1. Was fer hofnung hot Yeehoowa uns kep?

 YEEHOOWA hot uns ti wunerlich hofnung fon eewiche leepe kep. Etliche hofe im himel leepe, wii unxtërpliche kaystliche kriatuure. (1 Kor. 15:50, 53) Awer ti meyerste fon uns hofe fer imer uf te eyert leepe mit perfekt kesuntheet un frooheet. (Apo. 21:3, 4) Ekaal ep mer hërtslich am waarte sin im himel orer uf te eyert leepe, unser hofnung hot fiil weyert fer uns.

2. Aan was xtaypt sich unser hofnung, un warom khene mer tas saan?

² In te Piipel, tas wort “hofnung” hot se tuun mit “se waarte tas kuute tinge pasiire”. Meyer sin uns sicher tas unser hofnung fer te futuer sich erfiile tuut, wayl se fon Yeehoowa khomt. (Rom. 15:13) Meyer wise was eyer ferxproch hot un mer wise aach tas eyer sayn ferxpreche erfiilt. (Nuu. 23:19) Meyer sin uns sicher tas Yeehoowa hot net ploos te wunx, awer aach ti kraft fer se mache was eyer ferxprecht. Tes weeche, unser hofnung xtaypt sich net aan was mer wole fer te futuer hon; tii xtaypt sich aan pewaysunge un aan was mer wise woer is.

3. Was tuun mer in tiise artikel siin? (Psalm 27:14)

³ Unser Fater im himel liipt uns un tee wil hon tas mer uf tëm traue. (Lees Psalm 27:14.) * Wën unser hofnung uf Yeehoowa xtark is, khene mer ti xwiirichkheete aus hale un ti koraaj un frooheet hale, ekaal was mit uns pasiirt. In tiise artikel, lërne mer wii unser hofnung uns xitst. Eyerst, siin mer wii unser hofnung wii een anker un een ayse khap is. Tan, xpreche mer iwer wii mer unser hofnung ferxtërke khene.

4. Warom khene mer saan tas ti hofnung wii een anker is? (Hepreeyer 6:19)

⁴ In sayn priif fer ti hepreeyer, hot te aphostel Phaul unser hofnung mit een anker ferklaycht. (Lees Hepreeyer 6:19.) * Phaul hot eftas reese am meer kemacht un eyer wust tas een anker penutst waar fer net lose een xif sich ap lënke. Een mool, waar eyer in een xif wii een xlim xtorm aan kefang hot. Torich te xtorm, hot eyer kesiin ti xifsmëner phaar anker im meer xmayse, tas tas xif net witich ti xteen kexupt weyer. (Aph. 27:29, 39-41) Soo wii een anker een xif fest halt, unser hofnung halt uns fest, tas mer uns net fon Yeehoowa ap lënke wën mer xweyere tsayte mit leepe. Unser fest hofnung lost uns in ruu wën mer propleeme mit mache, wayl mer klaape tas peser tsayte khome tuun. Eriner tich: Yeesus hot uns aan kesaat tas mer keyacht weyere. (Yoo. 15:20) Soo, triwer noo tenke aan Kot sayn ferxpreche fer te futuer, helft uns tëm wayter fest tiine.

5. Wii hot ti hofnung Yeesus keholef wii eyer foer te toot waar?

⁵ Kuk mool wii ti hofnung Yeesus keholef hot troy plaype, opwool eyer wust tas een xroo toot foer tëm waar. Im Phingste Taach fon 33 N.K., hot te aphostel Pheeter iwer ti profetsii fon een Psalm kexproch. Tii pexraypt wii Yeesus sich in ruu un sicher kexpiirt hot: “Ich tuun in hofnung leepe. Wayl tuu lost mich net im Kraap. Tuu lost net weer leaal is, fertërpe. (…) Tuu tuust mich fol frooheet lose in tayn presens.” (Aph. 2:25-28; Psal. 16:8-11) Yeesus wust tas eyer xtërpe teet, awer tee hat een fest hofnung tas Kot tëm uf ruufe teet un tas eyer noch mool ti frooheet kreecht fer tsurik mit sayn Fater im himel sin. (Hep. 12:2, 3)

6. Was hot een pruuter iwer ti hofnung kesaat?

⁶ Unser hofnung hot xon fiile priiter un xwestere keholef ti proope aus hale. Kuk mool tas payxpiil fon Leonard Chinn, een troye pruuter woo in Englant keleept hot. Torich te 1^te Welt Kriich, is eyer in kexpërt kep wayl eyer net im militeer tiine wolt. Tee is 2 moonate in een solitária keplip. Tan, hon se tëm ketswung xweyer aarwayt mache. Xpeeter, hot eyer kexrip: “Was ich mit kemacht hon, hot mich keholef se mërke wii fiil mise mer hofnung hon fer aus hale. Meyer hon tas payxpiil fon Yeesus, ti aphostele, ti profeete un aach ti ferxpreche fon te Piipel, woo fiil weyert hon. Tas ales kept uns een xtark hofnung fer te futuer un ferxtërkt uns fer aus hale.” Ti hofnung waar wii een anker fer Leonard — un tii khan aach wii een anker fer uns sin!

7. Wii tuun ti proope unser hofnung ferxtërke? (Romaaner 5:3-5; Tyako 1:12)

⁷ Satanaas wil hon tas mer uns iwerlaat xpiire weeche ti proope, awer mit Yeehoowa sayn hilef khene mer yeete eene fon tëne aus hale. Wën mer proope mit mache un tëne mit Yeehoowa sayn hilef aus hale, mërke mer tas mer tëm kefale, un tas ferxtërkt unser hofnung. (Lees Romaaner 5:3-5; * Tyako 1:12. *) Tes weeche, is unser hofnung hayt xtërker wii am aanfang, wii mer ti kuute notisye aan kenom hon.

8. Warom khene mer saan tas ti hofnung wii een ayse khap is? (1^te Thesalooniker 5:8)

⁸ Ti Piipel ferklaycht aach unser hofnung mit een ayse khap. (Lees 1^te Thesalooniker  5:8.) * Een soltaat tuut een ayse khap aan fer sich xitse fon te wee woo ti faynte tëm im khop mache wole. Meyer sin in een khampf keeche Satanaas. Un meyer mise unser ketanke fon sayn atake xitse. Tee penutst fiile unerxiitliche tinge fer uns fersuuche un unser ketanke fersaue. Soo wii een ayse khap een soltaat sayn khop xitst, ti hofnung xitst unser ketanke; un soo, khene mer troy tsu Kot plaype.

9. Was pasiirt mit te layt wën se khee hofnung hon?

⁹ Unser hofnung fon eewiche leepe helft uns kluuche ëntxlise mache. Awer, wën mer lose unser hofnung xwach wëre un aan fange ploos aan unser aychne winxe tenke, khene mer uns ferkese fon unser hofnung fer eewiche leepe hon. Kuk mool was pasiirt is mit etliche kriste woo im friirixe Korinto keleept hon. Tii hon noo kelos uf een wichtich ferxpreche fon Kot klaape — ti hofnung fom ufxtaye fom toot. (1 Kor. 15:12) Phaul hot kexrip tas tii woo net am ufxtaye fom toot klaape, leepe ploos fer sayn aychne winxe erfiile. (1 Kor. 15:32) Hayt, fiile layt woo uf Kot sayn ferxpreche net klaape, mache ales was se khene fer noo sayn luste leepe. Awer meyer sin anerste, wayl mer klaape uf tëm futuer woo Kot ferxproch hot. Unser hofnung is wii een ayse khap woo unser ketanke xitst un uns helft net ploos aan uns selepst tenke, wayl soo was mache teet unser fraayntxaft mit Yeehoowa fersaue. (1 Kor. 15:33, 34)

10. Wii khan unser hofnung uns keeche ferkheerte ketanke xitse?

¹⁰ Unser hofnung xitst uns aach keeche ti ketanke tas mer Yeehoowa nii kefalt kriin. Tsum payxpiil, etliche khene tenke: ‘Ich wëre nii tepay mit tëne woo fer imer leepe tuun. Ich sin net kuut kenuuch… Was Kot fon mich waart, tas tuun ich nii kemacht kriin.’ Tenk tich traan tas Elifas, eene fon Yoop sayn falxe fraaynte, hot was eenliches kesaat: “Wii khan een xtërpliche mënx rayn sin?” Tee hot aach iwer Kot kesaat: “Kuk mool! Tee traut net uf sayn engele; noch net mool te himel is rayn foer sayn aue.” (Yoop 15:14, 15) Tas sin xrekliche liie! Ferkes tich net: is Satanaas woo hinich tiise itee is. Tee wees tas, wëns tuu wayter soo tenkst, tuust tuu aan fange ti hofnung ferliire. Soo, xtos tiise liie ap un hal tich traan aan Kot sayn ferxpreche. Yeehoowa wil hon tas tuu fer imer leepst un tee helft tich tas hin kriin — tuu nii too tefun tswayfele! (1 Tim. 2:3, 4)

11. Warom sole mer ketultich sin soo lang wii mer waarte unser hofnung sich erfiile?

¹¹ Es is net imer laycht unser hofnung xtark hale. Fiilaycht, ferliire mer ti ketult soo lang wii mer waarte Kot sayn ferxpreche erfiile. Awer Yeehoowa is eewich. Tes weeche, siit eyer ti tsayt anerste wii meyer. (2 Phe. 3:8, 9) Tee tuut sayn ferxpreche erfiile in te pest aat wiis meechlich is, awer im xtant, tuut eyer tas net mache in te xtun woo meyer tas waarte. Was khan uns helfe unser hofnung xtark hale soo lang wii mer ketultich waarte Kot sayn ferxpreche erfiile? (Tya. 5:7, 8)

12. Tëm noo Hepreeyer 11:1, 6, was is ti ferpiinung tswixich hofnung un klaape?

¹² Meyer hale unser hofnung xtark wën mer ticht pay Kot plaype, wayl tee macht tas unser hofnung sich erfiilt. In woerheet, ti Piipel ferpiint ti hofnung mim klaape. Fer hofnung hon, mise mer “klaape tas [Kot] eksistiirt un tas eyer peloont tii woo tëm ërnstlich suuche”. (Lees Hepreeyer 11:1, * 6. *) Wën mer wërklich klaape tas Kot eksistiirt,  wërt unser sicherheet xtërker tas eyer macht was eyer ferxproch hot. Yets, wole mer etliche aate kuke wii mer unser fraayntxaft mit Yeehoowa ferxtërke khene un, soo, unser hofnung xtark hale.

13. Wii khene mer ticht pay Kot khome?

¹³ Peet tsu Yeehoowa un lees sayn Wort. Opwool mer Yeehoowa net siin khene, khene mer ticht pay tëm khome. Meyer khene mit tëm xpreche torich tas kepeet, mit te sicherheet tas eyer uns heere tuut. (Yee. 29:11, 12) Meyer khene Kot heere wën mer tëm sayn Wort leese un too triwer noo tenke. Wën mer leese iwer wii Yeehoowa sayn troye tiiner friier uf kephast hot, wërt unser hofnung noch xtërker. “Ales was foer heyer [in Kot sayn Wort] kexrip kep is, is kexrip kep fer uns in lërne, tas torich unser persewerans un te troost woo fon te Xrifte khomt, khente mer hofnung hon.” (Rom. 15:4)

14. Warom sole mer triwer noo tenke aan was Yeehoowa fer ti anere kemacht hot?

¹⁴ Tuu triwer noo tenke aan wii Yeehoowa sayn ferxpreche erfiilt hot. Kuk mool was Kot fer Apraham un Sara kemacht hot. Kot hat ferxproch tas se een khint kreechte, awer tii waare xon tsu alt. (Xee. 18:10) Wii hot Apraham sich too tefoer aan kextelt? Ti Piipel saat: “Eyer [hat] klaape tas eyer fater fon fiile natsyoone kepe teet.” (Rom. 4:18) Apraham wust net wii Kot sayn ferxpreche erfiile teet, awer tee waar sich sicher too tefun. Apraham sayn klaape hot sich peloont: tee un sayn fraa hon een khint kriit! (Rom. 4:19-21) Soo sorte kexichte lose uns sicher tas Yeehoowa sayn  ferxpreche imer erfiile tuut — soo kaar wën se unmeechlich fer uns aus siin.

15. Warom sole mer triwer noo tenke aan was Kot xon fer uns kemacht hot?

¹⁵ Tuu triwer noo tenke aan was Yeehoowa fer tich xon kemacht hot. Tenk aan te ferxpreche fon te Piipel woo sich xon in tayn leepe erfiilt hon. Tsum payxpiil: Yeesus hot ferxproch tas sayn Fater teet tich fersoriche was tuu in tayn leepe praychst. (Mat. 6:32, 33) Yeesus hot aach ti sicherheet kep tas Kot tuut tich hayliche kayst kepe wëns tuu es ferlangst. (Luk. 11:13) Yeehoowa erfiilt tiise ferxpreche. Tsiimlich sicher, khanst tuu in anere ferxpreche tenke woo eyer xon in tayn leepe erfiilt hot. Tsum payxpiil: tee ferxprecht tich fertsaye, treeste un tich kepe was neetich is fer ticht pay tëm plaype. (Mat. 6:14; 24:45; 2 Kor. 1:3) Wëns tuu triwer noo tenkst aan was Yeehoowa xon fer tich kemacht hot, ferxtërkst tuu tayn hofnung iwer was eyer fer tich im futuer mache tuut.

16. Warom is ti hofnung een kexenk woo fiil weyert hot?

¹⁶ Unser hofnung fon eewiche leepe is een weyertlich kexenk fon Kot. Meyer tuun een wunerlich futuer hërtslich waarte un mer sin uns sicher tas es khomt. Unser hofnung is wii een anker, woo uns fest halt; soo, khene mer proope, yachtung un soo kaar te toot aus hale. Unser hofnung is aach wii een ayse khap, woo unser ketanke xitst; soo, khene mer ap xtose was ferkheert is un mache was richtich is. Ti hofnung fon te Piipel tsaycht uns wii fiil Kot uns liipt un helft uns aach tichter pay tëm khome. Meyer kriin fiil nutse wën mer unser hofnung xtark hale!

17. Warom tuut unser hofnung uns fraye?

¹⁷ In sayn priif fer ti romaaner, hot Phaul kesaat: “Frayt aych in te hofnung.” (Rom. 12:12) Phaul khont sich fraye wayl eyer sich sicher waar tas, wën eyer troy plaype teet, kreecht eyer tas eewiche leepe im himel. Meyer khene uns aach in te hofnung fraye wayl mer uns sicher sin tas Kot sayn ferxpreche erfiilt. Es is soo wii te psalmist kexrip hot: ‘Froo is te mënx woo sayn hofnung uf Yeehoowa, sayn Kot, xtelt, tee woo imer troy is.’ (Psal. 146:5, 6)