1. Was fer waar Isayas sayn pexeet fer ti israeliiter?

 TE PROFEET Isayas hot Yeehoowa pexrip wii “te Kot fon te woerheet”. Tas wort woo iwersetst is “woerheet” petayt “amen”. (Isa. 65:16, noote) “Amen” petayt “es sol soo pasiire” orer “sicher”. Tas wort “amen” is ofts in te Piipel penutst fer ti sicherheet kepe tas was Yeehoowa un Yeesus saan orer mache, woer is. Tes weeche, Isayas sayn pexeet fer ti israeliiter waar taytlich: meyer khene traue tas ales was Yeehoowa foer raus saat, pasiire tuut. Yawool, Kot erfiilt imer sayn ferxpreche.

2. (a) Warom khene mer aan Yeehoowa sayn ferxpreche fer te futuer traue? (b) Was fer frooche tuun mer in tiise artikel antworte?

² Khene mer aach traue tas Yeehoowa sayn ferxpreche iwer unser futuer sich erfiile tuun? Neekst 800 yoore noo Isayas sayn taache, hot te aphostel Phaul aus keleet warom meyer khene imer uf Kot sayn ferxpreche traue. Tee hot kesaat: ‘Es is unmeechlich tas Kot liie tuut.’ (Hep. 6:18) Tenk mool noo: een ranje paam khan net eple kepe. Kraat soo, wayl Yeehoowa ti Kwel fon te woerheet is, khan eyer net liie. Tes weeche, khene mer kans traue aan ales was eyer saat, too tepay sayn ferxpreche fer te futuer. In tiise artikel, antworte mer tiise frooche: Was hot Kot ferxproch uns im futuer kepe? Wii hot eyer uns sicher kelos tas eyer sayn ferxpreche erfiile tuut?

3. (a) Was fer ferxpreche hot fiil weyert fer Kot sayn tiiner? (Apokalipsis 21:3, 4) (b) Was tuun etliche saan wën mer iwer tiise ferxpreche mit tëne fertseele?

³ Tas ferxpreche woo mer noo kuke, hot fiil weyert fer al Kot sayn tiiner uf te kans welt. (Lees Apokalipsis 21:3, 4.) b Yeehoowa ferxprecht een tsayt woo es ‘khee mee toot, traurichkheet, krayxe un phayn kepe tuut’. Fiile fon uns leese tiise wersikele iwer tas leepe im Paratiis fer ti layt in te preetich aarwayt treeste. Was tuun etliche im xtant saan wën mer tas mache? “Tas heert sich tsu kuut aan fer woer sin.”

4. (a) Was wust Kot xon wii eyer sayn ferxpreche iwer tas Paratiis kemacht hot? (b) Mee wii een ferxpreche mache, was noch hot Yeehoowa uns kep?

⁴ Wii Yeehoowa te aphostel Yoohan kelenkt hot iwer tas ferxpreche fom Paratiis xraype, wust Kot xon tas mer hayt iwer tiise hofnung xpreche teete wën mer ti kuute notisye fer ti layt preetiche teete. Yeehoowa wust aach tas es weyer aarich xweyer fer etliche layt klaape tas tiise ënerunge wërklich im futuer pasiire tuun. (Isa. 42:9; 60:2; 2 Kor. 4:3, 4) Soo, wii khene mer ti anere helfe se siin tas ti ënerunge in Apokalipsis 21:3, 4 wërklich pasiire tuun? Un wii khene mer unser fertraung aan Yeehoowa un sayn ferxpreche ferxtërke? Kot hot net ploos tiise ufmuutiche ferxpreche kemacht; tee hot uns aach xtarke uersache kep fer se traue tas es sich erfiile tuut. Was fer uersache hot eyer kep?

5. Was fer wersikele kepe uns uersache fer se klaape aan Kot sayn ferxpreche un was tuun se saan?

⁵ Meyer fine uersache fer aan Kot sayn ferxpreche fom Paratiis klaape in te 2 neekste wersikele. Tii saan: “Tee, woo uf tëm troon kesitst waar, hot kesaat: ‘Kuk! Ich sin ale tinge nay am mache.’ Tee hot aach kesaat: ‘Xrayp, wayl tiise wërter sin troy un woer.’ Un tee hot mich kesaat: ‘Tii hon sich erfiilt! Ich sin te Alfa un te Oomeka, te aanfang un tas ën.’” (Apo. 21:5, 6 1^te teel)

6. Warom tuun ti wërter in Apokalipsis 21:5, 6 unser klaape aan Kot sayn ferxpreche ferxtërke?

⁶ Warom tuun tiise wërter unser klaape aan Yeehoowa sayn ferxpreche ferxtërke? In tiise wersikele, is es wii wën Yeehoowa een tokument unertsayche teet, woo karantiirt tas eyer sayn ferxpreche erfiile tuut. Kot sayn ferxpreche xteet in Apokalipsis 21:3, 4; awer in te wersikele 5 un 6, tuut eyer “unertsayche” was eyer ferxproch hot fer uns sicher lose tas es pasiire tuut. Wole mer siin ti wërter woo Kot penutst fer uns tiise karantii kepe.

7. Weer fangt aan se xpreche im wersikel 5, un warom is tas ekstra?

⁷ Te wersikel 5 fangt soo aan: “Tee, woo uf tëm troon kesitst waar, hot kesaat.” (Apo. 21:5 1^te teel) Tiise wërter sin wërklich ekstra, wayl tii tsayche tas Yeehoowa am xpreche is; im puuch Apokalipsis macht eyer tas ploos 3 mool. Soo, weer tiise karantii kept, is net een engel, noch net mool Yeesus, awer Yeehoowa selepst! Tas lost uns sicher tas mer klaape khene aan was Yeehoowa noo heyer saat. Warom is tas soo? Wayl Yeehoowa “net liie khan”. (Tit. 1:2) Soo ti wërter in Apokalipsis 21:5, 6 tuun sich sicher erfiile.

8. Wii tsaycht Yeehoowa tas eyer sayn ferxpreche erfiile tuut? (Isayas 46:10)

⁸ Yeehoowa saat tan: “Kuk!” (Apo. 21:5) Tas kreekix wort woo iwersetst is “kuk”, is noo un noo im puuch Apokalipsis penutst. Een referëns puuch saat tas tiise wort “is penutst kep fer se tsayche fer te leeser tas was neekst khomt, wichtich is”. Was hot Kot klaych tëm noo kesaat? “Ich sin ale tinge nay am mache.” Yeehoowa macht tiise ënerunge im futuer, awer tee is sich soo sicher tas eyer sayn ferxpreche erfiile tuut, tas eyer xprecht wii wën eyer tas xon am mache weyer. (Lees Isayas 46:10.) c

9. (a) Was wil Yeehoowa saan wën eyer aus xprecht tas eyer “ale tinge nay am mache” is? (b) Was tuut pasiire mit tëm “himel” un mit te “eyert” woo hayt eksistiire?

⁹ Yeehoowa saat aach in Apokalipsis 21:5: “Ich sin ale tinge nay am mache.” Was wil tas saan? In tiise kapitel, tas hot se tuun mit 2 tinge woo Yeehoowa macht. Eyerst: Yeehoowa tuut te alt sisteem fernichte. Tsweet: tee tuut een nay sisteem pringe. In Apokalipsis 21:1, leese mer tas “te ferkangne himel un ti ferkangne eyert sin rom kang”. “Te ferkangne himel” hot se tuun mit rechiirunge woo fon Satanaas un sayn temoone influentsiirt sin. (Mat. 4:8, 9; 1 Yo. 5:19) In te Piipel, tas wort “eyert” khan ti eyert sayn pewooner petayte. (Xee. 11:1; Psal. 96:1) Soo, “ti ferkangne eyert” representiirt ti xlechte layt woo hayt leepe. Yeehoowa tuut net ploos te “himel” un ti “eyert” woo hayt eksistiire, peser lose. Xtats tas, tuut Kot se fernichte; tan tuut eyer “een naye himel un een nay eyert” pringe — es wil saan, een nay rechiirung tuut iwer ti kerechte layt rechiire.

10. Was tuut Yeehoowa nay mache?

¹⁰ Wii noch tuut Kot ‘ale tinge nay mache’? (Apo. 21:5) Tee tuut ti eyert un ti mënxe heele tas se perfekt wëre. Soo wii Isayas profetisiirt hot, macht Kot fon te kans eyert een xeen plats, soo wii te Eetem kaate. Un tee tuut uns aach nay mache: meyer al wëre kans keheelt, too tepay ti laame, ti plinte un ti taape. Un soo kaar ti toote wëre tsurik tsum leepe keprung. (Isa. 25:8; 35:1-7)

11. Was hot Yeehoowa Yoohan kexikt se mache un warom?

¹¹ Was noch is teel fon Kot sayn karantii? Tee hot fer Yoohan kesaat: “Xrayp, wayl tiise wërter sin troy un woer.” (Apo. 21:5) Kot hot mee kemacht wii ploos Yoohan xike se xraype — Tee hot een uersach kep. Yeehoowa hot kesaat: “Wayl tiise wërter sin troy un woer” — es wil saan, Kot sayn wërter sin kenau un mer khene uf tëne traue. Meyer sin petanklich tas Yoohan Yeehoowa aan keheert hot, wayl soo, khene mer Kot sayn ferxpreche iwer tas Paratiis leese un aach triwer noo tenke aan te wunerliche seechen woo mer kriin tuun.

12. Warom hot Yeehoowa kesaat: “Tii hon sich erfiilt”?

¹² Was saat Kot tan? “Tii hon sich erfiilt!” (Apo. 21:6) Warom hot Yeehoowa kesaat tas tiise ferxpreche sich xon erfiilt hate? Wayl niks khan Yeehoowa um hale sayn tsiil erfiile. Tan saat Yeehoowa was aneres woo uns sicher lost tas eyer sayn ferxpreche wërklich erfiile tuut. Was hot eyer kesaat?

13. Warom hot Yeehoowa kesaat: “Ich sin te Alfa un te Oomeka”?

¹³ Wii mer eente kesaat hon, hot Yeehoowa 3 mool kexproch in Yoohan sayn wisyoone. (Apo. 1:8; 21:5, 6; 22:13) Yeetes mool, hot Yeehoowa aus kexproch: “Ich sin te Alfa un te Oomeka.” Alfa is te eyerste puuchxtaap fom kreekix alfapët; oomeka is te letst. Wën Yeehoowa saat tas eyer “te Alfa un te Oomeka” is, helft eyer uns ferxteen tas wën eyer etwas aan fangt, pringt eyer tas fërtich.

14. (a) Wanee hot Yeehoowa “Alfa” kesaat un wanee tuut eyer “Oomeka” saan? (b) Was fer karantii fine mer in Xeenesis 2:1-3?

¹⁴ Noo tas Yeehoowa Aatam un Ewa kemacht hot, hot Eyer tëne kesaat was sayn tsiil fer ti mënxe un ti eyert waar. Ti Piipel saat: “Kot [hot] tii keseechent un Kot hot tsu tëne kesaat: ‘Tuut khiner kriin, un wërt fiil un macht ti Eyert fol, un tuut se aych iwernëme.’” (Xee. 1:28) In tiise momënt, is es wii wën Yeehoowa “Alfa” saan teet. Ti tsayt teet khome wën foliche un perfekte nookhomer fon Aatam un Ewa teete ti eyert fol lose un se tsu een paratiis mache. Wën Kot sayn tsiil erfiilt wërt, wërts wii wën Yeehoowa “Oomeka” saan teet. Noo tas Yeehoowa “te himel, ti eyert un ales in tëne fërtich kemacht” hot, hot eyer een karantii kep, woo in Xeenesis 2:1-3 d xteet. (Lees.) Yeehoowa hot kesaat tas te 7^te taach haylich waar. Was wil tas saan? Yeehoowa hot te 7^te taach kextelt fer sayn tsiil fer ti mënxe un ti eyert erfiile.  Soo, wën eyer te 7^te taach haylich kemacht hot, is es wii wën eyer am saan weyer tas sayn tsiil sich erfiile teet am ën fon tiise taach.

15. Warom khent Satanaas ketenkt hon tas eyer Yeehoowa um kehal hat sayn tsiil erfiile?

¹⁵ Noo tas Aatam un Ewa sich repeliirt hon, sin se sintiche layt kep un sayn nookhomer hon ti sint un te toot keërpt. (Rom. 5:12) Tes weeche, khont es aus kesiin hon tas Satanaas Yeehoowa sayn tsiil — ti eyert fol mache mit foliche un perfekte layt — fersaut hat. Khont Satanaas Yeehoowa um hale sayn ferxpreche erfiile? Fiilaycht hot Satanaas ketenkt tas Kot net fiiles mache khent fer sayn ferxpreche erfiile. Im xtant, hot eyer ketenkt: ‘Kot tuut Aatam un Ewa um pringe un een aner perfekt pheyerche mache fer sayn tsiil fer ti mënxe erfiile.’ Awer wën Kot tas kemacht hët, hët te Taywel kesaat tas Yeehoowa een liichner weyer. Warom? Wayl tëm noo Xeenesis 1:28, hat Yeehoowa fer Aatam un Ewa kesaat tas tëne sayn nookhomer teete ti eyert fol mache.

16. Warom hot Satanaas fiilaycht ketenkt tas eyer saan khont tas Yeehoowa es net hin kriit hot sayn tsiil erfiile?

¹⁶ Was fer aner ëntxlus hot Satanaas fiilaycht ketenkt tas Yeehoowa mache khent? Fiilaycht hot eyer ketenkt tas Yeehoowa Aatam un Ewa erlaupe teet khiner kriin, awer woo teete nii perfekt wëre. (Ekl. 7:20; Rom. 3:23) Wën es soo weyer, khent te Taywel saan tas Yeehoowa es net hin kriit hot sayn tsiil erfiile: ti eyert fol lose mit foliche un perfekte nookhomer fon Aatam un Ewa.

17. (a) Was fer solutsyoon hot Yeehoowa kep fer ti repelyoon fon Satanaas un ti eyerste mënxe? (b) Was tuut am ën pasiire? (Kuk aach tas pilt.)

¹⁷ Satanaas khent sich nii foer xtele was Yeehoowa mache teet. Kot hot ti pest solutsyoon kefun fer sayn tsiil erfiile, opwool Satanaas, Aatam un Ewa sich repeliirt hon. (Psal. 92:5) Yeehoowa hot erlaupt tas Aatam un Ewa khiner kreechte un soo hon Sayn wërter sich erfiilt — Tee waar net een liichner. Un Yeehoowa hot ketsaycht tas wën eyer saat tas eyer etwas macht, niks khan tëm um hale. Tee hot sich sicher kelos tas sayn tsiil sich erfiile teet wën eyer een “nookhomer” fersoricht hot, woo ti foliche nookhomer fon Aatam un Ewa rete teet. (Xee. 3:15; 22:18) Sicher hot Satanaas net ketenkt tas Kot een fray khaaf opfer kepe teet. Warom? Wayl tiise  opfer xtaypt sich aan te krooshërtslich liip un Satanaas is ekoiistix, net krooshërtslich. (Mat. 20:28; Yoo. 3:16) Was tuut pasiire weeche tas fray khaaf opfer? Am ën fon Yeesus Kristus sayn Tausent Yoore Rechiirung, tuun ti foliche, perfekte nookhomer fon Aatam un Ewa uf een paratiis too uf te eyert leepe — soo wii Kot am aanfang kesaat hot. In tiise tsayt, wërt es wii wën Yeehoowa “Oomeka” saan teet.

18. Was fer 3 uersache hon mer fer se klaape tas Kot sayn ferxpreche sich erfiile tuut? (Kuk aach te khaste “ Tray uersache fer se klaape aan Kot sayn ferxpreche”.)

¹⁸ In tiise artikel, hon mer kesiin etliche uersache woo uns sicher lose tas ti eyert een paratiis wërt. Was khene mer fer ti anere layt saan fer tëne sicher lose tas tas wërklich pasiire tuut? Eyerst: Yeehoowa selepst hot tiise ferxpreche kemacht. Apokalipsis saat: “Tee, woo uf tëm troon kesitst waar, hot kesaat: ‘Kuk! Ich sin ale tinge nay am mache.’” Kot hot ti kluucheet, ti kraft un te wunx fer sayn ferxpreche erfiile. Tsweet: Yeehoowa wees tas was eyer kesaat hot, sicher pasiirt. Tes weeche hot eyer aus kexproch: “Tiise wërter sin troy un woer. (…) Tii hon sich erfiilt!” Trit: wën Yeehoowa aan fangt etwas mache, niks khan tëm um hale tas fërtich pringe. Tes weeche hot eyer kesaat: “Ich sin te Alfa un te Oomeka.” Yeehoowa tuut pewayse tas Satanaas een liichner is woo Tëm net um hale khan Sayn tsiil erfiile.

19. Wën ti layt es xweyer fine se klaape aan Kot sayn ferxpreche fom Paratiis, was khanst tuu mache?

¹⁹ Eriner tich: yeetes mool woos tuu mit te anere fertseelst iwer was Yeehoowa kesaat hot fer uns sicher lose tas sayn ferxpreche sich erfiile tuun, ferxtërkst tuu tayn aychne fertraung uf tëm. Soo, tas neekste mool woos tuu leest tas ufmuutiche ferxpreche iwer tas Paratiis in Apokalipsis 21:4 un yemant tich saat: “Tas heert sich tsu kuut aan fer woer sin”, was khanst tuu mache? Tuu khanst tëm ti wersikele 5 un 6 leese un aus leye. Tsaych tëm tas Yeehoowa selepst tuut sayn ferxpreche “unertsayche”. (Isa. 65:16)