XTUUTYUM ARTIKEL 46
LIIT 49 Ich mache Yeehoowa sayn hërts froo
Pruuter, teest tuu kërn een ministeryaale tiiner wëre?
“Kepe pringt mee frooheet wii kriin.” (APHOSTELE SAYN KEXICHT 20:35)
WAS TUUN MER SIIN?
Tiise artikel helft ti ketaafte priiter sich kwalifitsiire un aach te wunx kriin fer een ministeryaale tiiner wëre.
1. Was hot te aphostel Phaul iwer ti ministeryaale tiiner ketenkt?
TI MINISTERYAALE tiiner mache een wichtich aarwayt in te kemaynt. Te aphostel Phaul hot fiil weyert fer tiise troye priiter kep. Tsum payxpiil, wii eyer fer ti kriste in Filipos kexrip hot, hot eyer net ploos ti elteste kekriis, awer aach ti ministeryaale tiiner. (Fili. 1:1)
2. Wii tuut te pruuter Luis sich xpiire iwer een ministeryaale tiiner sin?
2 Fiile ketaafte priiter, ekaal sayn elter, tuun sich mechtich fraye wayl se wii ministeryaale tiiner in te kemaynt xafe khene. Tsum payxpiil, Devan waar 18 yoore alt wii eyer een ministeryaale tiiner kep is. Im keeche teel, Luis is een ministeryaale tiiner kep wii eyer xon mee wii 50 yoore hat. Wii xpiirt eyer sich too triwer? “Ich sin aarich froo — saat eyer — tas ich ti priiter un xwestere in te kemaynt soo tiine khan. Tii hon mich soo fiil liip ketsaycht un yets hon ich ti xans fer mayn liip tëne tsayche.” Fiile ministeryaale tiiner tuun sich kraat soo xpiire.
3. Was fer frooche tuun mer in tiise artikel antworte?
3 Wëns tuu een ketaafte pruuter pist awer noch net een ministeryaale tiiner, khanst tuu tiise tsiil xtele? Was khan tich uf muute tas mache? Un tëm noo te Piipel, was fer kwaliteete must tuu hon fer een ministeryaale tiiner wëre? In tiise artikel, tuun mer ti antworte fer tiise frooche noo kuke. Awer eyerst wole mer xpreche iwer ti sort aarwayt woo een ministeryaale tiiner macht.
WAS MACHT EEN MINISTERYAALE TIINER?
4. Was tuun ti ministeryaale tiiner in te kemaynt mache? (Kuk aach tas pilt.)
4 Een ministeryaale tiiner is een ketaafte pruuter woo torich te hayliche kayst in kesetst kep is fer ti elteste in te kemaynt helfe wichtiche flichte uf phase. Etliche ministeryaale tiiner xafe tas ti priiter kenuuch teritoorye un puplikatsyoone fer ti preetich aarwayt hon. Anere helfe te Raych Saal sauwer mache un in te ray lose. Ti ministeryaale tiiner xafe aach wii intikatoore un hantele ti autyo un wiiteo ekipamënte in te fersamlunge. Awer tas haupste: ti ministeryaale tiiner sin mëner woo Yeehoowa liipe un tëm kefale in sayn leepe. Tii liipe aach sayn priiter un xwestere aarich fiil. (Mat. 22:37-39) Awer wii khan een ketaafte pruuter sich kwalifitsiire fer een ministeryaale tiiner wëre?
Wën ti ministeryaale tiiner ti anere helfe wole, mache se Yeesus noo (Kuk te apsats 4.)
5. Was khan een pruuter mache wën eyer wil een ministeryaale tiiner wëre?
5 In te Piipel, fine mer ti kwaliteete woo een pruuter hon mus fer een ministeryaale tiiner wëre. (1 Tim. 3:8-10, 12, 13) Wëns tuu tiise tsiil erayche wilst, lërn soo fiil wiis tuu khanst iwer tiise kwaliteete un tan xtreng tich aan fer tëne ëntwikele. Awer eyerst, must tuu tich frooe warom wilst tuu een ministeryaale tiiner wëre.
WAROM WILST TUU EEN MINISTERYAALE TIINER SIN?
6. Was sol ti uersach sin warom tuu ti priiter un xwestere tiine wilst? (Matheus 20:28; kuk aach tas pilt.)
6 Tenk iwer unser kreeste payxpiil: Yeesus. Ales was eyer kemacht hot, waar weeche liip tsu sayn Fater un ti anere. Tiise liip hot tëm uf kemuut xtram xafe un keweenliche tinge fer ti anere mache. (Lees Matheus 20:28; a Yoo. 13:5, 14, 15.) Wëns tuu wilst een ministeryaale tiiner wëre weeche liip, tuut Yeehoowa tich seechne un tich helfe tayn tsiil erayche. (1 Kor. 16:14; 1 Phe. 5:5)
Torich sayn payxpiil, tuut Yeesus sayn aphostele in lërne ti anere teemuutich tiine xtats fersuuche ti wichtichste sin (Kuk te apsats 6.)
7. Warom is es ferkheert een ministeryaale tiiner wëre wole, ploos fer loop kriin?
7 In te welt, tuun ti layt ofts loope tii woo sich aan xtrenge fer wichtich aus siin. Awer Yeehoowa sayn tiiner sin net soo. Een pruuter woo, soo wii Yeesus, ti anere liipt, wil net iwer tëne xike orer wichtich foer tëne aus siin. Was khent pasiire wën soo een sort persoon wii ministeryaale tiiner in kesetst weyer? Fiilaycht weyer tee net wilich fer etliche keweenliche flichte erfiile, woo neetich sin fer Yeehoowa sayn liipe xeef uf phase. Tee khent tenke tas eyer tsu wichtich is fer soo was mache. (Yoo. 10:12) Wën een persoon wil wichtich foer ti anere aus siin, tuut Yeehoowa tëm sayn aanxtrengung net seechne. (1 Kor. 10:24, 33; 13:4, 5)
8. Was fer aanreet hot Yeesus fer sayn aphostele kep?
8 Als mool, soo kaar etliche fon Yeesus sayn tichte fraaynte wolte priwilëje kriin weeche ferkheerte uersache. Tenk tich traan was ti aphostele Tyako un Yoohan kemacht hon. Tii hon Yeesus ferlangt tëne een wichtich xtel in sayn Raych kepe. Yeesus hot se net too teweeche keloopt. Xtats tas, hot eyer fer sayn 12 aphostele aus keleet: “Weer wil kroos tswixich aych sin, mus ti anere tiine; un weer wil te eyerste tswixich aych sin, mus sklaaw fon al ti anere sin.” (Mar. 10:35-37, 43, 44) Ti priiter woo ti richtich motiwatsyoon hon — te wunx fer ti anere tiine — tuun ti kemaynt fiil helfe. (1 The. 2:8)
WII KHANST TUU TAYN WUNX FERXTËRKE FER TAYN PRIITER TIINE?
9. Wii khanst tuu tayn wunx ferxtërke fer een ministeryaale tiiner wëre?
9 Kewis liipst tuu Yeehoowa un tuu wilst ti anere tiine. Awer fiilaycht es feelt tich te wunx fer ti aarwayt fon een ministeryaale tiiner mache. Wii khanst tuu tayn wunx ferxtërke fer ti anere tiine? Tenk iwer ti frooheet woos tuu kriist wëns tuu fer tayn priiter un xwestere xafst. Yeesus hot kesaat: “Kepe pringt mee frooheet wii kriin.” (Aph. 20:35) Yeesus selepst hot tiise wërter aan kewënt. Tee waar mechtich froo wayl eyer ti anere ketiint hot un tuu khanst tiise selwich frooheet kriin.
10. Wii hot Yeesus ketsaycht tas ti anere tiine tëm froo kelos hot? (Markus 6:31-34)
10 Mërk mool een payxpiil woo tsaycht tas Yeesus froo waar wii eyer ti anere ketiint hot. (Lees Markus 6:31-34.) b Een mool waare Yeesus un sayn aphostele aarich miit. Tii wolte tan tsu een apkeleechen plats keen fer een pisye ruue. Awer phaar layt sin eente tat hin khom, wayl se wolte fon Yeesus in kelërnt wëre. Yeesus khent tëne “nee” kesaat hon, wayl tee un sayn aphostele hate khee tsayt “noch net mool fer se ese”. Orer Yeesus khent ti layt eene orer tswaay tinge in lërne un tan se faart xike. Awer weeche liip, hot eyer “aan kefang tëne fiil tings in se lërne”. Un tee hot tas wayter kemacht pis es “xon xpeet” waar. (Mar. 6:35) Yeesus hot es net kemacht wayl eyer sich ketswung kexpiirt hot, awer wayl eyer ti layt ketauert hot. Tee wolt se in lërne weeche sayn liip tsu tëne. Ti anere tiine, hot Yeesus imer froo kelos.
11. Wii hot Yeesus praktix hilef fer ti layt kep? (Kuk aach tas pilt.)
11 Yeesus hot ti layt keholef wii eyer se iwer Kot in kelërnt hot. Awer tee hot se aach praktix hilef kep. Tee hot, tsum payxpiil, ese fersoricht un tan sayn tisipele kexikt es petiine. (Mar. 6:41) Soo hot eyer sayn tisipele in kelërnt wii ti anere tiine. Tee hot aach ketsaycht tas soo sorte aarwayte wichtich sin — ti selwich sorte aarwayte woo ti ministeryaale tiine mache khene. Tenk iwer ti frooheet woo ti aphostele kexpiirt hon wii se mit Yeesus kexaft hon fer ese mit te layt teele pis se ‘al kes hon un sat kep sin’. (Mar. 6:42) Tas is ploos een payxpiil woo tsaycht wii Yeesus ti neetichkheete fon te anere foer sayn aychne kextelt hot. Tee hot tas kemacht torich sayn kanse leepe too uf te eyert. (Mat. 4:23; 8:16) Yeesus is froo kep wii eyer ti anere in kelërnt hot un sayn neetichkheete uf kephast hot. Tuu tuust aach fiil frooheet kriin wëns tuu wilich pist fer ti anere helfe wii ministeryaale tiiner.
Wëns tuu Yeehoowa liipst un wilst ti anere tiine, es tuut tich uf muute tayn priiter un xwestere helfe (Kuk te apsats 11.) f
12. Warom sole mer net tenke tas mer khee apiliteet hon fer ti kemaynt helfe?
12 Wëns tuu tenkst tas tuu khee apiliteet host, playp net oone muut. Sicher host tuu apiliteete woos tuu penutse khanst fer ti kemaynt helfe. Lees Phaul sayn wërter in 1 Korinter 12:12-30 un ferlang Yeehoowa sayn hilef fer se siin wii tiise wërter fer tich phase. Phaul sayn wërter lose es taytlich tas tuu un al ti anere priiter neetich un weyertlich in te kemaynt sin. Wëns tuu yets net kwalifitsiirt pist fer een ministeryaale tiiner wëre, kep net uf. Xtats tas, mach tayn pestes fer Yeehoowa tiine un tayn priiter helfe. Say tich sicher tas ti elteste tich flichte kepe tuun woo mit tayn apiliteete xtime, eeps tuu een ministeryaale tiiner wërst. (Rom. 12:4-8)
13. Was khene mer saan iwer ti meyerste kwaliteete woo ti inkexteltne mëner hon mise?
13 Tenk aach iwer tiise phunkt: ti meyerste kwaliteete woo ti Piipel fon te ministeryaale tiiner ferlangt, sin kwaliteete woo al ti kriste ëntwikele sole. Al ti kriste sole ticht pay Yeehoowa khome, mit frooheet fer ti anere kepe un een leepe nëme woo Yeehoowa kefalt. Soo, tsiimlich sicher, host tuu xon ti meyerste kwaliteete ëntwikelt woo neetich sin fer een ministeryaale tiiner wëre. Awer was khan een pruuter mache fer tiise tsiil trefe?
WAS KHANST TUU MACHE?
14. Was petayt “ërnst sin”? (1 Timoteus 3:8-10, 12)
14 Wole mer yets noo kuke etliche kwaliteete fon 1 Timoteus 3:8-10, c 12. d (Lees.) Een ministeryaale tiiner mus “ërnst sin”. Tas khan aach iwersetst wëre wii “sich kexayt aan xtele, in een aat woo respekt fertiint”. Es wil net saan tas tuu khanst nii lache orer xpas hon. (Ekl. 3:1, 4) Awer tuu must xtram xafe fer al tayn responsapiliteete erfiile. Wëns tuu tayn flichte imer fërtich pringst un tas kuut machst, tuun ti priiter mërke tas se uf tich traue khene un tas tuut se uf muute tich respektiire.
15. (a) Was petayt “sayn wort in hale”? (b) Was petayt sich “net kiirich aan xtrenge fer uneerliche kelt fertiine”?
15 “Sayn wort in hale” petayt eerlich sin. Tuu machst was tuu ferxproch host un tuu tuust net fer ti anere liie. (Xpr. 3:32) “Sich (…) net kiirich aan xtrenge fer uneerliche kelt fertiine” petayt eerlich sin in tayn kexefte mit te anere un aach in te aat wiis tuu kelt hantele tuust. Tuu tuust net tayn fraayntxaft mit te priiter in te kemaynt penutse fer kelt fertiine.
16. (a) Was petayt “net tsu fiil wayn trinke”? (b) Was petayt “een sauwer kewise” hon?
16 “Net tsu fiil wayn trinke” petayt net tsu fiil alkohool trinke orer pekhant sin wii yemant woo saufe tuut. “Een sauwer kewise” hon, petayt tas tuu leepst tëm noo Kot sayn kesetse. Tuu pist net perfekt, awer tuu host een xtark fraayntxaft mit Yeehoowa un tas kept tich inerlich friit.
17. Was petayt tas yemant mus “noo kekukt wëre op [eyer] kwalifitsiirt” is? (1 Timoteus 3:10; kuk aach tas pilt.)
17 “Noo kekukt wëre op se kwalifitsiirt sin” petayt tas ti elteste xon kemërkt hon tas tuu tayn flichte kuut erfiile khanst un tas se uf tich traue khene. Soo, wën ti elteste tich een flicht kepe, tuu tëne sayn oryentiirunge un aach ti oryentiirunge fon te Orkanisatsyoon ticht noo keen. Los tich sicher tas tuu weest wiis tuu tas mache solst un wanee ti aarwayt fërtich wëre sol. Wëns tuu tayn flichte in te kemaynt flaysich erfiilst, tuun ti priiter mërke tas tuu foran keest. Elteste, xtrengt aych aan fer ti ketaafte priiter iipe. (Lees 1 Timoteus 3:10.) e Kept es ketaafte priiter in tayn kemaynt woo 10 pis 14 yoore alt orer noch yinger sin? Hon se een kuut rutiin fer ti Piipel xtutiire un sich foer perayte fer ti fersamlunge? Tuun se reeklich antworte in te fersamlunge kepe un in te preetich aarwayt xafe? Wën yaa, kep tëne flichte woo mit sayn elter un situatsyoon phase. Soo khene se “noo kekukt wëre op se kwalifitsiirt sin”. Soo, wën se 17 pis 19 yoore alt wëre, wëre se tsiimlich sicher fërtich fer ministeryaale tiiner sin.
Ti elteste khene flichte fer ti priiter kepe fer se siin “op se kwalifitsiirt sin” (Kuk te apsats 17.)
18. Was petayt “fray fon xult sin”?
18 “Fray fon xult sin” petayt tas nimant uersache hot fer tich akusiire een ferkheert aanxtelung hon. Kewis khene ti kriste falx akusiirt sin. Ti layt hon tas mit Yeesus kemacht un tee hot kesaat tas se teete tas selwiche mit tëm sayn nookeener mache. (Yoo. 15:20) Awer wëns tuu tayn aanxtelung rayn halst, soo wii Yeesus kemacht hot, tuust tuu een kuute naame in te kemaynt kriin. (Mat. 11:19)
19. Was is tepay aan te wërter “mëner sin fon ploos een fraa”?
19 “Mëner sin fon ploos een fraa.” Wii Yeehoowa ti eyerst hayrat in kextelt hot, hot eyer kesaat tas ti hayrat solt tswixich eene man un een fraa sin. Tas is was al ti kriste foliche mise. (Mat. 19:3-9) Een kristliche man sol nii seksuaal imoraaliteet mache. (Hep. 13:4) Awer is net ploos tas. Tuu must troy tsu tayn fraa sin un nii romantix interes aan anere fraae tsayche. (Yoop 31:1)
20. Wii tuut een pruuter sayn “familye kuut fiire”?
20 “[Tii] mise iire khiner un aychne familye kuut fiire.” Wëns tuu een familye xëf pist, must tuu tayn responsapiliteete ërnst erfiile. Tuu ti familye aanpeetung reeklich fiire. Preetich mit tayn fraa un khiner soo ofts wiis tuu khanst. Helf tayn khiner een perseenlich fraayntxaft mit Yeehoowa ëntwikele. (Ëfe. 6:4) Eene man woo sayn familye uf phast, tsaycht tas eyer aach ti kemaynt uf phase khan. (Kuk aach 1 Timoteus 3:5.)
21. Wëns tuu noch net een ministeryaale tiiner pist, was khanst tuu mache?
21 Pruuter, wëns tuu noch net een ministeryaale tiiner pist, pite, lees tiise artikel mit acht un peet tsu Yeehoowa too triwer. Xtutiir ti kwaliteete woos tuu hon must un xtreng tich aan fer tëne ëntwikele. Ferxtërk tayn liip tsu Yeehoowa un ti priiter un tenk iwer ti uersache warom tuu tëne tiine wilst. (1 Phe. 4:8, 10) Tayn priiter un xwestere tiine, tuut tich sicher fiil frooheet pringe. Meyer winxe tas Yeehoowa tayn aanxtrengung seechent fer een ministeryaale tiiner wëre! (Fili. 2:13)
LIIT 17 “Ich wil es!”
a (Matheus 20:28) kraat soo wii te Mënxe Soon khom is, net fer petiint se wëre, awer fer se tiine un sayn leepe kepe wii een opfer fer fiile fray se khaafe.”
b (Markus 6:31-34) Un tee hot tëne kesaat: “Khomt mit meer un wole mer pis een ruych plats keen fer een pisye ruue.” Wayl tat es waare fiile layt woo khom un kang sin, un noch net mool fer se ese, hate se tsayt. 32 Tes weeche, in een xif, sin se tsu een plats kang woo khee layt waare, tas se khonte aleen plaype. 33 Awer ti layt hon se kesiin wech keen, un fiile hon tas tsum wise kriit. Un tii sin tsu fuus fon ale xtete khom un sin eente wii tii tat hin khom. 34 Wii Yeesus aus kextii is, hot eyer een kroos folek kesiin un hot se ketauert, wayl se wii xeef oone xeefer waare. Un tee hot aan kefang tëne fiil tings in se lërne.
c (1 Timoteus 3:8-10) Kraat soo, sole ti ministeryaale tiiner ërnst sin un mëner woo sayn wort in hale. Tii sole net tsu fiil wayn trinke un sich aach net kiirich aan xtrenge fer uneerliche kelt fertiine. 9 Tii sole sich aan xtrenge fer sich in te haylich kehaymnis fom klaape hale mit een sauwer kewise. 10 Awer eyerst, sole se noo kekukt wëre op se kwalifitsiirt sin. Tan, wën se fray fon xult sin, sole se wii tiiner xafe.
d (1 Timoteus 3:12) Ti ministeryaale tiiner sole mëner sin fon ploos een fraa un mise iire khiner un aychne familye kuut fiire.
e (1 Timoteus 3:10) Awer eyerst, sole se noo kekukt wëre op se kwalifitsiirt sin. Tan, wën se fray fon xult sin, sole se wii tiiner xafe.
f PILT AUSLEYUNG: In te links sayt: Yeesus tuut sayn tisipele mit teemuut tiine. In te recht sayt: een ministeryaale tiiner helft een elter pruuter fon te kemaynt.
