XTUUTYUM ARTIKEL 44
LIIT 33 ‘Xmays tayn laste uf Yeehoowa’
Wii khene mer mit te unkerechtichkheet um keen?
“Los tich net fom xlechtes kewine. Awer tuu wayter tas xlechtes mit tëm kuutes ap kewine.” (ROMAANER 12:21)
WAS TUUN MER SIIN?
Wii mer uns aan xtele sole wën mer unkerechtichkheet mit mache.
1-2. In was fer aate khene mer unkerecht pehantelt wëre?
YEESUS hot een kexicht iwer een witfraa fertseelt. Tii hot noo un noo hilef fer een richter ferlangt wayl yemant se unkerecht pehantelt hot. Yeesus sayn tisipele khonte sicher ferxteen wii tiise fraa sich kexpiirt hot, wayl ofts ti keweenliche layt in tiise tsayt unkerecht pehantelt waare. (Luk. 18:1-5) Meyer khene aach tiise xpiirunge ferxteen, wayl meyer al hon xon unkerechtichkheet mit kemacht.
2 In te welt hayt, siit ma prekonseyt, kropheet un kiirichkheet iweraal. Tes weeche, wën mer xlecht pehantelt sin, es ferxrok uns net. (Ekl. 5:8) Awer wën tas fon een pruuter orer xwester khomt, es khan uns mechtich traurich lose. Kewis unser priiter un xwestere tuun uns net fer kërn unkerecht pehantele. Tii sin aynfach imperfekt. Wën mer ketultich sole sin mit te keechner woo uns xlecht pehantele, sole mer noch fiil ketulticher sin mit te priiter un xwestere. Meyer khene fiil lërne mit te aat wii Yeesus sich aan kextelt hot wii eyer unkerechtichkheet kelit hot in te hant fon te keechner. Wii meecht Yeehoowa sich xpiire wën eene pruuter orer yemant aneres uns unkerecht pehantelt? Meecht Eyer sich too temit khimere?
3. Wii wise mer tas Yeehoowa sich khimere tuut wën mer unkerecht pehantelt sin?
3 Yeehoowa wil hon tas mer kuut pehantelt wëre un tee mërkt wën yemant unkerecht mit uns is. “Yeehoowa liipt ti kerechtichkheet.” (Psal. 37:28) Yeesus lost uns sicher tas Yeehoowa ti kerechtichkheet in te richtich tsayt xnel pringe tuut. (Luk. 18:7, 8) Klaych, tuut eyer al unser xwiirichkheete wech nëme; un ti kanse unkerechtichkheete wëre ferpay. (Psal. 72:1, 2)
4. Was fer hilef kept uns Yeehoowa hayt?
4 Opwool mer waarte mise ti tsayt wën Yeehoowa ti kans unkerechtichkheet tsum ën pringt, tuut eyer uns xon hayt helfe. (2 Phe. 3:13) Tsum payxpiil: tee tsaycht uns wii mer uns aan xtele sole wën mer unkerecht pehantelt sin, tas mer te propleem net kreeser lose. Een aat wii Eyer tas macht, is torich tas payxpiil fon sayn Soon, woo ti pest aanxtelung hat foer te unkerechtichkheet. Yeehoowa kept uns aach aanreete iwer was se mache wën mer unkerecht pehantelt sin.
PHAS UF MIT TAYN AANXTELUNG FOER TE UNKERECHTICHKHEET
5. Warom sole mer uf phase ti aat wii mer uns foer te unkerechtichkheet aan xtele?
5 Ti unkerechtichkheet khan uns pelayticht orer unruych lose. (Ekl. 7:7) Troye tiiner, soo wii Yoop un Hapakuk, hon sich kraat soo kexpiirt. (Yoop 6:2, 3; Hap. 1:1-3) Opwool es normaal is sich soo xpiire, mise mer uf phase fer net etwas mache woo te propleem noch xlimer lose tuut.
6. Was lërne mer mit Apsaloon sayn payxpiil? (Kuk aach tas pilt.)
6 Wën yemant unkerecht is, fiilaycht wole mer mit te selwich nikel tsurik petsaale. Awer tas khent ti situatsyoon noch xlimer lose. Kuk tas payxpiil fon Apsaloon, soon fom kheenich Tawi. Apsaloon sayn xtif pruuter, Amnom, hot sayn xwester Tamar seksuaal iwerfal. Tëm noo tas mosayxe Kesets, must Amnom um keprung wëre. (Lew. 20:17) Apsaloon is mechtich pees kep! Awer opwool eyer tas recht hat fer wuutich wëre, hat eyer net tas recht fer ti sache mit sayn aychne hënt resolwiire. (2 Sam. 13:20-23, 28, 29)
Apsaloon hot net sayn wuut kontroliirt wii Tamar unkerecht pehantelt waar (Kuk te apsats 6.)
7. Wii hot te psalmist sich am aanfang aan kextelt wii eyer ti unkerechtichkheet kesiin hot?
7 Wën es aus siit tas tii woo unkerecht sin, net kextrooft wëre, khene mer aan fange se tenke tas tas richtiches mache, umsonst is. Fer eene fon Yeehoowa sayn tiiner hot es aus kesiin tas ti xlechte froo waare, opwool se ti kuute layt unkerecht pehantelt hon. Tee hot kexrip: “Tas sin ti xlechte — tii hon es imer laycht.” (Psal. 73:12) Tee is mechtich traurich too teweeche kep un tee hot ketenkt tas es sich net keloont hot Yeehoowa tiine. Tee hot kesaat: “Wii ich fersuucht hon tas ferxteen, sin ich unruych kep.” (Psal. 73:14, 16) Tee hot soo kaar erkhënt: “Mayn fiis hon sich neekst ap kelenkt; tii hon neekst ap keritxt.” (Psal. 73:2) Was eenliches is mit een pruuter pasiirt woo mer Alberto nëne tuun.
8. Wii hot ti unkerechtichkheet eene pruuter petrof?
8 Opwool es net woer waar, hon etliche priiter Alberto akusiirt kelt fon te kemaynt xteele. Tes weeche, khont eyer net mee wii elteste tiine un tee hot te respekt ferloer fon fiile woo ti sache tsu wise kriit hon. “Ich waar piterlich, pees un traurich” — tuut eyer sich traan tenke. Tee hot sayn xpiirunge kelos sayn fraayntxaft mit Yeehoowa fersaue un tee is 5 yoore inatiiw keplip. Tiise speryens tsaycht was pasiire khent wën mer net unser wuut foer te unkerechtichkheet kontroliire.
MACH YEESUS NOO WËNS TUU UNKERECHTICHKHEET MIT MACHST
9. Was fer unkerechtichkheete hot Yeesus mit kemacht? (Kuk aach tas pilt.)
9 Yeesus hot een perfekt payxpiil kelos iwer wii sich foer te unkerechtichkheet aan xtele. Fiile layt hon tëm unkerecht pehantelt, too tepay sayn familye. Sayn parente hon kesaat tas eyer ferikt waar; ti relichyeese fiirer hon kesaat tas eyer kraft fon te temoone kriit hot; un ti romaanixe soltaate hon tëm ferxpot, ferkweelt un um keprung. (Mar. 3:21, 22; 14:55; 15:16-20, 35-37) Noch soo, hot Yeesus nii tsurik petsaalt. Was lërne mer mit sayn payxpiil?
Yeesus hot tas perfekte payxpiil kelos iwer wii mer uns aan xtele sole wën mer unkerechtichkheet mit mache (Kuk ti apsetse 9-10.)
10. Wii is Yeesus mit te unkerechtichkheet um kang? (1 Pheeter 2:21-23)
10 Lees 1 Pheeter 2:21-23 a. b Wën mer unkerecht pehantelt sin, mise mer Yeesus, tas perfekte payxpiil, noo mache. Tee wust wanee es peser waar ruych plaype orer xpreche. (Mat. 26:62-64) Als mool, wën ti layt iwer tëm keloo hon, hot eyer kaar niks kesaat. (Mat. 11:19) Un wën eyer kexproch hot, hot eyer net sayn keechner ferxënt orer kesaat tas eyer tsurik petsaale teet. Yeesus hot selepst kontrol ketsaycht wayl “tee hot sich truf ferlos aan Tee woo mit kerechtichkheet richt”. Tee wust tas Yeehoowa ti situatsyoon peopacht hot un tee hot ketraut tas Kot ti kans unkerechtichkheet in te richtich tsayt tsum ën pringe teet.
11. Wii khene mer unser wërter kontroliire? (Kuk aach ti pilter.)
11 Wën yemant uns unkerecht pehantelt, khene mer soo wii Yeesus, kontroliire was mer saan. Wën es was kleenes is, fiilaycht khene mer es soo lose. Orer khan sin tas mer raus suuche niks saan wën unser wërter ti tinge noch xlimer lose teete. (Ekl. 3:7; Tya. 1:19, 20) In anere situatsyoone, fiilaycht mise mer etwas saan; tsum payxpiil: wën mer mërke tas yemant unkerecht pehantelt is orer wën mer ti woerheet xitse mise. (Aph. 6:1, 2) Wën mer xpreche, mise mer uns aan xtrenge fer tas mit respekt un tsaamheet mache. (1 Phe. 3:15) c
Wën mer unkerecht pehantelt sin, khene mer Yeesus noo mache un mit ketult ëntxlise wanee un wii xpreche (Kuk ti apsetse 11-12.)
12. Warom traue mer uf “Tee woo mit kerechtichkheet richt”?
12 Meyer khene aach Yeesus noo mache wën mer traue uf “Tee woo mit kerechtichkheet richt”. Wën anere unkerecht mit uns sin, traue mer tas Yeehoowa ti woerheet wees. Wise tas Yeehoowa, eene taach, al ti sache in te ray xtele tuut, helft uns aus hale. Meyer sole uf Yeehoowa traue un net pees orer piterlich mit te anere plaype. Wën net, khente mer was ferkheertes mache, unser frooheet ferliire orer unser fraayntxaft mit Kot fersaue. (Psal. 37:8)
13. Was khan uns helfe ti unkerechtichkheet mit ketult aus hale?
13 Kewis, khene mer net imer Yeesus sayn payxpiil perfekt noo mache. Als mool, tuun mer etwas saan orer mache woo mer uns xpeeter peroye. (Tya. 3:2) Un manich mool ti unkerechtichkheete woo mer mit mache, tuun uns phayn un propleeme pringe woo pis tas ën fon tiise welt hale. Wën tas mit tich pasiirt, say tich sicher tas Yeehoowa tich ferxteet. Yeesus wees aach wiis tuu tich xpiirst, wayl tee selepst hot unkerechtichkheet kelit. (Hep. 4:15, 16) Awer Yeehoowa kept uns net ploos Yeesus sayn payxpiil. Torich sayn Wort, tuut eyer uns aan reete was se mache wën mer unkerecht pehantelt sin. Wole mer 2 wersikele fom puuch Romaaner noo kuke woo uns helfe khene.
“KEPT PLATS FER KOT SAYN WUUT”
14. Wii khene mer “plats fer Kot sayn wuut” kepe? (Romaaner 12:19)
14 Lees Romaaner 12:19. d Te aphostel Phaul hot ti kriste uf kemuut: “Kept plats fer Kot sayn wuut”. Wii mache mer tas? Meyer lose Yeehoowa ëntxlise wanee un wii ti sache in te ray xtele. Eene pruuter, woo John heest, waar unkerecht pehantelt. Tee saat was noo heyer pasiirt is: “Es waar net laycht, awer ich must mayn wuut kontroliire tas ich net was ferkheertes mache teet. Romaaner 12:19 hot mich keholef ketultich sin un uf Yeehoowa traue.”
15. Warom is es peser uf Yeehoowa waarte fer ti sache resolwiire?
15 Es is kuut fer uns wën mer uf Yeehoowa waarte fer ti sache in te ray xtele. Xon yets, xoone mer uns fon fiil strës un traurichkheet woo mer ofts xpiire wën mer fersuuche ti sache selwer resolwiire. Yeehoowa wil uns helfe. Es is wii wën eyer saan teet: ‘Los ti unkerechtichkheet mit mich. Ich xtele tas in te ray.’ Yeehoowa ferxprecht tii woo ti anere xlecht pehantele, richte. Wën mer too traan klaape, prayche mer net mee pees plaype, wayl mer wise tas Yeehoowa kerechtichkheet pringe tuut. Tas is was John keholef hot. Tee saat: “Wën ich uf Yeehoowa waarte, wërt sicher te resultaat peser sin wii wën ich tas selwer resolwiire teet.”
“TUU WAYTER TAS XLECHTES MIT TËM KUUTES AP KEWINE”
16-17. Wii khan tas kepeet uns helfe “wayter tas xlechtes mit tëm kuutes ap kewine”? (Romaaner 12:21)
16 Lees Romaaner 12:21. e Phaul hot ti kriste aach uf kemuut “tas xlechtes mit tëm kuutes ap kewine”. In Yeesus sayn Përich Preetich, hot eyer kesaat: “Tuut wayter ayer faynte liipe un peet fer tii woo aych yachte tuun.” (Mat. 5:44) Yeesus selepst hot tas kemacht. Meyer khene uns traan tenke wii fiil eyer kelit hot wii ti romaanixe soltaate tëm aan kenaachelt hon aan een kweel phoste. Meyer khene uns kaar net foer xtele wii fiil phayn eyer kexpiirt hot weeche ti unkerechtichkheete woo eyer mit kemacht hot.
17 Awer opwool eyer soo fiil kelit hot, waar Yeesus wayter liiplich un tee hot sich troy tsu Yeehoowa kehal. Xtats ti soltaate ferxëne, hot eyer kepeet: “Fater, fertsay se, wayl tii wise net was se am mache sin.” (Luk. 23:34) Wën mer peete tas Yeehoowa helfe sol tii woo unkerecht mit uns sin, es helft uns in ruu plaype un net soo wuutich wëre. Es khan uns soo kaar helfe unser mënung iwer ti persoon ënere.
18. Wii hot tas kepeet Alberto un John keholef mit te unkerechtichkheet um keen?
18 Tas kepeet hot ti 2 priiter iwer weem mer eente kexproch hon, keholef ti unkerechtichkheete aus hale. Alberto saat: “Ich hon fer ti priiter kepeet woo mich unkerecht pehantelt hon. Ich hon tsu Yeehoowa ofts ferlangt tas eyer mich helfe solt net pees too teweeche plaype.” Tsum klik, is Alberto noch mool Yeehoowa troy am tiine. John saat: “Ich hon ofts fer te pruuter kepeet woo mich wee kemacht hot. Yeehoowa hot mich keholef net pees mit tëm pruuter plaype un noo lose tëm richte. Tiise kepeete hon mich aach friit kep.”
19. Was sole mer mache soo lang wii mer in tiise xlechte welt leepe? (1 Pheeter 3:8, 9)
19 Soo lang wii mer in tiise xlechte welt leepe, wëre mer unkerecht pehantelt. Awer ekaal was mer noch aus hale mise, wole mer nii noo lose Yeehoowa sayn hilef in kepeet ferlange. Wole mer aach Yeesus noo mache wën ti anere unkerecht mit uns sin un wayter Yeehoowa sayn aanreete aan wëne. Wën mer tas mache, khene mer uns sicher sin tas Yeehoowa uns seechne tuut! (Lees 1 Pheeter 3:8, 9.) f
LIIT 38 Yeehoowa halt tich xtark
a (1 Pheeter 2:21-23) Yawool, es is fer tas tas teyer keruuft kep sayt, wayl te Kristus selepst fer aych kelit hot, un soo, hot eyer een payxpiil fer aych kelos tas teyer tëm sayn xrite ticht noo keet. 22 Eyer hot khee sint kemacht, un khee falxheet waar in sayn munt kefun kep. 23 Wii se tëm pelayticht hon, hot tee se net tsurik pelayticht. Wii tee am layte waar, hot tee se net ameasiirt, awer tee hot sich truf ferlos aan Tee woo mit kerechtichkheet richt.
b In te kapitele 2 un 3 fon Pheeter sayn eyerste priif, xprecht eyer iwer etliche unkerechtichkheete woo ti eyerste kriste mit kemacht hon in te hënt fon krope hëre orer unklaapiche mëner. (1 Phe. 2:18-20; 3:1-6, 8, 9)
c Kuk te wiiteo Wii ti liip woere friit pringt im site jw.org.
d (Romaaner 12:19) Liipe layt, tuut net tsurik petsaale, awer kept plats fer Kot sayn wuut; wayl es xteet kexrip: “‘Ich sin tee woo xtrooft; ich tuun es tsurik petsaale’, saat Yeehoowa.”
e (Romaaner 12:21) Los tich net fom xlechtes kewine. Awer tuu wayter tas xlechtes mit tëm kuutes ap kewine.
f (1 Pheeter 3:8, 9) Tsum xlus, tuut al ti selwiche ketanke hon, tsaycht empatii, tuut priiterlich liip, liiplich mitlayt un teemuut hon. 9 Tuut net xlechtes mit xlechtes un pelaytichung mit pelaytichung tsurik petsaale. Xtats tas, tuut mit een seechen tsurik petsaale, wayl teyer too tefoer keruuft kep sayt, fer een seechen se ërpe.
