, wën mer een tiif liip tsu unser  priiter un xwestere hon, khene mer “teke” — orer fertsaye —, net ploos eene orer tswaay sinte, awer fiile.

15. Wën unser liip tsu te priiter un xwestere xtark is, was kriin mer kemacht? (Koloser 3:13)

¹⁵ Unser liip tsu te priiter sol soo xtark sin tas mer sayn imperfektsyoone fertsaye, soo kaar wën tas xweyer is. (Lees Koloser 3:13.) f Wën mer ti anere fertsaye, tsayche mer tas unser liip xtark is un tas mer wole Yeehoowa kefale. Was noch khan uns helfe ti anere sayn feeler fertsaye un net laycht pees too temit wëre?

16-17. Was noch tuut uns helfe ti kleene sinte fon unser priiter fertsaye? Mach een ferklaychung. (Kuk aach tas pilt.)

¹⁶ Hal tich traan aan te priiter sayn kwaliteete, net aan sayn imperfektsyoone. Wole mer een ferklaychung mache. Xtel tich mool foer tas tuu in een festche mit priiter un xwestere pist. Teyer al sayt froo un, am ën, tuust tuu een pilt ap nëme. In woerheet, tuust tuu 3 pilter ap nëme, wayl khan sin tas tas eyerste net kuut aus siit. In eene fon te pilter, mërkst tuu tas eene pruuter pees aus siit. Was machst tuu mit tiise pilt? Tuu tuust tas  aus wixe, wayl in te 2 anere pilter sin al am lache, te pruuter tepay.

¹⁷ Meyer khene ferklayche ti pilter woo mer net aus kewixt hon, mit te erinerunge woo mer hale. Sicher, khene mer uns traan tenke fon te kuute momënte woo mer mit unser priiter un xwestere aus kep hon. Awer wole mer saan tas in eene fon tiise momënte, een pruuter orer een xwester etwas kesaat orer kemacht hot woo net liiplich waar. Was sole mer mit tiise erinerung mache? “Aus wixe”, soo wii mer mit te eekliche pilter mache. (Xpr. 19:11; Ëfe. 4:32) Wën een pruuter was kleenes keeche uns macht, khene mer tas “aus wixe”, wayl mer tenke uns traan fon te fiile kuute momënte woo mer mit tëm hate. Tiise kuute erinerunge sole imer mit uns keen.

18. Was fer wichtiche phunkte iwer ti liip hon mer in tiise artikel kesiin?

¹⁸ Warom sole mer unser liip eene tsu te anere xtark hale? Wii mer kesiin hon, wën mer liip tsu te priiter un xwestere tsayche, tsayche mer liip tsu Yeehoowa. Wii tsayche mer liip tsu te priiter? Een tings is tëne treeste. Wën mer mitlayt tsu te anere xpiire, tuun mer “wayter [uns] naner treeste”. Wii khene mer unser liip eene tsu te anere xtark hale? Meyer sole unser pestes mache fer ti anere sayn feeler fertsaye, soo kaar wën tas xweyer is.

19. Warom is es hauptseechlich wichtich liip eene tsu te anere hayt se taach tsayche?

¹⁹ Warom is es hauptseechlich wichtich liip eene tsu te anere hayt se taach tsayche? Mërk mool ti uersach woo Pheeter kept: “Tas ën fon ales is ticht. Tes weeche (…), tuut tiif liip eene tsu te anere hon.” (1 Phe. 4:7, 8) Soo lang wii tas ën fon tiise xlecht welt imer tichter is, was khene mer waarte? Yeesus hot iwer sayn nookeener foer raus kesaat: “Ale natsyoone tuun aych hase weeche mayn naame.” (Mat. 24:9) Fer tiise has aus hale, mise mer eenich plaype. Wën mer unser priiter un xwestere liipe, tuut Satanaas nii es hin kriin uns aus naner mache, “wayl ti liip is ti perfekt aat fer ti eenichkheet samer hale”. (Kol. 3:14; Fili. 2:1, 2)