XTUUTYUM ARTIKEL 42
Hal tich fest aan te woerheet mit xtark sicherheet
“Pewayst ales; halt aych fest aan tas kuutes.” (1TE THESALOONIKER 5:21)
LIIT 142 Ti hofnung halt uns fest
WAS TUUN MER SIIN? *
1. Warom sin fiile layt konfus?
HAYT, kepts fiile relichyoone woo saan tas se Kristus noo keen un tas se Kot aan peete in een aat woo Tëm kefalt. Tes weeche, sin fiile layt konfus; tii frooe sich: “Kepts ploos eene woere relichyoon? Orer meechte ale relichyoone Kot kefale?” Meechte mer uns sicher sin tas mer ti woerheet in lërne un tas ti aat wii Yeehoowa sayn Tsayer Kot aan peete is ti eensich aat woo tëm kefalt? Wole mer etliche pewaysunge noo kuke woo uns tiise sicherheet kepe tuun.
2. Warom waar Phaul sich sicher fon te woerheet? (1te Thesalooniker 1:5)
2 Phaul waar sich kans sicher fon te woerheet kewees. (Lees 1te Thesalooniker 1:5.) * Awer tiise sicherheet hot sich net uf emotsyoone kextayp. Tee hot Kot sayn Wort mit acht xtutiirt un tee hat klaape tas “ti kans Xrift is kep woer torich Kot sayn kayst”. (2 Tim. 3:16) Was hot Phaul mit sayn xtuutyum kelërnt? Tee hot pewaysunge in te Xrifte kefun tas Yeesus te ferxprochne Mesias waar; nimant khont tiise pewaysunge ap saan. Awer ti yiitixe relichyeese fiirer hon raus kesuucht tiise pewaysunge uf sayt lose. Tii hon kesaat tas tii waare ti woerheet iwer Kot am in lërne, awer in te selwich tsayt, hon se kemacht was Kot kehast hot. (Tit. 1:16) Te aphostel Phaul waar kans anerste wii tiise mëner kewees: tee hot net raus kesuucht aan was fer teele fon te Piipel teet eyer klaape. Xtats tas, hot eyer “Kot sayn kanse aanreete” aan kewënt un in kelërnt. (Aph. 20:27; noote)
3. Fer uns sicher sin tas mer ti woerheet kefun hon, mise mer ti antwort fer al unser frooche hon? (Kuk te khaste “ Yeehoowa sayn aarwayte un ketanke — ‘tsu fiil fer se tseele’”.)
3 Etliche tenke tas ti woere relichyoon sol ti antwort fer al ti frooche kepe — soo kaar fer tii woo net in te Piipel keantwort sin. Awer, is soo was meechlich? Kuk mool Phaul sayn payxpiil. Tee hot ti kriste uf kemuut: “Pewayst ales.” (1 The. 5:21) Awer tee hot erkhënt tas es fiile tinge waare woo eyer net ferxtan hot. Tee hot kexrip: “Meyer hon ploos een teel khëntnis”, un aach: ‘Meyer siin xmiiriche pilter torich een metaal xpiichel.’ (1 Kor. 13:9, 12) Phaul hot net ales ferxtan; un meyer tuun aach net ales ferxteen. Awer Phaul hot ti haupste inlërnunge iwer Yeehoowa ferxtan; un was eyer wust waar xon kenuuch kewees fer tëm sicher lose tas eyer ti woerheet kefun hat!
4. Wii khene mer unser sicherheet ferxtërke tas mer ti woerheet kefun hon, un was tuun mer iwer ti woere kriste lërne?
4 Meyer mise unser sicherheet ferxtërke tas mer ti woerheet kefun hon. Een aat fer tas mache is ferklayche tas payxpiil fon woere aanpeetung woo Yeesus kelos hot mit was Yeehoowa sayn Tsayer hayt tsu taach mache. In tiise artikel, lërne mer tas ti woere kriste tuun (1) ti itolatrii ap xtose, (2) Yeehoowa sayn naame respektiire, (3) ti woerheet liipe, un (4) een xtark liip eene tsu te anere hon.
MEYER XTOSE TI ITOLATRII AP
5. Was lërne mer mit Yeesus iwer ti richtich aat fer Kot aan peete un wii khene mer tas aan wëne?
5 Weeche sayn tiif liip tsu Kot, hot Yeesus — im himel un uf te eyert — ploos Yeehoowa aan kepeet. (Luk. 4:8) Yeesus hot sayn tisipele in kelërnt tas selwiche mache. Tee un sayn troye nookeener hon nii net xtaatue in sayn aanpeetung penutst. Un aach: meyer khene net Kot siin; tes weeche, khan nimant was paue woo fer weenichst ticht khomt fon wii Yeehoowa wërklich is. (Isa. 46:5) Awer, etliche mache xtaatue fon layt woo se wii “hayliche” ruufe un tuun soo kaar tsu tëne peete. Meecht tas richtich sin? Yeehoowa hot kesaat im tsweete fon te 10 Kepoote: ‘Tuu solst khee xtaatue fer tich aus xnayte orer mache, fon etwas, woo oowe im himel, orer uner uf te eyert is. Tuu solst tich net foer tëne niter piike.’ (Eeks. 20:4, 5) Tiise wërter sin kans taytlich fer tii woo Kot kefale wole — Tee wil net hon tas mer xtaatue aan peete.
6. Was fer payxpiil fon aanpeetung tuun Yeehoowa sayn Tsayer hayt tsu taach noo keen?
6 Kexicht unersuucher saan tas, in te tsayt fon te aphostele, hon ti kriste ploos Kot aan kepeet. Een puuch woo iwer tas Kexicht xprecht, saat tas ti eyerste kriste “hëte kehast” ti itee fon xtaatue in sayn aanpeetunge pletser hon. Hayt, tuun Yeehoowa sayn Tsayer tas payxpiil fon te eyerste kriste noo keen. Meyer peete net tsu xtaatue fon “hayliche” orer engele; noch net mool fer Yeesus peete mer. Meyer tuun aach net unser lant aan peete un mer mache kaar niks woo soo aus siin khent, wii ti faan loope. Ekaal was pasiirt, sin mer pextimt Yeesus sayn wërter aan heere: “Tuu solst Yeehoowa tayn Kot aan peete.” (Mat. 4:10)
7. In was fer aate sin Yeehoowa sayn Tsayer anerste wii al ti anere relichyoone?
7 Hayt, tuun fiile layt kërn heere relichyeese fiirer woo xamant un pekhant sin. Als mool, hon se tiise relichyeese fiirer soo kërn tas se tuun tii neekst aan peete. Ti layt mache tëne sayn khëriche fol, khaafe sayn piicher, un kepe fiil kelt fer tëne orer fer ti orkanisatsyoone woo se pay xteen. Etliche klaape aan ales was tiise fiirer saan. Awer tenk mool noo: Un wën se Yeesus siin teete? Meechte se aach soo froo wëre? Es is xweyer se saan. Tii woo Yeehoowa in te richtich aat aan peete, keen net mëner noo. Opwool mer respektiire tii woo ti kemaynt fiire, tuun mer Yeesus sayn taytlich inlërnung aan nëme: “Teyer sayt ale priiter.” (Mat. 23:8-10) Meyer peete khee mënx aan — ekaal ep se relichyeese fiirer orer rechiirente sin. Meyer tuun aach net tëne sayn relichyeese orer politixe pleen pay xteen. Xtats tas, hoole mer khee sayt raus un mer mache khee teel fon te welt. Tan, in al tiise situatsyoone, hon mer kesiin tas mer kans anerste sin wii al ti anere relichyoone woo saan tas se Kristus noo keen. (Yoo. 18:36)
MEYER RESPEKTIIRE YEEHOOWA SAYN NAAME
Es frayt ti woere kriste iwer Yeehoowa mit te anere xpreche (Kuk ti apsetse 8-10.) *
8. Wii wise mer tas Yeehoowa wil hon tas mer Sayn naame ferhërliche un fer ti anere pekhant mache?
8 Een mool, hot Yeesus kepeet: “Fater, ferhërlich tayn naame.” Te aychne Yeehoowa hot tiise kepeet keantwort mit een hart xtim fom himel aus. Tee hot ferxproch tas eyer sayn naame ferhërliche teet. (Yoo. 12:28) Torich sayn preetich aarwayt too uf te eyert, hot Yeesus imer Yeehoowa sayn naame ferhërlicht. (Yoo. 17:26) Tes weeche, is es een eer fer ti woere kriste Kot sayn naame penutse un tëm fer ti anere pekhant mache.
9. Wii hon ti eyerste kriste pewayst tas se Kot sayn naame respektiirt hon?
9 Een pisye tëm noo wii ti kristlich kemaynt orkanisiirt waar, hot Yeehoowa “acht tsu te natsyoone kep” fer “een folek fer Sayn naame raus hoole”. (Aph. 15:14) Fer tiise kriste, waar tas een eer Kot sayn naame penutse un tëm fer ti anere pekhant mache. Ti aphostele un anere tisipele hon Kot sayn naame penutst wii se kepreeticht hon un wii se ti piiplixe piicher kexrip hon. * Tii hon pewayst tas se tas eensiche folek waare woo Kot sayn naame pekhant kemacht hot. (Aph. 2:14, 21)
10. Wii wise mer tas Yeehoowa sayn Tsayer een folek fer Kot sayn naame sin?
10 Sin Yeehoowa sayn Tsayer een folek fer Kot sayn naame? Kuk mool ti pewaysunge. Hayt tsu taach, mache fiile relichyeese fiirer ales was se khene fer Kot sayn naame ferxtekele. Tii hon tëm sayn naame fon sayn iwersetsunge fon te Piipel raus kehool un als mool hon se soo kaar ferpoot tas tiise naame in sayn khëriche penutst weyer. * Yets, mërk mool ti unerxiit: meyer hon xon mee wii 240 milyoone kopye fon te Tradução do Novo Mundo da Bíblia Sagrada aus ketrukt; tii penutst Kot sayn naame in te pletser woo anere iwersetser raus kehool hon. Meyer mache aach puplikatsyoone, woo sich aan te Piipel xtaype, aan mee wii 1.000 xprooche un tii mache aach Yeehoowa sayn naame pekhant. Es is taytlich, kël? — ploos Yeehoowa sayn Tsayer kepe Kot sayn naame ti eer un te respekt woo eyer fertiint. Khee aner relichyeese krup macht Yeehoowa sayn naame soo pekhant wii meyer. Meyer mache unser pestes fer tëm noo unser naame leepe un wërklich Yeehoowa sayn Tsayer sin. (Isa. 43:10-12)
MEYER LIIPE TI WOERHEET
11. Wii hon ti eyerste kriste ketsaycht tas se ti woerheet keliipt hon?
11 Yeesus hot ti woerheet keliipt, es wil saan, ti woerheet iwer Kot un Tëm sayn tsiile. Yeesus hot tëm noo tiise woerheet keleept un hot se fer ti anere pekhant kemacht. (Yoo. 18:37) Tëm sayn woere nookeener hon aach ti woerheet fiil keliipt. (Yoo. 4:23, 24) Te aphostel Pheeter hot ti kristlich relichyoon wii “te weech fon te woerheet” kenënt. (2 Phe. 2:2) Was hon ti tisipele kemacht wën ti relichyeese itee, ti tratitsyoone fon sayn kultuer orer sayn perseenliche mënunge net mit te woerheet kextimt hon? Weeche sayn xtark liip tsu te woerheet, hon se tas ap kextos! (Kol. 2:8) Tas selwiche pasiirt mit te woere kriste hayt tsu taach: tii xtrenge sich aan fer ‘wayter in te woerheet keen’. Wii? Tii xtaype sayn kanse klaape un sayn aat fer se leepe in Yeehoowa sayn Wort. (3 Yo. 3, 4)
12. Wën es neetich is ti aat ënere wii mer etwas mache orer ferxteen, was macht ti Rechiirente Khërperxaft, un warom mache se tas?
12 Hayt, tuun Yeehoowa sayn Tsayer net saan tas se ales in te Piipel kans ferxteen tuun. Als mool, hon se feeler kemacht in te aat wii se een piiplix inlërnung aus keleet hon un in te aat wii se ti kemaynt orkanisiirt hon. Tas sol uns net ferxreke. Ti Piipel lost kans taytlich: ti kenau khëntnis ferkreest sich mit te tsayt. (Kol. 1:9, 10) Yeehoowa macht ti woerheet lamsam pekhant. Tes weeche, mise mer ketultich waarte pis mer ti woerheet peser ferxteen khene. (Xpr. 4:18) Awer, was macht ti Rechiirente Khërperxaft wën se mërke tas mer ënere mise ti aat wii mer etwas mache orer ferxteen? Tii tuun ti ënerung klaych mache. Hayt, fiile khëriche ënere sayn inlërnunge wayl se wole sayn mitkliiter orer ti welt kefale. Awer Yeehoowa sayn Tsayer mache ënerunge wayl se wole tichter pay Yeehoowa khome un tëm aan peete soo wii Yeesus kemacht hot. (Tya. 4:4) Wën mer een ënerung mache, is wayl mer ti Piipel peser ferxtan hon, net wayl ti mënung fon te layt uf te welt sich keënert hot. Meyer tuun wërklich ti woerheet liipe! (1 The. 2:3, 4)
MEYER HON EEN XTARK LIIP EENE TSU TE ANERE
13. Was is ti wichtichste kwaliteet fon te woere kriste, un wii tuun Yeehoowa sayn Tsayer tii hayt tsu taach tsayche?
13 Ti eyerste kriste hate fiile kwaliteete. Awer tii waare hauptseechlich pekhant weeche een fon tëne: ti liip. Yeesus hot kesaat: “Torich tas, tuun al wise tas teyer mayne tisipele sayt: wën teyer liip unich aych hot.” (Yoo. 13:34, 35) Hayt tsu taach, hon Yeehoowa sayn Tsayer uf te kans welt woere liip un eenichkheet unich sich. Anerste wii anere relichyoone, sin mer wii een familye, opwool mer fon unerxiitliche lënter un kultuure khome. Meyer xpiire tiise woere liipe in unser fersamlunge un konkrëse. Tas lost uns noch sicher tas mer Yeehoowa aan peete in te aat woo tëm kefalt.
14. Tëm noo Koloser 3:12-14, was is een wichtich aat fer uns naner tiif liip tsayche?
14 Ti Piipel saat uns: “Tuut tiif liip eene tsu te anere hon.” (1 Phe. 4:8) Een aat fer tiise sort liip tsayche is uns naner fertsaye un unser imperfektsyoone naner aus hale. Meyer suuche aach keleechenheete fer krooshërtslich sin un fer al in te kemaynt kuut aan nëme, soo kaar tii woo uns fiilaycht pelayticht hon. (Lees Koloser 3:12-14.) * Wën mer soo een sort liip tsayche, pewayse mer tas mer woere kriste sin.
“PLOOS EEN KLAAPE”
15. In was fer anere aate tuun mer noo keen tas payxpiil fon aanpeetung woo ti eyerste kriste kelos hon?
15 Meyer keen aach noo tas payxpiil fon aanpeetung fon te eyerste kriste in anere aate. Tsum payxpiil: meyer orkanisiire uns soo wii ti eyerste kriste kemacht hon. Soo wii tëne, hon mer reesenter superintentente, elteste un ministeryaale tiiner. (Fili. 1:1; Tit. 1:5) Soo wii tëne, respektiire mer Kot sayn kesetse iwer sëks, hayrat un wii tas pluut penutse; un meyer tuun aach ti kemaynt xitse fon tëne woo wole net Kot sayn kesetse noo keen. (Aph. 15:28, 29; 1 Kor. 5:11-13; 6:9, 10; Hep. 13:4)
16. Was lërne mer mit te wërter fon Ëfeser 4:4-6?
16 Lees Ëfeser 4:4-6. * Yeesus hot kesaat tas fiile saan teete tas se tëm sayn tisipele weyere, awer tas net al teete woere kriste sin. (Mat. 7:21-23) Ti Piipel saat aach tas, in te letste taache, fiile teete “een sort fon aanpeetung tsu Kot xayne”. (2 Tim. 3:1, 5) Awer ti Piipel is taytlich wën se saat tas es kept “ploos een klaape” — orer relichyoon — woo Kot kefalt.
17. Was fer krup tuut hayt tsu taach Yeesus noo keen un ti eensich woere relichyoon pratikiire?
17 Meyer hon ti pewaysunge noo kekukt. Meyer hon aach noo kekukt tas payxpiil fon aanpeetung woo Yeesus in kelërnt hot un woo ti eyerste kriste noo kang sin. Un yets: Was fer krup is ti eensich woere relichyoon hayt tsu taach am pratikiire? Kepts ploos een antwort: Yeehoowa sayn Tsayer. Es is een kroos eer teel fon Yeehoowa sayn folek sin un aach ti woerheet iwer Yeehoowa un tëm sayn tsiile wise. Tes weeche, wole mer unser pestes mache fer uns fest aan te woerheet hale mit xtark sicherheet!
LIIT 3 Mayne Kot ich fertrau uf tich
^ parágrafo 5 In tiise artikel, tuun mer xpreche iwer tas payxpiil fon woere aanpeetung woo Yeesus in kelërnt hot un wii ti eyerste kriste tas noo kang sin. Meyer siin aach pewaysunge tas Yeehoowa sayn Tsayer sin tiise payxpiil fon woere aanpeetung hayt tsu taach am noo keen.
^ parágrafo 2 (1te Thesalooniker 1:5) wayl ti kuute notisye woo mer preetiche sin net ploos mit wërter tsu aych khom, awer aach mit macht, mit hayliche kayst un mit xtark sicherheet. Un teyer wist was fer sorte layt sin mer tswixich aych kep fer ayre aychne nutse.
^ parágrafo 9 Kuk te khaste “Os primeiros cristãos usavam o nome de Deus?” in A Sentinela 1te Yuuli fon 2010, sayt 6.
^ parágrafo 10 Tsum payxpiil: in 2008, hot te Paapst Bento XVI een oryentiirung fer ti katoolix khëriche kep: tii thërfte net Kot sayn naame in te relichyeese fersamlunge, liiter orer kepeete penutse.
^ parágrafo 14 (Koloser 3:12-14) Tes weeche, wii rauskesuuchtne fon Kot, hayliche un keliipte, tsiit aych aan mit liiplich mitlayt, kuutheet, teemuut, tsaamheet un ketult. 13 Tuut aych wayter naner aus hale un krooshërtslich fertsaye, soo kaar wën yemant uersache hot fer sich keeche een aner peklaae. Yeehoowa hot aych krooshërtslich fertsayt un teyer solt tas selwich mache. 14 Awer, mee wii tas ales, tuut aych mit liip aan tsiie, wayl ti liip is ti perfekt aat fer ti eenichkheet samer hale.
^ parágrafo 16 (Ëfeser 4:4-6) Es kept ploos een khërper un ploos een kayst, soo wii es ploos een hofnung kept woo teyer keruuft kep sayt; 5 es kept ploos een Hër, ploos een klaape, ploos een taafe; 6 es kept ploos een Kot un Fater fon ale kaar, woo iwer ale is, un woo torich ale un in ale xaft.
^ parágrafo 66 PILT AUSLEYUNG: Yeehoowa sayn Orkanisatsyoon hot ti Tradução do Novo Mundo in mee wii 200 xprooche puplitsiirt. Weeche tas, khene ti layt, in sayn aychne xprooch, een Piipel leese woo Kot sayn naame penutst.
