YEETES yoer, wëre fiil weyertliche xeef wii Yeehoowa sayn Tsayer noch mool aan kenom. Iwerlee tich ti kroos ‘frayt woos im himel kept’ wën yeete eene fon tëne retuer khomt! (Luk. 15:7, 10) Wën tas tayn situatsyoon is, say tich sicher tas Yeehoowa, Yeesus, un ti engele sin aarich froo wayls tuu noch mool teel fon te kemaynt pist. Awer soo lang wiis tuu tayn froyntxaft mit Yeehoowa noch mool uf paust, khanst tuu xwiirichkheete mit mache. Was sin etliche fon tëne un was khan tich helfe?

Fiile priiter, noo tas se tsurik tsu te kemaynt khome, xpiire sich noch oone muut. Im xtant, ferxteest tuu wii te kheenich Tawi sich kexpiirt hot. Soo kaar noo tas sayn sinte fertsayt kep sin, hot eyer kesaat: “Mayn feeler iwerlaate mich.” (Psal. 40:12; 65:3) Noo tas yemant tsurik tsu Yeehoowa khomt, khan eyer sich noch xultich un ferxeemt xpiire torich fiile yoore. Isabelle, * woo mee wii 20 yoore tesasosiirt waar, saat: “Es waar aarich xweyer fer mich se klaape tas Yeehoowa khent mich fertsaye.” Wëns tuu wayter oone muut playpst, khan tayn froyntxaft mit Yeehoowa noch mool xwach wëre. (Xpr. 24:10) Los tas net pasiire!

Anere tenke: ‘Es khost tsu fiil aarwayt mayn froyntxaft mit Yeehoowa noch mool uf paue; ich kriin tas net hin.’ Noo tas Antoine noch mool wii Yeehoowa sayn Tsayer aan kenom kep is, hot eyer kesaat: “Es waar wii wën ich kans ferkes hët wii een krist leept.” Weeche soo sorte xpiirunge, tuun etliche net fer Yeehoowa mache ales was se khene.

Tsum payxpiil: iwerlee tich tas een triles xtorm fiil xaate fer een haus pringt. Wën te man tsu weem tas haus keheert tas siit, fiilaycht xpiirt eyer sich iwerlaat un tenkt: ‘Es tuut mich fiil tsayt un aanxtrengung khoste fer tas ales noch mool uf  paue.’ In te selwich aat, wën tayn froyntxaft mit Yeehoowa fersaut kep is weeche een xweyer sint, fiilaycht tenkst tuu: ‘Es tuut mich fiil tsayt un aanxtrengung khoste fer tas noch mool uf paue.’ Awer tuu pist net aleen — tuu khanst hilef kriin!

Yeehoowa laat uns in: “Khomt, un wole mer ti sache tswixich uns in te ray tuun.” (Isa. 1:18) Tuu host tich xon fiil aan kextrengt fer ti ‘sache mit Yeehoowa in te ray tuun’, un Yeehoowa liipt tich weeche tas. Tenk too traan: wayls tuu tsurik tsu Yeehoowa khom pist, khan Tee tich wii een payxpiil penutse fer se tsayche tas te Taywel een liichner is! (Xpr. 27:11)

Wayls tuu tsurik tsu Yeehoowa khom pist, host tuu tich tichter pay Yeehoowa kexaft, un tee ferxprecht tas eyer tuut aach tichter pay tich khome. (Tya. 4:8) Es is kuut tas ti anere mërke tas tuu tsurik khom pist. Awer es is net kenuuch ploos noch mool kekhënt wëre wii teel fon te kemaynt. Tuu must wayter tayn liip fer tayn Fater un Froynt Yeehoowa ferxtërke. Wii khanst tuu tas mache?

Fersuuch tsiile xtele woos tuu trefe khanst. Tsiimlich sicher, erinerst tuu noch fon te haupste inlërnunge iwer Yeehoowa un sayn ferxpreche fer ti tsukhunft. Awer tuu must een kuut kaystlich rutiin noch mool hon; too tepay is ti kuute notisye preetiche, in te fersamlunge keen un mit tayn priiter un xwestere sin. Kuk mool etliche tsiile.

Tuu imer mit Yeehoowa fertseele. Tayn Fater wees tas, wëns tuu tich wayter xultich xpiirst, khan tas xweyer fer tich sin tsu Tëm peete. (Rom. 8:26) Awer tuu “wayter peete”; saa fer Yeehoowa tas tuu wërklich wilst Tëm sayn froynt sin. (Rom. 12:12) Andrej erinert sich: “Ich hon mich mechtich xultich un ferxeemt kexpiirt. Awer, yeetes mool woo ich kepeet hon, hon ich mich peser kefun. Ich waar in friit kewees.” Wëns tuu net weest iwer was se peete, xtutiir ti Psalme 51 un 65. Tii tsayche Tawi sayn kepeete noo tas eyer sich peroyt hot.

Tuu ti Piipel reeklich xtutiire. Tas tuut tayn klaape un tayn liip tsu Yeehoowa ferxtërke. (Psal. 19:7-11) Felipe saat: “Wayl ich kheen kuut rutiin hat fer ti Piipel xtutiire, sin ich xwach kep un hon Yeehoowa traurich kelos. Ich wolt net te selwiche feeler 2 mool mache. Tes weeche, hon ich ëntxlist mayn perseenlich xtuutyum reeklich in hale.” Tuu khanst tas selwiche mache! Wëns tuu net weest iwer was xtutiire, ferlang hilef fer een froynt woo een xtarke klaape hot.

Tuu tayn froyntxaft mit tayn priiter un xwestere noch mool uf paue. Etliche woo tsurik tsu te kemaynt khome, mache sich ketanke tas ti anere khente pees mit tëne sin. Larissa erkhënt: “Ich hon mich aarich ferxeemt kexpiirt. Ich hon ketenkt tas ich mayn priiter wee kemacht hët. Tiise xpiirunge sin mit mich een lang tsayt keplip.” Say tich sicher: ti elteste un ti priiter al wole tich helfe tayn froyntxaft mit Yeehoowa noch mool uf paue. (Kuk te khaste “ Was khene ti elteste mache?”) Tii sin froo tas tuu retuer khom pist, un tii wole wërklich hon tas tuu froo wërst! (Xpr. 17:17)

Was khanst tuu mache fer tich tichter pay te kemaynt xafe? Tuu imer tsu te fersamlunge mit tayn priiter keen un tuu aach mit tëne reeklich preetiche. Wii tuut tas tich helfe? Felix saat: “Ti kemaynt waar hërtslich am waarte tas ich tsurik khemt. Ich hon mich keliipt kexpiirt. Tii al hon mich keholef xpiire tas ich noch mool teel fon te familye waar, tas Yeehoowa mich fertsayt hat, un tas ich khent foran keen un wayter Yeehoowa tiine.” (Kuk te khaste “ Was khanst tuu mache?”)

In te tsayt woos tuu tayn froyntxaft mit Yeehoowa noch mool uf paust, Satanaas tuut wayter “triles xtorme” keeche tich xike fer fersuuche tich xwach lose. (Luk. 4:13) Tan, tuu tich foer perayte — ferxtërk yets tayn froyntxaft mit Yeehoowa!

Yeehoowa ferxprecht iwer sayn xeef: “Tas woo sich ferloer hot, tuun ich suuche, tas woo sich ap kelënkt hot, tuun ich tsurik pringe, tas woo sich wee kemacht hot, tuun ich sayn wee tsu wikele, un tas woo xwach is, tuun ich ferxtërke.” (Ese. 34:16) Yeehoowa hot xon fiile fon tëm sayn tiiner keholef sayn froyntxaft mit Tëm noch mool uf paue. Say tich sicher tas Yeehoowa wil tich aach helfe tas mache un tayn froyntxaft mit Tëm noch xtërker lose.