1. Was khomt in unser khop wën mer in een parmhërtslich persoon tenke?

WËN mer aan yemant tenke woo parmhërtslich is, xtele mer uns fiilaycht yemant foer woo mitlaytich, kuut, liiplich un krooshërtslich is. Im xtant tenke mer aach traan aan Yeesus sayn kexicht iwer te kuute samaritaaner. Tiise man fon een aner natsyoon hot een yuute mit “parmhërtslichkheet pehantelt”, noo tas xpitspuupe tëm kextool un ferklopt hon. Te samaritaanixe man ‘hot mitlayt fon tëm yuute kexpiirt’ un hot tëm liiplich uf kephast. (Luk. 10:29-37) Tiise kexicht lërnt uns fiil iwer ti parmhërtslichkheet — een xeen kwaliteet fon unser Kot. Tee is parmhërtslich wayl eyer uns liipt. Un yeete taach, in fiile aate, tsaycht eyer uns sayn parmhërtslichkheet.

2. Was is een aner aat fer parmhërtslichkheet tsayche?

² Awer es kept een aner aat wii een persoon parmhërtslichkheet tsayche khan — tii khan raus suuche net xtroofe yemant woo tas fertiint. Meyer khene saan tas Kot hot uns tiise sort parmhërtslichkheet ketsaycht. “Eyer tuut net mit uns um keen tëm noo unsere sinte”, saat te psalmist. (Psal. 103:10) Awer als mool, khan sin tas Kot xtark tisipliin kept fer yemant woo kesint hot.

3. Was fer frooche tuun mer antworte?

³ In tiise artikel, tuun mer ti antwort fon te Piipel fer tiise 3 frooche siin: Warom tsaycht Yeehoowa parmhërtslichkheet? Khan yemant een xtark tisipliin kepe un noch soo parmhërtslich sin? Un was khan uns helfe parmhërtslichkheet tsayche?

4. Warom tuut Yeehoowa parmhërtslichkheet tsayche?

⁴ Yeehoowa tsaycht kërn parmhërtslichkheet. Te aphostel Phaul hot kexrip: “Kot is raych in parmhërtslichkheet.” Too waar Phaul am aus leye tas Yeehoowa parmhërtslich is wayl Eyer ti himlix hofnung fer sayn imperfekte kesalpte tiiner kept. (Ëfe. 2:4-7) Awer Kot is parmhërtslich net ploos mit sayn kesalpte tiiner. Te  psalmist Tawi hot kexrip: “Yeehoowa is kuut mit ale kaar, un ma khan sayn parmhërtslichkheet siin in ale sayn aarwayte.” (Psal. 145:9) Wayl Kot ti layt liipt, tsaycht eyer parmhërtslichkheet imer wën eyer een uersach fer tas fint.

5. Wii hot Yeesus iwer Yeehoowa sayn parmhërtslichkheet kelërnt?

⁵ Yeesus is ti persoon woo te pest wees wii Yeehoowa kërn parmhërtslichkheet tsaycht. Tee un sayn Fater waare mitsamer im himel torich tausente yoore fon tëm mënxliche kexicht. (Xpr. 8:30, 31) Yeesus hot kesiin sayn Fater fiil mools parmhërtslichkheet fer sintiche mënxe tsayche. (Psal. 78:37-42) Wii Yeesus anere in kelërnt hot, hot eyer ofts kexproch iwer tiise xeen kwaliteet fon sayn himlixe Fater.

6. Was fer kexicht woo Yeesus fertseelt hot, helft uns Yeehoowa sayn parmhërtslichkheet ferxteen?

⁶ Wii mer im letste artikel kesiin hon, Yeesus hot tas kexicht fon tëm ferloerne soon penutst fer uns helfe ferxteen wii kërn tsaycht Yeehoowa parmhërtslichkheet. Te soon is fon sayn haus fat kang un hot “sayn kans ërpxaft in een ausferxeemt leepe fertrip”. (Luk. 15:13) Xpeeter, hot eyer sich fon tas peroyt, sich kleen kemacht, un is tsurik tsu sayn haus kang. Wii hot tëm sayn fater sich aan kextelt? Te yunge man praycht net fiil waarte fer ti antwort fine. Yeesus hot kesaat: “Wii tee [soon] noch wayt wech waar, hot sayn fater iim kesiin un hot mitlayt kexpiirt; tan is eyer kexprung, un hot tëm um kekrif un liiplich kekhus.” Te fater hot net sayn soon niter kextelt. Xtats tas, hot eyer sayn soon parmhërtslich fertsayt un tëm noch mool in sayn familye aan kenom. Te ferloerne soon hot kroose sinte kemacht, awer wayl eyer sich peroyt hot, hot sayn fater tëm fertsayt. Yeehoowa is soo wii tiise parmhërtsliche fater. Mit tiise xeene kexicht, hot Yeesus ketsaycht tas Kot wil ti sintiche layt fertsaye woo sich wërklich peroyt hon. (Luk. 15:17-24)

7. Wii tuut ti aat wii Yeehoowa parmhërtslichkheet tsaycht pewayse tas eyer mechtich kluuch is?

⁷ Yeehoowa tsaycht parmhërtslichkheet wayl eyer mechtich kluuch is. Tes weeche, macht Eyer imer ëntxlise woo kuut fer sayn kriatsyoon sin. Ti Piipel saat tas ti “kluucheet fon oowe” is “fol mit parmhërtslichkheet un kuute friichte”. (Tya. 3:17) Kot is wii een liipliche fater woo wees tas es kuut fer sayn khiner is wën eyer parmhërtslich is. (Psal. 103:13; Isa. 49:15) Weeche tiise parmhërtslichkheet, khene se een hofnung hon, opwool se imperfekt sin. Tan, wayl Yeehoowa mechtich kluuch is, imer wën eyer siit een uersach fer parmhërtslichkheet tsayche, macht eyer tas. Awer, Kot wees  aach wën eyer net parmhërtslichkheet tsayche sol — tee macht tas nii wën es petayt aan nëme was ferkheert is. Wole mer een payxpiil siin woo helft uns tas ferxteen.

8. Was is als mool neetich se mache un warom?

⁸ Wole mer saan tas een tiiner fon Yeehoowa sucht raus een imoraalix leepe nëme. Was sole mer mache? Kot hot Phaul kelënkt xraype: ‘Lost noo keselxaft mit tëm hon.’ (1 Kor. 5:11) Tii woo sinte un sich net peroye wëre fon te kemaynt tesasosiirt. Tas is neetich fer ti troye priiter xitse un fer se tsayche tas mer Kot sayn kesetse pay xteen. Awer wën yemant tesasosiirt is, khene etliche tenke tas Kot net parmhërtslich mit tëm waar. Is tas wërklich woer? Wole mer tas yets siin.

9-10. Tëm noo Hepreeyer 12:5, 6, warom khene mer saan tas ti tesasosyasyoon is een aat fer parmhërtslichkheet tsayche? Mach een ferklaychung.

⁹ Es lost uns aarich traurich wën mer ti pekhantmachung heere tas yemant woo mer khëne un liipe “net mee Yeehoowa sayn Tsayer is”. Im xtant tenke mer: ‘Waar tas wërklich neetich?’ Is es wërklich parmhërtslich yemant tesasosiire? Yaa, tas is. Net tisipliniire yemant woo tas praucht is net kluuch, parmhërtslich orer liiplich. (Xpr. 13:24) Khan ti tesasosyasyoon yemant helfe sich ënere un peroye? Sicher. (Lees Hepreeyer 12:5, 6.) * Fiile priiter un xwestere, woo xweyere sinte am mache waare, hon kesaat tas ti tesasosyasyoon waar kraat was se praychte. Es hot tëne keholef se mërke wii xlim tëne sayn sint waar, sich peroye, sayn aanxtelung ënere un tsurik tsu Yeehoowa sayn liiplich umaarem khome.

¹⁰ Kuk mool ti neekst ferklaychung; tii heleft uns ferxteen warom ti tesasosyasyoon tsaycht aach parmhërtslichkheet fer ti kemaynt. Een xeefer mërkt tas een fon sayn xeef krank is. Tee wees tas fer tiise krankheet heele, mus eyer tas xoof aus naner fon te anere mache. Awer ti xeef sin kërn paysamer un tii wëre unruych wën se aus naner sin. Tan, wil tas saan tas te xeefer krop orer xtram is wayl eyer tas macht? Kewis net. Tee wees tas wën eyer tas kranke xoof pay te anere lost, tuut tas ti anere xeef aan xteche. Tes weeche, fer te kanse trop xeef xitse, lost eyer tas woo krank is wayt wech fon te anere. (Kuk aach Lewiitikus 13:3, 4.)

11. (a) Warom khan ma saan tas yemant woo tesasosiirt is, eenlich wii een krank xoof is? (b) Was khene tii woo tesasosiirt sin mache un was fer hilef khene se kriin?

¹¹ Meyer khene saan tas een krist woo tesasosiirt is, is wii tiise krank xoof. Tee is kaystlich krank. (Tya. 5:14) Soo wii een krankheet woo aan xtecht, yemant woo sayn froyntxaft mit Yeehoowa fersaut hot, khan ti anere uf muute xlechte tinge mache. Tes weeche, is es als mool neetich yemant tesasosiire wën eyer kaystlich krank is. Tiise tisipliin tsaycht Kot sayn liip tsu tëne woo troy in te kemaynt plaype. Un khan sin tas tas helft te sintiche mënx se mërke wii xlim sayn sint waar un sich peroye. Soo lang wii eyer tesasosiirt is, khan eyer imer noch in te fersamlunge khome; tat khan eyer ti piiplixe oryentiirunge kriin un sayn klaape noch mool xtark mache. Tee khan aach puplikatsyoone kriin fer se leese un xtutiire un khan aach te JW Broadcasting^® kuke. Un wën ti elteste siin tas tee am ënerunge mache is, khene se tan un wan tëm aanreete kepe fer tëm helfe sayn froyntxaft mit Yeehoowa noch mool uf paue. Soo, khan eyer mit te tsayt noch mool wii Yeehoowa sayn Tsayer aan kenom wëre. *

12. Was is tas liiplich un parmhërtslich tings woo ti elteste mache khene wën een sintich persoon sich net peroyt?

 ¹² Es is imer kuut uns erinere: ploos tii woo een sint mache un sich net peroye wëre fon te kemaynt tesasosiirt. Ti elteste wise tas es een ërnst flicht is, un tii tenke fiil too triwer noo eep se een ëntxlus mache. Tii wise tas Kot kept “tisipliin im richtich moos”, un Tee wil hon tas tii tas selwiche mache. (Yee. 30:11) Ti elteste liipe sayn priiter, un wole niks mache woo khent xaate fer tëne sayn froyntxaft mit Yeehoowa pringe. Awer als mool, tas liiplich un parmhërtslich tings fer se mache is te sintiche mënx aus te kemaynt fer een tsayt tuun.

13. Warom waar es neetich een krist fon te kemaynt in Korinto tesasosiire?

¹³ Kuk mool wii te aphostel Phaul um kang is mit een sintich persoon woo sich net peroyt hot. Een krist in Korinto hot sëksuaal imoraaliteet mit te fraa fon sayn fater pratikiirt. Was fer een xreklich situatsyoon, kël? Phaul wust tas Kot hat fer ti israeliiter in te ferkangne yoore kesaat: “Te man woo sëks macht mit te fraa fon sayn fater, pringt xaam fer sayn fater. Ti tswaay mise sicher um keprung wëre.” (Lew. 20:11) Kewis, Phaul khont net saan fer ti kemaynt te man um pringe; awer tee hot kesaat tas tii solte tee tesasosiire. Ti imoraalix aanxtelung fon tiise man waar anere in te kemaynt am petrefe; etliche hon soo kaar ketenkt tas es net soo een xlim sint waar. (1 Kor. 5:1, 2, 13)

14. Wii un warom hot Phaul parmhërtslichkheet ketsaycht fer te man in Korinto woo tesasosiirt waar? (2^te Korinter 2:5-8, 11)

¹⁴ Een tsayt xpeeter, hot te aphostel Phaul tsum wise kriit tas te man kroose ënerunge kemacht hot. Tee hat sich wërklich peroyt! Opwool tiise man xaam fer ti kemaynt keprung hat, hot Phaul fer ti elteste kesaat tas eyer wolt “net tsu xtreng sin”. Tee hot tëne oryentiirt: ‘Teyer solt tëm mit kuutheet fertsaye un treeste.’ Phaul saat aach warom solte se tas mache: “Wën net, khan ti iwermeesich traurichkheet tëm iwerlaate.” Phaul hot mitlayt fon tëm man kexpiirt. Tee wolt net hon tas te man sich soo iwerlaat xpiire teet weeche sayn sint, tas eyer noo lose teet fertsayung suuche. (Lees 2^te Korinter 2:5-8, * 11. *)

15. Wii khene ti elteste xtark tisipliin kepe un in te selwich tsayt parmhërtslich sin?

 ¹⁵ Soo wii Kot, tsayche ti elteste kërn parmhërtslichkheet. Tii kepe xtark tisipliin imer wëns neetich is, awer tsayche parmhërtslichkheet imer wëns meechlich is. Wën ti elteste net tisipliin kepe fer weem tas praucht, sin se net parmhërtslichkheet am tsayche; xtats tas, sin se am aan nëme was ferkheert is. Awer, sin ploos ti elteste woo mise parmhërtslich sin?

16. Tëm noo Xpriiche 21:13, wii pehantelt Yeehoowa tii woo net parmhërtslichkheet tsayche?

¹⁶ Al ti kriste mise fersuuche Yeehoowa sayn parmhërtslichkheet noo mache. Warom? Een uersach is tas Kot heert net tii woo net parmhërtslich sin. (Lees Xpriiche 21:13.) * Es weyer niks kuutes wën Yeehoowa noo lose teet unser kepeete heere, kël? Tes weeche, mise mer uf phase fer net krop un xtreng mit te anere sin. Wën een pruuter orer xwester woo am layte is hilef ferlangt, sole mer net unser oore tsu mache. Xtats tas, sole mer imer fërtich sin fer se heere “wën te xwache mënx hilef ferlangt”. In te selwich aat, mache mer unser pestes fer aan se wëne was tiise wersikel saat: “Weer net ti parmhërtslichkheet pratikiirt, wërt oone parmhërtslichkheet kericht.” (Tya. 2:13) Wën mer mit teemuut traan tenke aan wii fiil parmhërtslichkheet meyer prayche, is es laychter parmhërtslichkheet fer ti anere tsayche. Meyer wole tas haupstseechlich mache wën yemant sich peroyt hot un tsurik tsu te kemaynt khom is.

17. Wii hot Tawi parmhërtslichkheet ketsaycht?

¹⁷ Ti Piipel is fol payxpiile woo khene uns helfe parmhërtslich sin, net krop orer xtreng. Tenk mool, tsum payxpiil, am kheenich Tawi. Tee hot ofts parmhërtslichkheet ketsaycht. Opwool Saul tëm um pringe wolt, waar Tawi parmhërtslich mit Yeehoowa sayn kesalpte kheenich — tee hot nii fersuucht Saul tsurik petsaale orer tëm wee mache. (1 Sam. 24:9-12, 18, 19)

18-19. In was fer tswaay situatsyoone hot Tawi kheen parmhërtslichkheet ketsaycht?

¹⁸ Awer Tawi waar net imer parmhërtslich kewees. Tsum payxpiil: een mool hot Napal, een krope mënx, Tawi ferxënt un eyer wolt net ese fer Tawi un sayn mëner kepe. Tawi is aarich wuutich kep un wolt Napal un al ti mëner fon sayn haus um pringe. Awer Napal sayn fraa, Apikaiil, waar kuut un ketultich, un tii hot xnel ese fer Tawi un sayn mëner keprung. Weeche tii, hot Tawi net Napal un sayn mëner um keprung. (1 Sam. 25:9-22, 32-35)

¹⁹ Een aner mool, hot te profeet Natan tsu Tawi fertseelt iwer een rayche man woo een keliipte xoof fon sayn aarme nochper kextool hot. Tawi is mechtich pees kep! Too, hot eyer kesaat: “Soo sicher wii Yeehoowa leept, tuut te man woo tas kemacht hot te toot fertiine!” (2 Sam. 12:1-6) Tawi wust was tas Mosayxe kesets kesaat hot: yemant woo een xoof xtele teet, mist 4 xeef tsurik kepe. (Eeks. 22:1) Awer, Tawi hot kesaat tas te xpitspuup mist um  keprung wëre — tas waar een xweyer kericht kewees. In woerheet, waar Natan ploos een kexicht am fertseele; mit tëm, wolt eyer Tawi helfe se ferxteen tas was eyer kemacht hat fiil xlimer waar. Tsum xlus, waar Yeehoowa aarich parmhërtslich mit Tawi kewees — kans anerste wii Tawi te xpitspuup fon Natan sayn kexicht pehantele teet. (2 Sam. 12:7-13)

20. Was khene mer mit Tawi sayn payxpiil lërne?

²⁰ Mërk tas, wii Tawi aarich pees waar, hot eyer ëntxlist tas Napal un sayn mëner miste ale xtërpe. Un xpeeter, hot Tawi kesaat tas te man in Natan sayn kexicht solt um keprung wëre. Awer, Tawi waar een kuute man kewees; tan, warom hot eyer te man soo xtreng kericht? Tenk een pisye aan was in Tawi sayn leepe kraat pasiirt is. In tiise tsayt, hot Tawi een xweyer kewise kehat. Was lërne mer too temit? Wën yemant ti anere xtreng richte tuut, tas tsaycht tas sayn froyntxaft mit Yeehoowa net kuut traan is. Yeesus hot sayn nookeener xtark aan kereet: “Lost noo se richte, tas teyer net kericht wërt. Wayl soo wii teyer ti anere richte tuut, wërt aych kericht.” (Mat. 7:1, 2) Tan wole mer uf phase fer net xtreng sin un wole mer uns aan xtrenge fer “raych in parmhërtslichkheet” sin, soo wii Kot is.

21-22. Wii khene mer parmhërtslichkheet tsayche?

²¹ Parmhërtslichkheet is mee wii ploos een xpiirung — parmhërtsliche layt mache etwas fer ti anere helfe. Tan, khene meyer al layt suuche woo hilef prayche; tas khan in unser familye, in unser kemaynt orer in tëm plats woo mer woone sin. Sicher, fine mer fiile keleechenheete fer parmhërtslichkheet tsayche. Tsum payxpiil: Khene mer troost fer yemant kepe? Khene mer uns aan piite fer yemant in een praktix aat helfe — im xtant ese in richte orer een aner aarwayt mache? Meecht yemant woo noch mool aan kenom kep is wii Yeehoowa sayn Tsayer een froynt prayche fer tëm uf muute? Orer meechte mer khene anere in unser teritooryum treeste mit tëm pexeet fon te kuute notisye? Tas letste is eene fon te peste aate fer parmhërtslichkheet tsayche fer ale kaar woo mer trefe. (Yoop 29:12, 13; Rom. 10:14, 15; Tya. 1:27)

²² Wën mer mit acht uf phase, tuun mer fiile keleechenheete fine fer parmhërtslichkheet tsayche. Un sicher, wën mer tiise kwaliteet tsayche, tuun mer unser Fater im himel kefale, woo ‘raych in parmhërtslichkheet is’!