Fer sayn flicht erfiile, miste ti Piipel Xtutënte koraajich sin. Tii teete net ploos “kuute notisye” fer ti tsaame preetiche, awer aach “te taach woo Kot tsurik petsaalt” fer ti xlechte pekhant mache.

Te pruuter John Henry Hoskin, woo in Kanata keleept hot, hot mit koraaj kepreeticht, opwool fiil tekeeche waare. Am aanfang fon 1921, hot eyer tsaye fer een farer fon te metotist khërich kep. John hot tas kexpreeche soo aan kefang: “Meyer mise froyntlich iwer ti Piipel xpreche; un wën mer net xtime tuun, khene mer unser kexpreeche ënte in een friitlich aat un wayter froynte sin.” Awer te pruuter John hot fertseelt tas es net kraat soo pasiirt is: “Meyer hate ploos een pisye fertseelt, tan hot te farer ti teer soo foxt tsu keklopt, tas ich ketenkt hon ti klaas sich ferpreche teet.”

“Warom keest tuu net xpreche mit tëne woo net aan Kot klaape?” — hot te farer kexraayt. Te pruuter hot niks kesaat; awer ti tsayt woo eyer am fat keen waar, hot eyer fer sich ketenkt: ‘Es siit aus tas tuu soo yemant pist!’

Wii te metotiste farer te neekste taach sayn preetich kemacht hot, hot eyer te pruuter John wayter kexënt. “Tee hot kesaat tas ich te kreeste liichner fon te xtat waar un tas ich mist um keprung wëre” — hot te pruuter John sich erinert. Awer tas hot net unser pruuter um kehal: tee hot wayter kepreeticht un hot kuute resultaate kriit. John saat: “Tat, in tiise yoore preetiche, hot mich wërklich kefalt. Etliche layt hon soo kaar mich kesaat: ‘Ich wees tas tuu een mënx fon Kot pist.’ Tii hon soo kaar sich aan kepoot fer mich tinge kepe woo ich mist hon.”

Wii hon ti Piipel Xtutënte ti layt keholef woo interes hate, foran keen? Tii hon een prokramatsyoon fer ti Piipel xtutiire in tëm piichelche A Idade de Ouro * puplitsiirt. Eene fon tëne waar tas Piipel xtuutyum fer ti yunge. Tas waar een prokram mit frooche kewees, un ti eltere khente tëne mit sayn khiner xtutiire. Ti eltere selte ti “frooche fer sayn khiner mache un tëne helfe ti antwort in te Piipel fine”. Etliche frooche hon tinge iwer ti Piipel in kelërnt, wii: “Wii fiil piicher sin in te Piipel?” Anere frooche hon ti yunge foer  perayt fer koraajich preetiche, wii: “Meecht yeete krist waarte khene tas eyer yachtung mit macht?”

Es waar aach een prokram kewees mit frooche un antworte fer tëne woo een pisye mee khëntnis iwer ti Piipel hate. Ti antworte khente kefun wëre im eyerste puuch fon Estudos das Escrituras. Fiile layt woo tas kelees hon, hon fiil mit tiise frooche kelërnt. Awer in tëm piichelche A Idade de Ouro 21^te Teetsemper fon 1921 is es pekhant kemacht kep tas tiise prokrame teete net wayter kemacht wëre. Warom?

In tiise tsayt, hon ti priiter woo ti Orkanisatsyoon kefiirt hon etwas kemërkt: es weyer laychter fer ti layt iwer ti Piipel lërne wën se een sache ufm mool xtutiire teete. Tes weeche, hon se tas puuch A Harpa de Deus puplitsiirt in Nofemper fon 1921. Ti layt woo interes hate un tas puuch aan kenom hon, hon aach een khurs aan kefang. Tiise khurs, woo ti layt aleen kemacht hon, hot tëne keholef Yeehoowa sayn tsiil ferxteen: ti mënxheet mit eewiche leepe seechne. Wii hot tiise khurs funtsyoniirt?

Wën yemant tas puuch aan kenom hot, hot eyer aach een kleen khaart kriit. Tiise khaart hot ketsaycht was fer sayte fom puuch selt eyer leese. Ti neekst woch, hot eyer een aner khaart kriit mit phaar frooche iwer was eyer kelees hat. Am ën fon tiise khaart, waar es kexrip was fer sayte selt eyer fer ti neekst woch leese.

Yeete woch, torich 12 woche, hot te xtutënt tiise khaarte kriit. Een kemaynt woo ticht waar, hot tas fer ti persoon kexikt. In te meyerst tsayt, tii woo ti khaarte kexikt hon, waare ti elter un tii woo khonte net haus tsu haus preetiche. Tsum payxpiil: Anna Katherine Gardner, fon Millvale, Pennsylvania, FXA, hot sich erinert: “Mayn xwester Thayle hat een propleem fer se laafe; awer wii tas puuch A Harpa de Deus puplitsiirt kep is, hat se fiil aarwayt se tuun. Yeete woch, hot se ti khaarte mit te frooche kexikt.” Wën yemant fërtich mit tëm khurs waar, is een pruuter orer xwester tëm pesuuche kang fer tëm helfe mee iwer ti Piipel lërne.

Am ën fom yoer, hot te pruuter Joseph Rutherford een priif fer ti kemaynte kexikt. Te priif hot kesaat: “Ti tsaye woo mer in tiise yoer kep hon, hot mee layt ketrof un keholef wii in te letste yoore.” In te futuer am tenke, hot eyer noch kesaat: “Es kept noch fiil aarwayt fer se mache. Muut anere aach uf fer mit helfe in tiise wunerlich aarwayt.” Kewis, hon ti Piipel Xtutënte tiise aanreet aan kewënt! Un im yoerkang 1922, hon se mit koraaj in een wunerlich aat iwer tas Raych kepreeticht.