1. Was is unser ‘kaystlich neetichkheet’, un was hot tas se tuun mit te frooheet?

 TI WOERE frooheet is net ploos een kuut xpiirung woo khomt un keet — tii khan torich tas kanse leepe fon een persoon hale. Wii? Yeesus hot tas aus keleet in te Përich Reet: “Froo sin tii woo sayn kaystliche neetichkheete erkhëne.” (Mat. 5:3) Yeesus wust tas ti mënxe kemacht kep sin mit een xtarke wunx fer sayn Kriatoer, Yeehoowa Kot, khëne un aan peete. Tas is unser ‘kaystlich neetichkheet’. Un wayl Yeehoowa te “frooe Kot” is, tii woo tëm aan peete khene aach froo sin. (1 Tim. 1:11)

2-3. (a) Tëm noo Yeesus, weer noch khan froo sin? (b) Was tuun mer in tiise artikel lërne un warom?

² Khene mer froo sin ploos wën unser leepe khee propleeme hot? Nee. In sayn reet, hot Yeesus was interesantes kesaat: “Tii woo prile” — es wil saan, tii woo sich xultich xpiire weeche sayn sinte orer weeche ti xweyere propleeme woo se hon — khene froo sin. Yeesus hot aach kesaat tas “tii woo keyacht sin weeche ti kerechtichkheet” orer woo ‘ferxtumpiirt’ wëre wayl se Yeesus noo keen, khene aach froo sin. (Mat. 5:4, 10, 11) Awer wii is es meechlich froo sin in soo sorte situatsyoone?

³ Yeesus hot uns in kelërnt tas unser frooheet khomt, net fon een perfekt leepe hon, awer fon unser kaystliche neetichkheete uf phase un uns ticht pay Kot xafe. (Tya. 4:8) Awer wii khene mer tas mache? In tiise artikel, tuun mer iwer 3 xrite xpreche woo tsu te woere frooheet nëme.

4. Was fer is te 1^te xrit woo mer kepe mise fer wërklich froo sin? (Psalm 1:1-3)

⁴ 1^TE XRIT: Fer wërklich froo sin, mise mer ti Piipel leese un xtutiire. (Lees Psalm 1:1-3.) * Yeesus hot Kot sayn Wort mim ese ferklaycht. Ti mënxe un ti tiere mise ese fer se leepe. Awer, ploos ti mënxe khene Kot sayn Wort leese un tii mise  tas mache. Tes weeche, hot Yeesus kesaat: “Te mënx sol net ploos fon proot leepe, awer fon yeete wort woo fon Yeehoowa sayn maul khomt.” (Mat. 4:4) Tes weeche, sole mer noch net mool een taach rom keen lose oone ti Piipel leese. Te psalmist hot kesaat: ‘Froo is te mënx woo sich frayt mit Yeehoowa sayn kesets, un woo tas taach un nacht leese tuut.’

5-6. (a) Was khan ti Piipel uns in lërne? (b) Wii khan ti Piipel leesung uns helfe?

⁵ Wayl Yeehoowa uns liipt, tuut eyer torich ti Piipel uns tsayche was mer mache mise fer een froo leepe hon. Meyer lërne, tsum payxpiil, was tas opjetiiw fon unser leepe is. Meyer lërne wii mer khene tichter pay Kot khome un was mer mache mise tas eyer unser sinte fertsayt. Meyer lërne aach iwer ti wunerlich hofnung woo eyer uns fer te futuer ferxprecht. (Yee. 29:11) Tiise woerheete woo mer lërne wën mer ti Piipel xtutiire, lose unser hërts aarich froo!

⁶ Wii mer xon wise, ti Piipel is aach fol nutsliche aanreete fer unser taach tsu taach. Tiise aanreete noo keen, pringt uns frooheet. Imer wën ti propleeme fom leepe tich iwerlaate, tuu mee tsayt hoole fer Yeehoowa sayn Wort leese un too triwer noo tenke. Yeesus hot kesaat: “Froo sin tii woo Kot sayn wort heere un tas in sayn leepe aan wëne.” (Luk. 11:28)

7. Was khan tich helfe ti kreest nutse kriin wëns tuu Kot sayn Wort leese tuust?

⁷  Wëns tuu Kot sayn Wort leese tuust, hool tsayt fer se “xmeke” was tuu leest. Wole mer een payxpiil mache, woo im xtant xon mit tich pasiirt is. Yemant hot tayn liipst ese in kericht. Awer im xtant, host tuu net kenuuch tsayt fer se ese orer machst tich ketanke mit was aneres; un tes weeche, tuust tuu tas xnel uner xlike, oone yeete haps se xmeke. Tan, wëns tuu fërtich pist, mërkst tuu tas tuu tsu fiks kes host, un tuu tenkst: ‘Ich hët mise lamsamer kes hon un yeete haps kexmekt hon…’ Soo was eenliches khan pasiire wën mer ti Piipel leese. Als mool, khene mer soo fiks leese tas mer net wërklich “xmeke” was mer am leese sin. Tes weeche, hool tich tsayt fer se “xmeke” was tuu in Kot sayn Wort leest. Xtel tich foer ti pletse, ti layt sayn xtim un tenk iwer was tuu leest. Tas tuut tich helfe frooer sin.

8. Wii tuut “te troye un ferninftiche sklaaw” sayn flicht uf phase? (Kuk aach ti noote.)

⁸ Yeesus hot “te troye un ferninftiche sklaaw” in kesetst fer kaystlich esmitel fersoriche in te richtich tsayt; un mer khene uns wërklich sat ese in kaystlich aat. * (Mat. 24:45) Ti Piipel is te haupste “inkretyënt” fon ales was te troye sklaaw fersoriche tuut. (1 The. 2:13) Tes weeche, was se in richte, helft uns Yeehoowa sayn ketanke, woo in te Piipel sin, peser ferxteen. Tas is te uersach warom mer Te Wachthorm, Wacht Uf! un aach ti artikele im site jw.org leese. Meyer tuun uns aach in richte fer al ti fersamlunge. Un yeete moonat, tuun mer te JW Broadcasting^® kuke, wën tas in unser xprooch kepe tuut. Wën mer wayter ti Piipel leese un xtutiire, sin mer fërtich fer te 2^te xrit kepe fer wërklich froo sin.

9. Was is te 2^te xrit woo uns helft wërklich froo sin?

⁹ 2^TE XRIT: Fer wërklich froo sin, mise mer aan heere was Yeehoowa saat richtich un ferkheert is. Te psalmist hot kexrip: “Froo is tee woo Yeehoowa tiif respektiirt, woo uf Sayne weeche keet.” (Psal. 128:1) Wën mer Yeehoowa tiif respektiire, tuun mer uns wech hale fon ales was eyer net kërn hot. (Xpr. 16:6) In te Piipel, lërne mer was Yeehoowa saat richtich un ferkheert is. Un mer xtrenge uns aan fer tas aan heere. (2 Kor. 7:1) Wën mer mache was Yeehoowa kefalt un uns wech hale fon was eyer hast, tuun mer froo sin. (Psal. 37:27; 97:10; Rom. 12:9)

10. Es is neetich se wise was Kot sayn wile is; awer, was noch mise mer mache? (Romaaner 12:2)

¹⁰ Lees Romaaner 12:2. * Im xtant wees yemant tas Yeehoowa tas recht hot fer se ëntxlise was richtich un ferkheert is, awer tee mus tas aach aan heere. Tsum payxpiil, im xtant yemant wees tas ti rechiirung tas recht hot fer se saan wii xnel khene mer uf een xtroos faare. Awer fiilaycht, wil eyer tiise krënse net aan heere. Un tes weeche, faart eyer xneler wii eyer thërft. Unser aanxtelung tuut tsayche ep mer wërklich klaape tas Yeehoowa sayn kesetse aan heere ti pest aat fer se leepe is. (Xpr. 12:28) Was Tawi iwer Yeehoowa kesaat hot, lost taytlich tas eyer soo ketenkt hot: “Tuu lost mich te weech fom leepe khëne. In tayn presëns kepts fiil frayt; ti frooheet is uf tayn rechts sayt fer imer.” (Psal. 16:11)

11-12. (a) Wën mer ëngstlich orer traurich sin, mit was mise mer uf phase? (b) Wii khene ti wërter fon Filiper 4:8 uns helfe een kuut ferkniichung raus suuche?

¹¹ Im xtant wën mer ëngstlich orer traurich  sin, wole mer etwas mache woo uns helft noo lose in unser propleeme tenke. Tas is tsum ferxteen; awer mer mise uf phase fer net etwas mache woo Yeehoowa hast. (Ëfe. 5:10-12, 15-17)

¹² In sayn priif fer ti Filiper, hot te aphostel Phaul ti priiter uf kemuut se tenke iwer was “kerecht is (...), was rayn is (...), was ti liip uf muut (...), [un] was kuut is”. (Lees Filiper 4:8.) * Too hiir, waar Phaul net am xpreche iwer ferkniichung. Awer was eyer kexrip hot, sol petrefe was mer raus suuche fer uns ferkniiche. Fersuuch te tekst een pisye anerste leese; tsum payxpiil: “Tuut imer tenke ep ayre musike rayn sin, ep ayre fiilme un piicher kuut sin, ep ayre videogames loop fertiine” un soo wayter. Tas se mache tuut tich helfe raus fine ep een ferkniichung Yeehoowa kefalt, orer net. Meyer wole Yeehoowa sayn hooche kesetse aan heere. (Psal. 119:1-3) Tan, mit een sauwer kewise, khene mer te neekste xrit kepe fer wërklich froo sin. (Aph. 23:1)

13. Was is te 3^te xrit woo uns helft wërklich froo sin? (Yoohan 4:23, 24)

¹³ 3^TE XRIT: Xtel Yeehoowa sayn aanpeetung im eyerste plats in tayn leepe. Wayl Yeehoowa uns kemacht hot, fertiint eyer unser aanpeetung. (Apo. 4:11; 14:6, 7) Tes weeche, tas haupste fer uns sol sin tëm aan peete in te aat woo tëm kefalt, es wil saan, “mit kayst un woerheet”. (Lees Yoohan 4:23, 24.) * Meyer wole hon tas Yeehoowa sayn kayst unser aanpeetung lënkt; un mer wole aach hon tas unser aanpeetung mit te woerheete fon te Piipel xtimt. Unser aanpeetung tsu Yeehoowa mus tas haupste sin, soo kaar wën mer in een lant woone woo unser aarwayt krënse hot orer ferpoot is. Kraat yets, mee wii 100 priiter un xwestere sin inkexpërt ploos wayl se Yeehoowa sayn Tsayer sin. * Noch soo, mache se wayter sayn pestes fer peete, xtutiire, un mit te anere fertseele iwer Kot un sayn Raych. Wën ti layt uns yachte un ferxëne, sin mer froo wayl Yeehoowa uns helft tas aus hale un wayl eyer uns peloone tuut. (Tya. 1:12; 1 Phe. 4:14)

14. Was is mit een yunge pruuter in Tatxikhstan pasiirt, un warom?

¹⁴ Etliche priiter un xwestere hon aarich xlime situatsyoone mit kemacht. Awer tii hon sayn frooheet kehal, wayl se ti 3 xrite kep hon woo mer kraat fertseelt hon. Kuk mool was mit Jovidon Bobojonov pasiirt is, wii eyer 19  yoore alt waar. Tee is fon Tatxikhstan, un hot net aan kenom im militeer tiine. Am 4^te oktooper fon 2019, hon se mit kropheet tëm fon sayn haus raus kehool un tëm torich phaar moonate inkexpërt pehal. Tii hon tëm pehantelt wii wën eyer een kriminoos weyer. Ti notisye in etliche lënter hon iwer tiise unkerechtichkheet kexproch. Es is kesaat kep tas eyer ferklopt kep is wii se fersuucht hon tëm tswinge een juramënt fer tas lant mache un tas militeer tsaych aan tuun. Tan, is eyer xultich aus kexproch kep un tsu een katee kexikt woer. Tsum xlus, hot te presitent fom lant tëm fertsayt un kexikt tëm pefraye. Torich tas ales, hot Jovidon sich froo un troy kehal. Wii hot eyer es hin  kriit? Tee hot imer sayn kaystliche neetichkheete erkhënt.

15. Wii hot Jovidon mee iwer Yeehoowa kelërnt wii eyer in te katee waar?

¹⁵ Wii eyer inkexpërt waar, hot Jovidon wayter iwer Yeehoowa kelërnt, aach wën eyer khee Piipel orer puplikatsyoone hat. Wii waar soo was meechlich? Etliche priiter un xwestere fom plats hon tëm ese keprung un tii hon te tekst fom taach aan ti sek fom merkaate kexrip. Soo, khont eyer ti Piipel leese un too triwer noo tenke yeete taach. Noo tas eyer pefrayt kep is, hot eyer tiise aanreet kep fer tii woo noch net xweyere propleeme mit kemacht hon: “Teyer mist ayre frayheet kuut penutse fer Kot sayn Wort un unser puplikatsyoone leese un soo, imer mee iwer Yeehoowa lërne.”

16. Aan was hot unser pruuter Jovidon sayn ketanke traan kehal?

¹⁶ Unser pruuter hot aan keheert was Yeehoowa saat richtich un ferkheert is. Tee hot net in ferkheerte winxe ketenkt un sich xlecht aan kextelt. Xtats tas, hot eyer sich aan Yeehoowa un was weyert fer Tëm hot traan kehal. Jovidon hot frayt kefun aan Yeehoowa sayn xeen kriatsyoon. Yeete moynt, is eyer uf kextii wii ti feechel am singe waare. Un oomts, hot eyer te moont un ti xtërne peopacht. Tee hot kesaat: “Tiise kexenke fon Yeehoowa hon mich  froo un ufkemuut kelos.” Wën mer petanklich sin fer ti fiisixe un kaystliche tinge woo Yeehoowa uns kept, wëre mer froo un tas khan uns helfe aus hale.

17. Wii phase ti wërter fon 1^te Pheeter 1:6, 7 fer yemant woo een eenlich situatsyoon wii Jovidon sayns mit macht?

¹⁷ Jovidon hot aach Yeehoowa sayn aanpeetung im eyerste plats kextelt. Tee wust wii wichtich es is troy tsum woere Kot plaype. Yeesus hot kesaat: “Tuu Yeehoowa, tayn Kot, aan peete un tuu ploos tëm tiine.” (Luk. 4:8) Ti militeer fiirer un soltaate wolte hon tas Jovidon noo lose teet Yeehoowa tiine. Awer xtats uf kepe, hot eyer yeete taach un nacht hërtslich kepeet. Tee hot Yeehoowa sayn hilef ferlangt fer wayter aus hale un troy plaype. Opwool Jovidon unkerecht pehantelt kep is, hot eyer nii uf kep. Tes weeche, khan eyer sich fraye, wayl yets, hot eyer etwas woo friier eyer net hat, foer ferklopt un in kexpërt wëre — een klaape woo keproopt kep is. (Lees 1^te Pheeter 1:6, 7.) *

18. Wii khene mer unser frooheet hale?

¹⁸ Yeehoowa wees was mer prayche fer wërklich froo sin. Wëns tuu tiise 3 xrite kepe tuust, khanst tuu tayn frooheet hale opwool ti xweyere situatsyoone. Un soo khanst tuu aach saan: “Froo is tas folek woo tëm sayn Kot Yeehoowa is!” (Psal. 144:15)