XTUUTYUM ARTIKEL 41
Wii een Piipel xtutënt helfe pis aan taaf hin khome — Teel 1
“Teyer een priif fon Kristus sayt, woo is fon uns wii tiiner kexrip.” (2 CORÍNTIOS 3:3)
LIIT 78 Ensine a verdade com amor
WAS TUUN MER SIIN? *
Was khan een kemaynt frooer lose wii een Piipel xtutënt — iwer weem se hon liip ëntwikelt — sich taafe lose siin? (Kuk te apsats 1.)
1. Wii tuut 2 Coríntios 3:1-3 uns helfe weyert xetse fer te priwilëj fon Piipel xtuutye fiire woo tsu te taaf nëme? (Kuk tas pilt am aanfang fom piichelche.)
WII finst tuu tich wëns tuu siist een Piipel xtutënt fon tayn kemaynt ketaaft wëre? Tas wërt wool tayn hërts fraye! (Mat. 28:19) Un wëns tuu tiise Piipel xtuutyum kefiirt hot, sicher ti frayt is noch kreeser! (1 Tes. 2:19, 20) Ti naye tisipele woo sich ketaaft hon, sin xeene “loope priife”, net ploos fer tii woo mit tëne xtutiirt hon, awer aach fer ti kans kemaynt. (Lees 2 Coríntios 3:1-3.) *
2. (a) Aan was fer wichtich frooch prayche mer tenke, un warom? (b) Was is een Piipel xtuutyum? (Kuk ti noote.)
2 Es is aarich kuut se siin tas, in te letste fier yoore, unkefeer 10 milyoone Piipel xtuutye * sin yeete moonat kefiirt kep uf te kans welt. Un torich tiise selwiche yoore, unkefeer 280.000 hon sich yeete yoer ketaaft. Was khene mer mache tas mee fon tiise Piipel xtutënte sich taafe lose? Yeehoowa tuut ketultich noch tsayt un keleechenheet fer ti layt kepe fer Kristus sayn tisipele wëre. Weeche tas, meyer wole unser pestes mache fer tëne helfe tsu te taaf hin khome, wii xnel wiis meechlich is. Ti tsayt keet xnel rom! (1 Cor. 7:29a; 1 Ped. 4:7)
3. Was tuun mer in tiise artikel siin iwer Piipel xtuutye fiire?
3 Wayl es is soo wichtich hayt tisipele mache, ti Rechiirente Khërperxaft hot ti filyaale kefroot was khene mer mache tas mee fon unser Piipel xtutënte forem keen un sich taafe lose. In tiise artikel un in tëm neekste, meyer tuun siin was khene mer lërne fon pyoneere, misyoneere un sirkuyt superintentente woo fiil speryens hon. * (Pro. 11:14; 15:22) Tii tuun aus leye was ti Piipel leerer un ti Piipel xtutënte khene mache tas tas Piipel xtuutyum noch nutslicher fer te xtutënt wërt. In tiise artikel, meyer tuun finef tinge siin woo yeete xtutënt praucht mache tas eyer khan forem keen un pis ti taaf khome.
TUU YEETE WOCH XTUTIIRE
Froo te xtutënt ep teyer khent sich paysamer setse fer tas xtuutyum mache (Kuk ti apsetse 4-6.)
4. Was sole mer mërke iwer een Piipel xtuutyum aans teer fiire?
4 Fiile fon unsere priiter un xwestere tuun Piipel xtuutye fiire kraat aan tëm pewooner sayn teer. Opwool tas is een kuut aanfang fer te interes fon tëm pewooner in te Piipel ëntwikele, tiise kexpreeche sin eftas tsu khorts un fiilaycht sin se net yeete woch kemacht. Fer te interes noch ferkreese, welche priiter un xwestere tuun ti persoon sayn kontakt informatsyoone hoole un tan telefoniire orer een pexeet xike tswixich ti pesuuche fer etwas iwer ti Piipel saan. Soo sorte khortse kexpreeche fiilaycht tuun moonate tauere un tuun net een nutslich Piipel xtuutyum wëre. Awer, tuut een Piipel xtutënt wërklich forem keen pis ti tetikatsyoon un taaf, wën tee * tuut net mee tsayt un kraft kepe fer Kot sayn Wort xtutiire? Tsiimlich sicher net.
5. Was hot Yeesus kesaat in Lucas 14:27-33 woo khene mer penutse fer unser Piipel xtutënte helfe?
5 Selich mool, hot Yeesus een ferklaychung kemacht fer tsayche wii fiil teet es khoste fer tëm sayn tisipel sin. Eyer hot kexprooch iwer yemant woo wolt een thorm paue un iwer een kheenich woo wolt tsum kriich keen. Yeesus hot kesaat tas te pauer mus ‘sich eyerst hin setse un noo rechne was tas khost’ fer te thorm fërtich paue; un te kheenich mus ‘sich eyerst hin setse fer aanreete kriin’ fer se siin ep sayn militeer khan es hin kriin was se wole mache. (Lees Lucas 14:27-33.) * In te selwich aat, Yeesus wust tas een persoon woo wil tëm sayn tisipel wëre sol ketultich traan tenke aan was petayt tëm noo keen. Meyer khene helfe ti layt tas mache wën mer tëne uf muute yeete woch mit uns xtutiire. Wii khene mer es hin kriin?
6. Was khene mer fersuuche mache fer een xtuutyum hon woo forem keet?
6 Te eyerste xrit is tas xtuutyum aans teer lënger lose. Fiilaycht khanst tuu xpreche iwer tswaay Piipel tekste xtats iwer ploos eens, yeete mool woos tuu ti persoon pesuuchst. Wën te pewooner tuut sich kuut fine mit te lënger pesuuche, froo tëm ep es een plats kept woos tuu khanst tich mit tëm setse un wayter xpreche. Te pewooner sayn antwort tuut tsayche wii wichtich tas Piipel xtuutyum tsu tëm is. Mit te tsayt, fer tëm helfe noch xneler lërne, fiilaycht khanst tuu tëm frooe ep tee wilich is fer tswaay mool te woch xtutiire. Awer, mee is neetich wii ploos eene orer tswaay mool te woch xtutiire.
TUU TICH FER YEETE XTUUTYUM IN RICHTE
Tuu tich kuut fer yeete xtuutyum in richte un tsaych te xtutënt wii sich aach in richte (Kuk ti apsetse 7-9.)
7. Wii khan te leerer sich kuut in richte fer yeete mool woo eyer een Piipel xtuutyum fiirt?
7 Wii te leerer, prauchst tuu tich kuut in richte fer yeete mool woos tuu een Piipel xtuutyum fiirst. Fer se aan fange, khanst tuu leese was tuut teyer xtutiire un ti tekste noo kuke. Tuu ti haupste phunkte kans taytlich in tayn khop hon. Tenk iwer ti thitel fon te lisyoon, ti unerthitele, ti xtuutyum frooche, ti “lees” tekste, ti pilter un yeete wiiteo woo khan tich helfe ti sache aus leye. Tan, tenk iwer tayn xtutënt un wii tuust tuu ti informatsyoon in een keweenlich un taytlich aat aus leye, soo tas tayn xtutënt khan tas laycht ferxteen un aan wëne. (Nee. 8:8; Pro. 15:28a)
8. Was tuut Colossenses 1:9, 10 uns in lërne iwer fer unser xtutënte peete?
8 Wëns tuu tich in richst, peet tsu Yeehoowa iwer te xtutënt un sayn neetichkheete. Ferlang Yeehoowa fer tich helfe tas tuu khanst ti Piipel lërne in een aat woo aan te persoon sayn hërts krayft. (Lees Colossenses 1:9, 10.) * Fersuuch xon foer siin was khan xweyer sin fer tayn xtutënt ferxteen orer aan nëme. Hal im khop tas tayn tsiil is tëm helfe tsu te taaf khome.
9. Lee aus wii khan te leerer te xtutënt helfe sich fer tas xtuutyum in richte.
9 Meyer hofe tas een reeklich Piipel xtuutyum tuut te xtutënt helfe petanklich sin fer was Yeehoowa un Yeesus kemacht hon un tuut tëm ti lust kepe fer noch mee lërne. (Mat. 5:3, 6) Fer ti kanse nutse fon tëm xtuutyum kriin, te xtutënt praucht sayn kanse acht kepe fer was tee am lërne is. Fer tëm helfe tas mache, lee tëm aus wii wichtich es is tas eyer sich in richt fer yeete mool woo eyer xtutiirt. Eyer khan ti lisyoon xon foer heyer leese un triwer noo tenke aan wii tas tuut in sayn leepe phase. Wii khanst tuu tëm helfe sich in richte? Tuu een lisyoon mit tëm xtutënt in richte fer tsayche wii khan eyer tas mache. * Lee tëm aus wii ti antworte fer ti xtuutyum frooche fine un tas ploos phaar wërter uner xtrayche tuut tëm helfe sich fon te antwort erinere. Tan, ferlang tëm ti antwort in sayn aychne wërter kepe. Wën tee soo macht, tuust tuu mërke wii fiil fon te lisyoon hot eyer ferxtan. Awer, es kept noch etwas woos tuu khanst tayn xtutënt uf muute se mache.
TUU TE XTUTËNT LËRNE YEETE TAACH MIT YEEHOOWA FERTSEELE
Lërn tayn xtutënt wii khan eyer mit Yeehoowa fertseele (Kuk ti apsetse 10-11.)
10. Warom is tas wichtich tas te xtutënt yeete taach ti Piipel leest, un wii khan eyer ti kanse nutse fon sayn Piipel leesung kriin?
10 Tepay mit yeete woch ti Piipel mit sayn leerer xtutiire, te xtutënt tuut nutse kriin fon welche tinge aleen yeete taach mache. Eyer praucht mit Yeehoowa fertseele. Wii? Es is wichtich tas eyer Yeehoowa horicht un mit tëm xprecht. Tee khan Yeehoowa horiche wën eyer yeete taach ti Piipel leest. (Jos. 1:8; Sal. 1:1-3) Tsaych tëm wii khan eyer ti Piipel Leesung Prokram penutse, woo in te jw.org * xteet. Sicher, fer tee helfe ti kanse nutse fon sayn Piipel leesung kriin, tuu tëm uf muute triwer noo tenke aan tiise frooche: ‘Was lërnt tas mich iwer Yeehoowa?’ ‘Wii khan ich tas in mayn leepe aan wëne?’ (Atos 17:11; Tia. 1:25)
11. Wii khan een xtutënt lërne richtich peete, un warom is tas tëm wichtich eftas tsu Yeehoowa peete?
11 Tuu tayn xtutënt uf muute mit Yeehoowa xpreche — yeete taach tsu tëm peete. Tuu fon tayn hërts peete, am aanfang un am ën fom xtuutyum, un xprech iwer tayn xtutënt in tiise kepeete. Wii eyer tayn kepeete heert, tuut tee lërne wii fon sayn hërts peete un tas eyer sol tsu Yeehoowa, im naame fon Yeesus Kristus peete. (Mat. 6:9; João 15:16) Iwerlee tich wii yeete taach ti Piipel leese (Yeehoowa horiche) un peete (mit Yeehoowa xpreche) tuut tayn xtutënt helfe imer tichter fon Yeehoowa khome. (Tia. 4:8) Wën eyer tiise tinge yeete taach macht, tas tuut tëm helfe noo te tetikatsyoon un taaf forem keen. Was noch tuut tëm helfe?
TUU TAYN XTUTËNT HELFE EEN FROYNTXAFT MIT YEEHOOWA PAUE
12. Wii khan eene leerer eene xtutënt helfe een froyntxaft mit Yeehoowa paue?
12 Was eene xtutënt in sayn Piipel xtuutyum lërnt thërft net ploos aan sayn khop rin keen, awer aach aan sayn hërts krayfe. Weeche was? Wayl unser hërts — too tepay unser winxe, emotsyoone un xpiirunge — tuut uns uf muute fer aan wëne was mer lërne. Yeesus hot in een aat kelërnt tas ti tinge sin laycht aan ti layt sayn khop rin kang. Awer ti layt sin tëm noo kang wayl eyer hot aan tëne sayn hërts kekrif. (Luc. 24:15, 27, 32) Tayn xtutënt thërft Yeehoowa wii een Persoon siin, yemant mit weem tee khan een froyntxaft paue. Tee praucht Yeehoowa siin wii sayn Fater, sayn Kot, un sayn Froynt. (Sal. 25:4, 5) Torich tas Piipel xtuutyum, helef tayn xtutënt sayn aue truf tuun aan Yeehoowa sayn xeene kwaliteete. (Êxo. 34:5, 6; 1 Ped. 5:6, 7) Ekaal iwer was fer sache teyer sayt am xpreche, pring acht fer was fer sort Persoon Yeehoowa is. Helef te xtutënt Yeehoowa sayn xeene kwaliteete siin — sayn liip, kuutheet un mitlayt. Yeesus hot kesaat tas “tas kreeste un eyerste kepoot” is ‘Yeehoowa, tayn Kot, liipe’. (Mat. 22:37, 38) Fersuuch een tiif liip tsu Kot in tayn xtutënt sayn hërts uf rechne.
13. Kep een payxpiil iwer wii khene mer unser xtutënt helfe iwer Yeehoowa sayn xeene kwaliteete lërne.
13 Wëns tuu mit tayn xtutënt fertseelst, tsaych wii fiil tuust tuu Yeehoowa liipe. Tas tuut fiilaycht tayn xtutënt helfe se mërke tas tee praucht sayn aychne hërtslich un perseenlich froyntxaft mit Yeehoowa hon. (Sal. 73:28) Tsum payxpiil, kepts welche wërter in te xtuutyum puplikatsyoon orer in te Piipel woo tsayche etwas iwer Yeehoowa — sayn liip, kluucheet, kerechtichkheet, orer macht — woo krayft aan tayn hërts? Saa tas fer tayn xtutënt, un los tëm wise tas tas is eene fon te fiile uersache warom tuust tuu tayn himlixe Fater liipe. Es kept noch etwas woo yeete Piipel xtutënt praucht mache fer forem keen un pis aan taaf hin khome.
TUU TE XTUTËNT UF MUUTE TSU TE FERSAMLUNGE KHOME
Tuu tayn xtutënt uf muute aan fange in te fersamlunge khome, klaych wiis meechlich is! (Kuk ti apsetse 14-15.)
14. Was tuut Hebreus 10:24, 25 saan iwer ti fersamlunge, woo khan tayn Piipel xtutënt helfe forem keen?
14 Meyer al wole tas unser xtutënte pis aan taaf hin khome. Een wichtich aat fer tii helfe is tëne uf muute aan te fersamlunge khome. Leerer woo fiil speryens hon saan tas ti xtutënte woo klaych aan te fersamlunge khome, tuun xneler forem keen. (Sal. 111:1) Welche leerer tuun fer sayn xtutënte aus leye tas sayn Piipel inlërnung is in 2 xtike keteelt: halp in tëm xtuutyum un te aner heleft in te fersamlung. Lees Hebreus 10:24, 25 * mit tayn xtutënt, un lee tëm aus wii fiil nutse tuut eyer kriin wën eyer tsu te fersamlunge khomt. Tsaych tëm te wiiteo Was pasiirt in een Raych Saal? * Helef tayn xtutënt se ferxteen tas yeete woch in te fersamlunge keen sol een wichtich teel fon sayn leepe wëre.
15. Wii khene mer unser xtutënt uf muute reeklich in te fersamlunge keen?
15 Was khanst tuu mache wën tayn xtutënt hot noch net pis een fersamlung khom, orer tuut net reeklich keen? Tuu mit muut xpreche iwer etwas woos tuu host in te letste fersamlunge kelërnt. Tas is mee ufmuutich wii ploos te xtutënt fer ti fersamlunge in laate. Kep tëm Te Wachthorm orer tas Xtuutyum heftche woo wërt in te woch xtutiirt. Tsaych tëm was wërt in te neekst fersamlung noo kekukt un froo tëm was fer teel siit tëm interesant aus. Was tayn xtutënt tuut siin orer horiche in sayn eyerst fersamlung tuut fiil peser sin wii ales woo eyer xon kehoricht un kesiin hot in te fersamlunge fon anere relichyoone. (1 Cor. 14:24, 25) Eyer tuut anere layt khëne lërne woo tuun een xeen payxpiil tsu tëm sin un woo iim helfe tuun pis aan taaf hin khome.
16. Was prauche mer mache fer Piipel xtuutye fiire woo tsu te taaf nëme, un was tuun mer im neekste artikel siin?
16 Wii khene mer Piipel xtuutye fiire woo pis aan te taaf nëme? Meyer sole unser xtutënte uf muute yeete woch xtutiire un sich kuut in richte fer yeete xtuutyum — in tiise aat, tuun mer tëne helfe mërke wii wichtich tas xtuutyum is. Meyer wole tëne aach uf rechne fer mit Yeehoowa yeete taach fertseele un een perseenlich froyntxaft mit tëm paue. Meyer wole aach unser xtutënte wilich lose fer in te fersamlunge khome. (Kuk te khaste “ Was prauche ti xtutënte mache fer pis aan taaf hin khome”, im sayt 12.) Awer wii te neekste artikel tuut uns aus leye, es kept noch 5 anere tinge woo ti leerer khene mache fer ti xtutënte helfe pis aan taaf hin khome.
LIIT 76 Was pringt uns mee frooheet?
^ parágrafo 5 Yemant in lërne petayt iim helfe tenke, xpiire, orer sich aan xtele in een nay orer unerxiitlich aat. Unser yoerstekst fer 2020, Mateus 28:19, hot uns erinert wii wichtich es is ti Piipel mit te layt xtutiire un tëne lërne wii khene se tsu te taaf khome un Yeesus sayn tisipele wëre. In tiise artikel un in tëm neekste, tuun mer siin wii khene mer uns in tiise wichtich aarwayt ferpesere.
^ parágrafo 1 (2 Coríntios 3:1-3) Prayche mer noch mool aan fange uns selepst loope? Orer prayche mer loope priife fer aych xike orer fon aych kriin, soo wii etliche mënxe prayche? 2 Teyer selepst sayt unser priif, woo in unser hërts kexrip is un woo fon te kans mënxheet kekhënt un keleest is. 3 Wayl es is taytlich tas teyer een priif fon Kristus sayt, woo is fon uns wii tiiner kexrip, net mit farpe, awer mit tëm kayst fon eene lepeentiche Kot; net in xteen preete, awer in flayx preete, in hërtse.
^ parágrafo 2 TUU PESER FERXTEEN: Wëns tuu tuust reeklich iwer ti Piipel mit yemant xpreche, mit orer tëm noo een informatsyoon fon unser puplikatsyoone, pist tuu een Piipel xtuutyum am fiire. Tuu khanst een Piipel xtuutyum in tëm relatooryum tseele, wëns tuu host es tswaay mool kefiirt noo tas tuu host ketsaycht wii teet tas xtuutyum sin, un wëns tuu klaapst tas tas xtuutyum tuut wayter keen.
^ parágrafo 3 Tepay in tiise artikele sin phaar aanunge fon te sekwëns “Como dirigir estudos bíblicos progressivos”, woo sin ketsaycht kep in tëm piichelche Nosso Ministério do Reino, tswixich Yuuli 2004 un Yuuli 2005.
^ parágrafo 4 Wën mer iwer een Piipel xtutënt xpreche, es kilt fer ti mëner un aach fer ti fraae.
^ parágrafo 5 (Lucas 14:27-33) Weer net sayn kweeleray phool nëmt un mich noo keet, khan net mayn tisipel sin. 28 Tsum payxpiil, weer fon aych, woo een thorm uf paue wil, tuut sich net eyerst hin setse un noo rechne was tas khost, fer se siin op eyer kenuuch hot fer tas fërtich paue? 29 Wën net, tuut eyer tas funtamënt leye awer kriit tas net fërtich paue, un al woo tas peopachte tuun aan fange tëm xpote 30 un saan: ‘Tiise man hot aan kefang se paue, awer khont net fërtich paue.’ 31 Orer was fer kheenich, woo keeche een aner kheenich khëmpfe keet, tuut net sich eyerst hin setse un aanreete kriin fer se siin op eyer es kriit mit 10.000 soltaate sich keeche te aner kheenich xtele, woo mit 20.000 soltaate khomt? 32 Tan, wën eyer mërkt tas eyer kriit tas net hin, xikt eyer eene krup fon empayxatoore fer te friit suuche, soo lang wii te aner kheenich noch wayt is. 33 In te selwich aat, teyer khent aych sicher sin tas khee eene fon aych woo net fon ale sayn tinge uf kept, khan mayn tisipel wëre.
^ parágrafo 8 (Colossenses 1:9, 10) Es is aach weeche tas, tas sayt tëm taach woo mer es keheert hon, hon mer net noo kelos iwer aych peete un ferlange tas teyer fol kept mit te kenau khëntnis fon tëm sayn wile, in ale kluucheet un kaystlich ferxtëntnis, 10 tas teyer kexayt foer Yeehoowa keet un tee in ales tsufriite lost, soo lang wii teyer wayter in yeete kuut aarwayt frucht kept un in Kot sayn kenau khëntnis wakst.
^ parágrafo 9 Kuk te khortse wiiteo Ti xtutënte in lërne iire xtuutyum foer perayte. In tëm site jw.org, kee tsu PUPLIKATSYOONE > WIITEOS > FERSAMLUNGE UN PREETICH AARWAYT > WII EEN PESER PUPLIKATOER SIN.
^ parágrafo 10 Kee tsu PUPLIKATSYOONE > PIICHER UN PIICHELCHER.
^ parágrafo 14 (Hebreus 10:24, 25) Un wole mer eene aan te anere tenke fer uns tsu te liip un tsu kuute aarwayte uf muute, 25 un los mer net noo uns fersamele, wii es ti kewoonheet fon etliche is, awer tuun mer uns eene mim anere xtërke, un noch mee wën iir siit te taach tichter khome.
^ parágrafo 14 In tëm site jw.org, kee tsu PUPLIKATSYOONE > WIITEOS > FERSAMLUNGE UN PREETICH AARWAYT > HILFE FER TI PREETICH AARWAYT.
