XTUUTYUM ARTIKEL 43
Kep net uf!
“Wole mer net noo lose tas kuutes se mache.” (KALATER 6:9)
LIIT 68 Plantando a semente do Reino
WAS TUUN MER SIIN? *
1. Was fer frooheet un eer hon mer?
TAS is een kroos eer un frooheet fer uns Yeehoowa sayn Tsayer sin un Kot sayn naame nëme! Meyer tsayche tas mer Tëm sayn Tsayer sin wën mer iwer tëm fer ti anere preetiche un in lërne. Es frayt uns mechtich fiil wën mer yemant helfe khene, “woo ti richtich muut fer tas eewiche leepe” hot, Yeehoowa aach tiine. (Aph. 13:48) Meyer xpiire uns soo wii Yeesus. Wii sayn tisipele tëm fertseelt hon iwer ti kuute resultaate woo se in te preetich aarwayt kehat hon, is Yeesus “aarich froo kep”. (Luk. 10:1, 17, 21)
2. Wii khene mer tsayche tas ti preetich aarwayt wichtich fer uns is?
2 Ti preetich aarwayt is aarich wichtich: leepe hënge too ap. Te aphostel Phaul hot Timoteus uf kemuut: “Tuu wayter acht iwer tich selepst un iwer tayn inlërnung kepe. (...) Wëns tuu tas machst, tuust tuu tich selepst un tii woo tich aan heere rete.” (1 Tim. 4:16) Meyer kepe fiil acht fer uns selepst wayl mer wole fon Kot sayn Raych rechiirt wëre. Tes weeche, xtele mer uns imer aan in een aat woo loop tsu Yeehoowa pringt un woo tsaycht tas mer klaape aan te kuute notisye woo mer preetiche. (Fili. 1:27) Awer, wii khene mer tsayche tas mer acht iwer unser inlërnung kepe? Meyer mise uns kuut in richte fer ti preetich aarwayt un Yeehoowa sayn hilef ferlange eep mer preetiche keen.
3. Tuun ale kaar interes aan te kuute notisye fom Raych tsayche? Kep een payxpiil.
3 Awer, soo kaar wën mer unser pestes mache, im xtant nimant orer weenich layt in unser teritooryum tuun interes aan te kuute notisye fom Raych tsayche. Kuk mool tas payxpiil fom pruuter Georg Lindal. Tee hot in fiile teele fon Islant aleen kepreeticht torich ti yoore 1929 un 1947. Opwool eyer tausente piicher aus kep hot, hot nimant ti woerheet aan kenom. Tee hot kexrip: “Siits aus tas etliche hon sich keeche ti woerheet kextelt. Awer ti meyerste wole ploos niks wise.” Misyoneere fon te Xileat Xuul sin kexikt kep fer in te preetich aarwayt tat helfe. Awer tii hon aach weenich interes torich ti yoore kefun. Tsum xlus — noo 9 yoore —, hon etliche layt fon Islant sich tetikiirt un ketaaft. *
4. Wii khene mer uns xpiire wën ti layt net ti Piipel xtutiire wole?
4 Tas khan uns traurich lose wën ti layt net ti Piipel xtutiire wole. Im xtant, fine mer uns soo wii Phaul. Tee hat ‘een tiif traurichkheet un een xmërts woo sayn hërts net in ruu kelos hot’, wayl ti meyerste yuuter hon net Yeesus wii Mesias aan kenom. (Rom. 9:1-3) Fiilaycht, xtutiirst tuu ti Piipel mit yemant un tuu xtrengst tich aan fer een kuute leerer sin. Tuu machst aach fiil kepeete fer tëm; awer, eyer wënt net aan was eyer lërnt un tuu must noo lose mit tëm xtutiire. Orer im xtant, host tuu noch net een xtuutyum kehat woo pis aan taaf hin khom is. Solst tuu tich xultich xpiire, fiilaycht am tenke tas Yeehoowa net froo mit tayn preetich aarwayt is? In tiise artikel, fine mer ti antwort fer 2 frooche: (1) Was pewayst tas unser preetich aarwayt sayn opjetiiw erfiilt? (2) Was khene mer fon unser preetich aarwayt waarte?
WAS PEWAYST TAS UNSER PREETICH AARWAYT SAYN OPJETIIW ERFIILT?
5. Warom khan sin tas unser aarwayt tsu Yeehoowa tuut net imer ti resultaate pringe woo mer waarte?
5 Ti Piipel saat iwer yemant woo Kot sayn wile macht: “Ales was eyer macht wërt eyer kuut hin kriin.” (Psal. 1:3) Awer, tas wil net saan tas ales was mer fer Yeehoowa mache, tuut ti resultaate pringe woo mer waarte. Warom net? Wayl mer imperfekt sin un mer leepe in een imperfekt welt; tes weeche, is unser leepe “fol mit soriche”. (Yoop 14:1) Es khene propleeme pasiire woo mer net waarte tuun, un woo uns um hale khene se mache was mer kërn wolte in Yeehoowa sayn tiinst. Un noch: tii woo keeche uns sin, fiilaycht khene unser puuplix preetich aarwayt fer een tsayt um hale. (1 Kor. 16:9; 1 The. 2:18) Awer tan, wii tuut Yeehoowa ëntxlise ep unser preetich aarwayt sayn opjetiiw erfiile tuut? Kuk mool etliche piiplixe funtamente woo khene uns helfe tas antworte.
Yeehoowa mërkt unser aanxtrengung, ekaal ep mer perseenlich, orer torich priife un telefoon preetiche (Kuk te apsats 6.)
6. Wii tuut Yeehoowa ëntxlise ep unser preetich aarwayt sayn opjetiiw erfiile tuut?
6 Yeehoowa mërkt unser aanxtrengung un tas mer net uf kepe. Yeehoowa is froo mit uns wën mer, weeche unser liip tsu tëm, wayter flaysich preetiche, soo kaar wën ti anere net heere wole. Phaul hot kexrip: “Kot is net unkerecht. Tan, ferkest eyer sich net fon te aarwayt un ti liip woo teyer tsu sayn naame ketsaycht hot, wii teyer ti hayliche ketiint hot un tii wayter tiine tuut.” (Hep. 6:10) Yeehoowa halt sich traan aan unser aanxtrengung un liip, soo kaar wën mer noch net yemant pis aan taaf hin kenom hon. Tes weeche, was Phaul fer ti korinter kesaat hot, kilt fer tich aach: ‘Tayn xweyer aarwayt im Hër is net umsonst.’ (1 Kor. 15:58) Tan, wëns tuu xtram xafst un net ti resultaate kriist woos tuu kewaart host, tenk aan tiise wërter traan.
7. Was khene mer lërne mit was te aphostel Phaul iwer sayn preetich aarwayt kesaat hot?
7 Phaul waar een mechtich kuut misyoneer kewees. Tee hot naye kemaynte in fiile xtete uf kemacht. Awer een mool, hon etliche layt tëm kritikiirt un kesaat tas eyer net een kuute leerer waar. Fer een antwort kepe, hot eyer net kesaat wii fiil layt eyer keholef hat kriste wëre. Xtats tas, hot eyer kexrip: “Ich hon mee kexaft.” (2 Kor. 11:23) Soo wii Phaul, eriner tich: tas haupste fer Yeehoowa is unser aanxtrengung un tas mer net uf kepe.
8. Was sole mer uns net ferkese iwer unser preetich aarwayt?
8 Unser preetich aarwayt lost Yeehoowa froo. Yeesus hot 70 tisipele kexikt kehat iwer Kot sayn Raych preetiche, un tii sin “mit frooheet tsurik khom”. Warom waare se soo froo? Tii hon fer Yeesus kesaat: “Soo kaar ti temoone heere uns aan wën mer tayn naame penutse!” Awer Yeesus hot tëne korikiirt mit te wërter: “Frayt aych net wayl ti kayste aych aan heere tuun. Xtats tas, frayt aych wayl ayre naame im himel kexrip kep sin.” (Luk. 10:17-20) Yeesus wust tas tii teete net imer tiise kuute resultaate in te preetich aarwayt hon. Un, fer ti woerheet saan, wise mer net wii fiil layt woo Yeesus sayn tisipele keheert hon, sin nochter kriste kep. Ti tisipele miste was ferxteen: ti frooheet teet net ploos weeche ti kuute resultaate khome; ti kreest frooheet teet khome fon wise tas Yeehoowa froo waar mit tëne sayn xweyer aarwayt.
9. Tëm noo Kalater 6:7-9, was tuut pasiire wën mer net noo lose se preetiche?
9 Wën mer net noo lose se preetiche, tuun mer eewiche leepe kriin. Wën mer unser pestes mache fer preetiche un in lërne, tuun mer aach ‘seye fer te wunx fom kayst erfiile’. Meyer khene tas saan wayl, wën mer preetiche, tsayche mer tas mer wole fom hayliche kayst kefiirt wëre. Wën mer “net uf kepe”, ferxprecht uns Yeehoowa tas eewiche leepe kepe, ekaal ep mer yemant keholef hon sich taafe lose orer net. (Lees Kalater 6:7-9.) *
WAS KHENE MER FON UNSER PREETICH AARWAYT WAARTE?
10. Warom tuun etliche uns heere wën mer preetiche un anere net?
10 Op ti layt ti kuute notisye aan heere tuun orer net hëngt hauptseechlich ap aan wii tëne sayn hërts is. Yeesus hot tas aus keleet in te ferklaychung fon tëm pauer woo soome in unerxiitliche sorte pootem xmayst; awer ploos te soome woo in een kuute pootem falt, kept kuute resultaate. (Luk. 8:5-8) Yeesus hot kesaat tas ti unerxiitliche sorte pootem petayte ti layt sayn aanxtelung foer “Kot sayn wort”, tëm noo was in sayn hërts is. (Luk. 8:11-15) Soo wii te pauer, khene mer net kontroliire ti resultaate fon unser aarwayt; tas hëngt ap aan wii tas hërts fon tëne woo uns heere is. Unser flicht is wayter ti soome seye, es wil saan, ti kuute notisye fon Kot sayn Raych preetiche. Tas is soo wii Phaul kesaat hot: “Yeete eene kriit sayn peloonung tëm noo sayn aychne aarwayt” — net tëm noo ti resultaate fon sayn aarwayt. (1 Kor. 3:8)
Opwool Noee hot fiile yoore troy kepreeticht, sin ploos sayn fraa, sayn soone un tëne sayn fraae mit tëm in te arich rin kang. Noch soo, hot Noee Kot aan keheert un fërtich kemacht ti aarwayt woo eyer kriit hat! (Kuk te apsats 11.)
11. Warom waar Yeehoowa froo mit Noee sayn preetich aarwayt opwool nimant tëm keheert hot? (Kuk tas pilt am aanfang fom piichelche.)
11 Torich tas kanse kexicht, hon fiile tiiner fon Yeehoowa fer layt kepreeticht woo tëne net heere wolte. Tsum payxpiil: Noee waar “een preeticher fon kerechtichkheet” tsiimlich sicher torich 40 orer 50 yoore. (2 Phe. 2:5) Kewis, hot eyer kewaart tas yemant teet sayn preetich aarwayt aan nëme, awer Yeehoowa hot net kesaat tas es pasiire teet. In woerheet, wii Kot Noee oryentiirt hot ti arich paue, hot Eyer kesaat: “Tuu solst in te arich rin keen, mit tayne puupe, un tayn fraa, un mit te fraae fon tayne puupe.” (Xee. 6:18) Un wii Yeehoowa Noee kesaat hot wii kroos selt ti arich sin, fiilaycht hot eyer etwas kemërkt: net fiile mënxe teete tëm aan heere, wayl es weyer net kenuuch plats fer fiile layt in te arich tuun. (Xee. 6:15) Un wii mer xon wise, noch net mool een persoon hot Noee aan keheert. (Xee. 7:7) Hot Yeehoowa ketenkt tas Noee sayn preetich aarwayt net kuut kenuuch waar? Sicher net! Kot waar aarich froo mit Noee kewees, wayl eyer folich waar. (Xee. 6:22)
12. Wii hot Yeeremias frooheet in sayn preetich aarwayt kefun opwool ti layt tekeeche waare un tëm net heere wolte?
12 Te profeet Yeeremias hot was eenliches mit keleept. Tee hot mee wii 40 yoore kepreeticht opwool fiile layt tekeeche waare un net heere wolte. Ti keechner hon tëm ‘ferxënt un ferxpot’ un tas hot tëm oone muut kelos — soo oone muut tas eyer sayn insetsung uf kepe wolt. (Yee. 20:8, 9) Awer Yeeremias hot net uf kep! Was hot tëm keholef wayter preetiche un frooheet in sayn tiinst fine? Tee hot sich traan kehal aan 2 wichtiche woerheete. Eyerst: Kot sayn pexeet, woo eyer fer ti layt kenom hot, teet tëne “een futuer un een hofnung kepe”. (Yee. 29:11) Tsweet: Yeehoowa hot Yeeremias raus kesuucht fer tëm Sayn naame nëme, tëm representiire. (Yee. 15:16) Meyer nëme aach een pexeet fon hofnung fer ti layt in tiise tunkel welt un meyer nëme aach Yeehoowa sayn naame, wii tëm sayn Tsayer. Wën mer uns traan hale aan tiise 2 wichtiche woerheete, khene mer frooheet fine, ekaal ep ti layt uns heere orer net.
13. Was lërne mer fon Yeesus sayn ferklaychung in Markus 4:26-29?
13 Es nëmt een lang tsayt fer yemant klaape paue. Yeesus hot iwer tas kexproch in te ferklaychung fon tëm pauer woo soome seet un tan xloofe keet. (Lees Markus 4:26-29.) * Noo tas te pauer ti soome seet, tuun se lamsam wakse. Tee khan niks mache tas es xneler keet. In te selwich aat, must tuu fiilaycht waarte pis tuu siist tayn Piipel xtutënt aan wëne was eyer lërnt. Een pauer khan net sayn plantse tswinge soo xnel wii eyer wil wakse; un meyer khene net unser Piipel xtutënte sayn klaape tswinge soo xnel wii meyer wole wakse. Tan, kep net uf un ferliir net tayn muut wën se net soo xnel foran keen wiis tuu kërn hëst. Tisipele mache is wii een plantaaj uf phase: meyer mise ketult hon. (Tya. 5:7, 8)
14. Was fer payxpiil tsaycht tas ti resultaate in te preetich aarwayt khene een lang tsayt taure fer se khome?
14 In etliche teritoorye, khan es een lang tsayt nëme pis yemant sich taafe lost. Kuk mool tas payxpiil fon Gladys un sayn xwester Ruby Allen. * In 1959 sin se wii rekulaare pyoneerine kexikt kep fer een kleen xtat in Quebec, Kanata. Ti layt fon te xtat hate pang fon was sayn nochpere un ti farer tenke orer mache teete. Tes weeche, wolte se net heere wën Yeehoowa sayn Tsayer mit tëne kexproch hon. Gladys erinert sich: “Meyer hon 8 xtune te taach torich 2 yoore haus tsu haus kepreeticht, un noch net mool een persoon hot uns aan keheert. Ti layt sin pis te teer khom, hon kesiin weer mer waare, un tan sin se fat kang. Awer mer hon net uf kep!” Mit te tsayt, is ti layt sayn aanxtelung peser kep un etliche hon aan kefang se heere. Hayt, kepts 3 kemaynte in tiise xtat. (Isa. 60:22)
15. Was tuut 1te Korinter 3:6, 7 uns in lërne iwer ti aarwayt fer tisipele mache?
15 Fiile layt sin neetich fer yemant helfe een tisipel wëre. Es is xon kesaat kep: een kans kemaynt is neetich fer yemant helfe pis aan taaf hin khome. (Lees 1te Korinter 3:6, 7.) * Tsum payxpiil: een pruuter lost een pleetche mit een persoon woo interes tsaycht. Awer, tee khan net tsurik khome in te xtun woo kuut fer ti persoon is. Tes weeche, ferlangt eyer hilef fer een aner pruuter ti rik pesuuch mache. Tee kriit tas hin een Piipel xtuutyum aan fange. Tan, laat eyer unerxiitliche priiter in fer im xtuutyum keen, un yeete eene tuut te xtutënt uf muute in een ekstra aat. Khan ma saan tas yeete eene helft kiise te soome fon te woerheet. Soo, ale kaar woo in te kaystliche erntung xafe, khene sich fraye wën yemant sich taafe lost. (Yoo. 4:35-38)
16. Warom khanst tuu frooheet in te preetich aarwayt fine opwool tayn kesuntheet net kuut is orer wëns tuu xweecher kep pist?
16 Fiilaycht khanst tuu net mee soo fiil in te preetich aarwayt mache wayl tayn kesuntheet net soo kuut is orer wayls tuu xweecher kep pist. Awer tuu khanst noch frooheet fine in was tuu mache khanst. Kuk mool was mim kheenich Tawi un sayn mëner pasiirt is. Tii sin keeche ti amalekiiter kang fer sayn familye un tinge tsurik hoole. Awer, 200 fon tëm sayn mëner waare tsu miit kewees fer se khëmpfe; tes weeche, sin se tsurik keplip fer ti tinge uf phase woo tsu tëne keheert hon. Tawi un sayn mëner hon te kriich kewun un hon fiile kiltiche tinge fon sayn faynte kehool. Tawi hot kexikt tas tiise tinge selte ekaal tswixich sayn mëner al keteelt wëre — mit tëne woo keplip sin un mit tëne woo khëmpfe kang sin. (1 Sam. 30:21-25) Tiise kexicht lërnt uns etwas iwer unser aarwayt fer tisipele mache. Im xtant, khanst tuu net soo fiil xafe wiis tuu kërn teest; awer wëns tuu tayn pestes machst, khanst tuu noch fiil frayt hon wën yemant Yeehoowa khëne lërnt un sich taafe lost.
17. Fer was sole mer Yeehoowa tanke?
17 Meyer tanke Yeehoowa weeche ti liiplich aat wii eyer unser aarwayt tsu tëm siit. Tee ferxteet tas mer khene net ti layt tswinge uns aan heere orer Tëm aan peete. Awer, Yeehoowa siit wii xtram mer xafe un wii fiil mer tëm liipe, un tee peloont uns weeche tas. Tee lërnt uns aach froo sin mit was mer mache khene in te preetich aarwayt. (Yoo. 14:12) Meyer khene uns sicher sin: Yeehoowa playpt froo mit uns wën mer net uf kepe!
LIIT 67 “Tuu tas wort preetiche”
^ parágrafo 5 Es lost uns froo wën ti layt ti Piipel xtutiire wole; awer tas khan uns aach traurich lose wën se tas net wole. Im xtant, host tuu een Piipel xtutënt woo net aan wënt was eyer lërnt. Orer fiilaycht host tuu noch net mit yemant xtutiirt woo sich taafe kelos hot. Wil tas saan tas tayn aarwayt tsu Yeehoowa net kuut kenuuch is? In tiise artikel, lërne mer warom khene mer uns sicher sin tas unser preetich aarwayt tuut sayn opjetiiw erfiile un wii khene mer uns froo hale, ekaal ep ti layt uns heere tuun orer net.
^ parágrafo 9 (Kalater 6:7-9) Lost aych net hiner keen — Kot lost sich net ferxpote. Wayl, tas was te mënx seet, tas tuut eyer aach ernte. 8 Tee woo seye tuut fer te wunx fom flayx erfiile, tuut fon tas fernichtung ernte; awer tee woo seye tuut fer te wunx fom kayst erfiile, tuut fon tas eewiche leepe ernte. 9 Soo, wole mer net noo lose tas kuutes se mache, wayl, wën mer net uf kepe, tuun mer in te richtich tsayt ernte.
^ parágrafo 13 (Markus 4:26-29) Too, hot eyer noch kesaat: “Kot sayn Raych is soo wii wën eene man soome ufm pootem xmayst. 27 Tee keet oomts xloofe un xtayt moynts uf, un ti soome keen uf un wakse, awer tee wees net kenau wii tas pasiirt. 28 Fon tëm pootem selepst khomt te frucht: eyerst ti xtang, tan te eere un tsum xlus te khorn in tëm eere. 29 Awer, klaych wii ti khërne tsaytich sin, tuut eyer se ernte mit te sichel, wayl ti tsayt fon te erntung khom is.”
^ parágrafo 14 Tuu khanst Gladys Allen sayn leepes kexicht fine in tëm artikel “Eu faria tudo outra vez!”, in A Sentinela 1te Septemper fon 2002.
^ parágrafo 15 (1te Korinter 3:6, 7) Ich hon keplants, Apolo hot kekos, awer Kot hot es wakse kemacht. 7 Tan, tee woo plantst un tee woo kiist fertiine net ti eer, awer Kot, woo es wakse macht, fertiint es.
