Torich 1923, hot ti Orkanisatsyoon etliche ënerunge kemacht woo ti Piipel Xtutënte keholef hon noch eenicher sin in sayn aanpeetung tsu Kot. Tas piichelche A Torre de Vigia hot aan kefang ausleyunge puplitsiire iwer te tekst woo ti Piipel Xtutënte yeete woch xtutiirt hon in te Fersamlung fon Kepeet un Loop tsu Kot. Ti Piipel Xtutënte hon aach aan kefang een kalënter aus truke. Tee hot ketsaycht was fer tekst weyer yeete woch in te fersamlung xtutiirt un een liit fer yeete taach, woo se khente in sayn perseenlich xtuutyum orer familye aanpeetung singe.

In te fersamlunge, khonte ti Piipel Xtutënte speryense fon te preetich aarwayt fertseele, saan warom se petanklich tsu Yeehoowa waare, een liit singe orer soo kaar een kepeet mache. Eva Barney, woo sich in 1923 ketaaft hot, wii se 15 yoore alt waar, hot sich erinert: “Wëns tuu etwas saan wolst, khenst tuu tich uf xtele un soo aan fange: ‘Ich wil te Hër tanke weeche tas kanse kuutes woo eyer mich kep hot.’” Etliche priiter hon aarich kërn kexproch. Ti xwester Eva hot noch kesaat: “Te pruuter Godwin hat soo fiile tinge fer te Hër tanke… Awer, wën sayn fraa kemërkt hot tas weer ti fersamlung kefiirt hot xon een pisye ëngstlich waar, hot se te pruuter Godwin sayn yake een pisye ketsoo; tan hot eyer noo kelos se xpreche un is sich setse kang.”

Een mool te moonat, hot yeete kemaynt een ekstra Fersamlung fon Kepeet un Loop tsu Kot kehal. Iwer tiise fersamlunge, hot A Torre de Vigia 1^te April fon 1923 kesaat: “Een heleft fon te fersamlung sol penutst wëre fer komentaare un speryense iwer ti preetich aarwayt fertseele un fer ti priiter uf muute. (…) Meyer tenke tas tiise ufmuutiche fersamlunge tuun ti priiter noch eenicher lose.”

Charles Martin, een puplikatoer fon Vancouver (Kanata) woo 19 yoore alt waar, hot fiile nutse fon tiise fersamlunge kriit. Tee hot xpeeter kesaat: “Tas eyerste mool woo ich kelërnt hon was se saan in te haus tsu haus preetich, waar in tiise fersamlung. Als mool hot yemant een speryens too triwer fertseelt. Tas hot mich itee kep iwer was se saan un wii unerxiitliche frooche antworte.”

Weeche etwas woo kenënt waar “preetich taache”, hon ti priiter sich ufkemuut kexpiirt fer  se preetiche un tas hot se noch eenicher kelos. A Torre de Vigia 1^te April fon 1923 hot pekhant kemacht: “Tas mer eenich in te preetich aarwayt xafe (…), hon meyer tiinstaach, 1^te maay fon 1923 raus kesuucht wii een preetich taach. Fon tiise taach aan, wërt te eyerste tiinstaach fon yeete moonat raus kesuucht wii een preetich taach. (…) Yeete eene in te kemaynt sol in tiise aarwayt helfe.”

Soo kaar ti yunge hon too traan kexaft. Hazel Burford, woo 16 yoore alt in tiise tsayt waar, hot sich erinert: “Te Boletim a hot payxpiile keprung fon kexpreeche fer ti preetich aarwayt woo mer khente ausm khop lërne. Ich un mayn wowo hon xtram kexaft in al tiise aktiwiteete.” Awer ti xwester Hazel hot opositsyoon mit kemacht fon yemant woo se net kewaart hot. Tii hot kesaat: “Een alte pruuter hot net kuut kefun tas ich mit te layt kexproch hon. In tiise tsayt, hate etliche noch net ferxtan tas al ti Piipel Xtutënte solte loop tsu unser kroose Kriatoer kepe — too tepay ‘yunge mëner un yunge fraae’.” (Psal. 148:12, 13) Ploos xpeeter hon tiise priiter sayn mënung keënert un ferxtan tas ti yunge solte aach in te preetich aarwayt xafe. Meecht ti xwester Hazel uf kep hon weeche ti opositsyoon? Nee. Tii hot xpeeter ti 2^te Klas fon te Xileat Xuul kemacht un hot wii misyoneerin in Panamaa ketiint.

Ti konkrëse hon aach ti priiter eenicher kelos. Fiil mool, ekstra preetich taache sin kepleent kep fer in te konkrëse pasiire. Tas waar kraat soo, tsum payxpiil, im konkrës in Winnipeg (Kanata). Al woo tsum konkrës khom sin, sin in kelaat kep in te xtat preetiche, am 31^te mërts. Fiile layt sin kontaktiirt kep un tas hot kuute resultaate keprung. Am 5^te akust, hon unkefeer 7.000 layt een aner konkrës in Winnipeg kekukt. In tëne tsayt, noch nii sin soo fiile layt tsu een konkrës in Kanata kang.

Eene fon te wichtichste konkrëse fon Yeehoowa sayn folek is pasiirt am 18^te pis 26^te akust, in Los Angeles, California. In te woche foer te konkrës, hon ti tsaytunge tas pekhant kemacht un ti Piipel Xtutënte hon mee wii 500.000 inlaatunge  aus keteelt. Tii hon aach banners kextelt in puuplixe faartsaych un in perseenliche khare.

Am samstaach, 25^te akust, hot te pruuter Rutherford ti reet “Ti xeef un ti kaprite” kehal. Tee hot ti xeef taytlich itentifitsiirt wii ti layt mit te richtich aanxtelung, woo teete in een Paratiis too uf te eyert leepe. Tee hot aach een reet kehal un een resolutsyoon kelees mim thitel “Teyer sayt aan kesaat kep”. Ti resolutsyoon hot ti feeler fon te kristenthum foer keprung un hot ti layt mit een eerliche hërts uf kemuut aus “Papiloon ti Kroos” khome. (Apo. 18:2, 4) Xpeeter, hon flaysiche Piipel Xtutënte uf te kans welt milyoone pleetche mit tiise resolutsyoon aus keteelt.

Am letste taach fom konkrës, hon mee wii 30.000 layt te pruuter Rutherford keheert ti reet hale mim theema “Al ti natsyoone marxiire tsum Armaxeton, awer milyoone woo hayt leepe tuun nii mool xtërpe”. Wayl ti Piipel Xtutënte xon wuste tas fiile layt khome teete, hon se een xtaatyum kemiit woo kraat kepaut waar: tas Los Angeles Coliseum. Tas al kuut horiche khonte, hon ti priiter te autyo sisteem fom xtaatyum penutst, een teknoloxii woo nay in te tsayt waar. Noch fiil anere layt hon tas prokram torich ratyo kehoricht.

In 1923, is een kroos ferkreesung pasiirt in Afrika, Europa, Intya un Siit Amërika. In Intya, hot te pruuter A. J. Joseph net ploos sayn familye — mit 6 khiner — uf kephast, awer tee hot aach keholef puplikatsyoone in hindi, tamil, telugu un urtu mache.

In Sierra Leone, hon ti priiter Alfred Joseph un Leonard Blackman een priif fer ti haupst sets — in Brooklyn, Nay York — kexrip fer hilef ferlange. Am 14^te april fon 1923, hon se een antwort kriit. Alfred saat: “In tiise samstaach oomt, hot yemant mich aan keruuft.” Een hart xtim hot kefroot: “Pist tuu woo een priif tsu te haupst sets kexrip host un mee preeticher ferlangt host?” “Ia” — hot Alfred keantwort. “Tii hon mich kexikt” — hot te aner pruuter kesaat. Ti xtim waar fon William R. Brown. In tiise taach, is eyer fon Karip khom mit sayn fraa, Antonia, un sayn 2 meet: Louise un Lucy. Klaych hon se al sich khëne kelërnt.

Alfred saat noch: “In te neekste moynt, waare ich un Leonard iwer ti Piipel am xpreche, wii mer yeete woch kemacht hon. Too, uf een mool, hon  mer een kroose man aan te teer kesiin. Es waar te pruuter Brown. Tee waar soo flaysich tas eyer wolt een puuplix reet te neekste taach hale.” In weenicher wii een moonat, hot te pruuter Brown al ti puplikatsyoone woo eyer keprung hat, aus keteelt. Klaych tëm noo, hot eyer 5.000 piicher kriit un net fiil tsayt xpeeter, waare se xon al. Awer te pruuter Brown is net pekhant kep wii eene man woo piicher ferkhaaft hot. Torich sayn lang leepe wii eene flaysiche tiiner fon Yeehoowa, hot eyer imer ti Piipel in sayn reete penutst. Tes weeche, is eyer pekhant kep wii Piipel Brown.

In Taytxlant, ti filyaal in Barmen is tsu kleen kep. Tes weeche hon ti priiter ëntxlist ti filyaal tsu een aner plats wanere. Ti priiter hon aach tsum wise kriit tas klaych, teet tas franseesix militeer ti xtat iwerfale. Ti priiter hon phaar kepaye in Magdeburg kefun woo perfekt aus kesiin hon fer sayn aptrukeray aarwayt. Am 19^te yuuni, waare ti priiter fërtich mit te aarwayt fer ti aptrukeray ekipamënte un anere tinge tsu te nay filyaal in Magdeburg nëme. Im neekste taach, wii ti haupst sets tsum wise kriit hot tas ti wanerung in Taytxlant fërtich waar, hon ti tsaytunge ketsaycht tas Frankraych hat Barmen xtat iwerfal. Ti priiter hon ti situatsyoon kesiin wii een pewaysung fon Yeehoowa sayn seechen un xitsung.

In Brasil, George Young, woo tsu fiile pletse kereest is fer ti kuute notisye preetiche, hot een nay filyaal uf kemacht un hot aan kefang A Torre de Vigia in portukeesix puplitsiire. In phaar moonate, hot eyer mee wii 7.000 piichelcher un pleetche aus keteelt. Sarah Ferguson is aarich froo kep wii te pruuter George sayn familye pesuucht hot. Tii waar xon A Torre de Vigia am leese fon 1899 aan, awer tii hat net een xans kriit fer sayn tetikatsyoon tsayche torich te taaf. Phaar moonate xpeeter, khonte ti xwester Ferguson un sayn 4 khiner tsum xlus tiise wichtich xrit kepe.

Am ën fom yoer, hot A Torre de Vigia 15^te Teetsemper fon 1923 aus keleet wii ti ënerunge in te fersamlunge, preetich aarwayt un konkrëse ti Piipel Xtutënte petrof hon: “Es is taytlich tas ti kemaynte (…) een xtarke klaape hon. (…) Wole mer uns in richte un wayter Kot flaysich un froo tiine im yoer woo klaych aan fangt.”

Tas yoer 1924 waar aach een hooche phunkt im kexicht fon te Piipel Xtutënte. Ti priiter fon Petël hon torich moonate kexaft in een xtik lant in Staten Island, ticht pay te haupst sets in Brooklyn. Ti paueray is fërtich kep am aanfang fon 1924. Tas hot ti priiter noch eenicher kelos un keholef ti kuute notisye aus prayte in een aat woo noch nii foer heyer kemacht waar!